1-2. Ana mpaka tukayichileje chichi pakwamba ya mapopelo getu?

 ANA pakwete pakayichile yakuti Yehofa akusajanga mapopelo gawo? Naga akwanga kuti elo, nganaŵa jika. Abale ni alongo ŵajinji akusalipikana mwakulandanamo pandaŵi jakupilila yakusawusya. M’wejisoni patukusimana ni yakusawusya mpaka yitusawusyeje kumanyilila yatite Yehofa pakwanga mapopelo getu.

² Kwende tukambilane ligongo lyakwe tukusasosekwa kuŵa ŵakusimichisya kuti Yehofa akusajanga mapopelo ga ŵakutumichila ŵakwe. (1 Yoh. 5:15) Chitukambilanesoni yiwusyo ayi: Ligongo chichi ndaŵi sine mpaka tuyiwoneje kuti Yehofa ngakwanga mapopelo getu? Ana masiku agano Yehofa akusajanga mapopelo getu mmatala gapi?

3. Ligongo chichi Yehofa akusasaka kuti tupopeleje kwa jwalakwe?

³ Malemba gakusatusimichisya kuti Yehofa akusatunonyela mnope soni kuti tuli ŵa mtengo wapenani kwa jwalakwe. (Hag. 2:7; 1 Yoh. 4:10) Ni ligongo lyakwe Yehofa akusatusalila kuti tupopeleje kwa jwalakwe kuti atukamuchisyeje. (1 Pet. 5:6, 7) Jwalakwe akusasaka kutukamuchisya kuti tuŵe najo paunasi soni kuti tukomboleje kupilila yakusawusya yetu.

4. Ana tukusamanyilila chamtuli kuti Yehofa akusajanga mapopelo ga ŵakutumichila ŵakwe? (Alole chiwulili.)

⁴ Ndaŵi syejinji, tukusaŵalanga m’Baibulo yakuti Yehofa ŵajanjile mapopelo ga ŵakutumichila ŵakwe. Ana pana chisyasyo chimo champaka achiganichisye? Uli pakwamba ya Daudi? Kwa umi wakwe wosope, jwalakwe ŵaŵele ali mkusimana ni achimmagongo ŵakogoya mwamti ndaŵi syejinji ŵaliji mkupeleka mapopelo gakumŵenda Yehofa kuti amkamuchisye. Mwamti pandaŵi jine, jwalakwe jwamŵendile Yehofa kuti, “Apikane lipopelo lyangu, ŵalakwe  AMBUJE. Atejele lipikanilo kuti akupikane kuchondelela kwangu. Anjanje ligongo lyakukulupichika kwawo ni kugoloka kwawo.” (Sal. 143:1) Yehofa ŵajanjile mapopelo ga Daudi gakuŵenda kumkulupusya mu yakusawusya yaŵasimanaga nayo. (1 Sam. 19:10, 18-20; 2 Sam. 5:17-25) Mwachikulupi Daudi jwayikene pakuŵecheta kuti, “AMBUJE ali pakuŵandichila mundu jwalijose jwakwaŵilanga.” M’wejisoni tukulupilileje yeleyi.—Sal. 145:18.

5. Ana ŵakutumichila ŵa Yehofa ŵakala ŵajanjidwaga ndaŵi syosope mapopelo gawo muŵaganichisyaga? Apeleche chisyasyo. (Alole chiwulili.)

⁵ Ndaŵi sine Yehofa nganaŵa ajanjile mapopelo getu mwatukuganichisya. Mwelemu ni mwayaŵelele ni ndumetume Paulo. Jwalakwe jwamŵendile Mlungu kuti amtochesye mchilu mwakwe “chakusoma mpela miŵa.” Paulo jwapopesile ya nganiji kwa maulendo gatatu. Ana Yehofa jwajanjile mapopeloga? Elo, nambo ngaŵa mulitala lyaŵaganichisyaga Paulo. Mmalo mwakumasya chakusawusyachi, Yehofa ŵampele jwalakwe machili gakumkamuchisya kuti apitilisye kumtumichila mwakulupichika.—2 Akoli. 12:7-10.

6. Ligongo chichi ndaŵi sine mpaka yiwonecheje mpela kuti Yehofa ngakwanga mapopelo getu?

⁶ Ndaŵi sine, m’wejisoni mapopelo getu mpaka gajanjidwe mwakulekangana ni mwatwaganichisyaga. Myoyo ndaŵi syosope tukakayichilaga yakuti Yehofa akusamanyilila litala lyambone lyakutupela chikamuchisyo. Jwalakwe mpaka atende “yindu yekulungwa mnope kupunda yosope yampaka tuŵende kapena kuyiganichisya.” (Aef. 3:20) Pa ligongo lyeleli, jwalakwe mpaka ajanje mapopelo getu pa ndaŵi soni m’litala lyanganituliganichisyaga.

