Baba ŵangu ŵaliji jwamkulungwa jwampingo mu chalichi cha United Church of Canada. Wiki jilijose babaŵa ŵatusalilaga une ni chemwali ŵangu kuti tujawuleje ku Sande sukulu kaneko pajikwanile 11 koloko baba ŵatujigalaga kuja kupopela. Musi mama ŵatujigalaga ku Nyumba ja Uchimwene. Mwamti yaliji yangasawusya kulola kulekangana kwa dini siŵilisi.

Mama ŵalisalile yaŵalijiganyagayi liŵasa lya Hutcheson lyaŵakungulukaga nalyo. Mwamti jemanjaji ŵaŵelesoni ŵa Mboni sya Yehofa. Mu 1958 liŵasali lyanjigele uneji yimpepe ni ŵanache ŵawo ŵatatu ŵachalume ku Msongano wa Yilambo wa masiku 8 wawatendechele ku New York City. Msonganowu wakwete mtwe wawasalaga ya chakulinga cha Mlungu. Pangukumbuchila ya munyuma, nguyiwona kuti liŵasali lyalipeleche mnope kuti linjigale une ku msonganoku. Mwamti msongano welewu chili chindu chimo chakusangalasya mnope changusachikumbuchila paumi wangu.

Panaliji kamnyamata, twatamaga ku fama mwamti nasangalalaga mnope ni masengo gakuyisamalila yinyama. Naganisyaga yakuti chindende majiganyo gakusamalila yinyama. Kaneko, mama ŵamsalile yeleyi jwamkulungwa jwa mumpingo mwetu. Jwamkulungwaju jwangumbwisye kuti tukutama ‘m’masiku gakumalisya.’ Kaneko jwambusisye yampaka yijile pakukwaya unasi wangu ni Yehofa naga ngwawula kukulijiganya ku yunifesite. (2 Tim. 3:1) Yeleyi, yandendekasisye kuti njenje nganisyo syangu syakwawula ku yunifesite.

 Nambo naganichisyagape yachinjitenda panyuma pakumalisya sukulu. Atamose kuti wiki jilijose nalalichilaga nawo, nambo nganisangalalaga ni ulaliki, mwamti nganinganisyaga yakutenda upayiniya. Kaneko, baba ni apwawo ŵalimbikasisye kuti ngakamuleje masengo ku kampani jine jekulungwa jakulola ya misongo jajaliji ku Toronto. Wosopeŵa nganamtumichilaga Yehofa. Apwawo babawo ŵakwete udindo wekulungwa ku kampanijo, yeleyi yandendekasiye kuti ngunde kuja kukamula masengo pakampanijo.

Panaliji ku Toronto, namalilaga ndaŵi jangu ndili mkukamula masengo ni ŵandu ŵele nganamtumichilaga Yehofa. Yeleyi yandendekasisye kuti ngasimanikwaga pamisongano ja mpingo soni kuti ngalalichilaga ndaŵi syosope. Pandanda natamaga ni anganga ŵalume ŵelesoni nganamtumichilaga Yehofa. Nambo ali ajasiche, nasosekwaga kupata malo gane gakutama.

Liŵasa lya Hutcheson lyalyanjigele ku msongano wa mu 1958 lila, lyaliji mpela achinangolo ŵangu. Mwamti ŵambilasile kuti ngatameje kunyumba jawo kuŵangamuchisye kuti namnonyeleje mnope Yehofa. Kaneko mu 1960, nabatisidwe pampepe ni mwanache jwawo jwamlume lina lyakwe John. Kaneko, John jwatandite upayiniya, yayandendekasisye kuti ndande kuganonyela mnope masengo gakulalichila. Abale ŵa mumpingo watwasonganaga ŵayiweni yanatiga pakulimbichila, mwamti ŵambisile kuti mbe jwakulolela Sukulu ja Undumetume wa Mlungu. a

Mu 1966, nalombele Randi Berge. Mlongoju jwaliji mpayiniya jwakulipeleka mnope, mwamti jwaliji jwakoseka kuja kutumichila kukwasosekwaga ŵakulalichila ŵajinji. Jwakulolela dela jwetu pajwayiweni mwatwatendelaga yindu jwatulimbikasisye kuti tukakamuchisye mipingo ja ku Orillia, dela ja ku Ontario. Mwamti twanyakwiche kwawula kumaloko.

