1. Ana ŵajinji tukusasimana ni yakusawusya yamtuli?

 ANA pana ndaŵi jaŵakwete chakulinga chausimu ni kulagaga kuti achikwanilisye? b Naga yili myoyo, nganaŵa jika. Mwachisyasyo, M’bale Philip jwasakaga kuti apelecheje mapopelo gambone, nambo jwalagaga kuti apate ndaŵi jakupopela. Nombe Mlongo Erika jwasakaga kuti ayicheje mwachitema pamsongano wakosechela ulaliki. Nambope jwalakwe jwayikagape mwakuchelewa chiŵandika pamsongano uliwose. Nambosoni kwa maulendo gangapo M’bale Tomáš jwasakaga ali aŵalasile Baibulo josope. Jwalakwe jwatite, “Nganisangalalaga ni kuŵalanga Baibulo. Mwamti nalinjilile kwa maulendo gatatu, nambo paulendo uliwose nagambaga kuŵalanga malile buku ja Lefitiko kaneko ni kuleka.”

2. Ligongo chichi ngatukusosekwa kutenguka naga nganituŵe kukwanilisya chakulinga chausimu chatwakwete?

² Naga pachangakaŵapa ŵakwete chakulinga nambo nganaŵepe kuchikwanilisya, ngakusosekwa kutenguka. Kuti akwanilisye yakulinga atamose yamwanamwana yikusasaka ndaŵi soni kulimbichila. Kulingalinga kwawo kuti akwanilisye yakulinga yawo kukusalosya kuti akusayamichila unasi wawo ni Yehofa soni kuti akusasaka kumpa jwalakwejo yindu yambone mnope. Mwamti Yehofa akusayamichila mnope kulimbichila kwawo. Yisyene kuti jwalakwe jwangajembecheyaga kuti chitutendeje yindu yejinji kupunda yampaka tukombole kutenda. (Sal. 103:14; Mik. 6:8) Myoyo pakukola chakulinga alolechesyeje kuti mpaka achikwanilisye. Panyuma pakuti akwete chakulinga, ana mpaka atende yamtuli kuti achikwanilisye? Kwende tukambilane yindu yine yampaka yitukamuchisye.

3. Ligongo chichi kusachilila kuli kwakusosekwa mnope?

³ Kusachilila kuli kwakusosekwa mnope kuti akwanilisye chakulinga  chawo chausimu. Mundu jwakwete mtima wakusachilila akusalipeleka mnope kuti akwanilisye chakulinga chakwe. Kusachilila mpaka tukulandanye ni mbungo jajikusatuta liboti lyakwendela mbungo kuti likayiche kwalikwawula. Naga mbungo jikupitilisya kupuga, libotilyo likusayika kumalo kwakusaka mundu jwakwendesyajo. Soni naga mbungojo jili jamachili mnope, nikuti akusaja kwika mwachitema. Mwakulandana ni yeleyi, patukusachilila mnope ni patukusakwanilisyasoni yakulinga yetu. M’bale jwine lina lyakwe David jwakusatama ku El Salvador jwasasile kuti, “Pawukusachilila mnope kutenda chine chakwe, ni pawukusalimbichila mnope, mwamti ngawukusakunda chilichose kusokonasya chakulingacho.” Sano ana mpaka atende uli kuti asachilileje mnope kutenda chine chakwe?

