1. Mwakamulana ni 1 Petulo 5:2, ana ni masengo gakusosekwa gapi gakusakamula achakulungwa ŵa mumpingo?

 YEHOFA jwapele achakulungwa ŵa mumpingo utumiki wakuti ŵasamalileje ŵakutumichila ŵakwe. Achalume ŵakulipelekaŵa akusasangalala pakukamula masengoga, mwamti akusalimbichila kuti aŵe abusa ŵakusachinga yisyesyene. (Yel. 23:4; aŵalanje 1 Petulo 5:2.) Kusala yisyene yili yakusangalasya mnope kukola abale ŵamaudindoŵa m’mipingo mwetu.

2. Ana ni yakusawusya yapi yakusasimana nayo achakulungwa ŵa mumpingo ŵane?

² Achakulungwa ŵa mumpingo akusasimana ni yakusawusya pakusamalila maudindo gawo. Kusala yisyene, jemanjaji akusasosekwa kulipeleka mnope kuti awusamalileje chenene mpingo. Mwachisyasyo, jwamkulungwa jwa mumpingo jwine jwa ku United States lina lyakwe Tony jwayikopochele kuti akusosekwa kuŵa jwakulinandiya pangani jakwitichisya masengo gejinji ga mumpingo. Jwalakwe jwatite, “Kundanda kwa ulwele wa COVID-19 natanganidwaga mnope pakulongolela misongano ja mpingo soni masengo gakulalichila. Atamose kuti natanganidwaga mnope, nambope paŵaga masengo gejinji gagasosekwaga kukamulidwa. Mwamti kaneko nganimbataga ndaŵi jakwanila jakuŵalanjila Baibulo, kutenda lijiganyo lya pajika, soni kupopela.” Jwamkulungwa jwa mumpingo jwine jwa ku Kosovo lina lyakwe Ilir jwakwete chakusawusya chakulekangana ni chelechi. M’baleju jwayiwonaga kuŵa yakusawusya kupikanila malangiso ga gulu pandaŵi jijatendekwaga ngondo mudela jaŵatamaga. Jwalakwe jwatite, “Kulimba mtima kwangu kwalinjidwe Ofesi ja nyambi pajambele utumiki wakuti nakamuchisyeje abale ni alongo pandaŵi jakusawusyaji. Natendaga woga, mwamti nayiwonaga kuŵa yangapikanika kukamula masengogo pandaŵijo.” Nombe mmishonale jwine jwa ku Asia lina lyakwe Tim yamsawusyaga kutenda yindu yajwasosekwaga kutenda lisiku lililyose. Jwalakwe jwatite, “Ndaŵi sine nalipikanaga kuti nganingola machili gakwasamalila abale ni alongo.” Ana chichi champaka chakamuchisye  achakulungwa ŵa mumpingo ŵakusimana ni yakusawusya mpela yeleyi?

3. Ana kuganichisya chisyasyo cha Jwakulamula Gidiyoni mpaka kutukamuchisye chamtuli?

³ Achakulungwa ŵa mumpingo mpaka alijiganye yejinji kutyochela kwa Jwakulamula Gidiyoni. (Aheb. 6:12; 11:32) Jwalakwe jwachenjelaga soni kwalolela ŵandu ŵa Mlungu. (Ŵak. 2:16; 1 Mbi. 17:6) Mwakulandana ni Gidiyoni nombe achakulungwa ŵa mumpingo asagulidwe kuti ŵaloleleje ŵandu ŵa Mlungu mu ndaŵi jakusawusyaji. (Mase. 20:28; 2 Tim. 3:1) Myoyo wosopewe mpaka tulijiganye kuŵa ŵakulinandiya soni ŵakupikanila mpela muŵatendele Gidiyoni. Kupilila kwakwe kwalinjidwe pandaŵi jaŵatendaga ma utumiki gakwe. Chinga tukutumichila mpela achakulungwa ŵa mumpingo kapena iyayi, tukusosekwa twayamichileje achakulungwa ŵa mumpingo pa masengo gakusakamula. Mwamti tukusasosekwa kwakamuchisyaga jemanjaji pakwasamalila abale ni alongo ŵetu.—Aheb. 13:17.