Patwagambile kukopochela ku Orillia, unesoni natandite upayiniya wakutamilichika. Natanditesoni kusangalala mpela ŵamkwanguwo. Panawunonyelaga mnope upayiniya, natandite kuwuwona umbone wawukusapagwa ligongo lyakamulichisya masengo Baibulo soni kwawona ŵandu ali mkujipikanichisya. Yaliji yakusangalasya mnope kulikamuchisya liŵasa line lya ku delaji kuchenga umi wawo ni kutanda kumtumichila Yehofa.

Panayiche ku Toronto, nasimene ni M’bale Arnold MacNamara juŵaliji jumo mwa abale ŵakulongolela pa Beteli. Jwalakwe jwatuwusisye naga mpaka tusache kutumichila mpela apayiniya ŵapajika. Namjanjile ndaŵi jijojo kuti, “Mpaka ngatumichile kulikose kulekapo ku Quebec.” Najanjile myiyi ligongo lyakujigalila nganisyo syakulemwecheka syaŵakwete ŵandu ŵakuŵecheta Chingelesi pakwamba ya ŵandu ŵa ku Quebec ŵaŵaŵechetaga Chifalansa. Pa ndaŵijo ŵandu ŵatendaga yiwoneselo yakulimbana ni boma ja Canada ni chakulinga chakuti dela ja Quebec jiŵe jakulijimila pajika.

M’bale Arnold ŵanjanjile kuti, “Ku Quebec ni kwele ofesi ja nyambi jikwatumisya apayiniya ŵapajika pa ndaŵi ajino.” Ligongo lya mfundoji najitichisye yakwawula. Nambosoni namanyilile kuti ŵamkwangu ŵaliji ŵakusachilila kwawula kukutumichila ku delaji. Mwamti nayiweni kuti twatesile chenene kusagula yakwawula kukutumichila ku delaji.

Panyuma pakwinjila kalasi jakulijiganya chiŵecheto cha Chifalansa kwa mawiki msano, une ni ŵamkwangu yalumo ni liŵasa line twapite ku Rimouski, dela jijaliji pa lutando lwa makilomita 540 kumpoto chakungopokolyuŵa kwa msinda wa Montreal. Nambope nayiweni kuti pana yejinji yatwasosekwaga kulijiganya. Yeleyi yawonechele pandaŵi jine ndili pamisongano ja mpingo. Panaŵalangaga yimanyisyo, mmalo mwakuŵalanga chimanyisyo chine kuti pa msongano wa chigawo watukwembecheya tuchikola achalendo ŵajinji ŵakutyochela ku dela jinejakwe, yanatite pakaŵalanje yapikaniche mpela kuti tuchikola mtundu winewakwe wa yijuni pamsonganowo mpela achalendo.

Ku Rimouski, twakwete upile wakutumichila yalumo ni alongo mcheche ŵakulipeleka mnope yalumosoni ni liŵasa lya M’bale ni Mlongo Huberdeau ni ŵanache ŵakwe ŵaŵili ŵachakongwe. M’bale ni Mlongo Huberdeau ŵatupatile nyumba ja lendi jitwatamaga apayiniya wosope ni kukamusyanaga kulipila. Nyumbaji jakwete yipinda 7. Nyumbaji twajikolangaga kuti Nyumba Jeswela ligongo kumeso kwakwe soni yipilala yakwe ŵapachile penti jeswela. Twatamaga mnyumbaji chiŵandika ŵandu 12 kapena 14. Mpela apayiniya ŵapajika, une ni ŵamkwangu twajawulaga kukulalichila kundaŵi, musi soni ligulo mwamti twasangalalaga mnope ŵane pakulongana ni m’weji kukulalichilaku. Twatendaga yeleyi atamose mu nyengo jakusisima mnope.

