NGANI JAKULIJIGANYA 5
NYIMBO NA. 108 Chinonyelo Chisyesyene cha Mlungu
Yindu Yambone Yatukusapata Ligongo lya Chinonyelo cha Yehofa
“Klistu Yesu ŵayiche pachilambo kuti ŵakulupusye ŵandu ŵakulemwa.”—1 TIM. 1:15.
CHAKULINGA CHA NGANIJI
Chitukambilane yindu yambone yatukusapata ligongo lya mbopesi ja jakutuwombola, soni yampaka tutende pakumyamichila Yehofa.
1. Ana mpaka tutende chichi kuti tumsangalasye Yehofa?
TUWANICHISYE kuti mundu jwakusamnonyela ampele chindu chakusalala soni chakusosekwa mnope. Ana mpaka apikane wuli naga mundujo apochele chinducho ni kuchisunga panepakwe ngachikamulichisya masengo? Nambotu mpaka asangalale mnope naga mundujo papochele chinducho akuchikamulichisya masengo soni akulosya kuyamichila. Ana tukulijiganya chichi pelepa? Yehofa jwapeleche mwanache jwakwe pakusaka kutuwombola. Kusala yisyene, Yehofa akusasangalalaga patukulosya kuyamichila chinonyelo chekulungwa chiŵatulosisye pakupeleka mwanache jwakwe kuŵa mbopesi jakutuwombola.—Yoh. 3:16; Alo. 5:7, 8.
2. Ana munganiji chitukambilane chichi?
2 Ndaŵi pajikumala, mpaka tutande kutenda yindu yakulosya kuti ngatukuyamichila mbopesi jakutuwombola. Yeleyitu mpaka yiŵe mpela tujigele mtuka wakusangalasya mnope waŵatupele Yehofa ni kuwusunga. Kuti tuŵambale yeleyi, ndaŵi syosope tukusosekwa tuganichisyeje yindu yambone yaŵatutendele Mlungu soni Klistu. Nganiji chijitukamuchisye kutenda yeleyi. Chitukambilane umbone wampaka tupate apano soni msogolo ligongo lya mbopesi jakutuwombolaji. Chitukambilanesoni yampaka tutende pakulosya kuyamichila chinonyelo cha Yehofa mnopemnope mu ndaŵi ja Chikumbuchilo jino.
ANA MBOPESI JAKUTUWOMBOLA JIKUSATUKAMUCHISYA CHAMTI ULI APANO?
3. Ana mbopesi jakutuwombola jikusatukamuchisya chamti uli apano?
3 Pana yindu yambone yatukusapata apano ligongo lya mbopesi jakutuwombola jiŵapeleche Klistu. Mwachisyasyo, mbopesiji jikusatendekasya kuti Yehofa atukululuchileje yakulemwa yetu. Yehofa akusagamba kusaka kutukululuchila, nambo nganiwuŵa udindo wakwe kutenda yeleyo. Jwamasalimo Daudi jwajimbile kuti, “Ŵalakwe AMBUJE ali ŵambone ni ŵakululuchila ŵandu ŵawo.”—Sal. 86:5; 103:3, 10-13.
4. Ana Yehofa jwapeleche mbopesi jakutuwombola kwa ŵani? (Luka 5:32; 1 Timoteyo 1:15)
4 Komboleka ŵane mwa m’weji mpaka tulipikaneje kuti Mlungu ngakuŵajilwa kutukululuchila. Yisyesyene yakwe yili yakuti pangali mundu juŵasosekwaga kumkululuchila. Mwamti ndumetume Paulo jwasasile kuti “nganimba jwakuŵajilwa kukolanjidwa kuti ndumetume.” Kaneko jwatite, “Nambo ligongo lya umbone mtima wekulungwa wa Mlungu ndili jwandumetume.” (1 Akoli. 15:9, 10) Naga tukugalawuka mtima yisyesyene, Yehofa akusatukululuchila. Jwalakwe akusatenda yeleyi ngaŵaga ligongo lyakuti tukusaŵajilwa kutukululuchila, nambo ligongo lyachinonyelo chakwe. Myoyo, naga akusaliwona kuti ali ŵangasosekwa, akumbuchileje kuti Yehofa jwapeleche mbopesi jakutuwombola ngaŵaga kwa ŵandu ŵangalemwa nambo kwa ŵandu ŵakulemwa ŵagalawiche mtima.—Aŵalanje Luka 5:32; 1 Timoteyo 1:15.