4. Ana tukusasosekwa kupopelelaga ya chichi? (Afilipi 2:13) (Alole chiwulili.)

⁴ Apopeleje kuti akole mtima wakusachilila. Yehofa mpaka ŵakamuchisye kuti akwanilisye chakulinga chawo pakamulichisya masengo msimu weswela. (Aŵalanje Afilipi 2:13.) Ndaŵi sine tukusaliŵichila chakulinga ligongo tukusamanyilila kuti chituchikwanilisye soni kuti chili chambone. Nambo mpaka yisimanikwe kuti nganitukola mtima wakusachilila kuchikwanilisya. Yeleyi ni yayamtendechele mlongo jwine jwa ku Uganda lina lyakwe Norina. Jwalakwe jwakwete chakulinga chakuti akole lijiganyo lya Baibulo. Nambope nganakola mtima wakusachilila ligongo jwayiwonaga kuti nganaŵa akombwele kwiganya chenene. Ana chichi chichamkamuchisye mlongoju? Jwalakwe jwatite, “Natandite kumŵenda Yehofa lisiku lililyose kuti angamuchisye kukusya chakulinga changu chakutendesya lijiganyo lya Baibulo. Mwakamulana ni mapopelo ganguga, natandite kulimbichila mnope kuti mbe jwakwiganya chenene. Pali papitile myesi jamnono, natandite kuyiwona kuti chakulinga changu chila chitandite kukula. Mwamti m’chaka chichichi natandite kutendesya majiganyo ga Baibulo.”

5. Ana mpaka tuganichisyeje yindu yapi yampaka yitukamuchisye kukusya kusachilila kwetu kuti tukwanilisye chakulinga chatukwete?

⁵ Aganichisyeje yindu yaŵatendele Yehofa. (Sal. 143:5) Ndumetume Paulo jwaganichisyaga ya umbone mtima waŵamlosisye Yehofa, mwamti yeleyi yamlimbikasyaga kuti amtumichileje Yehofa. (1 Akoli. 15:9, 10; 1 Tim. 1:12-14) Mwakulandana ni yeleyi, pakuganichisya mnope yaŵatendele Yehofa ni pakusasachilila mnope kukwanilisya chakulinga chawo. (Sal. 116:12) Kwende tulole chachamkamuchisye mlongo jwine jwa ku Honduras kukwanilisya chakulinga chakwe chakuti aŵe mpayiniya jwakutamilichika. Jwalakwe jwatite, “Naganichisyaga mnope yakusati Yehofa pakunonyela. Jwalakwe jwangamuchisye kuti mbe mu gulu jakwe. Akusasamalila soni kunjenjela. Kuganichisya yindu yeleyi kwandendekasisye kuti namnonyeleje mnope jwalakwe soni kukusya chakulinga changu chakuŵa mpayiniya jwakutamilichika.”

6. Ana ni chindu chine chapi champaka chijonjechesye kusachilila kwetu kukwanilisya chakulinga chine chakwe?

⁶ Aganichisyeje mnope ya umbone wachachipata pachachikwanilisya chakulinga chawo. Kwende tulole chachamkamuchisye Mlongo Erika jwatumkolasile jula kuti akwanilisye chakulinga chakwe chakusunga ndaŵi. Jwalakwe jwatite, “Nayikopochele kuti yambitaga yejinji ligongo lyakuchelewa pamsongano wakosechela ulaliki. Kaneko nayiweni kuti kwika mwachitema chikumbeje upile wakwakomasya abale ni alongo soni kunguluka  nawo. Nayiwenisoni kuti chingoleje upile wakupikanila nawo malangiso gampaka gangamuchisye kusangalala pandili mu ulaliki soni kulalichila mwakamula mtima.” Mlongo Erika jwaganichisye mnope umbone wampaka apate naga akusunga ndaŵi, mwamti jwakwanilisye chakulinga chakwechi. Ana wawojo mpaka aganichisye ya maumbone gapi gampaka apate ligongo lyakwanilisya chakulinga chawo? Naga chakulinga chawo chili kuŵalanga Baibulo kapena kupopela, aganichisyeje yampaka yijile pakwakamuchisya kulimbisya unasi wawo ni Yehofa. (Sal. 145:18, 19) Naga chakulinga chawo chili kusaka kukola ndamo sya Chiklistu, aganichisyeje yampaka chijile chakulingacho pakwakamuchisya kuŵa paunasi wambone ni ŵane. (Akolo. 3:14) Naga akwete chakulinga chine chakwe, mpaka atende chenene kulemba magongo gakwatendekasya kuti achikwanilisye. Ndaŵi syosope aloleje yaŵalembileyo. M’bale Tomáš jwatumsasile kundanda kula jwatite, “Pangwete magongo gejinji gakundendekasya kukwanilisya chakulinga chine chakwe, ni pangusalimbichila mnope kuti nachikwanilisye.”

