1-2. Mpela muyaŵelele ni Loti, ana Aklistu masiku agano akusasimana ni yakusawusya yamtuli?

 PATUKUSIWONA ndamo syakusakala pachilambopa, tukusapikana m’mitima jetu mpela mujwapikanile mundu jwakulupichika Loti. Jwalakwe “ŵaliji mkulagasika mnope ni ndamo jakulijasilila ja ŵandu ŵangapikanila.” Jwatesile yeleyi ligongo jwamanyililaga kuti Atati ŵetu ŵakwinani akusaŵengana ni ndamo syakusakala. (2 Pet. 2:7, 8) Ligongo lyakuti Loti jwamchimbichisyaga soni kumnonyela Mlungu, jwalakwe jwaŵenganaga ni ndamo syakusakala syaŵatendaga ŵandu ŵa mundaŵi jakwe. M’wejisoni tukutama ni ŵandu ŵangakukuya ndamo syambone sya Yehofa. Atamose yili myoyo, mpaka tukombole kupitilisya kukola ndamo syeswela naga tukusamnonyela soni kumchimbichisya mnope jwalakwe.—Mis. 14:2.

² Yehofa akusatukamuchisya kuti tukombole kutenda yeleyi kupitila mmalangiso gagakusasimanikwa m’buku ja Misyungu. Myoyo abale ni alongo wosope chinga ali ŵachikulile kapena ŵachinandipile mpaka apindule mnope ni malangiso gagakusasimanikwa m’bukuji.

3. Mwakamulana ni Misyungu 17:3, ana ligongo limo lyapi lyalikusatutendekasya kuwuchenjela mtima wetu? (Alole chiwulili.)

³ Ligongo lyekulungwa lyalikusatutendekasya kuwuchenjela mtima wetu lili lyakuti Yehofa ni jwakusajilinga mitima jetu. (Aŵalanje Misyungu 17:3.) Jwalakwe chachipitilisya kutunonyela naga tukupitilisya kuganichisya malangiso gakwe gampaka gatukamuchisye kutama ni umi mpaka kalakala. (Yoh. 4:14) Kutenda yeleyi kuchitukamuchisya kuti tukawulala ni ndamo syakusakala syakutyochela kwa Satana soni kwa ŵandu ŵa mchilambochi. (1 Yoh. 5:18, 19) Unasi wetu ni Yehofa pawukukula mnope ni patukusatandasoni kumchimbichisya soni kumnonyela mnope. Ligongo lyakuti ngatukusasaka kwatumbilikasya Atati ŵetu, tukusaŵambalasoni atamose nganisyo syampaka situlongolele kutenda ulemwa. Patusimene ni yindu  yampaka yitulongolele kutenda ulemwa, tukusosekwa kuliwusyaga kuti, ‘Ana yisyene namtumbilikasye Mlungu jwakusanonyela mnope?’—1 Yoh. 4:9, 10.

4. Ana kumjogopa Yehofa kwamkamuchisye chamtuli mlongo jwine kuti akatenda chakulemwa?

⁴ Mlongo jwine jwa ku Croatia lina lyakwe Marta jwasimene ni yindu yayikamlongolele kutenda chikululu. Jwalakwe jwalembile kuti, “Nalasile mnope kuti ngombole kuganisya chenene soni kuti malane ni nganisyo syakumbila kutenda yakusakala. Nambo kumjogopa Yehofa kwangamuchisye mnope.” b Ana yeleyi yakomboleche chamtuli? Mlongoju jwasasile kuti jwaganichisyaga yakuyichisya yampaka asimane nayo naga akusagula kutenda yindu mwakulemwecheka. M’wejisoni mpaka tumsyasye mlongoju. Yakuyichisya yakutenda chakulemwa yikusaŵa kumtumbilikasya Yehofa, yayikusatendekasya kuti tukaŵa mu gulu ja ŵandu ŵakumtumichila jwalakwe mpaka kalakala.—Gen. 6:5, 6.

