NGANI JAKULIJIGANYA 27
Ligongo Chichi Tukusosekwa Kumpikanilaga Yehofa?
“AMBUJE akusasyoŵekana ni ŵandu ŵakumpikanila jwalakwe.”—SAL. 25:14.
NYIMBO NA. 8 Yehofa Ali Pakutilila Petu
YACHITULIJIGANYE a
1-2. Mwakamulana ni Salimo 25:14, ana tukusosekwa kutenda chichi kuti tuŵe paunasi wambone ni Yehofa?
ANA ni ndamo syapi syakuganisya kuti mpaka syakamuchisye kuti apitilisye kuŵa paujakwe wambone ni mundu jwine jwakwe? Komboleka mpaka ajanje kuti akusosekwa kunonyelana soni kamusyangana. Mwamti komboleka nganaŵa aganichisye yakuti kupikanila mpaka kukamuchisye ŵandu kuŵa paujakwe wambone. Nambope, mpela mwalikuŵechetela lilemba lyakulongolela nganiji, ŵandu ŵakusaka kuŵa paunasi wambone ni Yehofa akusasosekwa ‘kumpikanila jwalakwe.’—Aŵalanje Salimo 25:14.
2 Chinga tuŵele tuli mkutumichila Yehofa kwandaŵi jelewu chamtuli, wosopewe tukusasosekwa kupitilisya kumpikanilaga mnope jwalakwe. Nambo ana kumpikanila Mlungu kukusagopolela chichi? Ana tukusosekwa kutenda chichi kuti tumpikanileje Yehofa? Ana mpaka tulijiganye chichi pakwamba ya kumpikanila Mlungu kutyochela kwa mundu jwalunda Obadiya, Jwamkulungwa jwa Ŵakutaga Mbopesi Yehoyada, soni Mwenye Yowashi?
ANA KUMPIKANILA MLUNGU KUKUSAGOPOLELA CHICHI?
3. Ana woga mpaka utukamuchisye chamtuli? Alondesye.
3 Tukusapikanila kapena kogopa yine yakwe patukuyiwona kuti umi wetu chiwuŵe pangosi. Woga welewu ukusaŵa wakuŵajilwa ligongo ukusatukamuchisya kutenda yindu mwalunda. Mwachisyasyo, naga tukogopa kugwa tukusaŵambala kwenda mungulugulu lisimbo lyakogoya. Naga tukogopa kuwulasidwa tukusatila patuyiweni yindu yakogoya. Nambosoni naga tukogopa kuti tukasokonasya unasi wetu ni mundu jwine jwatukusakamulana najo tukusaŵambala kuŵecheta kapena kutenda chindu champaka chimsakalisye.
4. Ana Satana akusasaka kuti ŵandu amjogopeje Yehofa m’litala lyamtuli?
4 Satana akusasaka kuti ŵandu amjogopeje Yehofa m’litala lyangaŵajilwa. Jwalakwe akusalimbikasya nganisyo syaŵasasile Elifasi syakuti Yehofa ali jwawukali mwamti akusatamila kuganichisya yakutupa chilango soni kuti nganituŵa tukombwele kutenda yindu yakumsangalasya jwalakwe. (Yob. 4:18, 19) Satana akusasaka kuti tumjogopeje mnope Yehofa ni kwika pakuleka kumtumichila. Myoyo, kuti tuŵambale chitega chelechi, tukusasosekwa kumjogopaga Mlungu nambo m’litala lyakuŵajilwa.
5. Ana kumjogopa Mlungu kukusagopolela chichi?
5 Mundu jwakusampikanila soni kumjogopa Mlungu mwakuŵajilwa akusamnonyela jwalakwe soni jwangalinga kutenda chilichose champaka chijonanje unasi wakwe ni Mlungujo. Nombe Yesu ‘ŵamjogopaga Mlungu’ m’litala lyeleli. (Aheb. 5:7) Jwalakwe nganamjogopaga Yehofa mwangaŵajilwa. (Yes. 11:2, 3) Mmalomwakwe, ŵamnonyelaga mnope Yehofa mwamti ndaŵi syosope jwasachililaga kumpikanila. (Yoh. 14:21, 31) Mwakulandana ni Yesu, m’wejisoni tukusamnonyela mnope Yehofa ligongo lyakuti jwalakwe ali Mlungu jwachinonyelo, jwalunda, soni jwamachili mnope. Tukusamanyililasoni kuti Yehofa akusatunonyela mnope soni kuti yikusamkwaya mnope ni yatukusati pakupikanila malangiso gakwe. Myoyo, naga tukulepela kumpikanila Yehofa, jwalakwe yikusampweteka mnope, nambo naga tukumpikanila akusasangalala mnope.—Sal. 78:41; Mis. 27:11.