4. Ana Gidiyoni jwalosisye chamtuli kuti jwaliji jwakulinandiya?

⁴ Gidiyoni jwaliji jwakulinandiya. b Lilayika lya Yehofa palyamsalile Gidiyoni kuti asagulidwe kuti ŵakulupusye Ayisalayeli kwa Amidiyani, mundu jwakulinandiyaju jwajanjile kuti, “Liŵasa lya Manase lili lyakulepetala kupunda gane gosope, soni une ni jwa kumbesi kwa liŵasa lyetu.” (Ŵak. 6:15) Jwalakwe jwalipikanaga kuti ali jwangaŵajilwa pa utumikiwu, nambotu Yehofa nganamwonaga myoyo. Mwamti ni chikamuchisyo cha Yehofa, Gidiyoni jwakombwele kutenda chenene utumiki wakwewo.

5. Ana kulinandiya kwa achakulungwa ŵa mumpingo mpaka kulinjidwe mmatala gapi?

⁵ Ndaŵi syosope achakulungwa ŵa mumpingo akusalingalinga kutenda yindu mwakulinandiya. (Mik. 6:8; Mase. 20:18, 19) Jemanjaji ŵangapokaga ligongo lya yindu yakombwele kutenda, kapena kwanyosya achimjawo payindu yakusalepela kutenda. Nambope ndaŵi sine jwamkulungwa jwa mumpingo mpaka yimsawusye kulosya ndamo jakulinandiya. Mwachisyasyo, mpaka ajitichisyeje kutenda ma utumiki gejinji, nambo ni kulepelaga kugakwanilisya. Kombolekasoni mpaka apocheleje ulemu mnope payindu yakombwele kutenda, kapena kwimbidwa magambo payindu yalepele kuyitenda chenene. Ana achakulungwa ŵa mumpingo mpaka alijiganye chichi kwa Gidiyoni yampaka yakamuchisye mu yakutendekwa mpela yeleyi?

6. Ana achakulungwa ŵa mumpingo mpaka alijiganye chichi kwa Gidiyoni pangani ja kulinandiya? (Alole chiwulili.)

⁶ Ŵaŵendeje ŵane kuti ŵakamuchisyeje. Mundu jwakulinandiya akusamanyilila yindu yanganaŵa akombwele kuyitenda. Gidiyoni jwalosisye kuti jwaliji jwakulinandiya ligongo jwaŵendaga  ŵane kuti amkamuchisye. (Ŵak. 6:27, 35; 7:24) Nombe achakulungwa ŵa mumpingo ŵalunda akusatenda yakulandanayi. M’bale Tony jwatumkolasile jula jwasasile kuti, “Yaŵatite pakunjiganya achinangolo ŵangu yandendekasyaga kuti ngambeje kwitichisya masengo galigose atamose yili mkuti nganimba ngombwele kugakamula gosopego. Myoyo nalinganyisye yakuti pakulambila kwa peŵasa tukambilaneje ya ndamo jakulinandiya, mwamti nawusyagasoni ŵamkwangu nganisyo. Nalolelagasoni pa jw.org fidiyo jakuti, Ŵajiganyeje, Ŵakulupilileje Soni Ŵalimbikasyeje Ŵane Mpela Muŵatendelaga Yesu.” Yeleyi yamkamuchisye M’bale Tony kuti atande kwaŵenda ŵane kuti amkamuchisyeje masengo gakwe. Ana yakuyichisya yakwe yaliji yamtuli? M’baleju jwatite, “Masengo ga pampingo gatandite kwenda chenene, soni napataga ndaŵi jakutenda yindu yakungamuchisya kulimbisya unasi wangu ni Yehofa.”