5. Ana tukusosekwa kuŵambala ganisya chichi? Alondesye.
5 Wosopewe tuŵambaleje ganisya kuti Yehofa akusosekwa kutukululuchila ligongo lyakuti tuŵele tuli mkumtumichila jwalakwe kwa yaka yejinji. Yisyene kuti Yehofa akusayamichila yosope yatuŵele tuli mkutenda pakumtumichila. (Aheb. 6:10) Nambope, Yehofa jwatupele Mwanache jwakwe mpela mtuka walulele, ngaŵaga mpela malipilo ga utumiki wetu. Myoyo, mpaka kuŵe kulemwa kuganisya kuti Yehofa akusosekwa kutukululuchila ligongo lyakuti tutesile yindu yejinji pakumtumichila. Ligongo naga tukuganisya myoyo, mpaka tulosye kuti ngatukusosechela mbopesi ja Yesu.—Awanichisye ni Agalatiya 2:21.
6. Ligongo chichi Paulo jwalipelekaga mnope pakumtumichila Yehofa?
6 Paulo jwamanyililaga kuti Yehofa nganasosekwaga kumkululuchila. Nambo ligongo chichi jwalakwe jwapitilisye kumtumichila Yehofa mwakulipeleka? Jwalakwe nganatenda yeleyi pakulosya kuti ali jwakuŵajilwa kumkululuchila, mmalomwakwe jwatesile yeleyi pakusaka kulosya kuyamichila umbone mtima soni chanasa chiŵamlosisye Yehofa. (Aef. 3:7) Mwakulandana ni Paulo, tukusapitilisya kumtumichila Yehofa mwakulipeleka ngaŵaga pakusaka kuti Yehofa atukululuchile, nambo pakulosya kuyamichila umbone mtima wajwatulosisye.
7. Ana ni umbone wine ŵapi watukusapata apano ligongo lya mbopesi jakutuwombola? (Aloma 5:1; Yakobo 2:23)
7 Umbone wine watukusapata apano ligongo lya mbopesi jakutuwombola uli wakuti mpaka tuŵe paunasi wambone mnope ni Yehofa. a Mpela mujaŵechetele ngani jipite jila, patwapagwaga nganituŵa paunasi wambone ni Mlungu. Nambo ligongo lya mbopesi jakutuwombola, mpaka tuŵe “pamtendele ni Mlungu” soni mpaka tuŵe paunasi wambone ni jwalakwe.—Aŵalanje Aloma 5:1; Yakobo 2:23.
8. Ligongo chichi tukusosekwa kumyamichila Yehofa ligongo lya upile wa lipopelo?
8 Aganichisye ya chindu chine chatukusapata ligongo lyakuŵa paunasi wambone ni Yehofa, chachili upile wakupopela. Kupwatika pa kupikana mapopelo gatukusapeleka pagulu ja ŵandu, Yehofa akusapikanasoni mapopelo gatukusapeleka kwajika. Patukupopela kwa Yehofa yikusatukamuchisya kuti tunandiye kulagasika nganisyo. Nambotu lipopelo mpaka litukamuchisyesoni m’litala line. Mpaka litukamuchisye kuŵa paunasi wakulimba ni Yehofa. (Sal. 65:2; Yak. 4:8; 1 Yoh. 5:14) Yesu ali pachilambopa, jwapopelaga ndaŵi ni katema. Jwatendaga yeleyi ligongo jwamanyililaga kuti Yehofa jwapikanilaga mapopelogo, mwamti gamkamuchisyaga kuti aŵe paunasi wakulimba ni Atati ŵakwe. (Luk. 5:16) Kusala yisyene, yili yakusangalasya kumanyilila kuti mbopesi ja Yesu jikusatukamuchisya kuŵa paunasi wambone ni Yehofa soni kuŵechetanaga ni jwalakwe kupitila mu lipopelo.
