1. Mwakamulana ni 3 Yohane 3, 4, ana ni chichi chachikusatutendekasya kuŵa ŵakusangalala?

AGAMBE ganisya mwaŵapikanile Yohane paŵapikene kuti ŵandu ŵaŵajiganyisye usyesyene akupitilisya kumtumichila Yehofa mwakulupichika. Jemanjaji ŵasimanaga ni yakusawusya yejinji, soni Yohane jwakamuchisye kuti akole chikulupi chakulimba. Kupwatika pelepa jwalakwe jwawonaga Aklistuŵa mpela ŵanache ŵakwe. Mpela Yohane, m’wejisoni tukusaŵa ŵakusangalala patukwawona ŵanache ŵetu kapena ŵandu ŵane ŵatwajiganyisye Baibulo ali mkulipeleka kuti amtumichileje Yehofa.—Aŵalanje 3 Yohane 3, 4.

2. Ana yikalata yaŵalembile Yohane yakwete chakulinga chamtuli?

² Komboleka kuti Yohane jwatamaga ku Efeso kapena chiŵandika msindawu mu 98 C.E. Jwalakwe komboleka kuti jwapite kweleku ali agambile kumkoposya kwene ku ukayidi pachilumba cha Patimosi. Yikulosya kuti pandaŵijo ni paŵalembile yikalata yitatu mwakusalilidwa ni Yehofa. Chakulinga chakulembela yikalatayi chaliji kwalimbikasya Aklistu ŵakuwona kuti apitilisye kwenda mu usyesyene.

3. Ana chitukambilane yiwusyo yapi?

³ Yohane ni juŵasigele ni umi ŵandumetume wosope ali awile. Jwalakwe yamkwayiye mnope paŵapikene kuti ŵandu ŵane akwiganya yindu yaunami mumpingo. * (1 Yoh. 2:18, 19, 26) Ŵandu ŵaŵajiganyaga yaunamiŵa ŵasalaga kuti akummanyilila Mlungu, nambo jemanjaji nganapikanilaga malamusi ga Yehofa. Munganiji chitulole yaŵasasile Yohane pakwakalamusya Aklistuŵa, soni chitukambilane yiwusyo yakuyichisyayi. Ana kwenda mu usyesyene kukusagopolela chichi? Ana tukusasimana ni yakusawusya yamtuli patukwenda mu usyesyene? Soni ana mpaka twakamuchisye chamtuli ŵane kuti apitilisye kwenda mu usyesyene?

4. Mwakamulana ni 1 Yohane 2:3-6, soni 2 Yohane 4, 6, ana tukusasosekwa kutenda chichi kuti tujendeje mu usyesyene?

⁴ Kuti tukombole kwenda mu usyesyene tukusosekwa kulijiganya Maloŵe ga Mlungu. Kupwatika pelepa tukusosekwasoni ‘kutendaga yagakusasala malamusi’ ga Yehofa. (Aŵalanje 1 Yohane 2:3-6; 2 Yohane 4, 6.) Yesu ali chisyasyo chambone mnope pangani ja kumpikanila Yehofa. Myoyo, kuti tukombole kumpikanila Yehofa tukusosekwa kumkuya Yesu mwakusamala.—Yoh. 8:29; 1 Pet. 2:21.