Twaliji paujakwe wakulimba mnope ni apayiniyaŵa mwamti yaŵele mpela tukutyochela liŵasa limo. Ndaŵi sine twakolaga lisiku lyatwatelechelaga soni kulila yalumo yakulya yakumsangalasya jwalijose. Jumo mwa abale ŵetu jwamanyililaga kwimba mwamti Lyakuŵeluka ligulo twajimbaga soni kuŵina.

Dela ja Rimouski jakwete yakuyichisya yambone. Mkati mwa yaka msano twaliji ŵakusangalala kwawona ŵakulijiganya Baibulo ali mkulipeleka soni kubatisidwa. Nambosoni twasangalele kuwuwona mpingo uli mkukula kwika pa ŵakulalichila 35.

Ku Quebec, twapochele majiganyo gambone mnope mpela ŵakulalichila. Twayiweni yaŵatite Yehofa pakutukamuchisya pa utumiki wetu mwakutupa yakusosechela yetu ya paumi. Konjechesya pelepa twalijiganyisye kwanonyela ŵandu ŵachiŵecheto cha Chifalansa, kuchinonyela chiŵechetocho soni kujinonyela ndamo jawo. Yeleyi yatukamuchisye kuti tutande kusinonyela ndamo sinesoni.—2 Akoli. 6:13.

Mwangajembecheya, nyambi jatuŵendile kuti tujawule ku tawuni ja Tracadie, kungopokolyuŵa kwa tawuni ja New Brunswick jajili mungulugulu nyasa. Yeleyi yaliji yakusawusya kwetuwe ligongo twaliji tuli tugambile kutenda kwene lendi nyumba soni naliji ndili mbatile ganyu jakwiganya pa sukulu jinejakwe. Konjechesya pelepa ŵandu ŵane ŵatwajiganyaga Baibulo ŵaliji ali agambile kuŵa kwene ŵakulalichila soni twaliji mkati mwakutaŵa Nyumba ja Uchimwene.

Twajipopelele mnope ngani jakusamaji ligongo tawuni ja Tracadie jaliji jakulekangana ni tawuni ja Rimouski jitwatamaga. Nambo kaneko twasimichisye yakusamila ku delaji ligongo twayiweni kuti ali Yehofa jwakutusalila kuti tujawule kweleko. Twampasisye Yehofa mwamti twam’weni ali mkutukamuchisya pa yakusawusya yiliyose yatwasimanaga  nayo. (Mala. 3:10) Kusala yisyene kusama nganikutusawusyaga ligongo ŵamkwangu ŵaliji mundu jwakulimba mwausimu, jwakulipeleka mnope nambosoni jwandabwala.

Mu mpingo wetu wasambano mwapali jwamkulungwa jwa mumpingo jumope lina lyakwe Robert Ross. Jwalakwe ni ŵamkwakwe lina lyakwe Linda ŵatendaga upayiniya mu delaji. Jemanjaji ali akwete mwanache ŵasagwile yakutamape mu delaji. Atamose kuti ŵakwete udindo wakumlela mwanache, jemanjaji ŵatulimbikasyaga mnope ligongo lya mtima wawo wakupochela chenene achalendo soni kulipeleka kwawo pa masengo gakulalichila.

Tuli tutesile upayiniya kwa yaka yiŵili ku Tracadie, twasimonjile mnope ali atusalile kuti tukatumichileje mpela jwakulolela dela. Kwa yaka 7 twatumichile mmadela ga Chingelesi. Panyuma pakwe ŵatusalile kuti tukatumichileje m’dela ja Chifalansa ku Quebec. Jwakulolela chigawo jwa ku Quebec, lina lyakwe Léonce Crépeault, jwayamichilaga ngani syanaŵechetaga. Nambo mkupita kwa ndaŵi jwatandite kumbusya kuti, “Ana pana pane pakwe pamkusosekwa kongolela pakumŵecheta ngani syenu?” b Chiwusyochi changamuchisye kumanyilila kuti kajiganye kangu kakusosekwa kuŵa kakupikanika chenene kuti nayicheje pamtima ŵakupikanila.