ANA MBOPESI JAKUTUWOMBOLA JICHITUKAMUCHISYA CHAMTI ULI KUSOGOLOKU?
9. Ana mbopesi jakutuwombola jichakamuchisya chamti uli kusogoloku ŵakutumichila ŵa Yehofa ŵakulupichika?
9 Ana mbopesi jakutuwombola jichakamuchisya ŵakutumichila ŵa Yehofa ŵakulupichika kupata yindu yambone yapi kusogoloku? Jemanjaji chachipochela umi wangamala. Ŵajinji akusaganisya kuti yeleyi nganiŵa yikomboleche ligongo lyakuti kwa yaka yejinji ŵandu aŵele ali mkuwa. Nambotu chakulinga cha Yehofa kwa ŵandu chaliji chakuti atameje ni umi mpaka kalakala. Yikaŵe kuti Adamu nganalemwa, pangali mundu jwakaganisyaga kuti kutama ni umi wangamala kugambile kuŵa kumbila yindu yambone. Atamose kuti apano yakutama ni umi wangamala mpaka yiwoneche kuŵa yangakomboleka, nambope mbopesi jaŵapeleche Yehofa kupitila mwa Mwanache jwakwe ni jajichitendekasya kuti yeleyi yikomboleche.—Alo. 8:32.
10. Ana ŵasagulwe soni ŵangondolo sine akwembecheya chichi?
10 Atamose kuti umi wangamala tuchipochela msogolo, Yehofa akusasaka kuti tuganichisyeje yeleyi apano. Ŵasagulwe akwembecheya kola umi wambone mnope kwinani pandaŵi jachachilamulilaga yalumo ni Klistu. (Chiw. 20:6) Pele ŵangondolo sine akwembecheya kupochela chilambo chapasi cha paladaiso mwamuchiŵa mwangali kupikana kupweteka kapena yakutesya chanasa. (Chiw. 21:3, 4) Ana wawojo ali jumo mwa ŵangondolo sine ŵakwembecheya kupochela umi wangamala pachilambo chapasi? Chembecheyo chelechitu nganichiŵa chakutuluka pakulandanya ni chembecheyo chakwawula kwinani. Mwamti ligongo lyakuti Yehofa ŵatupanganyisye kuti tutameje pachilambo chapasichi, kutama ni umi wangamala pachilambopa kuchiŵa kwakusangalasya mnope.
11-12. Ana ni yindu yine yapi yambone yatukwembecheya m’chilambo chasambano? (Alolesoni yiwulili.)
11 Aganichisye mwawuchiŵela umi pachilambopa mu Paladaiso. Ŵandu ngasadandawulaga ni yindu mpela yilwele kapena chiwa. (Yes. 25:8; 33:24) Mwamti Yehofa chachapa yindu yosope yambone yakusasaka paumi wawo. Ana ni yindu yapi yakusasaka ali alijiganyisye? Ana akusasaka ali alijiganyisye yakwamba yinyama kapena yijuni? Ana akusasaka ali alijiganyisye mwampaka akamulichisye masengo chakwimbila chinechakwe? Kapena akusasaka ali alijiganyisye kwambula yiwulili? Ngatukukayichila kuti m’chilambo chasambano tuchisosekwa ŵandu ŵakumanyilila kwambula mapulani ga nyumba, ŵakutaŵa, soni ŵakulima mbeju. Pachisosekwasoni ŵandu ŵakumanyilila kulinganya yejonasiche, kupanganya yindu yakamulichisya masengo, soni kulinganya malo kuti gawonecheje chenene. (Yes. 35:1; 65:21) Ligongo lyakuti tuchitama ni umi mpaka kalakala, tuchikola upile wakulijiganya umanyilisi uliwose watukusasaka.