5. Ana tukusosekwa tukulupilileje yindu yapi?

⁵ Kuti tupitilisye kwenda mu usyesyene tukusosekwa kulupilila kuti Yehofa ali Mlungu jwakuwona, soni kuti yakusatusalila kupitila m’maloŵe gakwe yili yisyesyene. Tukusosekwa kulupililasoni kuti Yesu ali Mesiya. Masiku agano ŵandu ŵajinji akusakayichilaga yakuti Yesu jwasagulidwe kuŵa Mwenye jwa Uchimwene wa Mlungu. Yohane jwatukalamwisye kuti pachiŵa “ŵandu ŵajinji ŵawunami” ŵachachalambusya ŵandu ŵangakusakulupilila mnope usyesyene wakwamba Yehofa soni Yesu. (2 Yoh. 7-11) Yohane jwalembile kuti, “Ana jwaunamiju nduni? Ana ngaŵaga jwele jwakusaŵecheta kuti Yesu nganaŵa Mklistu jula?” (1 Yoh. 2:22) Kuti ŵane akatulambusya tukusosekwa kulijiganya Maloŵe ga Mlungu. Kutenda yeleyi kuchitukamuchisya kuti tummanyilile chenene Yehofa ni Yesu. (Yoh. 17:3) Soni tuchiŵa ŵakusimichisya kuti twapatile usyesyene.

6. Ana Aklistu ŵachinyamata akusasimana ni chakusawusya chamtuli?

⁶ Aklistu wosope ŵakuwona akusosekwa kusamala kuti akajigalikaga ni yijiganyo ya ŵandu. (1 Yoh. 2:26) Mnopemnope Aklistu ŵachinyamata akusosekwa kusamala mnope ni yeleyi. Mlongo jwine jwa yaka 25 jwasasile kuti, “Panaliji jwachinandipile, nalijiganyisye kusukulu kuti yaumi yatesile kuchenga kutyochela ku yindu yine, soni nalijiganyisye ya lunda lwa ŵandu, yeleyi yandendekasisye kuti ndande kayichila yanalijiganyisye m’Baibulo. Ndaŵi sine, yanalijiganyisye kusukuluyi nayikulupililaga. Nambo nayiweni kuti ngangusosekwa kumdalila Yehofa kuti angamuchisye mmalo mwagambaga kuyikulupilila kwamba kuyikulupilila yindu yanalijiganyisye kusukulu.” Mlongoju jwatandite kulijiganya buku jine (Life—How Did It Get Here? By Evolution or by Creation?). Mwamti pali pagambile kumala ma wiki gamnono jwalesile kuyikayichila  yaŵalijiganyisye m’Baibulo. Mlongoju jwatite, “Yanalijiganyisyeyi yangamuchisye kumanyilila kuti Baibulo jikusasala yisyesyene. Namanyililesoni kuti kamulichisya masengo yajikusasala Baibulo mpaka kungamuchisye kola umi wakusangalala soni wamtendele.”

7. Ana tukusosekwa kuŵambala kutenda chichi? Ligongo chichi tukusosekwa kuyiŵambala yeleyi?

⁷ Aklistu wosope, chinga ŵachinyamata kapena ŵachikulile ngakusosekwa kumtumichilaga Yehofa kwineku ali mkutenda yakusakala. Yohane jwasasile kuti yili yangakomboleka kwenda mu usyesyene kwineku uli mkutenda yakusakala. (1 Yoh. 1:6) Naga tukusaka kuti Yehofa asangalaleje ni m’weji tukusosekwa tukumbuchileje kuti Yehofa akusayiwona yosope yatukusatenda. Kusala yisyene, pangali ulemwa wampaka tutende nikuŵa wakusisika ligongo Yehofa akusalola chilichose.—Aheb. 4:13.

8. Ana tukusosekwa kuŵambala kutenda chichi?

⁸ Tukajigalilaga lunda lwa chilambochi pangani ja mwakusawuwonela ulemwa. Ndumetume Yohane jwalembile kuti, “Naga tukuŵecheta kuti nganitukola ulemwa, tukulilambusya, soni mwa uwe mwangali usyesyene.” (1 Yoh. 1:8) Mundaŵi ja Yohane ŵandu ŵakupanduka ŵaŵechetaga kuti mundu mpaka akomboleche kutendaga ulemwa ni kuŵape paunasi ni Mlungu. Masiku agano, ŵandu ŵane akwetesoni nganisyo syelesi. Ŵandu ŵajinji akusamkulupilila Mlungu nambo ngakusakamulana ni mwakusawuwonela Yehofa ulemwa mnopemnope pangani jagonana. Yindu yakusayiwona Yehofa kuŵa yakulemwa jemanjaji akusayiwona kuti uli ufulu wa mundu kusagula kutenda yeleyo.