Utumiki wanatesile mu 1978 pa Msongano wa Yilambo ku Montreal jwangawuliŵalilaga paumi wangu. Msonganowu wakwete mtwe wakuti “Kupunda kwa Chikulupi.” Natumichile mu Dipatimenti Jakuteleka Yakulya. Twajembecheyaga ŵandu ŵakupunda 80,000, soni dongosolo jakajendesye ka yakulya twakalinganyisye chenene mnope. Kwamba kuti chilichose chawonekaga kuti chaliji chasambano. Mpela yipangiso yatwakamulichisyaga masengo pakuteleka yakulya nambosoni yakulya yatwalembile kuti ŵandu chalyeje. Twakwete mafiliji gamakulungwakulungwa chiŵandika 20, nambo ndaŵi sine nganigakamulaga chenene masengo. Lisiku lyandanda lya msonganowo mkaniliyiche twalepele kwinjila mu sitediyamu kuti tukalinganye yindu yine mpaka sikati jachilo ligongo lyakuti yatutupile yakutenda. Twasosekwaga kutanda kukolesya moto kundaŵi mnope kuti tulinganye chakulya cha kundaŵi. Kusala yisyene twapesile mnope, nambope nalijiganyisye yindu yejinji kwa abale ŵanakamulaga nawo masengo ligongo ŵaliji ŵakulimbichila, ŵakuganisya chenene, soni ŵandabwala. Mpaka apano tuli paujakwe wambone mnope ni abaleŵa ligongo lyakuti twatendaga yindu mwakamulana mnope. Kusala yisyene yaliji yakulimbikasya mnope kusimanikwa nawo pa msongano wakusangalasyawu wawatendechele ku Quebec, dela jele ŵakutumichila ŵa Mlungu ŵalagasidwaga mnope mu yaka ya mma 1940 soni mma 1950.

Nalijiganyisyesoni yindu yejinji kutyochela kwa achakulungwakulungwa achimjangu ŵaŵalolelaga misongano jekulungwakulungwa ku Montreal. Chaka chine M’bale  David Splane, jwele apano akutumichila mu Likuga Lyakulongolela, jwaliji jwakulolela msongano. Pamsongano wakuyichisya ŵambendile kuti ndumichile mpela jwakulolela msongano mwamti M’bale David ŵangamuchisye mnope.

Mu 2011, panyuma pakuti tutumichile kwa yaka 36 mpela ŵakulolela dela, ŵasalile kuti ngajiganyeje Sukulu ja Achakulungwa ŵa Mumpingo. Yeleyi yatutendekasisye kuti tugoneje m’nyumba syakulekanganalekanga syakwana 75 m’yaka yiŵilipe, nambope yakwete yakuyichisya yambone. Wiki jilijose pajikumala achakulungwa ŵa mumpingo ŵayamichilaga mnope ligongo ŵalipikanaga kuti Likuga Lyakulongolela likusasamala ya jemanjaji kuti aŵe paunasi wambone ni Yehofa.

Mkupita kwa ndaŵi natandite kwiganya Sukulu ja Ŵakulalichila ya Uchimwene. Ŵakulijiganya ŵawonekaga kuŵa ŵakupela mnope soni ŵakudandawula ligongo lyakuti yatupilaga yakutenda. Jemanjaji ŵatamaga mkalasi kwa maawala chiŵandika 7 lisiku lililyose. Chilo chilichose kwa maawala gatatu pali ku nyumba syaŵagonaga ŵasosekwaga kukosechela chile mbali syapegwile, nambosoni ŵakolaga yindu yakwana 4 kapena 5 wiki jilijose yakuti akatende mkalasi. Unejo nambosoni mjangu jwatakamusyanaga kwajiganya twasalile ŵakulijiganyawo kuti nganaŵa akombwele kutenda yeleyi naga pangali chikamuchisyo cha Yehofa. Ngusakumbuchila yaŵatiga pakusangalala ŵakulijiganyawo paŵayiwonaga kuti kumdalila mnope Yehofa kwakamuchisye kuti atendeje yejinji kupunda yaŵaganisyaga.