YAMPAKA TUTENDE KUTI TUMPIKANILEJE SONI KUMJOGOPA MLUNGU
6. Ana ni litala limo lyapi lyampaka litukamuchisye kuti tumjogopeje Mlungu? (Salimo 34:11)
6 Ŵanduwe ngatukusapagwa ni mtima wa kumjogopa Yehofa, nambo tukusalijiganyaga kuti tumjogopeje jwalakwe. (Aŵalanje Salimo 34:11.) Litala limo lyampaka litukamuchisye kutenda yeleyi lili kuganichisya yindu yachilengedwe. Patukulola lunda lwakwete Mlungu, machili gakwe, soni yakusati pakulosya kuti akusatunonyela mnope kupitila mu ‘yindu yaŵapanganyisye’ ni patukusamchimbichisya soni kumnonyela mnope. (Alo. 1:20) Mlongo jwine lina lyakwe Adrienne jwasasile kuti, “Lunda lwa Mlungu lwalukusawonechela mu yindu yaŵayipanganyisye lukusasimonjesya mnope soni lukusangamuchisya kumanyilila kuti jwalakwe akusamanyilila chenene yindu yampaka yingamuchisye.” Mlongoju jwayikene pakuŵecheta kuti, “Jwangasaka kutenda chilichose champaka chisokonasye unasi wangu ni Yehofa juŵambele umi.” Uli ngalinga kupata ndaŵi mu wiki jeleji jaganichisya yine yakwe yajwapanganyisye Yehofa. Kutenda yeleyi, kuchakamuchisya kuti ampikanileje soni kumnonyela mnope Yehofa.—Sal. 111:2, 3.
7. Ana kupopela mpaka kutukamuchisye chamtuli kuti tumjogopeje Yehofa mwakuŵajilwa?
7 Litala line lyampaka litukamuchisye kutanda kumjogopa Mlungu lili kupopela ndaŵi syosope. Patukupopela ndaŵi ni katema, ni patukusatandasoni kumwona Yehofa kuŵa jusyesyene. Ndaŵi jilijose jatukumŵenda Yehofa kuti atukamuchisye kuti tukombole kuyipilila yakusawusya, tukusakumbuchila kuti jwalakwe ali jwamachili mnope. Patukumyamichila Yehofa ligongo lyakutupa Mwanache jwakwe, yikusatukamuchisya kumbuchila kuti Yehofa akusatunonyela mnope. Nambosoni patukumŵenda Yehofa kuti atukamuchisye patusimene ni yakusawusya, tukusakumbuchila yakuti jwalakwe ali jwalunda mnope. Mapopelo mpela gelega, gakusatutendekasya kuti tumchimbichisyeje mnope Yehofa. Nambosoni gakusatukamuchisya kuti tulinjelinjeje kuŵambala kutenda yiliyose yampaka yijonanje unasi wetu ni jwalakwe.
8. Ana tukusosekwa kutenda chichi kuti tupitilisye kumjogopa Mlungu?
8 Mpaka tukombole kupitilisya kumjogopa soni kumchimbichisya Mlungu mwakulijiganya Baibulo. Tukusosekwa kutendaga yeleyi tuli tukwete chakulinga chakulijiganya kutyochela pa yisyasyo yambone soni yakusakala yayikusasimanikwa m’Baibulomo. Kwende tukambilane ya ŵandu ŵaŵili ŵakulupichika ŵaŵamtumichile Yehofa. Jemanjaji ali Obadiya mundu jwalunda juŵatumichilaga pa nyumba ja Mwenye Ahabu soni Yehoyada Jwamkulungwa jwa Ŵakutaga Mbopesi. Kaneko chitulole yampaka tulijiganye kwa Mwenye Yowashi jwa ku Yuda. Jwalakweju jwatandite chenene nambo kaneko jwalesile kumtumichila Yehofa.
