1. Ana ni yindu yapi yaŵalijiganyisye paŵatandite kulijiganya Baibulo?

 ANA akukumbuchila yindu yejinji yaŵalijiganyisye pandaŵi jiŵatandite kulijiganya Baibulo? Komboleka kuti ŵasimonjile paŵamanyilile kuti Mlungu akwete lina. Nambosoni mwangakayichila ŵasangalele mnope paŵamanyilile kuti Mlungu ngakusiŵalagasya ŵandu ku moto. Ŵasangalelesoni paŵamanyilile kuti chachawona ŵakunonyelwa ŵawo ŵaŵawile soni kutama nawo yalumo mchilambo chasambano.

2. Konjechesya pa kulijiganya kwawo yisyesyene ya m’Baibulo, ana ni yindu yine yapi yatesile? (Aefeso 5:1, 2)

² Paŵalipelekaga mnope pakulijiganya Maloŵe ga Mlungu ni pachakulagasoni mnope chinonyelo chawo pa Yehofa. Chinonyelochi ni chichatendekasisye kuti akamulichisyeje masengo yaŵalijiganyagayo. Mfundo sya m’Baibulo syakamuchisye kuti asaguleje yindu mwalunda. Ŵajongolele kaganisye soni ndamo syawo ni chakulinga chakuti amsangalasyeje Mlungu. Mpela mwakusatendela mwanache pakumsyasya nangolo jwachinonyelo, ni yatesilesoni wawojo pakwasyasya Atati ŵawo ŵakwinani.—Aŵalanje Aefeso 5:1, 2.

3. Ana tukusosekwa kuliwusya yiwusyo yapi?

³ Komboleka mpaka tuliwusyeje kuti, ‘Ana ngumnonyela mnope Yehofa mpela munatendelaga pandanda? Kutandila panabatisidwe, ana kaganisye soni katende kangu ka yindu pangani ja kwanonyela abale ni alongo kakusalandana ni mwakusatendela Yehofa?’ Naga ‘chinonyelo chiŵakwete pandanda’ chitandite kunandipa akadandawula. Yakulandanayi yatendechelesoni Aklistu ŵa m’yaka 100 yandanda. Nambope Yesu nganiŵaleka jemanjaji soni nganaŵa atulesile m’weji. (Chiw. 2:4, 7) Jwalakwe akusamanyilila  kuti mpaka tukombole kolasoni chinonyelo chitwakwete pandanda.

4. Ana chitukambilane yamtuli munganiji?

⁴ Munganiji chitukambilane yampaka tutende kuti tumnonyeleje mnope Yehofa soni ŵane. Chitulolesoni yindu yambone yampaka yipagwe patukumnonyela mnope Yehofa soni abale ni alongo ŵetu.

5-6. Ana ni yakusawusya yapi yajwasimanaga nayo ndumetume Paulo pajwatendaga utumiki wakwe? Ana chichi chachamkamuchisye kuti apitilisye kumtumichila Yehofa?

⁵ Ndumetume Paulo jwasangalalaga pajwamtumichilaga Yehofa, nambope jwasimanagasoni ni yakusawusya yine. Ndaŵi syejinji jwalakwe jwajendaga ndando syelewu mnope, soni pandaŵijo kajende kaliji kakusawusya. Pamaulendo gakwe, ndaŵi sine jwasimanaga ni “yakogoya mu sulo,” soni “yakogoya ya ŵachiswamba.” Nambosoni pane jwalakwe jwatendeledwaga yindu yachipongwe ni ŵandu ŵakusisya. (2 Akoli. 11:23-27) Yikuwonekasoni kuti ndaŵi sine Aklistu achimjakwe nganalosyaga kuyamichila yindu yajwatendaga Paulo pakwakamuchisya.—2 Akoli. 10:10; Afil. 4:15.

⁶ Ana chichi chachamkamuchisye Paulo kupitilisya kumtumichila Yehofa? Paulo jwalijiganyisye yandamo syakwete Yehofa kutyochela m’Malemba soni ku yindu yajwasimanaga nayo. Jwalakwe jwakulupililaga kuti Yehofa akusamnonyela mnope. (Alo. 8:38, 39; Aef. 2:4, 5) Mwamti nombenajosoni jwamnonyelaga mnope Yehofa. Paulo jwalosisye kuti jwamnonyelaga Yehofa ‘mwakwatumichila ŵaswelawo soni kupitilisya kwatumichila’ jemanjajo.—Aheb. 6:10.