7. Ligongo chichi ndaŵi sine tukusasosekwa kuchenga mapopelo getu? Apeleche chisyasyo.

⁷ Ndaŵi sine mpaka tusosekwe kuchenga mapopelo getu patumanyilile chenene chakulinga cha Yehofa. Kwende tukambilane yayamtendechele M’bale Martin Poetzinger. M’baleju ali agambile kulombela kwene ŵamtaŵile ni kumtumisya kundende ja Nazi jakulagachisya ŵandu. Ali agambile kwika kundendeku, jwapopesile kwa Yehofa kuti amkamuchisye kukopoka mundendemo. Jwaŵendaga yeleyi ni chakulinga chakuti akapitilisye kwasamalila ŵamkwakwe nambosoni kuti akatandilesoni masengo gakulalichila. Nambope, panyuma pa mawiki gaŵili jwalakwe nganawuwona umboni uliwose wakulosya kuti Yehofa chamkamuchisye kukopoka mundendemo. Mwamti kaneko jwachenjile lipopelo lyakwe ni kutanda kupopela kuti, “Yehofa chonde angamuchisye kumanyilila yakusaka wawojo kuti ndende.” Jwalakwe jwatandite kuganichisya yakusawusya yaŵasimanaganayosoni abale ŵane ŵaŵaliji  mundendemo. Jwayiweni kuti ŵajinji mwa abaleŵa ŵadandawulaga mnope ya achiŵamkwawo soni ŵanache ŵawo. Kaneko M’bale Poetzinger jwapopesile kwa Yehofa kuti, “Sikomo kwejinji Yehofa ligongo lya utumiki wasambanowu. Chonde angamuchisye kuti napakombole kwalimbikasya abaleŵa.” Mwamti kwa yaka 9 yiŵatemi mundendemo jwaliji mkwalimbikasya abaleŵa.

8. Ana ni mfundo syapi syatukusosekwa kusikumbuchilaga patukupopela?

⁸ Tukumbuchileje kuti Yehofa akwete chakulinga, soni kuti jwalakwe jwaŵisile ndaŵi jachachikwanilisya chakulinga chakwecho. Chakulingachi chikupwatikapo kumasya yakusawusya yosope yakusimana nayo ŵandu masiku agano, mpela ngosi syachilengedwe, yilwele soni chiwa. Yehofa chachikwanilisya chakulingachi kupitila mu Uchimwene wakwe. (Dan. 2:44; Chiw. 21:3, 4) Nambope, pandaŵi ajino Yehofa akundile kuti Satana alamulileje chilambochi. b (Yoh. 12:31; Chiw. 12:9) Myoyo naga apano Yehofa akumasya yakusawusya yosope yakusimana nayo ŵandu masiku agano, mpaka yiwonecheje mpela kuti Satana akulamulila chenene. Nambotu patukwembecheya kuti Yehofa akwanilisye chakulinga chakwechi, ngayikugopolela kuti jwalakwe ngatukamuchisyaga. Kwende tukambilane matala gane gakusakamulichisya masengo Yehofa pakutukamuchisya masiku agano.

9. Ana Yehofa akusatukamuchisya chamtuli patukusaka kusagula yakutenda? Apeleche chisyasyo.

⁹ Jwalakwe akusatupa lunda. Yehofa akusatusalila kuti chachitupa lunda kuti tukombole kusagula chenene yindu. Mwamti tukusasosekwa lunda lwa Mlungu patukutenda yakusagula yampaka yikwaye umi wetu wosope, mpela kulombela kapena ngalombela. (Yak. 1:5) Kwende tukambilane ya chisyasyo cha mlongo jwine lina lyakwe Maria. c Jwalakwe jwasangalalaga pajwatendaga upayiniya wakutamilichika pajwatandite chitomelo ni m’bale jwine. Mlongoju jwatite, “Patwatandite kusyoŵekana mnope ni patwatanditesoni kutenda yindu mwakujigalika mnope. Namanyililaga kuti nasosekwaga kusagula yakutenda. Mwamti najipopelele nganiji kwandaŵi jelewu. Nasosekwaga kuti Yehofa alongolele, nambosoni namanyililaga kuti Yehofa nganaŵa asagulile yakutenda.” Mlongoju jwatandite kuyiwona kuti Yehofa ajanjile mapopelo gakwe. Ana ŵamjanjile chamtuli? Pajwawungunyaga m’mabuku getu, jwapatile ngani syasyamkamuchisye kwanga yiwusyo yakwe. Jwapikanilesoni malangiso gaŵamsalile mamagwe ŵaŵaliji ŵakulupichika. Malangisoga gamkamuchisye mlongoju kumanyilila naga akutenda yindu mwakujigalika kapena iyayi. Mwamti pambesi pakwe yamkamuchisye kusagula chenene.