12 Kusala yisyene, tuchisangalala mnope kwapochela ŵandu ŵachachijimuka ku chiwa. (Mase. 24:15) Aganichisyesoni mwachachisangalalila kulijiganya yejinji yakwamba Yehofa mwakuganichisya yindu yambone yiŵapanganyisye. (Sal. 104:24; Yes. 11:9) Kupunda pa yosopeyi, yichiŵatu yakusangalasya mnope kumtumichilaga Yehofa mwangalemwesya soni tuli tukwete chikumbumtima chambone. Ana wawojo mpaka akunde kwasa upile wakupochela yindu yamboneyi ligongo lya “yindu yangatamilisya yaulemwa”? (Aheb. 11:25) Mwangakayichila nganaŵa akundile yeleyi. Yindu yambone yatukwembecheya nganiyiŵa yilandene ni chilichose champaka tupate apano m’chilambomu. Akumbuchileje kuti, lisiku line ŵandu ngasakolasoni chembecheyo chakutama mu Paladaiso pachilambopa. Yichiŵa myoyo ligongo lyakuti yaŵajembecheyaga panganiji yichiŵa yili yikwanilichikwe. Mwamti yosopeyi yichikomboleka ligongo lyakuti Yehofa ŵatulosisye chinonyelo mwakupeleka Mwanache jwakwe kuŵa mbopesi.
Ana ni yindu yambone yapi yakwembecheya mwachidwi m’chilambo chasambano? (Alole Ndime 11-12)
YAMPAKA ATENDE PAKULOSYA KUYAMICHILA CHINONYELO CHA YEHOFA
13. Ana mpaka tulosye chamti uli kuyamichila chinonyelo chiŵatulosisye Yehofa? (2 Akolinto 6:1)
13 Ana mpaka tulosye chamti uli kuyamichila mbopesi jakutuwombola jaŵapeleche Yehofa? Mpaka tutende yeleyi mwakuŵika pandanda yindu yakwayana ni kumtumichila Yehofa. (Mat. 6:33) Pajatu Yesu jwawile “ni chakulinga chakuti ŵele ŵali ni umi akatamaga umi wakulisangalasya achimsyene, nambo atameje umi wakumsangalasya jwele juŵawilile ni kwimuka.” (2 Akoli. 5:15) Kusala yisyene, tukusosekwa kuŵambala kutenda yindu yampaka yitutendekasye kuti tukapindula ni umbone mtima wekulungwa waŵatulosisye Yehofa.—Aŵalanje 2 Akolinto 6:1.
14. Ana mpaka tulosye chamti uli kulupichika pangani jakupikanila yakusatusalila Yehofa?
14 Mpaka tulosyesoni kuyamichila chinonyelo chiŵatulosisye Yehofa patukupikanila mwakulupichika yakusatusalila jwalakwe. Ana mpaka tutende chamti uli yeleyi? Patukusaka kusagula yineyakwe mpela yakwamba majiganyo soni masengo, tukusasosekwa kuganichisya yampaka yimsangalasye Yehofa. (1 Akoli.10:31; 2 Akoli. 5:7) Patukusagula yindu mwakamulana ni nganisyo sya Yehofa, tukusatanda kumkulupilila mnope soni tukusaŵa paunasi wambone ni jwalakwe. Yeleyi yikusatukamuchisya kuti tukulupilileje mnope ya umi wangamala watukwembecheya msogolo.—Alo. 5:3-5; Yak. 2:21, 22.