Ligongo lyakuti mama ŵatendelaga ŵane yindu yambone yakamuchisyaga ŵandu ŵaŵajiganyaga Baibulo kwawula pasogolo. Yakamuchisyesoni baba kuchenga kaganisye kawo muŵawonelaga ŵa Mboni sya Yehofa. Pali pagambile kumala masiku gatatu chiwile mama, twasimonjile mnope kwawona baba ali ayiche ku Nyumba ja Uchimwene kukupikanila ngani ja wosope. Mwamti ŵapitilisye kusongana kwa yaka 26. Atamose kuti babaŵa nganabatisidwa, achakulungwa ŵa mumpingo ŵasalile kuti wiki jilijose babaŵa ŵaŵaga ŵandanda kukopochela pa misongano ja mpingo.

Mama ŵalijisoni chisyasyo chambone kwa une pampepe ni achalumbu ŵangu. Achalumbu ŵangu wosope ŵatatu yalumo ni achiŵamkwawo akumtumichila Yehofa mwakulupichika. Achalumbu ŵangu ŵaŵili akutumichila pa Beteli. Jumo akutumichila pa nyambi ja ku Portugal, pele jwinejo akutumichila ku nyambi ja ku Haiti.

Apano, une ni ŵamkwangu tukutumichila mpela apayiniya ŵapajika ku Hamilton, ku Ontario. Pwatwalolelaga dela, twasangalalaga mnope kwapechesya ŵane ku maulendo gawo gakuwilisya soni ku majiganyo gawo ga Baibulo. Nambo apano tukusasangalala mnope patukwawona ŵandu ŵatukwajiganya Baibulo ali mkutanda kumnonyela Yehofa. Nambosoni, patukupata abale ni alongo ŵajinji ŵakunguluka nawo mu mpingo wasambano, tukusasangalala mnope kulola yakuti Yehofa pakwakamuchisya jemanjaji pandaŵi jambone soni pandaŵi jakusawusya.

Patukuganichisya ya munyuma, tukusasangalala mnope ni yindu yambone yaŵele ali mkututendela ŵane. M’wejisoni tukusalinga ‘kwaganichisya’ ŵane, soni kwalimbikasya kuti amtumichileje Yehofa mwampaka akombolele. (2 Akoli. 7:6, 7) Mwachisyasyo, twalilimbikasisye liŵasa line, mwamti apano jwamkongwe jwa m’liŵasali, mwanache jwamlume soni mwanache jwamkongwe akutenda utumiki wandaŵi syosope. Pandaŵi jine namwusisye jwamlume jwa m’liŵasali naga pakwete paganichisye yakutenda upayiniya. Jwalakwe jwanjanjile kuti akwakamuchisya apayiniya ŵatatu ŵa muliŵasa lyakwe. Ni namwusisye kuti, “Ana mpaka akombole kwakamuchisya jemanjajo kupunda yampaka ajile pakwakamuchisya Yehofa?” Namlimbikasisye kuti nombe najosoni mpaka asangalale ni yindu yakusangalala nayo ŵandu ŵa mwiŵasa mwakwe ŵaŵatendaga upayiniyawo. Pali pagambile kumala myesi 6 jwalakwe jwaŵele mpayiniya.

Une ni ŵamkwangu tuchipitilisya kuyisalila “yisukulu yosope yakwisa msogolo” yakwamba “machili” gakusimonjesya ga Yehofa, soni tukukulupilila kuti jemanjajo chachisangalala mnope pakumtumichila Yehofa mpela m’weji.—Sal. 71:17, 18.