5. Ana yajwasimene najo M’bale Leo yajiganyisye chichi?

⁵ Naga tukusamjogopa Yehofa, tukusaŵambalasoni kunguluka ni ŵandu ŵakwete ndamo syakusakala. M’bale Leo jwakusatama ku Congo jwalijiganyisye yeleyi. Pali pamasile yaka mcheche kutyochela pajwabatisidwe, jwatandite kunguluka ni ŵandu ŵandamo syakusakala. M’baleju jwaganisyaga kuti pakuŵapo ngakutenda nawo yakusakala yakusatenda amchimjakwewo, nikuti ngakutenda chakulemwa chilichose pameso pa Yehofa. Nambo mkanipapite ndaŵi, achimjakwe ŵala ŵamtendekasisye kuti atande kukolelwa soni jwayikene pakutenda chikululu. Kaneko, m’baleju jwatandite ganichisya yaŵamjiganyisye achinangolo ŵakwe ŵaŵamtumichilaga Yehofa. Jwaganichisyagasoni yajwatiga pakusangalala pandaŵi jiŵamtumichilaga Yehofa. Ana yakuyichisya yakwe yaliji yamtuli? M’baleju jwatandilesoni kutenda yindu yambone. Achakulungwa ŵa mumpingo ali amkamuchisye, jwalakwe jwawujile kwa Yehofa. Apano m’baleju akumtumichila Yehofa mwakusangalala mwamti ali jwamkulungwa jwa mumpingo soni mpayiniya jwapadela.

6. Ana chitukambilane yisyasyo yiŵili ya achakongwe ŵapi?

 ⁶ Kwende tukambilane buku ja Misyungu chaputala 9. Mu chaputalachi tukusaŵalanga ya achakongwe ŵaŵili jwalunda soni jwakuloŵela. (Alole Aloma 5:14; Agalatiya 4:24.) Patukukambilana yeleyi akumbuchilejesoni kuti paja chilambo cha Satanachi chigumbele ni yindu yejinji yakulimbikasya chikululu soni yakuŵagula. (Aef. 4:19) Myoyo luli lunda kulingagalingaga kupitilisya kumjogopa Mlungu soni kuyiŵambalaga yakusakala. (Mis. 16:6) Kusala yisyene yachikusasala chaputalachi mpaka yitukamuchisye wosopewe. Achakongwe ŵaŵili ŵakwakolanga mu chaputalachi akwawanichisya kuti jwalijose akwaŵilanga “ŵandu ŵangali lunda.” Jwalijose akuŵecheta maloŵe mpela gakuti, ‘Msepuchile akuno tulye.’ (Mis. 9:1, 5, 6, 13, 16, 17) Nambo ŵandu ŵakuŵilanjidwawo akutenda yindu mwakulekangana mnope.

7. Mwakamulana ni Misyungu 9:13-18, ana chichatendechela chichi ŵandu ŵakusapikanila kuŵilanga kwa jwamkongwe jwakuloŵela? (Alole chiwulili.)

⁷ Aŵambaleje kujigalika nganisyo ni “jwamkongwe jwakuloŵela.” (Aŵalanje Misyungu 9:13-18.) Jwalakwe akusiŵaŵilanga ŵandu ŵangali lunda kuti “msepuchile akuno” kuti mlye. Ana pakusaŵa yakuyichisya yamtuli? “Kweleko ni kuchili chiwa.” Komboleka mpaka tukumbuchile kuti maloŵe gakuwanichisyaga gakusasimanikwa kundanda kwa buku ja Misyungu. Maloŵega gakusatukalamusya ya “jwamkongwe jwachigwagwa” soni jwakwendajenda. Tukusasalilidwasoni kuti, ‘naga tukwawula ku nyumba ja jwele jwamkongwejo, nikuti tukwenda m’litala lyakuja ku chiwa.’ (Mis. 2:11-19) Pa Misyungu 5:3-10 pakusatukalamusyasoni ya “jwamkongwe jwachigwagwa” kuti “sajo syakwe sikuselelechela ku chiwa.”

8. Ana tukusasosekwa kusagula kutenda chichi?

⁸ Ŵandu ŵakusapikanila kuŵilanga kwa “jwamkongwe jwakuloŵela” akusasosekwa kusagula yakutenda. Ana jemanjaji akusosekwa kumpikanila jwalakweju pakwaŵilanga kapena kumkana? M’wejisoni mpaka tusimane ni chakusagula mpelaga chelechi. Ana mpaka tutende yamtuli naga mundu jwine akusaka kuti tutende yindu yakusakala mpela kutenda chikululu kapena kulolela yakuŵagula pa intaneti?