7. Ana chichi chachamkamuchisye M’bale Julio yimpepe ni ŵamkwakwe kuti akwanilisye chakulinga chawo?

⁷ Akungulucheje ni ŵandu ŵampaka ŵalimbikasye kukwanilisya chakulinga chawo. (Mis. 13:20) Kwende tulole yayamkamuchisye M’bale Julio yimpepe ni ŵamkwakwe kuti akwanilisye chakulinga chawo chakuti alipelecheje mnope pamasengo gakulalichila. Jwalakwe jwatite, “Twapatile achimjetu ŵatwamanyililaga kuti chatukamuchisye kukwanilisya chakulinga chetu, soni twakambilanaga yakulinga yetu ni jemanjajo. Ŵajinji mwajemanjaji ŵaliji ŵakuti ŵakwanilisye yakulinga mpela yetuyo. Mwamti ŵatusalilaga yindu yampaka yitukamuchisye. Ŵatuwusyagasoni ya yindu yatulinganyisye, soni ŵatulimbikasyaga patukusosechela.”

8. Ana chichi champaka chitendekwe naga tukulimbichila kuti tukwanilisye chakulinga chetu pandaŵi jatukusachilila mnope? (Alole chiwulili.)

⁸ Kusala yisyene, wosopewe pana ndaŵi sine syatukusayiwona kuti nganitukola mtima wakusachilila kutenda yine yakwe. Ana yeleyi yikusalosya kuti nganituŵa tukwanilisye chakulinga chetu? Iyayi. Kuti tupikanichisye yeleyi kwende tuganichisye chisyasyo achi: Mbungo ni jajikusakamuchisya mnope liboti lyakwenda ni mbungo kuti likayiche kumalo kwalikwawula. Nambotu mbungo jikusachengachenga. Pane mpaka jipujeje mwamachili mnope, pele masiku gane mpaka kusimanikwe kuli kwangali mbungo. Ana yeleyi yikusagopolela kuti liboti nganiliŵa lijesile? Iyayi. Mwachisyasyo, maboti gane gakwendela mbungo gakusakolasoni injini kapena yakupalasila. Jwakwendesya liboti mpaka akamulichisye masengo yindu yeleyi kuti akayiche kumalo kwakwawula. Myoyo kusachilila kwetu mpaka tukulandanye ni mbungo. Ndaŵi sine mpaka tukole mtima wakusachilila mnope kutenda yine yakwe, pele ndaŵi sine ngakola. Soni ndaŵi sine mpaka tulepele kusachilila kukwanilisya chakulinga chetu. Myoyo naga tukusagamba kulimbichila kukwanilisya chakulinga chetu pandaŵi jatukusachilila pejo, nikuti nganituŵa tuchikwanilisye. Nambo mpela mwayikusaŵela ni jwakwendesya liboti jwakusapata matala gane kuti akayiche kumalo kwakusaka, m’wejisoni mpaka tulimbichile kuti tukwanilisye chakulinga chetu atamose panganitukola mtima wakusachilila. Atamose kuti kutenda  yeleyi mpaka kuŵe kwakusawusya, nambope chachisangalala mnope pachachikwanilisya chakulinga chawocho. Mkanituŵe kambilana yatukusosekwa kutenda, kwende tukambilane kaje chiwusyo champaka chipagwe.

9. Ana kuli kulemwa kulimbichila kukwanilisya chakulinga chetu chausimu panganitukola mtima wakusachilila kuchikwanilisya? Alondesye.