9. Ana pakusaŵa yakuyichisya yambone yapi naga ŵachinyamata akukuya yajikusasala Baibulo?

⁹ Kwa Aklistu ŵachinyamata mpaka yiŵe yakusawusya kola nganisyo syambone pangani ja gona ni mundu jwanganalombana najo. Yeleyi mpaka yitendekwe mnopemnope naga achimjawo ŵakusukulu kapena kumasengo ŵangakusakuya yajikusasala Baibulo akwanyenjelela kuti achenje nganisyo syawo panganiji. Yeleyi ni yayamtendechele  m’bale jwine lina lyakwe Aleksandar. Jwalakwe jwatite, “Asikana ŵane kusukulu ŵanyenjelelaga kuti ngoneje nawo. Jemanjaji ŵasalaga kuti ligongo lyakuti nganingola uganja ni kuti nagonaga ni achalume achimjangu.” Naga asimene ni yindu mpela yeleyi, akumbuchileje kuti kukuya yajikusasala Baibulo mpaka kwakamuchisye wawojo kola chilu chambone, nganisyo syambone, soni mpaka aŵe paunasi wambone ni Yehofa. Pakombwele kumalana ni yakulingwa yichiŵa yangasawusya kuti atendeje yindu yayili yambone. Akusosekwa akumbuchileje kuti Satana ni jwakusiŵatendekasya ŵandu kuti akoleje nganisyo syakutenda chikululu. Myoyo pakukana kutenda yakusakalayi nikuti, ‘chachimpunda jwakusakala jula.’—1 Yoh. 2:14.

10. Ana lilemba lya 1 Yohane 1:9 mpaka litukamuchisye chamtuli kuti tumtumichileje Yehofa ni chikumbumtima chambone?

¹⁰ Tukusamanyilila kuti Yehofa ni jwakwete udindo wakutusalila yindu yayili yambone soni yakusakala. Soni tukusosekwa kuŵambala chilichose champaka chitutendekasye kulemwa. Nambo naga tuli tutesile ulemwa tukusosekwa kupopela kwa Yehofa ni kumsalila chakulemwacho. (Aŵalanje 1 Yohane 1:9.) Soni naga ulemwawo wuli wekulungwa tukusosekwa kwasalila achakulungwa ŵa mumpingo ŵele Yehofa ŵasagwile kuti atusamalileje. (Yak. 5:14-16) Nambope ngatukusosekwa kulijimbaga magambo ligongo lya yakulemwa yatwatesile kalakala. Tukuŵecheta yeleyi ligongo lyakuti Yehofa jwapeleche mwanache jwakwe mpela mbopesi jakutuwombola. Yeleyi yikusatendekasya kuti Yehofa atukululuchileje patulemwisye. Naga tukupitikuka mtima, Yehofa ali jwakoseka kutukululuchila yakulemwa yetu. Kutenda yeleyi mpaka kutukamuchisye kuti tumtumichileje Yehofa ni chikumbumtima chambone.—1 Yoh. 2:1, 2, 12; 3:19, 20.

11. Ana tukusosekwa kutenda chichi kuti tuŵambale yindu yaunami yampaka yijonanje chikulupi chetu?

¹¹ Tukusosekwa kuŵambala yindu yakusajiganya ŵandu ŵapanduche. Kutandila kalakala, Satana aŵele ali mkukamulichisya masengo  mabosa pakwatendekasya ŵakutumichila ŵa Mlungu kukayichila usyesyene. Myoyo tukusosekwa tumanyilileje kulekanganya yindu yakuwona ni yaunami. * Ŵandu ŵakusatusisya mpaka akamulichisye masengo malo gakunguluchila ga pa Intaneti pakuwandisya yindu yaunami ni chakulinga chakuti tuleche kumkulupilila Yehofa soni kwanonyela abale ŵetu. Myoyo ngatukusosekwa kulupilila yindu yaunamiyi ligongo yikusatyochela kwa Satana.—1 Yoh. 4:1, 6; Chiw. 12:9.

