1. Ana Baibulo jikusachilondesya chamtuli chinonyelo chisyesyene?

 “MALAMBA ga chinonyelo gali mpela kolela kwa moto, lilamba lya Ya. Mesi gejinji ngaŵa mkusimisya chinonyelo, soni sulo ngaŵa mkuchikokolanya chinonyelo.” b (Nyi. 8:6, 7, NWT.) Maloŵega gakusala mwakupikanika chenene ya chinonyelo chisyesyene soni gali gakulimbikasya kwa ŵandu ŵalombane. Kusala yisyene, mpaka akombole kunonyelana yisyesyene mu ulombela mwawo.

2. Ana ŵandu ŵalombane akusasosekwa kutenda chichi kuti chinonyelo chawo chikatanda kunandipa?

² Yikusasosekwa kulimbichila kuti ŵandu ŵalombane anonyelaneje kwa umi wawo wosope. Yeleyi mpaka tuyilandanye ni moto watukusajotaga. Kuti motowo upitilisye kolela tukusasosekwa kwisilila. Nambo naga tukuleka kukwisililako, mwapanandipanandi motowo mpaka usime. Mwakulandana ni yeleyi, chinonyelo cha ŵalombane mpaka chipitilisye kukula naga jemanjajo akulimbisya unasi wawo. Nambope ndaŵi sine, chinonyelo cha ŵalombaneŵa mpaka chitande kunandipa pakusimana ni yakusawusya mpela kusoŵa kwa mbiya, yilwele, soni kulagasika nganisyo pangani ja kalele ka ŵanache. Myoyo naga wawojo ali paulombela, ana mpaka apitilisye chamtuli kutendekasya “lilamba lya Ya” kuti likasima mu ulombela mwawo? Munganiji chitukambilane mfundo sitatu syakutukamuchisya kulimbisya unasi wetu nambosoni kukola ulombela wakusangalasya. c

3. Ana kuŵa paunasi wambone ni Yehofa kukusakamuchisya chamtuli ŵalombane kupitilisya kunonyelana? (Jwakulalichila 4:12) (Alole chiwulili.)

³ Kuti “lilamba lya Ya” likasima mwiŵasa, ŵalombane akusasosekwa kulimbisya unasi wawo ni Yehofa. Ana kutenda yeleyi mpaka kulimbisye chamtuli ulombela? Naga ŵalombane akusawuwona unasi wawo ni Yehofa kuŵa wakusosekwa mnope yikusaŵa yangasawusya kuti akamulichisyeje masengo malangiso gakusapeleka jwalakwe. Yeleyi yikusiyakamuchisya kuŵambala soni kumalana ni yakusawusya yampaka yitendekasye chinonyelo chawo kunandipa. (Aŵalanje Jwakulalichila 4:12.) Ŵandu ŵali paunasi wambone ni Yehofa akusatenda yiliyose yampaka akombole kuti amsyasyeje jwalakwe. Mwamti akusajigalila ndamo syakusalosya jwalakwe mpela kwatendela ŵane yambone, kwalosya chanasa, soni kwakululuchila. (Aef. 4:32–5:1) Naga ŵalombane akulosya ndamosi yikusaŵa yangasawusya kuti chinonyelo chawo chikule. Mlongo jwine lina lyakwe Lena atemi peŵasa kwa yaka yakupunda 25. Jwalakwe jwatite, “Yikusaŵa yangasawusya kumchimbichisya soni kumnonyela mundu jwakusalipeleka mnope pakumtumichila Yehofa.”

4. Ana ligongo chichi Yehofa jwasagwile Yosefe ni Maliya kuti aŵe achinangolo ŵa Mesiya?

⁴ Kwende tukambilane chisyasyo cha m’Baibulo. Yehofa paŵasagulaga liŵasa lyele lichiŵa achinangolo ŵa Mesiya, ŵasagwile Yosefe ni Maliya pasikati pa yisukulu yejinji ya Daudi. Ligongo chichi ŵasagwile jemanjaji? Jemanjaji ŵaliji paunasi wambone ni Yehofa. Soni Yehofa jwamanyililaga kuti ulombela wawo uchiŵa wakulimba ligongo lyakuti ŵamnonyelaga mnope jwalakwe. Ana ŵalombane mpaka alijiganye chichi kutyochela kwa Yosefe ni Maliya?

