1-2. Ana Mklistu mpaka alandane mulitala lyapi ni nyumba jelewu mnope? (1 Akolinto 15:58)

 MU CHAKA cha 1978, chinyumba chelewu mnope chataŵidwe mu msinda wa Tokyo ku Japan. Nambo ŵandu ŵakayichilaga naga chinyumbachi chichitame kwandaŵi jelewu ligongo mumsindamo mwatendekwaga yisichinya ndaŵi ni katema. Ana chichi chachakamuchisye kuti chinyumbachi chikagwa? Ŵandu ŵaŵataŵaga nyumbaji ŵajitaŵile mwakulimbangana mnope nambosoni kuti jikundilileje kutenganyika pachikutendekwa chisichinya kaneko ni kuwujila mwajaŵelele. Ana Aklistu ali mpela chinyumbachi m’litala lyapi?

² Mklistu akusasosekwa kuŵa jwachikatikati pangani jakuŵa jwakulimbangana soni kukundilila. Jwalakwe akusasosekwa kuŵa jwakulimbangana soni jwangatenganyika pangani jakupikanila malamusi ga Yehofa. (Aŵalanje 1 Akolinto 15:58.) Akusaŵasoni jwakoseka “kupikanila” mwamti akusatendaga yasalilidwe. Nambosoni jwalakwe akusasosekwa kuŵa ‘jwakundilila’ payili yakuŵajilwa kutenda yeleyo. (Yak. 3:17) Mklistu jwakusatenda yindu m’litala lyeleli jwangakanganichila pa malamusi kapena kundilila mwakupelenganya malile. Munganiji, chitukambilane yampaka tutende kuti tukatenganyikaga. Chitulolesoni matala msano gakusakamulichisya masengo Satana pakusaka kututendekasya kuti tukaŵa ŵakulimbangana soni yampaka tutende kuti tuŵambaleje yakutenda ya Satana.

3. Ana Yehofa jwatupele malamusi gapi pa lilemba lya Masengo 15:28, 29?

³ Ndaŵi syosope Yehofa akusiŵapa ŵakutumichila ŵakwe malamusi gangasawusya kugapikanila. (Yes. 33:22) Mwachisyasyo, likuga lyakulongolela lya mu yaka 100 yandanda lyasasile matala gatatu  gakwakamuchisya Aklistu kuti aŵe ŵakulimbangana: (1) mwakumtumichila Yehofape mmalo mwakujitindiŵalila milungu jakusepa, (2) mwakuŵambala kukamulichisya masengo myasi mwakulemwecheka, soni (3) mwakuŵambala chikululu. (Aŵalanje Masengo 15:28, 29.) Ana Aklistu masiku agano mpaka alosye chamtuli kumpikanila Yehofa mmatala gatatuga?

4. Ana mpaka tutende wuli kuti tumtumichileje Yehofa jikape? (Chiwunukuko 4:11)

⁴ Tukusamtumichila Yehofape mmalo mwakujitindiŵaliila milungu jakusepa. Yehofa jwalamwile Ayisalayeli kuti akusosekwa kumtumichilaga jwalakwe jikape. (Det. 5:6-10) Nombe Yesu pajwalinjidwaga ni Satana, jwasasile mwakupikanika chenene kuti tukusosekwa kumtumichilaga Yehofa jikape. (Mat. 4:8-10) Myoyo, tukusasosekwa kuŵambala kujitindiŵalila milungu jakusepa. Nambosoni ngatukusasosekwa kwachimbichisyaga mnope achimlongola ŵadini, achimlongola ŵandale, kapena ŵandu ŵakumanyika ŵa m’chilambochi ni kwikaga pakwawona jemanjaji mpela tumilungu. M’weji tukusosekwa kumtumichilaga Yehofa jikape ‘juŵapanganyisye yindu yosope.’—Aŵalanje Chiwunukuko 4:11.