9-10. Ana ni magongo gane gapi gagakusatutendekasya kuti tuŵambaleje ndamo ja chikululu?

⁹ Pana magongo gakupikanika gakututendekasya kuŵambala kutenda ndamo ja chikululu. Mwamti ‘jwamkongwe jwakuloŵelaju’ jwatite “Mesi ga wiyi gakusanong’a.” Ana ‘mesi ga wiyiga’ gakusaŵa gamtuli? Baibulo jikusalandanya kugonana kwa ŵandu ŵalombane ni mesi gakutamika mtima pasi. (Mis. 5:15-18) Ŵandu ŵalombene mwalilamusi ni ŵampaka asangalaleje pakutamila malo gamo mwiŵasa. Ana yeleyi yikusalekangana chamtuli ni “mesi ga wiyi?” Mesi gelega gakugopolela kutenda chikululu. Ŵandu ŵakusatenda chikululu akusatenda mwakusisa mpela mwakusatendela mundu jwawiyi pakwiŵa yindu. “Mesi ga wiyi”  mpaka gawoneche kuŵa gakunong’a kumwa kwa ŵandu ŵakutenda ulemwawo. Nambo chakutesya chanasa chili chakuti Yehofa akusalola yindu yosope yakutenda ŵandu. Myoyo naga Yehofa alesile kutunonyela chikusaŵa chindu chakupweteka mnope, mwamti chindu “chakunong’a” chila changaŵasoni chakunong’a. (1 Akoli. 6:9, 10) Nambo pana yinesoni yejinji.

¹⁰ Ndamo ja chikululu mpaka jatendekasyeje ŵandu kuliwona kuŵa ŵangasosekwa, kujigala msigo wangajembecheya nambosoni mpaka jitendekasye maŵasa kumala. Kusala yisyene mpaka luŵe lunda kuŵambala kwinjila “mnyumba” ja jwamkongwe jwakuloŵela soni kulya yakulya yakwe. Mwamti ŵandu ŵakusatenda ndamo ja chikululu ngakusaŵa paunasi wambone ni Yehofa nambosoni akusajigala yilwele yayikusiyatendekasya kuti awe mwachitema. Pa Misyungu 7:23, 26 soni chaputala 9 ndime 18 pakusamalisya ni maloŵe gakuti, “achalendo ŵa jwele jwamkongwejo ali kala m’malembe gakusokoka.” Nambo ligongo chichi ŵandu ŵajinji akusakunda kuŵilanjidwa ni jwamkongweju yayikusayatendekasya kuti asimene ni yakusawusya?—Mis. 9:13-18.

11. Ligongo chichi kulolela yakuŵagula kuli kwakogoya mnope?

¹¹ Chitega chine chatukusosekwa kuchiŵambala chili kulolela yakuŵagula. Ŵandu ŵane akusaganisya kuti kulolela yakuŵagula nganikuŵa kwakogoya. Nambotu kusala yisyene kulolela yakuŵagula kuli kwakogoya mnope ligongo kukusikwatendekasya ŵandu kuti akaliwonaga mwakuŵajilwa, akachimbichisyaga ŵane, soni yikusaŵa yakusawusya kuti aleche ndamoji. Mwamti yiwulili yakuŵagula yikusaŵa yamachili soni yakusawusya kuyityosya munganisyo mwawo. Nambosoni kulolela yakuŵagula kukusamtendekasya mundu kuti akumbileje kutenda yakusakala. (Akolo. 3:5; Yak. 1:14, 15) Kusala yisyene ŵandu ŵajinji ŵakusalolela yakuŵagula yikusaŵa yangasawusya kuti atende chikululu.