10. Mwakamulana ni Afilipi 4:13, ana Yehofa chachitenda yamtuli pakwakamuchisya ŵakutumichila ŵakwe ŵakulupichika? Apeleche chisyasyo. (Alole chiwulili.)

¹⁰ Jwalakwe akusatupa machili kuti tukomboleje  kupilila. Mpela muŵatendele ni ndumetume Paulo, Yehofa chachitupa machili gatukusosekwa kuti tukombole kuyiŵambala yakusawusya. (Aŵalanje Afilipi 4:13.) Agambe ganichisya yaŵatesile Yehofa pakumkamuchisya M’bale Benjamin kuti akombole kupilila yakusawusya. Pachinyamata chakwe chosope, M’baleju ni ŵamwiŵasa mwakwe ŵatamaga ku kampu ku Africa. M’baleju jwasasile kuti, “Ndaŵi syosope namŵendaga Yehofa kuti ambe machili kuti ndendeje yindu yakumchimbichisya jwalakwe. Mwamti Yehofa jwajanjile mapopelo gangu mwakumba mtendele wa mumtima, machili gakuti mbitilisye kulalichila soni mwakumba mabuku kuti mbe jwakulimba mwausimu.” Jwasasilesoni kuti, “Kuŵalanga ngani syakwamba yaŵasimene nayo abale ni alongo soni yaŵatite Yehofa pakwakamuchisya jemanjaji kupilila, yangamuchisye kupitilisya kuŵa jwakulupichika.”

11-12. Ana Yehofa mpaka ŵakamulichisye masengo chamtuli abale ni alongo ŵetu pakwanga mapopelo getu? (Alole chiwulili.)

¹¹ Jwalakwe akusatukamuchisya kupitila mwa abale ni alongo ŵetu. Yesu jwapopesile mwakuchondelela pa chilo chakuti malaŵi gakwe chapeleche umi wakwe mpela mbopesi. Jwalakwe jwamŵendile Yehofa kuti ŵakamuchisye ŵandu kuti akamganichisyaga kuti ali jwakunyosya Mlungu. Mmalo mwakutenda yaŵaŵendile Yesuyi, Yehofa ŵamjanjile mwakumtumichisya lilayika kuti limlimbikasye. (Luk. 22:42, 43) Yehofa mpaka atukamuchisyesoni m’weji kupitila mwa abale ni alongo ŵampaka atujimbile foni kapena kutujendela kuti atulimbikasye. Kusala yisyene, wosopewe tukwete udindo wakuŵecheta “maloŵe gambone” kwa ŵakulupilila achimjetu—Mis. 12:25.

¹² Kwende tukambilane yayamtendechele mlongo jwine lina lyakwe Miriam. Pali pamasile mawiki gamnono panyuma pakuti ŵamkwakwe awile, mlongoju jwatamaga jika mwamti jwatamilaga kudandawula. Jwalakwe jwatamilaga kulila, mwamti jwasakaga mnope ali amsalile mundu jwine muŵapikanilaga mumtima. Jwalakwe jwatite, “Nganingola machili gakuti mpaka namjimbile foni jwalijose, nambo nagambile kupopela kwa Yehofa. Pandaŵi janalilaga soni kupopelaji, nagambile kupikana foni jangu jili mkuŵilanga. Juŵajimbileju jwaliji jwamkulungwa jwa mumpingo.” Kusala yisyene jwamkulungwa jwa mumpingoju soni ŵamkwakwe ŵamlimbikasisye mnope Miriam. Mlongoju jwayiweni kuti Yehofa ni juŵamtendekasisye m’baleju kuti amjimbile foni.

13. Asale chisyasyo chakulosya yakusatenda Yehofa pakwanga mapopelo getu pakamulichisya masengo ŵandu ŵangakusamtumichila?

 ¹³ Jwalakwe akusakamulichisya masengo ŵandu ŵangakusamtumichila. (Mis. 21:1) Ndaŵi sine Yehofa akusajanga mapopelo getu pakamulichisya masengo ŵandu ŵangakusamtumichila. Mwachisyasyo, jwalakwe jwakamulichisye masengo Mwenye Alitakisesi kuti amkunde Nehemiya kuja kukamuchisya kutaŵasoni msinda wa Yelusalemu. (Neh. 2:3-6) Masiku aganosoni, Yehofa mpaka akamulichisye masengo ŵandu ŵangakusamtumichila kuti atukamuchisye.