⁹ Yehofa akusasaka kuti tumtumichileje mwakusachilila soni mwakusangalala. (Sal. 100:2; 2 Akoli. 9:7) Sambano ana tukusosekwa kulimbichilaga kukwanilisya chakulinga chetu chausimu chitamilecho yili mkuti nganitukola mtima wakusachilila kuchikwanilisya? Kwende tulole chisyasyo cha ndumetume Paulo. Jwalakwe jwatite, “Nguchiputa chilu changu ni kuchilongolelaga mpela kapolo.” (1 Akoli. 9:25-27) Paulo jwalikanganichisyaga kutenda yindu yakuŵajilwa atamose pandaŵi janganakolaga mtima wakusachilila kutenda yinduyo. Ana Yehofa jwasangalalaga ni utumiki wa Paulo? Elo. Mwamti Yehofa jwampele upile jwalakwe ligongo lyakulimbichila kwakwe.—2 Tim. 4:7, 8.

10. Ana pakusaŵa umbone wamtuli naga tukulimbichila kuti tukwanilisye chakulinga chetu atamose yili mkuti ngatukusachilila?

¹⁰ Yehofa akusayamichila mnope pakutuwona tuli mkutenda yakomboleka kuti tukwanilisye chakulinga chetu atamose yili mkuti nganitukola mtima wakusachilila kuchitenda. Jwalakwe akusayamichila mnope ligongo akusamanyilila kuti ngatukutenda chinducho ligongo lyakuti tukuchinonyela, nambo tukuchitenda ligongo lyakumnonyela jwalakwe. Mwamti mpela muŵatendele Yehofa pakumpa upile Paulo, jwalakwe chachitupasoni upile m’weji ligongo lyakulimbichila kwetu. (Sal. 126:5) Soni patuyiweni kuti Yehofa akutupa upile, mpaka tutande kola mtima wakusachilila mnope. Mlongo jwine jwa ku Poland lina lyakwe Lucyna jwatite, “Ndaŵi sine jwangasakaga kuti njawule mu utumiki mnopemnope pambesile. Nambope pambite mu utumiki atamose ndili mbesile panyuma pakwe ngusaŵa jwakusangalala mnope.” Kwende tulole yampaka tutende naga nganitukola mtima wakusachilila kutenda yine yakwe.

11. Ana Yehofa mpaka atukamuchisye chamtuli kuti tuŵe ŵakulilekasya?

¹¹ Amŵendeje Yehofa kuti ŵakamuchisye kuŵa ŵakulilekasya. Maloŵega gakusasala ya kuŵambala kutenda yakusakala. Nambope kulilekasya kukusatukamuchisya kuti tutende yindu yambone mnopemnope naga yatukusaka kutendayo yili yakusawusya, kapena naga nganitukola mtima wakusachilila. Akumbuchilejesoni kuti kulilekasya jili ndamo jele msimu weswela ukusatukamuchisya kuti tukole. Myoyo amŵendeje Yehofa kuti ŵape msimu weswela kuti wakamuchisyeje kola ndamo jakusosekwa mnopeji. (Luk. 11:13; Agal. 5:22, 23) M’bale David jwatumkolasile kundanda kula jwasasile yalyatite pakumkamuchisya lipopelo. M’baleju jwasakaga kuti atendeje lijiganyo lyapajika mwakutamilichika. Jwalakwe jwatite, “Namŵendile Yehofa kuti angamuchisye kuŵa jwakulilekasya. Mwamti ni chikamuchisyo chakwe natandite kola ndandanda jambone jakutendela lijiganyo lyapajika janajikuyaga ndaŵi syosope.”