12. Ana mpaka tulosye chamtuli kuti tukuwuchenjela mtima wetu ku yindu yampaka yitutendekasye kutenda chikululu?

¹² Ana m’weji Aklistu ŵasyesyene tukusasosekwa kutenda chichi patuyiweni yiwulili yakuŵagula pa yipangiso yetu yamakono? Tukusasosekwa kuleka mwachitema kulola yiwuliliyo. Mpaka yiŵe yangasawusya kutenda yeleyi naga tukusakumbuchila kuti chindu chakusosekwa mnope kwa m’weji chili kuŵa paunasi wambone ni Yehofa. Atamose kuti yiwulili yine yangalosyaga kusyesyene yakuŵagula nambope mpaka yitutendekasye kukumbila yagonana. Myoyo tukusasosekwa kuyiŵambala yiwulili yeleyi. Tukusasosekwa kutenda yeleyi ligongo lyakuti ngatukusasaka amta panandi kutenda yindu yampaka yitulongolele kutenda ya chikululu. (Mat. 5:28, 29) Jwamkulungwa jwa mumpingo jwine line lyakwe David jwakusatama ku Thailand jwatite, “Ngusaliwusya kuti ‘Atamose kuti yiwuliliyi nganiyiŵa yakuŵagula, ana Yehofa mpaka asangalale naga ngupitilisyape kuyilola?’ Kuganisya kwamti myiyiku kukusangamuchisya kuti ndendeje yindu mwalunda.”

13. Ana chichi champaka chitukamuchisyeje kuti tutendeje yindu mwalunda?

¹³ Naga tukusatenda woga ni chindu chilichose champaka chimtendekasye Yehofa ngasangalala yichitukamuchisya kuti tutendeje yindu mwalunda. Kumjogopa Mlungu mwakuŵajilwa jili “ndandililo,” ja “lunda.” (Mis. 9:10) Yeleyi ayisasile mwakupikanika chenene kundanda kwa buku ja Misyungu chaputala cha 9, kwatukusaŵalangasoni ya jwamkongwe jwine jwakuwanichisya jwakusamkolanga kuti “lunda.”

14. Ana pa Misyungu 9:1-6 pana kuŵilanga kwamtundu wine wapi?

¹⁴ Aŵalanje Misyungu 9:1-6. Palilembali pana kuŵilanga kwa Yehofa, Mlungu juŵatupanganyisye jwali msyene lunda. (Mis. 2:6; Alo. 16:27) Tuŵalasile ya nyumba jekulungwa jajikwete njalamila msano ni siŵili. Yeleyi yikulosya kuti Yehofa ali jwakoloŵa magasa soni kuti jwalakwe akusiŵapochela wosope ŵakusaka kwiganyidwa ni jwalakwe kuti aŵe ŵalunda.

15. Ana Mlungu akutuŵenda kutenda chichi?

¹⁵ Yehofa ali jwakoloŵa makono mnope. Yeleyi  yikuwonechela mnope mu chisyasyo cha jwamkongwe jwa “lunda” chakuchilondesya mu buku ja Misyungu chaputala 9. Nganiji jikulondesya kuti jwamkongwe jwakuwanichisyaju alingenye chenene nyama jakwe, finyo jwakwe soni tebulo jakwe. (Mis. 9:2) Konjesya pelepa, mwakamulana ni ndime 4 soni 5, jwamkongweju kapena kuti lunda lusyesyene lukuŵecheta kwa “mundu jwangali lunda kuti, ‘Myiche mlye chakulya changu.’” Ligongo chichi tukusosekwa kwawula ku nyumba ja lunda lusyesyene ni kulya chakulya cha kweleko? Tukusosekwa kutenda yeleyi ligongo lyakuti Yehofa akusasaka kuti ŵanache ŵakwe aŵeje ŵalunda soni ŵakuteteyeka. Jwalakwe jwangasaka kuti m’weji tulijiganyeje liŵago lili mumtwe. Ni ligongo lyakwe jwalakwe “akusapeleka lunda lusyesyene kwa ŵandu ŵa chilungamo.” (Mis. 2:7) Patukumjogopa Yehofa mwakuŵajilwa tuchikola mtima wakusaka kutenda yindu yakumsangalasya jwalakwe. Nambosoni tuchipikanilaga lunda lusyesyene ni kulukamulichisyaga masengo mwakusangalala.—Yak. 1:25.

16. Ana kumjogopa Mlungu kwamkamuchisye chamtuli M’bale Alain kusagula yindu mwalunda? Ana yajwatesile m’baleju yakwete yakuyichisya yamtuli?