15. Ana mpaka tulosye chamti uli kuyamichila pandaŵi ja Chikumbuchilo?
15 Panasoni litala line lyampaka tulosye kuyamichila chinonyelo chiŵatulosisye Yehofa. Litala lyakwe lili kukamulichisya masengo ndaŵi jachikumbuchiloji pakumlosya Yehofa kuti tukuyamichila mbopesi jakutuwombola. Konjechesya pakusimanikwa pa mwambo wa Chikumbuchilo, mpaka twaŵilanjile ŵane ku mwambowu. (1 Tim. 2:4) Akusosekwa kwalondechesya ŵandu ŵaŵaŵilasilewo yindu yachiyikatendekwe ku mwambowu. Mpaka atende yeleyi mwakwalosya fidiyo jamtwe wakuti Ligongo Chichi Yesu Ŵawile? soni jakuti Akumbuchileje Chiwa cha Yesu gagakusasimanikwa pa jw.org. Achakulungwa ŵa mumpingo akusosekwa kwaŵilanjila ŵandu ŵaŵalesile kusongana. Aganichisye chisangalalo champaka chipagwe kwinani soni pachilambopa naga ngondolo jimo ja Yehofa jesokonechele jiwujile kwasili sijakwe. (Luk. 15:4-7) Pandaŵi ja chikumbuchiloji, tukusosekwa kuliŵichila chakulinga chakwapa moni mnopemnope ŵachasambano soni ŵaŵalesile kusongana ni mpingo. Chakulinga chetu chiŵe kwatendekasya kulipikana kuti apocheledwe chenene.—Alo. 12:13.
16. Ligongo chichi tukusosekwa kulinganya yakutenda yejinji pandaŵi ja Chikumbuchilo?
16 Ana mpaka alinganye yakutenda yejinji pandaŵi ja Chikumbuchilochi? Naga tukutenda yeleyi, mpaka tulosye kuti tukuyamichila yaŵatutendele Mlungu soni Klistu. Patukulipeleka mnope pamasengo gakulalichila, ni patukusayiwona kuti Yehofa akutukamuchisya. Mwamti yeleyi yikusatukamuchisya kuti tumdalileje mnope. (1 Akoli. 3:9) Pandaŵi ja Chikumbuchiloji, akusosekwasoni kuŵalangaga Baibulo mwakamulana ni mwalembele mu kabuku ka Kulijiganya Malemba Lisiku Lililyose kapena yayili mu chati chachili mu Utumiki ni Umi Wetu Wachiklistu. Mpaka alinganyesoni yakulijiganya yejinji kutyochela pa malemba gaŵalasilego.
17. Ana ni chichi chachikusamsangalasya Yehofa? (Alolesoni libokosi lyakuti “ Yampaka Atende Pakulosya Kuyamichila Chinonyelo cha Yehofa.”)
17 Yili yisyene kuti ŵane nganaŵa akombwele kutenda yosope yatukambilene munganiji. Akumbuchileje kuti Yehofa jwangalandanyaga yindu yakukombola kutenda wawojo ni yakukombola kutenda ŵane. Mmalomwakwe, jwalakwe akusalola yayili mumtima mwawo. Yehofa akusasangalala mnope naga wawojo akutenda yindu yakulosya kuyamichila mbopesi jakutuwombola.—1 Sam. 16:7; Maliko 12:41-44.
18. Ligongo chichi tukusosekwa kumyamichila Yehofa soni Yesu Klistu?
18 Ligongo lya mbopesi jakutuwombola, Yehofa akusatukululuchila yakulemwa yetu, tukusaŵa paunasi wambone ni jwalakwe, soni tukwete chembecheyo cha umi wangamala. Myoyo, kwende ndaŵi syosope tulosyeje kuyamichila chinonyelo cha Yehofachi, chachamtendekasisye kututendela yindu yambone mnopeyi. (1 Yoh. 4:19) Tukusosekwasoni tulosyeje kumyamichila Yesu, juŵatulosisye chinonyelo mwakupeleka umi wakwe ligongo lya m’weji.—Yoh. 15:13.
NYIMBO NA. 154 Chinonyelo Changamala
a Yehofa ŵakululuchilaga ŵakutumichila ŵakwe ŵakala atamose Yesu mkanaŵe kupeleka mbopesi jakutuwombola. Yehofa jwatendaga yeleyi ligongo jwakwete chikulupi chakuti Mwanache jwakwe chachiŵa jwakulupichika mpaka chiwa chakwe. Myoyo kwa Yehofa yaliji mpela apeleche kala mbopesi jakwawombola ŵandu.—Alo. 3:25.