12. Ana lilemba lya Jwakulalichila 11:4 mpaka litukamuchisye chamtuli kuti tukwanilisye chakulinga chetu chausimu?

¹² Akajembecheyaga ndaŵi jele yindu yichiŵa chenene. M’chilambo chatukutamachi nganiyiŵa yikomboleche kupata ndaŵi jangali yakusawusya. Naga tukwembecheya ndaŵi jele yindu yichiŵa chenene nikuti nganituŵa tukombwele kwanilisya chakulinga chetu. (Aŵalanje Jwakulalichila 11:4.) M’bale jwine lina lyakwe Dayniel jwatite, “Pangali ndaŵi jangali yakusawusya. Myoyo ngatukusosekwa kwembecheyaga ndaŵi jangali yakusawusya, mmalomwakwe tugambeje kutandapo yatukusaka kutenda.” M’bale jwine jwa ku Uganda lina lyakwe Paul jwasasilesoni ligongo line lyakututendekasya kuŵambala kututila ndaŵi kusogolo. Jwalakwe jwatite, “Patutandite kutenda yindu yine yakwe atamose yili mkuwoneka kuŵa yakusawusya kuyitenda, Yehofa mpaka atukamuchisye.”—Mala. 3:10.

13. Ana pakusaŵa ma umbone gamtuli naga tukutanda ni yakulinga yamwanamwana?

¹³ Atandeje ni yindu yamwanamwana. Ndaŵi sine mpaka tulepele kola mtima wakusachilila ligongo  lyakuti chakulinga chetu chikuwoneka kuŵa chakusawusya kuchikwanilisya. Naga mwelemu ni mwayiŵelele ni jemanja, ana nganaŵa akombwele kuchigaŵanya chakulingacho mumbali syamwanamwana? Naga chakulinga chawo chili kola ndamo jambone jine jakwe, uli ngalinga kutanda kulosya ndamojo muyakutendekwa yamwanamwana? Kapena naga akwete chakulinga chakuti aŵalanje Baibulo josope, uli ngalinga kutanda kujiŵalanga panandipanandi? M’bale Tomáš jwatumkolasile kundanda jula, jwalagaga kuti akwanilisye chakulinga chakwe chakumalisya kujiŵalanga Baibulo kwa chaka chimpepe. Jwalakwe jwatite, “Nayikopochele kuti litala lyanasagwile nganiliŵa lyambone kwa uneji ligongo naŵalangaga mwakuwutuka mnope. Myoyo nalinganyisye yakuti ndandilesoni. Nambo pandaŵiji nalinganyisye yakuti mbalanjeje ndime syamnono lisiku lililyosye ni kusiganichisyaga. Kaneko natandite kusangalala panguŵalanga.” M’baleju pajwasangalalaga mnope ni kuŵalanga Baibulo, jwatandite kuŵalanga kwandaŵi jelewu. Mwamti jwakombwele kuŵalanga Baibulo josope. c

14. Ana ni yindu yine yapi yakusokonasya yampaka tusimaneje nayo?

¹⁴ Atamose tuli tukwete mtima wakusachilila kukwanilisya chakulinga chetu, ndaŵi sine mpaka pasimanikwe yindu yine yakusokonasya chakulinga chetucho. Mwachisyasyo, “yakutendekwa yangayijembecheya” mpaka yitujonanjile ndaŵi jatwasosekwaga kujikamulichisya masengo kuti tukwanilisye chakulinga chetu. (Jwak. 9:11, NWT.) Mpaka tusimane ni yakusawusya yampaka yitutengusye soni kutuleka tuli ŵangali machili. (Mis. 24:10) Nambosoni pane ungali umlama wetu mpaka ututendekasye kutenda yindu yampaka yisokonasye yakulinga yetu. (Alo. 7:23) Mwinesoni mpaka tulipikaneje kuŵa ŵakupela mnope. (Mat. 26:43) Sambano ana chichi champaka chitukamuchisye kumalana ni yakusawusyayi?