7. Ana achakulungwa ŵa mumpingo mpaka amsyasye chamtuli Gidiyoni ŵane pakwajimba magambo?

⁷ Akatumbilaga ŵane pakwajimba magambo ligongo lya mwakutendela yindu. Achakulungwa ŵa mumpingo akusalinjidwasoni ŵane pakwajimba magambo ni mwakutendela yindu. Chisyasyo cha Gidiyoni mpaka chakamuchisyesoni pambali jeleji. Ligongo lyakuti Gidiyoni jwamanyililaga kuti mpaka alepele kutenda chenene yine yakwe, jwalakwe jwakombwele kwajanga mwakuwusimana mtima achalume ŵa ku Efelemu paŵamjimbaga magambo. (Ŵak. 8:1-3) Gidiyoni nganajanga mwawukali. Jwalakwe jwalosisye kuti jwaliji jwakulinandiya mwakwapikanila chenene jemanjajo paŵasalaga yindu yaŵadandawulaga soni mwakwajanga mwakuwusimana mtima. Yeleyi yakamuchisye kuti mitima ja achalume ŵa ku Efelemuwo jitame mmalo. Nombe achakulungwa ŵa mumpingo ŵalunda akusamsyasya Gidiyoni mwakupikanila soni kwanga mwakuwusimana mtima ŵane pakwajimba magambo. (Aŵalanje Yakobo 3:13.) Pakutenda yeleyi, jemanjaji akusakamuchisya kuti pa mpingo paŵeje mtendele.

8. Ana achakulungwa ŵa mumpingo mpaka atende uli ŵane pakwachimbichisya mnope pa yindu yakusakombola kutenda? Asale chisyasyo.

⁸ Atendeje yakuti ulemu wosope ujawuleje kwa Yehofa. Ŵandu ŵane paŵamchimbichisyaga mnope Gidiyoni ligongo lyakwagomeka Amidiyani, jwalakwe jwatesile yakuti ŵanduwo amchimbichisyeje Yehofa mmalo mwa jwalakwejo. (Ŵak. 8:22, 23) Ana achakulungwa ŵa mumpingo mpaka amsyasye chamtuli Gidiyoni? Jemanjaji akusosekwa kutendaga yakuti ulemu wosope ujawuleje kwa Yehofa payindu yakombwele kutenda. (1 Akoli. 4:6, 7) Tuwanichisye kuti abale ni alongo akusamyamichila jwamkulungwa jwa mumpingo ligongo lyakuti akusajiganya chenene. Pelepa jwamkulungwajo akusosekwa kutenda yakuti ŵanduwo ajichimbichisyeje mnope Baibulo mwatukusapatamo malangiso, kapena majiganyo gatukusapochela mu gulu ja Yehofaji. Achakulungwa ŵa mumpingo mpaka atende chenene kuganichisya naga yakusati pakwiganya yikusiyatendekasya ŵandu kumchimbichisya mnope Yehofa kapena jemanjajo. Kwende tulole yayamtendechele jwamkulungwa jwa mumpingo jwine lina lyakwe Timothy. M’baleju pajwagambile kuŵichidwa kwene kuŵa jwamkulungwa jwa mumpingo jwanonyelaga mnope kuŵecheta ngani sya wosope. Jwalakwe jwatite, “Pakuŵecheta ngani syangu nanonyelaga kusala yisyasyo yelewu mnope soni yakusawusya kuyipikanichisya. Yisyasyoyi yatendekasyaga abale kuti ayamichileje mnope. Yakuyichisya yakwe abale ni alongo ŵambaga ulemu mnope mmalo mwakumchimbichisya mnope Yehofa kapena Baibulo.” Pali papitile ndaŵi, M’bale Timothy jwachenjile kajiganye kakwe ni chakulinga chakuti abale ni alongo amchimbichisyeje mnope Yehofa. (Mis. 27:21) Ana papali yakuyichisya yamtuli? Jwalakwe jwasasile kuti, “Abale ni alongo ŵasalilaga yajitite pakwakamuchisya ngani jangu kuti akombole kupilila yakusawusya yaŵasimanaga nayo, kapena yajitite pakwakamuchisya kuti aŵe paunasi wakulimba ni Yehofa. Yaŵaŵechetaga abaleŵa yasangalasyaga mnope kupunda yanatiga pakusangalala yaka yejinji munyumamo paŵanjimbichisyaga mnope ligongo lya ngani syangu.”