12. Ligongo chichi tukusosekwa kulimbisya chikulupi chetu pa yindu yatwalijiganyisye?

¹² Kuti Satana akatusokonasya, tukusosekwa kumkulupilila mnope Yesu soni kumanyilila chenene udindo wakwete pakwanilisya chakulinga cha Mlungu. Ngatukusosekwasoni kayichila litala lyakukamulichisya masengo Yehofa masiku agano pakutujiganya. (Mat. 24:45-47) Kuti tulimbisye chikulupi chetu tukusosekwa kulijiganya Maloŵe ga Mlungu ndaŵi syosope. Kutenda yeleyi kuchitukamuchisya kuti tukole chikulupi chakulimba mnope. Paulo ŵasasile yindu yakulandana ni yeleyi paŵalembaga chikalata chakwawula ku mpingo wa ku Kolose. Jwalakwe jwatite, “Pakuti mwajitichisye kuti Klistu Yesu ni Ambuje ŵenu, umi wenu wosope uŵe wakulumbikana ni jwalakwe. Mŵe ŵatitimiche michiga mwa jwalakwe nipo mpitilisye kulupilila.” (Akolo. 2:6, 7) Pangali chindu champaka atende Satana kapena ŵandu ŵali kumbali jakwe champaka chimsokonasye Mklistu jwakwete chikulupi chakulimba.—2 Yoh. 8, 9.

13. Ana tukusosekwa kumanyilila chichi? Ligongo chichi tukusosekwa kumanyilila yeleyi?

¹³ Tukusosekwa kumanyilila kuti ŵandu chapitilisyepe kutuŵenga. (1 Yoh. 3:13) Yohane jwasasile kuti “wosope ŵakwegamila ya pachilambo chosope chapasi ali m’myala mwa jwakusakala jula.” (1 Yoh. 5:19) Satana ali jwakutumbila mnope chilambochi pachikuŵandichila kumala. (Chiw. 12:12) Mwakalamuka, jwalakwe akukamulichisya masengo matala gakulekanganalekangana mpela chikululu soni yindu yaunami yakusajiganya ŵandu ŵapanduche. Kupwatika pelepa Satana akusiŵalagasyaga mwangasa ŵakutumichila ŵa Mlungu. Jwalakwe akusalingalinga kulekasya masengo getu gakulalichila soni kutendekasya chikulupi chetu kuti chifowoche. Jwalakwe akusatenda yeleyi ligongo akumanyilila kuti ndaŵi jimmalile. Myoyo ngatukusasimonga pakulekasya masengo getu gakulalichila m’yilambo yejinji. Atamose kuti yili myoyo, abale ni alongo ŵetu ŵakusatamaga m’yilambo yeleyi akusakombola kupilila. Soni kupilila kwa jemanjaji kukusalosya kuti ŵakutumichila ŵa Yehofa mpaka aŵepe ŵakulupichika atamose Satana ali ŵalagasisye chamtuli.