TUŴEJE ŴAKULIMBA MTIMA MPELA OBADIYA JUŴAMJOGOPAGA MLUNGU
9. Ana kumjogopa Yehofa kwamkamuchisye chamtuli Obadiya? (1 Ayimwene 18:3, 12)
9 Baibulo jikusatanda kumsala Obadiya b ni maloŵe gakuti, “Jwalakwe ŵaliji mkwatumichila AMBUJE,” kapena kuti kwajogopa. (Aŵalanje 1 Ayimwene 18:3, 12.) Ana woga welewu wamkamuchisye chamtuli Obadiya? Yeleyi yamkamuchisye jwalakwe kuti aŵe jwakuwona mtima soni jwakudalilichika, ni ligongo lyakwe mwenye ŵamŵisile jwalakwe kuŵa jwakulolela yosope ya ku nyumba ja uchimwene. (Alole Nehemiya 7:2.) Ligongo lyakuti Obadiya ŵamjogopaga Mlungu, yamkamuchisye jwalakwe kuŵa jwakulimba mtima, ndamo jajwasosechelaga mnope. Jwalakwe jwatamaga mundaŵi jaŵalamulilaga mwenye jwakusakala Ahabu ‘juŵatesile ulemwa wawukulungwa pameso pa AMBUJE, ulemwa wakupunda wuŵatesile achayimwene wosope ŵakala.’ (1 Ayi. 16:30) Kupwatika pelepa, ŵamkwakwe Ahabu lina lyawo Yesebele ŵaŵalambilaga Baala ŵamŵengaga mnope Yehofa mwamti jwayikene pakusaka kusilekasya mbumba 10 sya Ayisalayeli kuti sikamtumichilaga Yehofa. Yesebele jwayikene pakwawulaga ŵakulochesya ŵajinji ŵa Mlungu. (1 Ayi. 18:4) Ayitu, yikulosya kuti Obadiya jwamtumichilaga Yehofa mundaŵi jwakusawusya.
10. Ana Obadiya jwalosisye chamtuli kulimba mtima?
10 Ana Obadiya jwalosisye chamtuli kulimba mtima? Yesebele pajwatandite kwasosasosa ŵakulochesya ŵa Mlungu kuti jwawulaje, Obadiya jwajigele ŵakulochesya ŵakwana 100 ni kwasisa. Mwamti “ŵakulochesya 50 ŵasisile mu mbanga jine, 50 ŵane mu mbanga jinesoni, ni ŵapaga yakulya ni mesi.” (1 Ayi. 18:13, 14) Yikaŵe kuti Yesebele jwamanyilile yajwatesile Obadiyayi nikuti jwalakwe akawulajidwe. Pakuŵapo Obadiya jwaliji mundu ngatukukayichila kuti jwatendaga woga. Nambo jwalakwe jwamnonyelaga mnope Yehofa soni ŵakutumichila ŵakwe kupunda mujwawunonyelelaga umi wakwe.
M’bale akupeleka mabuku ni magasini kwa Aklistu achimjakwe atamose kuti masengo getu ŵagalekasisye (Alole ndime 11) c