15. Naga tukwete yindu yakusokonasya, ana yikusalosya kuti tuli ŵakulepela? Alondesye. (Salimo 145:14)

¹⁵ Akumbuchileje kuti yakusokonasya yampaka asimane nayo yangalosyaga kuti ali ŵakulepela. Baibulo jikusasala kuti mpaka tusimaneje ni yindu yakusawusya. Nambope, jikusatusalilasoni  kuti ni chikamuchisyo cha Yehofa mpaka tukombole kukwanilisya yakulinga yetu. (Aŵalanje Salimo 145:14.) M’bale Philip jwatumkolasile kundanda jula jwasasile yayamkamuchisye kuti akwanilisye chakulinga chakwe. Jwalakwe jwatite, “Nakombwele kukwanilisya chakulinga changu ligongo lyaganichisya mnope yakutandilasoni kukwanilisya chakulingacho.” M’bale David jwatumkolasile jula jwatite, “Nalingaga kuyiwona yakusokonasya soni yakusawusya yangu kuŵa upile wakumlosya Yehofa kuti ngusamnonyela mnope.” Patukupitilisya kulimbichila kuti tukwanilisye chakulinga chetu atamose yili mkuwoneka kuŵa yakusawusya, tukusalosya kuti tukusaka kumsangalasya Yehofa. Kusala yisyene, Yehofa akusasangalala mnope pakwawona wawojo ali mkupitilisya kutenda yakomboleka kuti akwanilisye chakulinga chawo.

16. Ana mpaka alijiganye chichi naga chindu chine chakwe chikwasokonasya kuti akwanilisye chakulinga chawo?

¹⁶ Ayiwoneje yakusawusya kuŵa upile wawo wakulijiganya yine yakwe. Aganichisyeje chachitendekasisye yakusawusyayo, soni aliwusyeje kuti, ‘Ana ngusosekwa kutenda chichi kuti yeleyi yikandendechelasoni?’ (Mis. 27:12) Nambo ndaŵi sine, yakusokonasya yasimene nayo mpaka yilosye kuti nganaŵa akombwele kukwanilisya chakulinga chaŵakwete. Naga yeleyi ni yayikwatendechela, mpaka atende chenene kuganichisyasoni ya chakulinga chawocho kuti alole naga mpaka wawojo akombole kuchikwanilisya. d Yehofa ngasiŵawona wawojo kuŵa ŵakulepela ligongo lyakuti nganakombola kukwanilisya chakulinga chakuti nganaŵa akombwele kuchikwanilisya.—2 Akoli. 8:12.

17. Ligongo chichi tukusosekwa kumbuchilaga yindu yatukombwele kuyikwanilisya? (Alole chiwulili.)

¹⁷ Akumbuchileje yindu yakombwele kuyikwanilisya. Baibulo jikusasala kuti “Mlungu ali jwachilungamo, myoyo ngasaliŵalila masengo genu.” (Aheb. 6:10) Myoyo wawojosoni ngakusosekwa kuliŵalila yindu yakombwele kutenda. Aganichisyeje yakulinga yakombwele kuyikwanilisya. Yeleyi yichakamuchisya kuti aŵe paunasi wambone ni Yehofa, kuti ŵasalileje ŵane yakwamba jwalakwe, soni kuti abatisidwe. Mpela yaŵatite pakwanilisya yakulinga yawo munyumamu, mpaka akombolesoni kukwanilisya yakulinga yawo yakwete apano.—Afil. 3:16.

18. Ana tukusosekwa kumbuchilaga chichi patukulimbichila kuti tukwanilisye chakulinga chetu?

¹⁸ Ni chikamuchisyo cha Yehofa, mpaka akombole kukwanilisya chakulinga chawo, mpela mwayikusaŵelasoni ni jwakwendesya liboti jwakusasangalala mnope payiche kumalo kwaŵajawulaga. Nambo akaliŵalilasoni kuti ŵakwendesya maboti ŵajinji akusasangalalasoni ni ulendowo. Mwakulandana ni yeleyi, pakupitilisya kulimbichila kuti akwanilisye yakulinga yawo yausimu, akaliŵalilaga kusangalala pakulola yatite Yehofa pakwakamuchisya soni pakwapa upile mkati mwakulingalinga kwawo. (2 Akoli. 4:7) Mwamti naga ngakuwujila munyuma, chachipata upile wejinji.—Agal. 6:9.