5. Ana achalume ŵalombele mpaka alijiganye chichi kutyochela kwa Yosefe?

⁵ Yosefe jwaliji jwamlume jwambone ligongo jwaliji jwakoseka kukamulichisya masengo malangiso ga Yehofa. Kwa maulendo gatatu, jwalakwe jwapochele malangiso kutyochela kwa Mlungu gakwaya liŵasa lyakwe. Paulendo uliwose waŵapochele malangiso, jwalakwe jwapikanilaga atamose kuti yaŵaga yakusawusya. (Mat. 1:20, 24; 2:13-15, 19-21) Kukuya malangiso ga Mlungu kwamkamuchisye Yosefe kuti amchenjeleje, kumkamuchisya soni kumpa Maliya yindu yaŵasosechelaga. Kusala yisyene muŵatendelaga yindu Yosefe yamkamuchisye Maliya kuti amnonyeleje soni kumchimbichisya mnope jwalakwe. Achalume mpaka ajigalile chisyasyo cha Yosefe pakukamulichisya masengo malangiso ga m’Baibulo pakusamalila liŵasa lyawo. d Naga akukamulichisya masengo malangisoga, atamose yili yakuti chasosekwe kuchenga yindu yine yakwe, akusalosya kuti akusiŵanonyela ŵamkwawo soni kulimbisya unasi wawo. Mlongo jwine jwa ku Vanuatu, jwaŵele pa liŵasa kwa yaka yakupunda 20 jwatite, “Ŵamkwangu pakuwungunya soni kukamulichisya masengo malangiso ga Yehofa yikusangamuchisya kuti nachimbichisyeje mnope. Yeleyi yikusandendekasya kulipikana kuti  ndili pamalo gambone. Nambosoni yikusangamuchisya kukamulana ni yindu yasagwile.”

6. Ana achakongwe ŵalombele mpaka alijiganye chichi kwa Maliya?

⁶ Maliya jwaliji paunasi wambone ni Yehofa, mwamti jwakombolaga kutenda yindu yakumkamuchisya kola chikulupi chakulimba. Jwalakwe jwagamanyililaga chenene Malemba. Jwapatagasoni ndaŵi jakuganichisya Malembago. (Luk. 2:19, 51) Kusala yisyene, yeleyi yamkamuchisye Maliya kuŵa jwamkongwe jwambone mnope. Masiku aganosoni, achakongwe ŵajinji akusalipeleka mnope pakutenda yindu mpela muŵatendelaga Maliya. Mwachisyasyo, mlongo jwine lina lyakwe Emiko jwatite, “Panaliji mkanilombedwe nakwete ndandanda jakutendela yindu yausimu. Nambo panalombedwe, nayikopochele kuti chikulupi changu chitandite kudalila mnope pa yindu yaŵatendaga ŵamkwangu ligongo ni ŵaŵatupelechelaga mapopelo soni kulongolela kulambila kwa peŵasa. Kaneko nayiweni kuti ngusosekwa kutwichila katundu jwangu pangani jakuŵa paunasi wambone ni Yehofa. Apano ngusapata ndaŵi jakupopela, kuŵalanga Malemba, soni kuganichisya yambalasileyo.” (Agal. 6:5) Myoyo jemanja achakongwe, naga mkupitilisya kulimbisya unasi wenu ni Yehofa, yichakamuchisya achiŵamkwenu kuti amchimbichisyeje soni kumnonyela.—Mis. 31:30.