14. Ana ni chichi chachikwatendekasya chidwi ni yayamtendechele Mlongo Soo Hing? (Alole chiwulili.)

¹⁴ Mlongo jwine lina lyakwe Soo Hing jwayiweni kuti Yehofa ŵamkamuchisye kupitila mwa dokotala juŵakamuchisyaga. Mwanache jwakwe jwamlume jwalagaga ni ulwele wakulagasika nganisyo. Mwanacheju pajwatesile ngosi jekulungwa, achinangolo ŵakwe ŵaganisisye yakuleka masengo kuti amsamalileje. Yeleyi yatendekasisye kuti alajeje pa kapate ka mbiya. Mlongoju ngamkanakombola kupilila yakusawusyayi. Myoyo jwapopesile kwa Yehofa kutyochela pasi pamtima kuti amkamuchisye. Dokotala jula pajwayiweni yayamtendechele mlongoju yamkwayiye mnope soni jwatesilepo kandu. Mwamti mlongoju jwapatile upile wakupochela chikamuchisyo cha boma soni malo gambone gakutama. Kaneko jwalakwe jwatite, “Twayiweni kuti Yehofa jwatukamuchisye. Kusala yisyene Yehofa ali ‘jwakupikana lipopelo.’”—Sal. 65:2.

15. Ana ni chichi chachamkamuchisye Mlongo jwine kumanyilila kuti Yehofa ŵajangaga mapopelo gakwe?

¹⁵ Ndaŵi sine Yehofa jwangajanga mapopelo getu mwakuwonechela. Nambo yakusati pakwanga mapopeloga yikusatukamuchisya kuti tupitilisye kuŵa ŵakulupichika kwa jwalakwe. Myoyo tutendeje chidwi ni yakusati Yehofa pakwanga mapopelo getu. Mlongo jwine lina lyakwe Yoko jwaganisyaga kuti Yehofa ngakwanga mapopelo gakwe. Kaneko jwatandite kulemba yindu yaŵamŵendaga Yehofa. Mkupita kwa ndaŵi jwatandite kulola m’buku jiŵalembaga jila, ni jwayiweni kuti Yehofa ŵaliji ali amjanjile mapopelo gejinji, kupwatikapo yindu yaŵaliŵalile kuti ŵaŵendile. M’wejisoni ndaŵi syosope tukusosekwa kulolaga yakuti Yehofa pakwanga mapopelo getu.—Sal. 66:19, 20.

16. Ana mpaka tulosye chamtuli chikulupi pangani ja mapopelo getu? (Ahebeli 11:6)

¹⁶ Tukusalosya kuti tukusamkulupilila Yehofa patukupopela nambosoni kwitichisya yakuti  pakwanga mapopelo getu. (Aŵalanje Ahebeli 11:6.) Kwende tukambilane chisyasyo cha M’bale Mike ni ŵamkwakwe lina lyawo Chrissy. Jemanjaji ŵakwete chakulinga chakuti akatumichileje pa Beteli. Mike jwasasile kuti, “Kwa yaka yejinji twawuchisyaga utumikiwu soni kupopela kwa Yehofa kuti atukamuchisye kukwanilisya chakulingachi, nambo nganatuŵilangaga.” Mike ni Chrissy ŵakulupililaga kuti Yehofa akumanyilila utumiki wampaka atende chenene jemanjaji. Mwamti ŵapitilisye kutenda yiliyose yampaka akombole mwakutumichila mpela apayiniya ŵakutamilichika kudela kukwasosechelaga ŵakulalichila ŵajinji soni kamuchisya nawo pa masengo gayakutaŵataŵa. Apano ali ŵakulolela dela. Mike jwatite, “Yehofa nganajanga mapopelo getu mwatwaganichisyaga, nambo kusala yisyene jwalakwe jwatujanjile mapopeloga m’litala lyambone mnope kulekangana ni mwatwaganichisyaga.”

17-18. Mwakamulana ni Salimo 86:6, 7, ana tuŵeje ŵakusimichisya ya chichi?

¹⁷ Aŵalanje Salimo 86:6, 7. Jwamasalimo Daudi jwaliji jwakusimichisya kuti Yehofa ŵapikene soni kwanga mapopelo gakwe. M’wejisoni mpaka tukole chikulupi chelechi. Yisyasyo yatukambilene munganiji yikutusimichisya kuti Yehofa akusatupa lunda soni machili gatukusosechela kuti tupilileje yakusawusya. Jwalakwe mpaka akamulichisye masengo abale ni alongo kapena ŵandu ŵangakusamtumichila jwalakwe kuti atukamuchisye.

¹⁸ Atamose kuti Yehofa nganaŵa ajanjile mapopelo getu mwatukuganichisya, nambope tukusamanyilila kuti chachijanga. Jwalakwe akusatukamuchisya mwakutupa yatukusosechela pandaŵi jakwe. Myoyo apitilisye kupopela ali mkukulupilila kuti Yehofa chiŵasamalileje apano nambosoni kuti chachipeleka yachikusaka “chachijumi chilichose” m’chilambo chasambano chatukwembecheya.