11. Ana ŵakutumichila ŵa Yehofa ŵa masiku agano akusalandana chamtuli ni Obadiya? (Alole chiwulili.)
11 Masiku agano ŵakutumichila ŵajinji ŵa Yehofa akutama m’yilambo yele masengo getu ŵagalekasisye. Jemanjaji akusiŵachimbichisya achakulungwakulungwa ŵa boma, nambo mpela Obadiya abale ni alongo ŵetu ŵeleŵa akusatenda yakomboleka kuti akaleka kumtumichila Yehofa. (Mat. 22:21) Akusalosya kumjogopa Mlungu mwakumpikanila jwalakwejo kupunda ŵandu. (Mase. 5:29) Akusatenda yeleyi mwakupitilisya kulalichila ngani syambone soni mwakutendela yimpepe misongano nambo mwakusisa. (Mat. 10:16, 28) Abale ni alongo ŵeleŵa, akusalolechesya kuti Aklistu achimjawo akupata yindu yakusosechela kuti aŵe paunasi wambone ni Yehofa. Alole chisyasyo cha M’bale Henri juŵatamaga m’chilambo chinechakwe ku Africa chele masengo getu ŵagalekasisye kwakandaŵi. Pandaŵi jeleji, m’baleju jwalipelekaga kupeleka magasini ni mabuku getu kwa Aklistu achimjakwe. Jwalakwe jwalembile kuti, “Mwachipago uneji ndili jwasooni. Myoyo nayiweni kuti nakombwele kulosya kulimba mtima ligongo lyakuti namnonyelaga mnope Yehofa.” Ana wawojo mpaka akombole kuŵa jwakulimba mtima mpela mwajwatendele m’baleju? Mpaka akombole kutenda yeleyi naga akulingalinga kuti ampikanileje soni kumjogopa Mlungu mwakuŵajilwa.
TUŴEJE ŴAKULUPICHIKA MPELA JWAMKULUNGWA JWA ŴAKUTAGA MBOPESI YEHOYADA
12. Ana Jwamkulungwa jwa Ŵakutaga Mbopesi Yehoyada ni ŵamkwakwe ŵalosisye chamtuli kuti ŵaliji ŵakulupichika kwa Yehofa?
12 Jwamkulungwa jwa Ŵakutaga Mbopesi Yehoyada jwampikanilaga Yehofa. Yeleyi yamkamuchisye kuti aŵe jwakulupichika kwa Yehofa soni kulimbisya kulambila kusyesyene. Yeleyi yawonechele chenene pele mwanache jwamkongwe jwa Yesebele lina lyakwe Ataliya ŵasumwile mpando wa uchimwene ku Yuda. Ŵandu ŵamjogopaga Ataliya soni yeleyi yaliji yakupikanika ligongo jwalakwe jwaliji jwakusakala mnope mwamti jwalinjilile kuwulaga wosope ŵakuliŵasa lya umwenye, yisukulu yakwe yisyesyeneyo ni chakulinga chakuti aŵe pa mpando wa umwenyewu. (2 Mbi. 22:10, 11) Nambo Yowashi jwakulupwiche pa chiwembuchi ligongo Yehosheba ŵaŵaliji ŵamkwawo Yehoyada ŵamsisile jwalakwe. Yehosheba ni Yehoyada ŵamsisile jwalakwe ni kumsamalilaga. Mwakutenda yeleyi, jemanjaji ŵakamuchisye kuti msele wa umwenye wa Daudi uŵe chiŵela. Yehoyada jwaliji jwakulupichika kwa Yehofa soni nganamjogopaga Ataliya.—Mis. 29:25.
13. Ana Yehoyada jwalosisyesoni chamtuli kuti ali jwakulupichika pa ndaŵi jele Yowashi ŵaliji ali ni yaka 7?
13 Yowashi paŵakwanisye yaka 7, Yehoyada ŵalosisyesoni kulupichika kwakwe kwa Yehofa. Jwalakwe jwalinganyisye pulani. Yikaŵe kuti pulaniji chijikomboleche nikuti Yowashi akaliji mwenye ligongo jwaliji mu msele wakwinjila umwenye wa Daudi. Nambo yikaŵe kuti pulaniji chijilepeleche, mwangakayichila Yehoyada akawulajidwe. Nambo ni chikamuchisyo cha Yehofa yaŵalinganyisyeyi yakomboleche. Achimlongola ŵa asilikali soni Alefi ŵamkamuchisye Yehoyada mwamti yakomboleche kumŵika Yowashi pa mpando wa umwenye soni Ataliya ŵawulajidwe. (2 Mbi. 23:1-5, 11, 12, 15; 24:1) Mwamti kaneko Yehoyada ŵamsalile mwenye ni ŵandu ŵakwe kuti “aŵiche chilanga mu lina lya AMBUJE, chakuti taŵe ŵandu ŵakwe ŵa AMBUJE. Ŵanduwo soni ŵaŵisile chilanga chakuti taŵe ŵakulupichika kwa mwenyejo.” (2 Ayi. 11:17) Yehoyada “ŵaŵisile alonda pa yipata ya Nyumba ja AMBUJE kuti jwalijose juŵaliji jwangaswejesedwa akajinjila.”—2 Mbi. 23:19.