14. Ana mpaka twakamuchisye chamtuli abale ni alongo ŵetu kuti akaleka usyesyene?

¹⁴ Kuti twakamuchisye abale ni alongo ŵetu kuti akaleka usyesyene tukusosekwa kuŵa mundu jwakwaganichisya ŵane. (1 Yoh. 3:10, 11, 16-18) Tukagambaga kwanonyela abale ni alongo ŵetu yindu payikwenda chenene, mmalo mwakwe tukusosekwa kwanonyelagasoni pandaŵi jakusawusya. Mwachisyasyo, ana akummanyilila mundu jwalijose jwele ŵamkwakwe kapena jwachibale jwakwe jwajasiche soni akusosekwa kumlimbikasya kapena kumkamuchisya m’matala gane? Kapena pakwete papikene kuti abale ni alongo ŵane akulaga ligongo lya ngosi syachilengedwe mwamti akusosekwa kwataŵilasoni Nyumba sya Uchimwene kapena nyumba syawo? Mpaka tulosye kuti tukusiŵanonyela abale ni alongo ŵetu mwakwakamuchisya mmalo mwakwamba kuŵecheta ni maloŵepe.

15. Mwakamulana ni 1 Yohane 4:7, 8, ana tukusosekwa kutenda chichi?

¹⁵ Tukusamsyasya Mlungu jwetu jwachinonyelo mwakunonyelana jwine ni mjakwe. (Aŵalanje  1 Yohane 4:7, 8.) Litala lyambone lyakutendela yeleyi lili kwakululuchila ŵane patuleŵele. Mwachisyasyo, mundu jwine mpaka atuleŵele ni kutupepesya. Nambo mpaka tulosye kuti tukusamnonyela mundujo mwakumkululuchila soni kuliŵalila yatutendeleyo. (Akolo. 3:13) M’bale jwine lina lyakwe Aldo jwasimene ni yindu mpela yeleyi. Jwalakwe jwampikene m’bale jwine ali mkuŵecheta yakusakala yakwamba mtundu wakwe. M’baleju jwatite, “Napopesile kwa Yehofa kuti angamuchisye kuŵambala ganichisya yindu yakusakala yakwamba m’baleju.” Jwalakwe ŵamŵendile m’baleju kuti ajawule yimpepe kukulalichila. Jemanjaji ali mkulalichila, Aldo ŵamsalile m’bale jula yagatite kapweteche maloŵe gaŵaŵechete gala. Aldo ŵatite, “M’baleju jwapepesye paŵapikene muyambwetechelaga mumtima ligongo lya yaŵaŵecheteyo. Mwagapikanichilaga maloŵe gakwe yalosyaga kuti akudandawula mnope ni yaŵatesile. Twalekangene chenene mwamti paliji pali pangalisoni chakusawusya chilichose.”

16-17. Ana tukusosekwa kusimichisya kutenda chichi?

¹⁶ Ndumetume Yohane jwanonyelaga mnope abale ni alongo mwamti jwasakaga kuti jemanjaji akole chikulupi chakulimba. Yeleyi yikusawonechela mnope m’yikalata yakwe yitatu yaŵalembile. Kusala yisyene, yili yakulimbikasya mnope kumanyilila kuti achalume ni achakongwe ŵakusasagulidwa kuti akalamulile ni Yesu kwinani akusalosya chinonyelo mpela mwaŵatendelaga Yohane.—1 Yoh. 2:27.

¹⁷ Yatulijiganyisye munganiji yili yakusosekwa mnope soni tuyikamulichisyeje masengo. Kwende wosopewe tuŵeje ŵakusimichisya kwenda mu usyesyene yayikugopolela kuti tumpikanileje Yehofa pa yosope yatukusatendaga. Tulijiganyeje ni kugakulupilila Maloŵe ga Mlungu soni kumkulupilila Yesu. Ngatukusosekwa kumtumichila Yehofa kwineku tuli mkutenda yakusakala, soni tusamaleje ni ŵandu ŵakusajiganya yindu yaunami. Tutendeje yindu mwakamulana ni malamusi ga Yehofa. Twakamuchisyejesoni abale ni alongo kuti aŵe ŵamachili mwakwakukuluchila naga atuleŵele soni mwakwapa yindu yakusosechela. Patukutenda yeleyi, tuchipitilisyape kwenda mu usyesyene atamose tuli mkusimana ni yakusawusya.