9. Ana kulimba mtima soni kupikanila kwa Gidiyoni kwalinjidwe chamtuli? (Alole chiwulili chapachikuto.)

⁹ Gidiyoni ali asagulidwe kuŵa jwakulamula, jwalakwe jwasosekwaga kuŵa jwakupikanila soni jwakulimba  mtima. Jwalakwe jwapochele utumiki wakogoya wakuti ajonanje malo gaŵapelechelaga mbopesi babagwe kwa Baala. (Ŵak. 6:25, 26) Kaneko, Gidiyoni ali asongangenye gulu ja asilikali ŵakwe pakosechela ngondo, kwa maulendo gaŵili Yehofa ŵamsalile jwalakwe kuti apungule chiŵalanjilo cha asilikaliwo. (Ŵak. 7:2-7) Pambesi pakwe, Gidiyoni jwasalilidwe kuti akagomeche achimmagongo ŵakwe pasikati pa chilo.—Ŵak. 7:9-11.

10. Ana jwamkulungwa jwa mumpingo mpaka alinjidwe chamtuli pangani ja kupikanila?

¹⁰ Achakulungwa ŵa mumpingo akusaŵa ‘ŵakoseka kupikanila.’ (Yak. 3:17) Jwamkulungwa jwa mumpingo jwakupikanila akusaŵa jwakoseka kukuya yagakusasala Maloŵe ga Mlungu soni kupikanila malangiso gakutyochela ku gulu ja Yehofa. Mwamti jwalakwe akusaŵa chisyasyo chambone kwa abale ni alongo. Nambope, ndaŵi sine jwalakwe mpaka alinjidwe pangani ja kupikanila. Mwachisyasyo, pane mpaka ayiwoneje kuŵa yakusawusya kupikanila soni kukuya chenene malangiso gapochele. Mwamti pane, mpaka akayichileje naga malangiso gapochele gali gakamuchisya. Mwinesoni mpaka ayiwoneje kuti yindu yasalilidwe kuti atendeyo mpaka yitendekasye kuti ataŵidwe. Ana achakulungwa ŵa mumpingo mpaka amsyasye chamtuli Gidiyoni pa yakutendekwa mpela yeleyi?

11. Ana chichi champaka chakamuchisye achakulungwa ŵa mumpingo kuŵa ŵakupikanila?

¹¹ Apikanileje mwakusamala malangiso gapochele soni agakamulichisyeje masengo. Mlungu ŵamsalile Gidiyoni yampaka atende pakonanga malo gaŵapelechelaga mbopesi babagwe kwa Baala. Ŵamlanjilesoni pajwasosekwaga kumtaŵila Yehofa malo gakupelechela mbopesi, soni yinyama yakuŵajilwa kuyipeleka mbopesi. Gidiyoni nganalinga kunyinyita pa malangiso gaŵapochelego. Jwalakwe jwatesile ndendende mpela muŵaŵechetele Yehofajo. Masiku agano, achakulungwa ŵa mumpingo akusapochela malangiso gakutyochela ku gulu ja Yehofa kupitila mu yikalata, yimanyisyo, soni mmatala gane. Malangisoga gakusatukamuchisya kuti tuŵe ŵakuteteyeka soni kuŵa paunasi wambone ni Yehofa. Tukusitwayamichila mnope achakulungwaŵa ligongo lyakuya mwakulupichika malangiso gakusapochela. Yeleyi yikusakamuchisya mpingo wosope.—Sal. 119:112.

12. Ana achakulungwa ŵa mumpingo mpaka akamulichisye masengo chamtuli lilemba lya Ahebeli 13:17 naga gulu ja Yehofa jasalile kuti achenje muŵatendelaga yindu?