14. Ana Yehoyada ŵapochele uchimbichimbi wamtuli ligongo lyakumchimbichisya Yehofa?
14 Yehofa ŵampele upile Yehoyada ligongo ŵaliji ali asasile kala kuti, “Tinjachimbichisya ŵakunjimbichisya une.” (1 Sam. 2:30) Mwachisyasyo, Yehofa jwakundile kuti yindu yambone yajwatesile Yehoyada yilembedwe m’Baibulo kuti yitukamuchisyeje. (Alo. 15:4) Nambosoni paŵawile ŵapochele uchimbichimbi mwakuja kumsika “ku malembe ga ayimwene mu msinda wa Daudi, ligongo lyakuti ŵatesile yindu yambone pakwatumichila Aisalaeli, Mlungu, ni m’Nyumba ja AMBUJE.”—2 Mbi. 24:15, 16.
Twakamuchisyeje abale ni alongo ŵetu mpela muŵatendele Jwamkulungwa jwa Ŵakutaga Mbopesi Yehoyada (Alole ndime 15) d
15. Ana tukulijiganya chichi pa ngani ja Yehoyada? (Alole chiwulili.)
15 Ngani ja Yehoyada mpaka jitukamuchisye wosopewe kola mtima wakumpikanila Mlungu. Ŵakulolela ŵa Chiklistu mpaka amsyasye Yehoyada mwakuŵa mesope soni kusichenjela ngondolo sya Mlungu. (Mase. 20:28) Ŵandu ŵachikulile mpaka alijiganye kutyochela kwa Yehoyada kuti naga akumpikanila Yehofa soni kuŵa ŵakulupichikape kwa jwalakwe, Yehofa mpaka ŵakamulichisye masengo pakukwanilisya chakulinga chakwe. Jwalakwe akusiŵawonaga achakulungwaŵa kuti ali ŵakusosekwa mnope. Ŵachinyamata mpaka alijiganye mwakulola yaŵatiga Yehofa pakutenda yindu ni Yehoyada. Yeleyi mpaka yakamuchisye kuti ŵachimbichisyeje abale ni alongo ŵachikulile mnopemnope ŵaŵele ali mkutumichila Mlungu mwakulupichika kwa ndaŵi jelewu. (Mis. 16:31) Pakumalisya, wosopewe mpaka tulijiganye kutyochela kwa ŵakulongolela ŵa asilikali soni Alefi ŵaŵamkamuchisye Yehoyada. Myoyo kwende wosopewe twakamuchisyeje mwakulupichika abale ‘ŵakutulongolela’ mwakwapikanila jemanjaji.—Aheb. 13:17.
TUKAŴAGA MPELA MWENYE YOWASHI
16. Ana chichi chachikulosya kuti Mwenye Yowashi jwaliji jwakulepela?
16 Chisyasyo cha Yehoyada chamkamuchisye mnope Mwenye Yowashi. (2 Ayi. 12:2) Yakuyichisya yakwe jwalakwe jwatendaga yindu yakumchimbichisya Yehofa. Nambo Yehoyada paŵawile, Yowashi jwatandite kwapikanila achimlongola ŵakusapuka. Yakuyichisya yakwe jwalakwe ni ŵandu ŵakwe “ŵatandite kujitumichila milungu ja chilendo.” (2 Mbi. 24:4, 17, 18) Atamose kuti Yehofa yampweteche mnope yeleyi nambope Jwalakwe ŵapitilisye kwatumichisya “ŵakulochesya kuti ŵakalamusye jemanjajo kuti awujile soni kwa AMBUJE, nambo ŵanduwo ŵakanile.” Jemanjaji ŵayikene pangampikanilasoni Sakaliya mwanache jwa Yehoyada juŵaliji ngaŵa jwakulochesya soni jwakutaga mbopesipe nambo juŵaliji msuwani jwakwe jwa Yowashi. Yili yakutesya chanasa kuti Yowashi jwalepele kulosya kuliyamichila liŵasa lyalyamkulupwisye ku chiwembu chakuwulajidwa mwamti jwayikene pakumwulaga Sakaliya.—2 Mbi. 22:11; 24:19-22.