7. Ana ni litala limo lyapi lyampaka litukamuchisye kuti tumnonyeleje mnope Yehofa?

⁷ Mpaka tumnonyeleje mnope Yehofa patukulijiganya Maloŵe ga Mlungu ndaŵi syosope. Pakuŵalanga Baibulo, alinjeje kulola yajikwasalila nganijo pakwamba ya Yehofa. Aliwusyeje kuti, ‘Ana nganiji jikulosya chamtuli kuti Yehofa akusanonyela? Ana ni yindu yapi munganiji yayikundendekasya kuti namnonyeleje Yehofa?’

8. Ana lipopelo mpaka litukamuchisye chamtuli kuti tumnonyeleje mnope Yehofa?

⁸ Litala line lyampaka litukamuchisye kuti tumnonyeleje mnope Yehofa lili kupopela kwa jwalakwe ndaŵi syosope. (Sal. 25:4, 5) Mwamti jwalakwe akusajanga mapopelo getu. (1 Yoh. 3:21, 22) Mlongo jwine jwa ku Asia jwatite, “Pandanda namnonyelaga Yehofa ligongo lyakuti ni yanalijiganyaga. Nambo chinonyelo changu chakusile panayiweni yajwatiga Yehofa pakwanga mapopelo gangu. Yeleyi yandendekasisye kuti ndaŵi syosope ndendeje yindu yakumsangalasya jwalakwe.”

9. Ana Timoteo jwatendaga yamtuli kuti ŵanonyeleje mnope abale ni alongo?

⁹ Pali pamasile yaka yejinji Paulo ali aŵele Mklistu, jwalakwe jwasimene ni mnyamata jwambone lina lyakwe Timoteo. Mnyamataju jwamnonyelaga Yehofa soni ŵandu. Paulo jwayikene pakwasalila Aklistu ŵa ku Filipi kuti, “Nganingolasoni jwine jwamtima mpela wa [Timoteo], jwampaka amsamalile yisyesyene pa yakusosechela yenu.” (Afil. 2:20) Apatu nganamyamichilaga Timoteo ligongo lya lunda lwakwe pakulongolela yineyakwe kapena kuŵecheta chenene pagulu, nambo Paulo jwasangalalaga ni yajwatiga Timoteo pakwanonyela abale ni alongo. Ngatukukayichila kuti mipingo jiŵajijendelaga Timoteo jasangalalaga mnope pajipikene kuti jwalakwe akwika.—1 Akoli. 4:17.

10. Ana Mlongo Anna ni ŵamkwakwe ŵalosisye chamtuli kuti ŵanonyelaga mnope abale ni alongo?

¹⁰ M’wejisoni tupateje matala gakwakamuchisya Aklistu achimjetu. (Aheb. 13:16) Aganichisye yaŵatesile Mlongo Anna jwatwamkolasile mungani jajipite jila. Kuli kugwile wula ja mbungo, jwalakwe ni ŵamkwakwe ŵapite ku nyumba jine ja Aklistu achimjawo kuŵasimene kuti nyumba  ja liŵasalyo jijonasiche. Yeleyi yatendekasisye kuti yakuwala yosope ya liŵasalyo yinyalaye ni matope. Mlongo Anna jwatite, “Twajigele yakuwalayo ni kuja kuyichapa, kuyisita soni kuyipinda chenene ni kuja kwapa. Atamose kuti yatwatesileyi twayiweni kuti yaliji yamnono, nambope yakamuchisye kuti tunonyelaneje mnope ni liŵasali.” Ligongo lyakuti Anna ni ŵamkwakwe ŵanonyelaga mnope abale ni alongo, yatendekasisye kuti ŵakamuchisyeje ŵane.—1 Yoh. 3:17, 18.

11. (a) Ana ŵandu ŵane akusapikana uli patukulosya kuti tukusitwanonyela? (b) Mwakamulana ni Misyungu 19:17, ana Yehofa akusiŵatendelaga chichi ŵandu ŵakusiŵanonyela ŵane?