5. Ligongo chichi tukusasosekwa kumpikanila Yehofa pangani jakujiwona myasi soni umi kuŵa yapajika?

⁵ Tukusampikanila Yehofa pangani jakujiwona myasi soni umi kuŵa yapajika. Tukusasosekwa kutenda yeleyi ligongo Yehofa jwasasile kuti myasi jikusajimila umi wawuli mtuka wapenani waŵapeleche jwalakwe. (Lef. 17:14) Yehofa pajwakundile ŵandu kuti atande kulya nyama, jwasalile kuti ngakusosekwa kulya myasi. (Gen. 9:4) Jwawilisyesoni lilamusili pajwapaga Ayisalayeli Chilamusi cha Mose. (Lef. 17:10) Jwalakwe jwalilongolelesoni likuga lyakulongolela lya mu yaka 100 yandanda kuti ŵasalile Aklistu kuti ‘apitilisye kuŵambala . . . myasi.’ (Mase. 15:28, 29) M’wejisoni tukusapikanila lilamusili patukusagula chikamuchisyo cha mtela. b

6. Ana tukusasosekwa kutenda chichi kuti tupikanileje malamusi ga Yehofa ga ndamo syambone?

⁶ Tukusapikanila malamusi ga Yehofa gakusala ya ndamo syambone. (Aheb. 13:4) Ndumetume Paulo jwatupele malangiso gakuti tuyitendekasyeje yiŵalo ya chilu chetu kuŵa “yewe.” Yeleyi yikugopolela kuti tukusosekwa kutenda yampaka tukombole kuti tumalane ni yakumbila yakulemwecheka ya chilu chetu. Tukusatenda yeleyi mwakuŵambala kulola soni kutenda chilichose champaka chitulongolele kutenda chikululu. (Akolo. 3:5; Yob. 31:1) Patusimene ni yakulingwa, mwachitema tukusaŵambala nganisyo kapena kutenda yindu yampaka yijonanje unasi wetu ni Yehofa.

7. Ana tuli ŵakusimichisya kutenda chichi, soni ligongo chichi?

⁷ Yehofa akusajembecheya kuti chitumpikanileje “ni mtima wosope.” (Alo. 6:17) Ndaŵi syosope malangiso gakwe gakusaŵa gakutukamuchisya, soni nganituŵa tuchenjile malamusi gakwe. (Yes. 48:17, 18; 1 Akoli. 6:9, 10) Tukusatenda yampaka tukombole pakumpikanila Yehofa mwakulosya mtima wajwalosisye jwamasalimo juŵalembile kuti, “Awujiganye mtima wangu kuti uganonyele malamusi gawo kwa yaka yosope.” (Sal. 119:112) Nambope, Satana akusalingalinga kuti yiŵeje yakusawusya kwetuwe kumpikanila Yehofa. Ana akusatenda chamtuli yeleyi?

8. Ana Satana akusakamulichisya masengo chamtuli kutulagasya kuti tukampikanilaga Yehofa?

⁸ Kutulagasya. Satana akusakamulichisya masengo yindu yachiwawa soni kutujogoya ni chakulinga chakuti tuleche kuŵa ŵakulupichika kwa Yehofa. Chakulinga chakwe chili kusaka ‘kutulya,’ yayikugopolela konanga unasi wetu ni Yehofa. (1 Pet. 5:8) Aklistu ŵa mu yaka 100 yandanda ŵajogoyaga, kwaputa, soni kwawulaga ni chakulinga chakuti aleche kuŵa ŵakulupichika kwa Yehofa. (Mase. 5:27, 28, 40; 7:54-60) Masiku aganosoni Satana akupitilisya kukamulichisya  masengo yindu yachiwawa pakwalagasya ŵandu ŵa Mlungu. Yeleyi ni yayikwatendechela abale ni alongo ŵetu ku Russia soni m’yilambo yine. Mwamti kusyungulila pachilambo chosope, ŵandu ŵakusisya akwalagasya abale ni alongo ŵetu mmatala gakulekanganalekangana.

9. Ana mpaka tulosye chamtuli kuti tuli ŵakusamala ŵandu pakutunyenjelela? Apeleche chisyasyo.

⁹ Kutunyenjelela. Satana akusakamulichisya masengo “yitega” kapena kuti yitendo yachinyengo pakusaka kutuloŵesya. (Aef. 6:11) Aganichisye yajwasimene nayo M’bale Bob juŵagonechedwe m’chipatala kuti atendedwe opaleshoni. M’baleju ŵammanyisye dokotala jwakwe kuti mulimose mwampaka yiŵele nganaŵa apochele myasi. Dokotalajo jwakamulene nayo yeleyi. Nambope chilo chakuti malaŵi gakwe chamtende opaleshoni, dokotala juŵasakaga kumtenda opaleshonijo jwapite kukumlola m’bale jula. Pandaŵiji ŵachinasi ŵakwe ŵaliji ali atyosile. Dokotalajo ŵamsalile M’bale Bob kuti ngasakamulichisya masengo myasi pakumtenda opaleshoni nambo chachigamba kusunga myasi jine pakuŵandichila kutendela kuti mwine mpaka jisosekwe. Komboleka kuti dokotalajo jwaganisyaga kuti m’baleju chachenje nganisyo syakwe ligongo lyakuti paliji pali pangali ŵachinasi ŵakwe. Nambo M’bale Bob nganachenga nganisyo syakwe. Jwalakwe jwasimichisye kuti ngakusosekwa kuŵichidwa myasi atamose yili yisawisye chamtuli.