17. Ana yindu yammalile uli Yowashi?
17 Yowashi nganamjogopaga mnope Yehofa mwamti yindu nganiyimmalila chenene. Paja Yehofa jwasasile kuti, “tinjapila mtima ŵakunyosya une.” (1 Sam. 2:30) Kaneko asilikali ŵa ku Siliya ŵaŵaliji ŵakuŵalanjika ŵagomeche gulu jekulungwa ja asilikali ŵa Yowashi, mwamti ŵamlesile jwalakwe “ali awulele mnope.” Asilikali ŵa ku Siliya paŵatyosile, Yowashi ŵawulajidwe ni ŵakutumichila ŵakwe ligongo jwalakwe ŵamwuleje Sakaliya. Mwamti mwenye jwakusakalaju nganamsika “m’malembe ga ayimwene.”—2 Mbi. 24:23-25.
18. Mwakamulana ni Yelemiya 17:7, 8, ana mpaka tuŵambale chamtuli kuŵa mpela Yowashi?
18 Ana tukulijiganya chichi kutyochela kwa Yowashi? Jwalakwe jwaliji mpela chitela changali michiga jakwawula pasi chachikusadalila kuchichinga ni chitela chijakwe. Yehoyada juŵajimilaga chitela chakuchingachi pajwawile, mbungo jajikwimila ŵandu ŵakusapuka japujile mwamti Yowashi jwagwile. Yeleyi yikutujiganya kuti ngatukusosekwa kwegamilaga ŵakutumichila achimjetu kupwatikapo ŵandu ŵa m’liŵasa lyetu kuti tumpikanileje Mlungu. Kuti tuŵe ŵakulimba mwausimu tukusosekwa kupitilisya kulipeleka soni kumpikanila Mlungu mwakulijiganya mwakutamilichika, kuganichisya yatukulijiganyayo soni kupopela.—Aŵalanje Yelemiya 17:7, 8; Akolo. 2:6, 7.
19. Ana Yehofa akusasakaga kuti tutendeje chichi?
19 Yehofa ngakusajembecheya kuti tutendeje yejinji kupunda yampaka tukombole. Yakutulamula jwalakwe yikusimanikwa pa Jwakulalichila 12:13, papakusati, “Mumpikanileje Mlungu, nipo mgasunjeje malamusi gakwe, pakuti ali ni ligongo lyakwe jwalakwejo ŵatupanganyisye.” Patukumpikanila Mlungu, yichitukamuchisya kuti chituyipilile soni kuyipunda yakulingwa yamsogolo mpela mwayaŵelele ni Obadiya ni Yehoyada. Pangali champaka chijonanje unasi wetu ni Yehofa.
NYIMBO NA. 3 Machili Getu Soni Chembecheyo Chetu
a M’Baibulo maloŵe gakuti ‘kupikanila’ gakwete ngopolelo syejinji. Kupikanila mpaka kugopolele woga, soni kuchimbichisya mwakamulana ni ngani jakujilondesya. Nganiji chijitukamuchisye kola mtima wakupikanila wampaka utukamuchisye kuŵa ŵakulipeleka soni ŵakulupichika patukwatumichila Atati ŵetu ŵakwinani.
b Obadiya jweleju nganaŵa jwakulochesya Obadiya juŵapali pali papite yaka yejinji kutyochela pandaŵi jeleji soni juŵalembile buku ja m’Baibulo jakumanyika ni lina lyakwe.
c KULONDESYA CHIWULILI: Chiwulili chakulosya m’bale ali mkupeleka magasini soni mabuku mundaŵi jele masengo getu ŵagalekasisye.
d KULONDESYA CHIWULILI: Mlongo jwachisikana akulijiganya mwampaka alalichilile kupitila pa foni kutyochela kwa mlongo jwachikulile, m’bale jwachikulile akupeleka chisyasyo chambone mwakulalichila pamalo gakusimanikwa ŵandu ŵajinji, m’bale jwakumanyilila yejinji akwajiganya ŵane mwampaka alinganyile yindu yine pa Nyumba ja Uchimwene.