¹¹ Patukwanonyela ŵane soni kwatendela yambone, jemanjajo akusayiwona kuti tukulingalinga kumsyasya Yehofa. Mwamti jemanjaji mpaka ayamichile yatwatendeleyo kupunda mwampaka tuganichisye. Mlongo jwa ku Asia jwatumkolasile kundanda jula jwangaliŵalilaga ata panandi ŵandu ŵaŵamkamuchisye. Jwalakwe jwatite, “Ngusinayamichilaga mnope alongo ŵakunonyelwa ŵaŵanjigalaga mu utumiki. Jemanjaji ŵayikaga kukunjigala, kumbilanjila yakulya soni kuja kukundeka kunyumba. Apano manyilile kuti alongoŵa ŵasosekwaga kulipeleka mnope kuti akombole kutenda yeleyi. Mwamti ŵatendaga yeleyi ligongo lyakunonyela.” Yisyene kuti ngaŵa ŵandu wosope ŵampaka atuyamichile pa yindu yambone yatwatendele. Pakwamba ya ŵandu ŵaŵamkamuchisye mlongoju, jwalakwe jwatite, “Ngusasaka ndili nawuchisye yindu yambone jemanjaji nambo ngangumanyilila kwakutama apano wosopeŵa. Nambope Yehofa akumanyilila kwali jemanjaji, mwamti ngusamŵenda kuti jwawuchisye yindu yambone yaŵandendele une.” Mlongoju akusala yisyene. Yehofa akusamanyilila yindu yambone yatwatendele ŵane atamose yili yamwanamwana. Jwalakwe akusayiwona yindu yeleyo mpela mbopesi soni ngongole jakusasosekwa kuti atuwuchisye.—Aŵalanje Misyungu 19:17.

12. Ana abale mpaka alosye chamtuli kwanonyela Aklistu achimjawo? (Alole chiwulili.)

 ¹² Naga wawojo ali m’bale, ana mpaka atende yamtuli kuti ŵanonyeleje soni kwakamuchisya ŵane? Jwachinyamata jwine lina lyakwe Jordan jwamŵendile jwamkulungwa jwa mumpingo kuti amsalile yampaka atende kuti akamuchisyeje nawo mumpingo. Jwamkulungwajo jwamyamichile jwachinyamatajo pa yindu yajwatendaga chenene. Kaneko jwampele malangiso gakumkamuchisya kuti akombole kutenda yejinji. Mwachisyasyo, ŵamsalile kuti ayicheje mwachitema ku Nyumba ja Uchimwene kuti apateje ndaŵi jakwakomasya ŵane. Ŵamsalilesoni kuti ajigaleje nawo mbali pamisongano, alalichileje ni kagulu kakwe ndaŵi syosope, nambosoni ŵamsalile kuti aloleje matala gane gakwakamuchisya ŵane. M’bale Jordan pajwakamulichisye masengo malangisoga, jwalijiganyisye mwampaka akamulile masengo gane soni yampaka atende pakwanonyela Aklistu achimjakwe. Jwachinyamataju jwalijiganyisye kuti m’bale jwangatanda kwakamuchisya ŵane paŵele jwakutumichila jwakamuchisya, nambo yikusaŵa kuti akupitilisya kwakamuchisya jemanjajo.—1 Tim. 3:8-10, 13.

13. Ana chinonyelo chamkamuchisye chamtuli M’bale Christian kuti aŵajilwesoni kuŵa jwamkulungwa jwa mumpingo?

¹³ Nambi uli naga pakwete paŵatumichile mpela jwakutumichila jwakamuchisya kapena jwamkulungwa jwa mumpingo? Yehofa akusakumbuchila yindu yosope yaŵatendaga pakumtumichila soni pakumnonyela jwalakwe. (1 Akoli. 15:58) Akusalolasoni chinonyelo chakupitilisya kulosya apano. M’bale Christian jwadandawile mnope paŵamtyosisye paudindo wakwe mpela jwamkulungwa jwa mumpingo. Nambope jwalakwe jwatite, “Naganisisye yakuti chimbitilisye kumtumichila Yehofa ligongo lyakumnonyela atamose pangwete kapena panganingola udindo uliwose.” Pali papitile ndaŵi, m’baleju jwaŵichidwesoni kuŵa jwamkulungwa jwa  mumpingo. Jwalakwe jwatite, “Natendaga woga panandi kuti ndandilesoni kutumichila pa udindowu. Nambo naganisisye kuti naga Yehofa ligongo lya chanasa chakwe angundile kuti ndumichilesoni pa udindowu, ngusosekwa kwitichisya kutumichila ligongo lyakumnonyela jwalakwe soni abale ni alongo.”