7. Ana ŵalombane mpaka alijiganye chichi kwa Yosefe ni Maliya pakwamba ya kumtumichila Yehofa yimpepe?

⁷ Yosefe ni Maliya ŵatendelaga yindu yalumo kuti alimbisye unasi wawo ni Yehofa. Jemanjaji ŵamanyililaga kusosekwa kwakumtumichila Yehofa yimpepe. (Luk. 2:22-24, 41; 4:16) Komboleka kuti yeleyi yaŵaga yakusawusya liŵasa lyawo palyakulaga, nambope ŵakombolaga kuyitenda. Kusala yisyene chelechitu chili chisyasyo chambone mnope kwa ŵandu ŵalombane masiku agano. Naga akwete ŵanache mpela muyaŵelele ni Yosefe ni Maliya, mpaka ayiwoneje kuŵa yakusawusya kuja kusimanikwa pa misongano soni kutenda kulambila kwa peŵasa. Mpaka yiŵejesoni yakusawusya mnope kupopela soni kulijiganya yalumo ni ŵamkwawo. Nambope, akumbuchileje kuti kumtumichila yimpepe Yehofa kuchakamuchisya kuti aŵe najo paunasi wakulimba soni kuchakamuchisya kuŵa ŵakunonyelana. Myoyo akuwoneje kumtumichila Yehofa kuŵa kwakusosekwa mnope.

8. Ana liŵasa lyalikusimana ni yakusawusya mpaka litende yamtuli kuti lipinduleje ni kulambila kwa peŵasa?

⁸ Nambi uli naga akusimana ni yakusawusya mu liŵasa lyawo? Pelepa nikuti kutendela yalumo kulambila kwa peŵasa mpaka kuwonecheje kuŵa kwangasangalasya. Naga mwelemu ni mwayiŵelele mu liŵasa lyawo, mpaka yiŵe chenene kutanda ni kukambilana ngani jejipi soni jakusangalasya jakamulene wosope kuti akambilane. Kutenda yeleyi mpaka kulimbisye unasi wawo soni kusya chidwi chawo chakutendela yalumo yindu yakwayana ni kumtumichila Mlungu.

9. Ana ligongo chichi ŵalombane akusosekwa kupataga ndaŵi jakunguluchila yalumo?

⁹ Ŵandu ŵalombane mpaka apitilisye kunonyelana naga akupata ndaŵi jakunguluchila yalumo. Kutenda yeleyi mpaka kwakamuchisye kuti amanyilileje mwakuganichisya soni mwakupikanila ŵamkwawo. (Gen. 2:24) Alole yaŵayikopochele Lilia ni Ruslan panyuma pakuti agambile kulombana kwene yaka 15 yipiteyo. Jwamkongwe jwa muliŵasali jwatite, “Twayikopochele kuti nganitupataga ndaŵi jejinji jakunguluchila yalumo mpela mwatwaganichisyaga. Twatanganidwaga ni yindu mpela masengo getu, kulinganya panyumba, soni kwasamalila ŵanache. Twayiweni kuti naga ngatukulinganya yakupata ndaŵi jakunguluchila yalumo, unasi wetu mpaka utande kumala.”

10. Ana ŵalombane mpaka akamulichisye masengo chamtuli mfundo jakusimanikwa pa Aefeso 5:15, 16?

¹⁰ Ana ŵalombane akusosekwa kutenda chichi kuti apateje ndaŵi jakunguluchila yalumo? Akusasosekwa kupata ndaŵi jakuti akungulucheje yalumo. (Aŵalanje Aefeso 5:15, 16.) M’bale jwine jwa ku Nigeria lina lyakwe Uzondu jwatite, “Pangulinganya ndandanda ja yindu yangusosekwa  kutenda ngusapwatikapo ndaŵi jangusosekwa kunguluka ni ŵamkwangu, mwamti ndaŵi jeleji ni jajikusaŵa jakusosekwa mnope pa pologalamu jangu.” (Afil. 1:10) Kwende tulole yakusatenda mlongo jwine lina lyakwe Anastasia pakamulichisya chenene masengo ndaŵi jakwe. Mlongoju ŵamkwakwe ali ŵakulolela dela ku Moldova. Jwalakwe jwatite, “Ngusalolechesya kuti ngukamula masengo gangu ŵamkwangu pakutenda yindu yakwayana ni utumiki wawo. Yeleyi yikusatukamuchisya kupata ndaŵi jakunguluchila yalumo panyuma pakwe.” Nambi uli naga yakusatendaga yikusiyalepelekasya kupata ndaŵi jakunguluchila yalumo?