¹⁶ Kwende tukambilane chisyasyo cha M’bale Alain. Kumjogopa Mlungu kwamkamuchisye m’baleju kuti asagule yindu mwalunda. M’baleju ali jwamkulungwa jwa mumpingo soni mtichala. Jwalakwe jwatite, “Achimjangu ŵajinji ŵachalume ŵanakamulaga nawo masengo ŵagawonaga mafilimu gakulosya yakuŵagula kuti gagambile kuŵa majiganyo ga yagonana.” Nambo m’baleju jwayiwonaga kuti yeleyo nganiyiŵa yisyene. Jwalakwe jwasasile kuti, “Ligongo lya kumjogopa Mlungu nakanile kulolela mafilimugo. Nalondechesyesoni achimjangu ŵa kumasengowo ligongo lyalyandendekasisye kana kulolela mafilimugo.” M’baleju jwakamulichisye masengo malangiso gakutyochela ku “lunda lusyesyene” kuti akombole ‘kwenda mulitala lya umanyilisi.’ (Mis. 9:6) Kulimba mtima kwa M’bale Alain kwatendekasisye chidwi achitichala achimjakwe, mwamti ŵane mwa jemanjajo akulijiganya Baibulo soni kusimanikwa pa misongano ja mpingo.

17-18. Ana ŵandu ŵakusapikanila “lunda lusyesyene” akusasangalala ni yindu yambone yapi? Ana jemanjaji akwembecheya chichi kusogoloku? (Alole chiwulili.)

¹⁷ Yehofa jwakamulichisye masengo yisyasyo ya achakongwe ŵaŵili pakusaka kutukamuchisya kumanyilila yampaka tutende kuti tukole sogolo jambone. Ŵandu ŵakusapikanila kuŵilanga kwagumila kwa “jwamkongwe jwakuloŵela” akusaŵika nganisyo syawo pakutenda yakusakala. Chakutesya chanasa, jemanjaji ŵangamanyililaga kuti yakusatendagayo yichitendekasya kuti chasimane ni yakusawusya kusogoloku. Yakuyichisya ya yitendo yawo gachiŵa ‘malembe gakusokoka.’—Mis. 9:13, 17, 18.

¹⁸ Nambi uli pakwamba ya ŵandu ŵakusapikanila kuŵilanga kwa “lunda lusyesyene?” Jemanjaji akwete sogolo jambone, soni akusaŵa ŵakusangalala ligongo lyakuti akwete yindu yosope yakwakamuchisya  kupitilisya kuŵa paunasi wambone ni Yehofa. (Yes. 65:13) Kupitila mwa jwakulochesya Yesaya, Yehofa jwasasile kuti, “Mpikane, ni kutenda yinguŵecheta Une, mlyeje yakulya yambone, mlinonyelesyeje ni yakulya yakunakana.” (Yes. 55:1, 2) M’weji tukusalijiganya kutenda yindu yakusayinonyela Yehofa soni kuyiŵengaga yindu yakusayiŵenga jwalakwe. (Sal. 97:10) Tukusasangalala mnope patukwaŵilanjila ŵane kuti nombenawo apate “lunda lusyesyene.” Patukutenda yeleyi tukusaŵa mpela ŵamasengo ŵali ‘pamalo gakwela mnope mu msinda, ni kwenesyaga kuti, jwalijose jwali mundu jwangali lunda, ayiche akuno.’ Patukutenda yeleyi, m’weji pampepe ni ŵandu ŵakusatupikanilawo ngatukusagamba kupindula apanope. Nambo yikusatukamuchisya kuti tukombole kutama mpaka kalakala patukwenda ‘mulitala lya umanyilisi.’—Mis. 9:3, 4, 6.

19. Mwakamulana ni Jwakulalichila 12:13, 14, ana tukusosekwa kuŵa ŵakusimichisya kutenda chichi? (Alole libokosi lyakuti “Kumjogopa Mlungu Kukusatukamuchisya Mnope.”)

¹⁹ Aŵalanje Jwakulalichila 12:13, 14. Kwende wosopewe tupitilisyeje kumpikanila Yehofa ligongo yeleyi yichitukamuchisya soni kutuchenjela kundamo syakusakala patukutama m’masiku gakumalisya gakusakalaga. Patukutenda yeleyi yichitukamuchisya kuti tupitilisye kwaŵilanga ŵandu ŵajinji kuti nombenawosoni apate “lunda lusyesyene.”