¹² Aŵeje ŵakoseka kuchenga. Akumbuchile kuti paja Yehofa ŵamsalile Gidiyoni kuti ŵawusye ku ngondo asilikali ŵakwe ŵajinji ni kusigala ni ŵamnono. (Ŵak. 7:8) Apatu yikakomboleche Gidiyoni kuganisyaga kuti, ‘Ana atesile chenene kupungula asilikaliŵa? Ana yeleyi chiyikamuchisye?’ Yatukumanyilila yili yakuti Gidiyoni jwapikanile. Masiku agano achakulungwa ŵa mumpingo akusamsyasya Gidiyoni mwakujipikanila gulu ja Yehofa pajasalile kutenda yindu yele ngakuyipikanichisya. (Aŵalanje Ahebeli 13:17.) Mwachisyasyo, mu 2014 Likuga Lyakulongolela lyachenjile litala lyakupelechela mbiya syakamuchisya pakutaŵa Nyumba sya Uchimwene, soni malo ga misongano jekulungwakulungwa. (2 Akoli. 8:12-14) Kutandila chaka chelechi, ŵalesile kujikongosya mipingo mbiya syakutaŵila nyumbasi. Mmalomwakwe, ŵatandite kukamulichisya masengo mbiya syele mipingo jikusapeleka pachilambo chosope pakutaŵa Nyumba sya Uchimwene soni malo ga misongano. Akusatenda yeleyi atamose yili mkuti mpingowo  ukusapeleka mbiya syamnono. M’bale José ali apikene ya kuchengaku, jwakayichile yakuti kuchengaku chikukamuchisye, mwamti jwaganisyaga kuti, ‘Atamose Nyumba ja Uchimwene jimpepe nganijiŵa jitaŵidwe, ligongo kuchilamboku yindu yangajendaga myoyo.’ Ana chichi chachamkamuchisye m’baleju kuti akamulane ni kuchengako? Jwalakwe jwatite, “Maloŵe ga pa Misyungu 3:5, 6 gangamuchisye kuti namkulupilileje mnope Yehofa. Mwamti papali yakuyichisya yambone mnope ligongo lya kuchengako. Apano ngaŵa kuti tukwamba kombola kutaŵa Nyumba sya Uchimwene syejinji, nambo tulijiganyisye kupeleka yindu mmatala gakulekanganalekangana ni chakulinga chakuti abale ni alongo kulikose asamalilidweje mwakulandana.”

13. (a) Ana Gidiyoni nganakayichilaga ya chichi? (b) Ana achakulungwa ŵa mumpingo mpaka amsyasye chamtuli Gidiyoni? (Alole chiwulili.)

¹³ Alosyeje kulimba mtima pakutenda yakusasaka Yehofa. Gidiyoni jwampikanilaga Yehofa atamose kuti ndaŵi sine umi wakwe waŵaga pangosi. (Ŵak. 9:17) Gidiyoni pajwapikene maloŵe ga Yehofa gakumsalila kuti chachimkamuchisya pachachachenjelaga ŵandu ŵakwe, jwalakwe nganakayichila yeleyo. Achakulungwa ŵa mumpingo ŵakutama mmadela gele masengo getu ŵagalekasisye akusamsyasya Gidiyoni. Mwakulimba mtima jemanjaji akusalongolela misongano ja mpingo soni masengo gakulalichila. Jemanjaji akusatenda yeleyi atamose kuti akusaŵa pangosi jakuti mpaka ataŵidwe, kutyosyedwa masengo, kapena kuwulasidwa kwene. c Pandaŵi ja yakusawusya yekulungwa, achakulungwa ŵa mumpingo chachisosekwa kuŵa ŵakulimba mtima kuti chakomboleje kupikanila malangiso gachachipochelaga atamose yili mkuwoneka kuti kukuya malangisogo chikuŵiche umi wawo pangosi. Komboleka malangiso gachachipochelagago gachiŵa mwatuchilalichililaga utenga wakuwelusya, soni yatuchitenda kuti chitukulupuche pachachitujimuchila Gogi jwa chilambo cha Magogi.—Esek. 38:18; Chiw. 16:21.

14. Ana kupilila kwa Gidiyoni kwalinjidwe chamtuli?

¹⁴ Gidiyoni jwasosekwaga kutenda yindu mwakulimbichila kuti akombole kutumichila mpela jwakulamula. Amidiyani paŵatilaga pa ngondo jaŵamenyanaga chilo, Gidiyoni ŵatopwesye jemanjajo mpaka ku Chiwata cha Yesilele mpaka kuja kwika ku Lusulo lwa Yolodani, lwele komboleka lwasungulilidwe ni ngalango. (Ŵak. 7:22) Ana Gidiyoni jwalesile  kwatoposya jemanjajo pajwayiche ku Lusulo lwa Yolodani? Iyayi. Atamose kuti jwalakwe yimpepe ni asilikali ŵakwe ŵakwana 300 ŵaliji ali apesile mnope, ŵapitilisye kwatoposya jemanjajo mpaka ŵajombweche lusulolo. Pambesi pakwe, Gidiyoni ni asilikali ŵakwe ŵakamwile Amidiyaniwo mwamti ŵagomeche.—Ŵak. 8:4-12.