11. Ana ni masengo gapi gaŵakamulilaga yalumo Akula ni Pulisika?

¹¹ Ŵalombane mpaka alijiganye kutyochela ku chisyasyo cha Akula ni Pulisika. Aklistu ŵa mu yaka 100 yandanda ŵaliyamichilaga mnope liŵasali. (Alo. 16:3, 4) Atamose kuti Baibulo jangalondesyaga yejinji yakwamba liŵasali, nambope jikusasala kuti jemanjaji ŵakamulaga masengo, kulalichila, soni kwakamuchisya ŵane. Yindu yosopeyi ŵatendelaga yalumo. (Mase. 18:2, 3, 24-26) Mwamti Baibulo pajikusala ya Akula ni Pulisika jikusijakolanga jemanjaji yalumo.

12. Ana ŵalombane mpaka atende uli kuti akoleje ndaŵi jakunguluchila yalumo? (Alole chiwulili.)

¹² Ana ŵalombane mpaka alijiganye chichi kwa Akula ni Pulisika? Aganichisye ya yindu yakusasosekwa kutenda wawojo soni ŵamkwawo. Ana nganaŵa alinganyisye yakutendela yalumo ni ŵamkwawo yindu yeleyo mmalo mwakuyitenda jikape? Mwachisyasyo, Akula ni Pulisika ŵalalichilaga yalumo. Ana akusalinganya yakuti alalichileje yalumo mpela muŵatendelaga jemanjaji? Akula ni Pulisika ŵakamulagasoni masengo yalumo. Mwine wawojo ni ŵamkwawo ngakusakamula masengo gakulandana, nambo mpaka alinganye yakuti akamulileje yalumo masengo gakusamalila panyumba. (Jwak. 4:9) Naga akulinganya yakukamulila yalumo masengo mpaka yakamuchisyeje kuti aŵeje ŵakamulana soni kola upile wakuŵechetana. Robert ni Linda atemi mu ulombela kwa yaka yakupunda 50. Jwamlumeju jwatite, “Kusala yisyene nganitukola ndaŵi jejinji jakutendela yindu yakusangalasya. Nambo pangukamusyangana kuchapa mbale ni ŵamkwangu kapena patukamusyangana kulima ngusaŵa jwakusangalala mnope. Kutendela yindu yalumo kukusatukamuchisya kuŵa ŵakamulana soni yeleyi yikusalimbisya chinonyelo chetu.”

13. Ana ŵalombane akusosekwa kutenda chichi kuti aŵeje ŵakamulana yisyesyene?

¹³ Nambope akusosekwa kukumbuchila kuti kwamba kuŵa yalumo pajika nganikuŵa kutendekasisye ŵalombane kuŵa ŵakamulana. Jwamkongwe jwine jwa ku Brazil jwatite, “Masiku agano ŵandu tukusatanganidwaga mnope, mwamti mpaka yiŵe yangasawusya kuganisyaga kuti tukupata ndaŵi jakunguluchila yalumo ligongo lyakuti tukusatama m’nyumba jimpepe. Myoyo nayiweni kuti ngusosekwa kutenda yejinji kupunda pakwamba kuŵa yalumo.” Alole yaŵatesile Bruno ni ŵamkwakwe lina lyawo Tays kuti alosyeje kuganichisyana jwine ni mjakwe. Jwamlumeju jwatite, “Patukukunguluka tukusalolechesya kuti tutyosisye mafoni kuti gakatusokonasya.”