10. Ligongo chichi kaganisye ka ŵandu ŵa kuchilamboku kali kakogoya? (1 Akolinto 3:19, 20)

¹⁰ Kaganisye ka ŵandu ŵa kuchilamboku. Naga tukujigalila kaganisye ka ŵandu ŵa kuchilamboku, mpaka tutande kumleka Yehofa soni kuleka kukuya malamusi gakwe. (Aŵalanje 1 Akolinto 3:19, 20.) “Yindu yakusayiwona ŵandu kuchilamboku kuŵa yalunda” yikusiyatendekasya ŵandu kuti akampikanilaga Mlungu. Nombe Aklistu ŵane ŵa mu mpingo wa Pegamo soni Tiyatila ŵajigalile ndamo sya ŵandu ŵa mudela jaŵatamaga mwamti ŵatindiŵalilaga milungu jakusepa soni kutenda yachikululu. Mwamti Yesu ŵajijamwiche mwamachili mipingoji ligongo lyakujigalila ndamo syakusakalasi. (Chiw. 2:14, 20) M’wejisoni masiku agano, ŵandu akusatukanganichisya kuti tujigalileje kaganisye kawo. Ŵandu ŵa mwiŵasa mwetu kapena achimjetu mpaka alinjeje kutunyenjelela kuti tukapikanilaga malamusi ga Yehofa. Mwachisyasyo, jemanjaji mpaka atusalileje kuti kuŵambala kutenda yakusakala kuli kwangakamuchisya, mpaka atusalilejesoni kuti malamusi ga m’Baibulo gakwamba ndamo syambone gali gachikala.

11. Ana tukusosekwa kuŵambala chichi patukulingalinga kuŵa ŵakulimba?

¹¹ Ndaŵi sine mpaka tuganisyeje kuti malangiso gakusatupa Yehofa gali gangakamuchisya. Mwamti mpaka tutendeje yindu mwakupelenganya “yayalembedwe m’Malemba.” (1 Akoli. 4:6) Nombe achimlongola ŵa dini ŵa mundaŵi ja Yesu ŵatendaga yeleyi. Jemanjaji ŵajonjechesyaga tumalamusi twawo pa malamusi ga Mlungu, yayatendekasyaga ŵandu kulepela kugakuya. (Mat. 23:4) Yehofa akusatupa malamusi gakupikanika chenene kupitila m’Maloŵe gakwe soni mu gulu jakwe. Mwamti m’weji nganitukola ufulu wakonjechesya kanekakwe pa malamusigo. (Mis. 3:5-7) Myoyo, ngatukusosekwa kutendaga yindu mwakupelenganya yayalembedwe m’Baibulo kapena kupanganya tumalamusi twetu kwa ŵakulupilila achimijetu pa yindu yele Baibulo nganijipeleka malamusi.

12. Ana Satana akusakamulichisya masengo chamtuli “chinyengo changali mate”?

¹² Yachinyengo. Satana akusakamulichisya masengo “chinyengo changali mate” soni “nganisyo syakusajendela ŵandu m’chilambochi” pakusaka kwasokonasya soni kwagaŵikanganya ŵandu. Mu yaka 100 yandanda, yeleyi yapwatikagapo lunda lwa ŵandu, yijiganyo ya Chiyuda yakutindana ni Maloŵe ga Mlungu, nambosoni chijiganyo chakuti Aklistu ŵasosekwaga kukuya Chilamusi cha Mose. Yindu yeleyi yaliji yangali mate ligongo lyakuti yatendekasyaga ŵandu kuti alekangane ni Yehofa jwali msyene lunda lusyesyene. Masiku  agano, Satana akusakamulichisya masengo malo gakunguluchila ga pa intaneti pakuwandisya yindu yaunami, soni ngani syaunami syakusawandisya ŵandu ŵandale. Yeleyi yawonechele mnope pandaŵi ja mlili wa COVID-19. c Ŵamboni sya Yehofa ŵaŵapikanilaga malangiso ga gulu jetu nganalagasikaga nganisyo mpela muyaŵelaga kwa ŵandu ŵaŵapikanilaga ngani syaunamisi.—Mat. 24:45.