14. Ana yajwasasile mlongo jwine jwa ku Georgia yikwajiganya chichi?

¹⁴ Ŵakutumichila ŵa Yehofa akusiŵanonyelasoni ŵandu ŵane. (Mat. 22:37-39) Mwachisyasyo, Mlongo Elena jwakusatama ku Georgia jwatite, “Pandanda, nalalichilaga ligongo lyakumnonyela Yehofa. Nambo chinonyelo changu pa Yehofa pachakulaga ni panatanditesoni kwanonyela mnope ŵandu. Naganichisyaga yakusawusya yakusimana nayo jemanjajo soni ngani syampaka syalimbikasye. Panaganichisyaga ya jemanjaji, ni panasakagasoni mnope kwakamuchisya.”—Alo. 10:13-15.

15-16. Mpela mwakuyiwonela pa chiwulilicho, ana ni yindu yambone yapi yayikusapagwa ligongo lyakwanonyela ŵane?

¹⁵ Patukwanonyela abale ni alongo ŵetu, yikusiyakamuchisyaga ŵandu ŵajinji. Mlili wa COVID-19 uli utandite, M’bale Paolo ni ŵamkwakwe ŵakamuchisye alongo ŵachikulile kulalichila pakamulichisya masengo yipangiso yamakono. Mlongo jwine jwele pandanda yamsawusyaga kutenda yeleyi jwalijiganyisye mwamti jwakombwele. Jwalakwe jwakombwele kwaŵilanjila achalongo achimjakwe ku mwambo wa Chikumbuchilo. Mwamti ŵandu 60 ŵakombwele kutenda nawo mwambowo kupitila pa fidiyokofelesi.  Mlongoju pampepe ni ŵachinasi ŵakwe wosopewo ŵapindwile mnope ligongo lya kulipeleka kwa M’bale Paolo ni ŵamkwakwe. Kaneko, mlongoju ŵamlembele chikalata M’bale Paolo. Jwalakwe jwatite, “Sikomo kwejinji ligongo lyakutujiganya ŵachikulilewe. Ngasindiŵalila yakusati Yehofa pakutuganichisya m’weji soni kulipeleka kwawo pakutukamuchisya.”

¹⁶ Yakutendekwa mpela yeleyi yamjiganyisye M’bale Paolo lijiganyo lyakusosekwa mnope. Jwalakwe jwalijiganyisye kuti chinonyelo chili chakusosekwa mnope kupunda lunda soni kumanyilila kwetu yindu yineyakwe. M’baleju jwatite, “Mbele ndili mkutumichila mpela jwakulolela dela. Apano ngumanyilila kuti abale ni alongo ŵajinji komboleka kuti ŵaliŵalile ngani syanaŵechetaga, nambope nganaŵa aliŵalile yanatiga pakwakamuchisya jemanjajo.”

17. Ana ni ŵandu ŵane ŵapi ŵakusapindulaga patukulosya chinonyelo?

¹⁷ Patukwakamuchisya ŵane yikusatukamuchisyasoni m’weji m’matala gejinji. M’bale Jonathan jwakusatama ku New Zealand yamtendechele yeleyi. Lyakuŵeluka line musi kuli mkutenda mnope chitukuta, jwalakwe jwam’weni mpayiniya jwine ali mkulalichila mumsewu. Kaneko M’bale Jonathan jwalinganyisye yakuti alalichileje ni mpayiniyajo Lyakuŵeluka musi. M’baleju nganamanyililaga kuti yajwatesileyi chiyimkamuchisye msyenejo. Jwalakwe jwatite, “Pandaŵiji nganinonyelaga kulalichila. Nambo panatandite kupikanila yaŵatiga pakwiganya mpayiniyajo soni yakuyichisya yambone yayapali ligongo lya utumiki wakwe, yandendekasisye kuti ndande kunonyela kulalichila. Mpayiniyaju jwaŵelesoni mjangu juŵangamuchisyaga kuti sangalaleje mnope ni masengo gakulalichila soni kuti mbe paunasi wambone ni Yehofa.”

18. Ana Yehofa akusasaka kuti tutendeje chichi?

¹⁸ Yehofa akusasaka kuti tumnonyeleje jwalakwejo soni ŵandu ŵane. Mpela mwatulijiganyichisye munganiji, mpaka tukusye chinonyelo chetu pa Yehofa mwakuŵalanga soni kuganichisya Maloŵe gakwe nambosoni mwakupopela kwa jwalakwe ndaŵi syosope. Mpaka tukusyesoni chinonyelo chetu pa abale ni alongo ŵetu mwakwakamuchisya mmatala gakulekanganalekangana. Chinonyelo chetu pachikukula tuchiŵa paunasi wambone ni Yehofa soni abale ni alongo ŵetu. Mwamti tuchisangalala ni unasi welewo mpaka kalakala.