15. Ana ni ndaŵi japi jele kupilila kwa jwamkulungwa jwa mumpingo mpaka kulinjidwe?

¹⁵ Ndaŵi sine jwamkulungwa jwa mumpingo mpaka alipikaneje kuŵa jwakupela mnope ni kuyiwonaga kuti nganaŵa akombwele kuwulongolela mpingo soni liŵasa lyakwe. Payitendekwe yeleyi, ana achakulungwa ŵa mumpingo mpaka amsyasye chamtuli Gidiyoni?

16-17. Ana chichi chachamkamuchisye Gidiyoni kuti akombole kupilila? Ana achakulungwa ŵa mumpingo akusosekwa kusimichisya ya chichi? (Yesaya 40:28-31) (Alole chiwulili.)

¹⁶ Akulupilileje yakuti Yehofa chachapa machili. Gidiyoni jwakulupililaga kuti Yehofa champe machili, mwamti yeleyi ni yaŵatesile Yehofa. (Ŵak. 6:14, 34) Pandaŵi jine, Gidiyoni yalumo ni asilikali ŵakwe ŵatoposyaga achayimwene ŵaŵili ŵa Chimidiyani. Pandaŵiji achayimwenewo ŵaliji ali akwesile ngamila syawo, nambo Gidiyoni ni asilikali ŵakwe ŵawutukaga wapasi. (Ŵak. 8:12, 21) Nambope, Mlungu ŵakamuchisye jemanjajo kuti ŵakamule achimmagongo ŵawowo mwamti ŵagomeche. Nombe achakulungwa ŵa mumpingo akusamdalila mnope Yehofa jwali Mlungu “jwangapela.” Mwamti jwalakwe chachipeleka machili kwa achakulungwaŵa pandaŵi jakusosechela.—Aŵalanje Yesaya 40:28-31.

¹⁷ Alole yayamtendechele M’bale Matthew jwakusatumichila mu Komiti Jakuŵechetana ni Ŵachipatala. Ana chichi chachamkamuchisye jwalakwe kuti akombole kupilila? M’baleju jwasasile kuti, “Yehofa jwambaga machili mpela mwalikusaŵechetela lilemba lya Afilipi 4:13. Ndaŵi syejinji pambesile mnope, namŵendaga Yehofa kuti ambe machili kuti ngombole kwakamuchisya abale ni alongo. Mwamti pambopesile, nayiwonaga kuti Yehofa ambele machili gakungamuchisya kuti ngombole kupilila.” Achakulungwa ŵa mumpingo mpaka asimane ni yakusawusya pakwasamalila abale ni alongo mpela muyaŵelele ni Gidiyoni. Nambope jemanjaji akusasosekwa kumbuchila kuti ndaŵi sine nganaŵa akombwele kutenda yindu yosope yakusaka kutenda. Jemanjaji akusakulupilila kuti Yehofa chachipikana mapopelo gawo mwamti chachapa machili gakwakamuchisya kuti akombole kupilila.—Sal. 116:1; Afil. 2:13.

18. Mwakamulana ni yatulijiganyisye munganiji ana achakulungwa ŵa mumpingo mpaka amsyasye chamtuli Gidiyoni?

¹⁸ Achakulungwa ŵa mumpingo mpaka alijiganye yindu yejinji kutyochela kwa Gidiyoni. Jemanjaji akusasosekwa kuŵa ŵakulinandiya mwakulolechesya kuti akupochela masengo gampaka agakombole kugakamula. Akusosekwasoni kulinandiya ŵane pakwajimba magambo kapena kwachimbichisya mnope. Achakulungwaŵa akusosekwa kulosya kulimba mtima soni kuŵa ŵakupikanila mnopemnope apano pele mbesi ja chilambochi jiŵandichile. Nambosoni mwangasamala kandu ni yakusawusya yakusimana nayo, jemanjaji akusosekwa kukulupililaga mnope kuti Mlungu chachakamuchisya. Kusala yisyene tukusayamichila achakulungwaŵa soni ‘kwachimbichisya mnope.’—Afil. 2:29.