13. Ligongo chichi tukusosekwa kusamala ni yindu yakusokonasya?

¹³ Yindu yakusokonasya. Ndaŵi syosope tukusasosekwa tuganichisyeje mnope yindu “yayili yakusosekwa mnope.” (Afil. 1:9, 10) Yindu yakusokonasya mpaka yitujonanjile ndaŵi jetu jakutendela yindu yakusosekwa mnope paumi wetu. Yindu yatukusatendaga lisiku lililyose mpela kulya, kumwa, kusangalala, nambosoni masengo mpaka yiŵe yakusokonasya naga tukusayiwonaga kuŵa yakusosekwa mnope paumi wetu. (Luk. 21:34, 35) Kupwatika pelepa, lisiku lililyose tukusaŵalanga soni kupikana ngani syakusala ya ŵandu ŵakutenda yiwoneselo nambosoni ungapikangana wa ŵandu ŵandale. Tukusasosekwa kulolechesya kuti yindu yeleyi ngayikutusokonasya. Ligongo naga ngasamala, munganisyo mwetu mpaka tutande kujigala mbali mu yakutendekwayo. Satana akusakamulichisya masengo yindu yosope yatuyikolasile mu ndimesi pakusaka kutusokonasya kuti tukatendaga yindu yambone. Kwende tulole yampaka tutende kuti tukatenganyikaga ni yinduyi.

14. Ana ni chindu chimo chapi champaka chitukamuchisye kuti tuŵejepe kumbali ja Yehofa?

¹⁴ Aganichisyeje chichatendekasisye kulipeleka soni kubatisidwa. Ŵatesile yinduyi pakusaka kuŵa kumbali ja Yehofa. Aganichisye yayatendekasisye wawojo kukulupilila kuti apatile yisyesyene. Ŵammanyilile Yehofa soni ŵatandite kumchimbichisya ni kumnonyela mpela Mtati jwawo jwakwinani. Ŵatandite kola chikulupi yayakamuchisye kuti agalawuche mtima. Ŵalesile kutenda yindu yayikusamsakalisya Yehofa ni ŵatandite kutenda yindu yayikusamsangalasya jwalakwe. Ŵasangalele mnope paŵamanyilile kuti Mlungu ŵakululuchile yakulemwa yawo. (Sal. 32:1, 2) Kaneko  ŵatandite kusimanikwa pa misongano ja Chiklistu soni kwasalila ŵane yindu yakusangalasya yaŵalijiganyisye. Mpela Mklistu juŵalipeleche kwa Yehofa soni kubatisidwa, apano akwenda pa litala lya ku umi, mwamti ali ŵakusimichisya kupitilisya kwenda palitalali.—Mat. 7:13, 14.

15. Ligongo chichi kulijiganya soni kuganichisya yatulijiganyisyeyo kuli kwakamuchisya mnope?

¹⁵ Alijiganyeje Maloŵe ga Mlungu soni kuganichisya yalijiganyisyeyo. Mpela mwachikusaŵela chitela kuti chikusaŵa chakulimbangana michiga jakwe pajipite pasi mnope, m’wejisoni mpaka tuŵe ŵangatenganyika naga tukusamkulupilila mnope Yehofa. Chitela pachikukula, michiga jakwe jikusajawula pasi mnope soni jikusatupa mnope. Patukulijiganya soni kuganichisya yatulijiganyisyeyo, tukusalimbisya chikulupi chetu soni tukusaŵa ŵakusimichisya kuti yakusatusalila Yehofa yili yambone mnope. (Akolo. 2:6, 7) Aganichisyejesoni yagatite malangiso ga Yehofa pakwalongolela soni kwachenjela ŵakutumichila ŵakwe ŵakala. Mwachisyasyo, Esekiele jwapikanilaga mnope paŵagaweni mesomkulola gele lilayika lyasalaga ya ukulu wa nyumba ja Mlungu. Mesomkulolaga gamlimbikasisye mnope Esekiele, soni gakusatukamuchisya m’weji kumanyilila yampaka tutende kuti tukamuchisyeje nawo pakulambila kweswela. (Esek. 40:1-4; 43:10-12) Mwakulandana ni Esekiele, m’wejisoni yikusatukamuchisya mnope patukulijiganya soni kuganichisya yindu yakusokoka ya m’Maloŵe ga Mlungu.