14. Ana ŵalombane mpaka atende uli naga ŵangasangalalaga pakukunguluchila yalumo?

 ¹⁴ Nambi uli naga wawojo ni ŵamkwawo ŵangasangalalaga pali yalumo? Komboleka yeleyi mpaka yitendekwe ligongo lyakuti akusanonyela yindu yakulekangana, kapena akusakangala kutandana. Naga mwelemu ni mwayiŵelele ni jemanja, ana mpaka atende uli? Aganichisye ya moto watukusajotaga. Moto pawugambile kupambidwa kwene wangayichila kolela mwamachili. Kuti ukolele mwamachili tukusasosekwa kwisililaga ni sasu syekulungwakulungwa. Mwakulandana ni yeleyi, jemanjasoni mpaka atende chenene kutanda kunguluchilaga yalumo kwakandaŵi kamnono lisiku lililyosye. Alolechesyeje kuti akutenda kane kakwe kampaka kasangalasye ŵamkwawo. Aŵambaleje kutenda yindu yampaka yitandikasye kangana. (Yak. 3:18) Myoyo, mwakutanda mwapanandipanandi mpaka akombole kutandilasoni kunonyelana mnope.

15. Ligongo chichi kuchimbichisyana kuli kwakusosekwa mnope kuti ŵalombane apitilisye kunonyelana?

¹⁵ Kuchimbichisyana kuli kwakusosekwa mnope mu ulombela. Kuchimbichisyana kuli mpela kambepo kakakusakamuchisya kuti moto ukoleleje mnope. Myoyo naga pangali kambepoka nikuti motowo mpaka usime mwachitema. Mwakulandana ni yeleyi, naga ŵalombane ngakuchimbichisyana, chinonyelo chawo mpaka chitande kunandipa. Nambo naga ŵalombane akuchimbichisyana soni kamulila masengo yimpepe ni pakusanonyelana mnope. Nambope chakusosekwa kukumbuchila chikaŵaga mwakupikanila wawojo mumtima kuti akwachimbichisya ŵamkwawo, nambo mwakupikanila ŵamkwawowo kuti akupochela uchimbichimbi. Ŵalombane ŵane, Penny ni Aret atemi mwiŵasa kwa yaka yakupunda 25. Jwamkongwe jwa m’liŵasali jwatite, “Kuchimbichisyana kukusatukamuchisya kuŵa ŵakunonyelana mnope. Tukusaŵa ŵagopoka kusalilana yatukuganisya ligongo lyakuti tukusachimbichisyana nganisyo.” Myoyo ana mpaka atende yamtuli kuti ŵakamuchisyeje ŵamkwawo kulipikana kuti akusiŵachimbichisya yisyesyene? Kwende tukambilane chisyasyo cha Abulahamu ni Sala.

