Maumboni gakusalosya kuti Yesu jwaŵele jwamkulungwa jwa ŵakutaga mbopesi paŵagambile kubatisidwa mu 29 C.E. Ana tukumanyilila chamtuli yeleyi? Yesu paŵabatisidwe, jwalosisye kuti jwasakaga kupeleka umi wakwe mpela mbopesi pamalo gakupelechela mbopesi gakuwanichisya gagakusajimila ‘yakusasaka’ Mlungu. (Aga. 1:4; Aheb. 10:5-10) Ligongo lyakuti malo gakupelechela mbopesi galiji gakusosekwa mnope panyumba jakulambilila, myoyosoni nyumba jakulambilila jausimu jatandite kuwonechela pandaŵi jele Yesu jwabatisidwe. Nyumba jakulambilila jausimu ja Yehofa, jikusajimila yosope yatukusatenda pakumlambila jwalakwe m’litala lyakuŵajilwa kupitila mumbopesi jakutuwombola jaŵapeleche Yesu.—Mat. 3:16, 17; Aheb. 5:4-6.

Nyumba jakulambilila jausimu jasosekwaga kola jwamkulungwa jwa ŵakutaga mbopesi. Pakusaka kwanilisya yeleyi, Yesu jwasagulidwe ni ‘machili ga msimu weswela’ kuŵa jwamkulungwa jwa ŵakutaga mbopesi. (Mase. 10:37, 38; Mak. 1:9-11) Sano, ana mpaka tusimichisye chamtuli kuti Yesu jwasagulidwe kuŵa jwamkulungwa jwa ŵakutaga mbopesi mkanawe soni kwimuka? Mpaka tupate kwanga kwa chiwusyochi patukuganichisya ya chisyasyo cha Aloni soni ŵakutaga mbopesi ŵaŵakamulaga masengo pakukuya Chilamusi cha Mose.

Chilamusi cha Mose chasalaga kuti jwamkulungwa jwa ŵakutaga mbopesi ni juŵasosekwaga kwinjila ku Malo Geswela ga nyumba jakulambilila, soni kaneko ŵasosekwaga kwinjila ku Malo Geswela Mnope. Malo gaŵiliga ŵagalekanganyaga ni chinguwo chakuchinga. Jwamkulungwa jwa ŵakutaga mbopesi jwajinjilaga kamo pachaka ku Malo Geswela Mnopega pa Lisiku Lyakululuchila Ulemwa. (Aheb. 9:1-3, 6, 7) Aloni soni ŵandu ŵane ŵaŵaliji ŵakutaga mbopesi, ŵaŵele achakulungwa ŵambopesi mkanajinjile ku Malo Geswela Mnope. Myoyo, nombe najo Yesu jwaŵele jwamkulungwa jwa ŵakutaga mbopesi mkanawe, kaneko jwapitile pa chinguwo chakuchinga chachikwimila “chilu chakwe” ni kwawula kwinani. (Aheb. 10:20) Pa ligongo lyeleli ndumetume Paulo jwasasile kuti Yesu chachiyika mpela “jwamkulungwa jwa ŵakutaga mbopesi” soni kaneko ‘chachijinjila ku malo geswela ganganigataŵidwa ni ŵandu’ ni kwawula “kwinani.”—Aheb. 9:11, 24.

Pangali kulekangana pasikati pa ndaŵi jele chilangano chasambano chatamilikasidwe soni pa ndaŵi jichatandite kamula masengo. Ligongo chichi pangali kulekangana? Yesu ali apite kwinani ni kupeleka umi wakwe wangali ulemwa mmalo mwa m’weji, ndaŵi jeleji ni jiŵatamilikasisye chilangano chasambano. Pandaŵiji chilangano chasambanochi chatandite kukamula masengo. Yesu jwasosekwaga kutenda yindu yitatu kuti yeleyi yikomboleche.

Chandanda, Yesu jwawonechele kwa Yehofa. Chaŵili jwalakwe jwapeleche mbopesi jambone mnope kwa Yehofa jajaliji umi wakwe. Chatatu, Yehofa jwapochele mbopesi jakusosekwa mnope jaŵapeleche Yesu. Chilangano chasambanochi chaliji mkanichitande kukamula masengo atamose kuti yindu yitatuyi yaliji yili yitendekwe.

Baibulo jangasalaga ndaŵi jisyesyene jele Yehofa ŵapochele mbopesi ja Yesuji. Myoyo, nganituŵa tusasile ndaŵi jisyesyene jele chilangano chasambano chatamilikasidwe soni pachatandite kamula masengo. Nambope, Yesu jwapite kwinani pali pagambile kupita masiku 10 ndaŵi ja Pentekosite mkanijiŵe. (Mase. 1:3) Pandaŵi jinejakwe mkati mwa masiku 10 gelega, Yesu jwapeleche mbopesiji kwa Yehofa, soni Yehofajo ŵajipochele. (Aheb. 9:12) Umboni wakulosya kuti chilangano chasambano chatandite kukamula masengo wawonechele pa Pentekosite. (Mase. 2:1-4, 32, 33) Mwamti kutyochela palisikuli yaliji yachiwonechele kuti chilangano chasambano chatandite kukamula masengo.

Mwakata mpaka tujile kuti chilangano chasambano chatamilikasidwe soni kutanda kamula masengo pandaŵi jele Yehofa ŵapochele mbopesi jaŵapeleche Yesu. Soni pandaŵiji Yesu ŵatandite kutumichila mpela jwamkulungwa jwa ŵakutaga mbopesi soni jwakamulanya mu chilanganochi.—Aheb. 7:25; 8:1-3, 6; 9:13-15.