16. Ana kulimba mtima kwamkamuchisye chamtuli M’bale Bob? (Salimo 112:7)

¹⁶ Aŵeje ŵakulimba mtima. Mwenye Daudi jwalosisye kulimba mtima mwakusala kuti ngasaleka kumnonyela Yehofa. Jwasasile yeleyi mwakwimba kuti, “Ŵalakwe Mlungu mtima wangu ukulupilile.” (Sal. 57:7) M’wejisoni mpaka tuŵe ŵakulimba mtima mwakumkulupilila Yehofa ni mtima wosope. (Aŵalanje Salimo 112:7.) Alole yayatite yeleyi pakumkamuchisya M’bale Bob jwatumkolasile jula. Dokotala jwakwe pajwamsalile kuti chachigamba kusunga myasi jine pakuŵandichila kutendela kuti mwine mpaka jisosekwe, ndaŵi jijojo m’baleju jwajanjile kuti naga mpaka pasosekwe kumtaga myasi, chachityoka m’chipatalamo ndaŵi jijojo. Kaneko m’baleju jwasasile kuti, “Nganingayichilaga ata panandi yangusosekwa kutenda pandaŵiji, soni nganinjogopaga yampaka yindendechele.”

17. Ana tukulijiganya chichi pa yindu yayamtendechele M’bale Bob? (Alole chiwulili.)

 ¹⁷ M’bale Bob jwakombwele kuŵa jwakulimba mtima ligongo jwaliji ali asagwile kala yakutenda mkanajawule kuchipatala. Chandanda, jwasagwile kutenda yindu yakumsangalasya Yehofa. Chaŵili, jwalijiganyisye mwakusamala yajikusasala Baibulo soni mabuku getu pangani ja myasi soni umi. Chatatu, jwasimichisye kuti kukuya malangiso ga Yehofa kukusamkamuchisya mundu. M’wejisoni mpaka tuŵe ŵakulimba mtima atamose tuli tusimene ni yakusawusya yamtuli.

18. Ana chisyasyo cha Balaki chikutujiganya yamtuli pangani jakumdalila Yehofa? (Alole chiwulili chapachikuto.)

¹⁸ Amdalileje Yehofa. Aganichisye yajwatite Balaki pakupunda pangondo ligongo lyakupikanila malangiso ga Yehofa. Atamose kuti Ayisalayeli nganakola yakuchijila soni mapanga, nambope Yehofa ŵamsalile Balaki kuti akapute ngondo ni gulu jamachili ja asilikali ŵa Chikanani ŵaŵalongoleledwaga ni Sisela. (Ŵak. 5:8) Jwakulochesya jwamkongwe Debola ŵamsalile Balaki kuti ajawule pamalo gakuputila ngondo kuti akasimane ni Sisela soni asilikali ŵakwe ŵaŵaliji pa magaleta gakwana 900. Balaki jwapikanile atamose kuti yaliji yakusawusya kwa jwalakwe kulimbana ni asilikali ŵaŵaliji pa magaleta. Asilikali ŵa Sisela paŵatulukaga Litumbi lya Taboli, Yehofa jwatumisye wula jamachili. Mwamti magaleta ga Sisela gatitimile m’matope yayatendekasisye kuti Balaki ŵagomeche jemanjaji. (Ŵak. 4:1-7, 10, 13-16) Mwakulandana ni yeleyi, Yehofa mpaka atukamuchisye kuti tupunde naga tukumdalila jwalakwejo soni kupikanila malangiso gakutyochela kwa ŵandu ŵakusamjimila jwalakwejo.—Det. 31:6.

19. Ligongo chichi tukusosekwa kuŵa ŵakulimbangana ndaŵi syosope?

¹⁹ Tukusosekwa kupitilisya kuŵa ŵakulimbangana patukutama m’chilambo chakusakalachi. (1 Tim. 6:11, 12; 2 Pet. 3:17) Myoyo, kwende tukakunda kuwujila munyuma ligongo lya yindu mpela kutulagasya, kutunyenjelela, kaganisye ka ŵandu ŵa kuchilamboku, yindu yachinyengo soni yakusokonasya. (Aef. 4:14) Mmalomwakwe, kwende tuŵeje ŵangatenganyika, ŵakulimbangana pakulipeleka kwa Yehofa soni kupikanila malamusi gakwe. Nambosoni tukusosekwa kuŵaga ŵaganisya chenene. Mungani jakuyichisya, tuchikambilana yakusati Yehofa soni Yesu pakulosya kuti ali chisyasyo chambone mnope panganiji.