16. Ana achalume ŵalombele mpaka alijiganye chichi kutyochela kwa Abulahamu? (1 Petulo 3:7) (Alole chiwulili.)

¹⁶ Abulahamu ŵamchimbichisyaga Sala. Jwalakwe jwapikanilaga nganisyo sya Sala, soni jwaganichisyaga mwakupikanila. Pandaŵi jine, Sala jwasasile kwa Abulahamu yindu yayamlagasyaga munganisyo, nambosoni jwayikene pakumjimba magambo Abulahamu. Ana Abulahamu jwatumbile ni yeleyi? Iyayi. Jwalakwe jwamanyililaga kuti Sala ali jwamkongwe jwakupikanila soni jwakamuchisya. Abulahamu jwapikanile nganisyo sya Sala soni jwamasisye chakusawusyacho. (Gen. 16:5, 6) Ana tukulijiganya chichi pelepa? Yisyene kuti achalume akwete udindo wakusagula yindu mu liŵasa lyawo. (1 Akoli. 11:3) Nambope, jemanjaji akusosekwa kukumbuchila kuti chindu chakusosekwa mnope chili kuganichisya nganisyo sya achiŵamkwawo mkanasagule yakutenda, mnopemnope naga yakusaka kusagulayo mpaka yakwaye ŵamkwawo. (1 Akoli. 13:4, 5) Ndaŵi sine, ŵakongwe mpaka alagasicheje nganisyo mwamti mpaka  asache kwalondechesya ŵamkwawo mwakupikanila. Ana akusachimbichisya nganisyo syawo mwakwapikanila mwakusamala? (Aŵalanje 1 Petulo 3:7.) Ŵalombane ŵane, Angela ni Dmitry atemi mwiŵasa kwa yaka chiŵandika 30. Jwamkongwe jwa m’liŵasali jwasasile yaŵatendaga ŵamkwakwe pakulosya kumchimbichisya. Jwalakwe jwatite, “Ndaŵi syosope ŵamkwangu akusaŵa ŵakoseka kumbikanichisya pangulagasika nganisyo kapena pangusaka kuŵecheta. Akusatenda yindu mwakuwusimana mtima atamose pandumbile mnope.”

17. Ana achakongwe ŵalombele mpaka alijiganye chichi kutyochela kwa Sala? (1 Petulo 3:5, 6)

¹⁷ Sala ŵamchimbichisyaga Abulahamu mwakumkamuchisya pa yindu yaŵasagulaga. (Gen. 12:5) Pandaŵi jine, Abulahamu jwalinganyisye yakwapochela chenene achalendo ŵaŵayiche panyumba jawo mwangajembecheya. Jwalakwe ŵamŵendile Sala kuti aleche yindu yajwatendaga ni chakulinga chakuti ŵalinganyile mikate jejinji achalendowo. (Gen. 18:6) Myoyo Sala jwatesile mwachitema yajwasasile Abulahamuyo. Mwakulandana ni yeleyi, achakongwe ŵalombele mpaka amsyasye Sala mwakwakamuchisya achiŵamkwawo payindu yasagwile. Pakutenda yeleyi, ulombela wawo uchiŵa wakulimba. (Aŵalanje 1 Petulo 3:5, 6.) M’bale Dmitry jwatumkolasile mundime jipite jila, jwasasile yaŵatendaga ŵamkwakwe pakumtendekasya kulipikana kuti akusamchimbichisya. Jwalakwe jwatite, “Ngusayamichila yakusatendaga ŵamkwangu pakulipeleka kukamuchisya yindu yisagwile atamose kuti ngakukamulana nayo. Mwamti ŵanganjimbaga magambo atamose yili mkuti yindu yatwasagwileyo nganiyikola yakuyichisya yambone.” Kusala yisyene yikusaŵa yangasawusya kumnonyela mundu jwakusakuchimbichisya.

18. Ana ŵalombane mpaka apindule chamtuli pakupitilisya kunonyelana?

¹⁸ Masiku agano, Satana akusasaka kumasya chinonyelo chachili pasikati pa Aklistu ŵalombane. Jwalakwe akusamanyilila kuti naga ŵalombane alesile kunonyelana, nikuti chinonyelo chawo pa Yehofa mpaka chimale. Nambope, chinonyelo chisyesyene nganichiŵa chimasile. Myoyo chinonyelo chawo kwa ŵamkwawo chiŵeje mpela chinonyelo chiŵachisasile mu Nyimbo ja Solomoni. Aŵeje ŵakusachilila kumŵika Yehofa pamalo gandanda mu ulombela wawo, apateje ndaŵi jakunguluchila yalumo, achimbichisyeje nganisyo sya mjawojo, soni aganichisyeje yakusosechela yakwe. Pakutenda yeleyi, ulombela wawo uchipeleka uchimbichimbi kwa Yehofa jwali msyene chinonyelo chisyesyene. Mwamti mpela mwayikusaŵela ni moto wekwisilile chenene, nombe chinonyelo chawo chichipitilisya kukula.