1. Ana Yehofa akwaŵenda ŵakutumichila ŵakwe kutenda chichi? (Alole chiwulili.)

 ANA ŵani ŵampaka twaŵende kuti atulimbikasye soni kutulongolela? Kwanga kwa chiwusyochi kuli kwangasawusya. Yehofa ni jwampaka tumŵende. Yeleyi ni yakusatusalila Yehofa msyenejo. Jwalakwe akusasaka kuti tupopeleje mwakuwilisyawilisya kapena kuti “ndaŵi syosope.” (1 Ates. 5:17) Mpaka tupopeleje kwa jwalakwe ndaŵi jilijose soni kumŵenda kuti atulongoleleje payakutendekwa ya paumi wetu. (Mis. 3:5, 6) Ligongo lyakuti Yehofa ali jwakoloŵa makono, jwangatuŵichilaga malile ga ndaŵi jatukusosekwa kupopela kwa jwalakwe.

2. Ana chitukambilane chichi munganiji?

² Tukusayamichila mnope kukola upile wa lipopelo. Nambope ndaŵi syejinji yikusatusawusya kupata ndaŵi jakupopela. Nambosoni mpaka tuyiwone kuti tukusosekwa kongolela kuti mapopelo getu gaŵeje gambone. Yakusangalasya yili yakuti Malemba mpaka gatukamuchisye soni kutulongolela panganiji. Munganiji, chitukambilane yampaka tutende kuti tupateje ndaŵi jakupopela pakujigalila chisyasyo cha Yesu. Chitukambilanesoni yindu msano yampaka tuyisale m’mapopelo getu kuti gaŵeje gambone.

3. Ana Yesu jwamanyililaga yamtuli pakwamba ya lipopelo?

³ Yesu akusamanyilila kuti Yehofa akusagawona mapopelo getu kuŵa gakusosekwa mnope. Jwalakwe mkanayiche pachilambo chapasichi jwawonaga Atati ŵakwe ali mkwanga mapopelo ga achalume soni achakongwe ŵakulupichika. Yesu ŵaliji yalumo ni  Atatigwe pandaŵi jele Atatigwewo ŵajangaga mapopelo ga Hana, Daudi soni Eliya, kwamba kwakolanga ŵakuŵalanjikape. (1 Sam. 1:10, 11, 20; 1 Ayi. 19:4-6; Sal. 32:5) Mwamti Yesu ali pachilambopa jwasalile ŵakulijiganya ŵakwe kuti apopeleje mwakuwilisyawilisya soni ni chikulupi.—Mat. 7:7-11.

4. Ana tukulijiganya chichi pa mapopelo ga Yesu?

⁴ Kupitila m’mapopelo gakwe gaŵapopelaga kwa Yehofa, Yesu jwapeleche chisyasyo chambone kwa ŵakulijiganya ŵakwe chakuti akuyeje. Pa utumiki wakwe wosope, Yesu jwapopelaga ndaŵi syosope. Jwalakwe jwasosekwaga kupata ndaŵi jakuti apopeleje ligongo lyakuti jwaŵaga jwakutanganidwa. (Maliko 6:31, 45, 46) Jwalakwe jwajimukaga kundaŵindaŵipe kuti apate ndaŵi jakupopela pajika. (Maliko 1:35) Pachakutendekwa chine, Yesu mkanasagule chindu chakusosekwa mnope jwapopesile chilo chosope. (Luk. 6:12, 13) Nambosoni jwapopesile mwakuwilisyawilisya chilo chakuti malaŵi gakwe chawulajidwe pakusaka kuti Yehofa chamkamuchisye kupilila chiwa chakwecho.—Mat. 26:39, 42, 44.

5. Ana mpaka tumsyasye chamtuli Yesu patukupopela?

⁵ Chisyasyo cha Yesuchi chikutujiganya kuti tukusosekwa kupataga ndaŵi jakupopela atamose kuti yikusatutupilaga yakutenda. Mwakulandana ni Yesu, m’wejisoni tukusosekwa kupataga ndaŵi jakupopela. Mpaka tutende yeleyi mwakwimuka kundaŵindaŵipe kapena kugona mwakuchelewa kuti tupopele. Patukutenda yeleyi tukusalosya kuti tukusamyamichila Yehofa ligongo lya mtukawu. Mlongo jwine lina lyakwe Lynne akusakumbuchila yajwatite pakuyamichila ali amanyilile kandanda upile wakupeleka lipopelo. Jwalakwe jwatite, “Panalijiganyisye kuti mpaka mbechetane ni Yehofa ndaŵi jilijose yangamuchisye kuti namwoneje jwalakwe kuŵa mjangu jwapamtima soni nalingagalingaga kuti mbelecheje mapopelo gambone.” Ngatukukayichila kuti ŵajinji mwa m’weji tukusalipikanasoni mulitala lyeleli. Myoyo kwende tukambilane mfundo msano syakusosekwa mnope syatukusosekwa kusikumbuchilaga patukupopela.

6. Mwakamulana ni Chiwunukuko 4:10, 11, ana Yehofa ali jwakuŵajilwa kupochela chichi?

⁶ Tumchimbichisyeje Yehofa. Kupitila mmesomkulola, ndumetume Yohane ŵaweni achakulungwa 24 kwinani ali mkumtindiŵalila Yehofa. Jemanjaji ŵamchimbichisyaga Mlungu soni ŵaŵechetaga kuti jwalakwejo ali jwakuŵajilwa ‘kumkwesya, ligongo lya uchimbichimbi  soni machili.’ (Aŵalanje Chiwunukuko 4:10, 11.) Nombe nago malayika gakwete magongo gejinji gakugatendekasya kumchimbichisya soni kumkwesya Yehofa. Mwachisyasyo, malayikaga gakusatama kwinani ni Yehofajo soni gakusammanyilila chenene. Nambosoni gakusalola ndamo syakwe syasikusawonechela pakatende kakwe ka yindu. Malayikaga gakusamchimbichisya Yehofa pagakulola yakusatenda jwalakwe.—Yob. 38:4-7.

7. Ana mpaka tumchimbichisye Yehofa pa yindu yapi?

⁷ M’wejisoni tukusosekwa kumchimbichisya Yehofa m’mapopelo getu. Mpaka tutende yeleyi mwakumsalila ligongo lyakwe tukusamnonyela soni kumchimbichisya. Patukuŵalanga soni kulijiganya Baibulo, tulinjeje kulola ndamo syakwete Yehofa syasikusatusangalasyaga. (Yob. 37:23; Alo. 11:33) Kaneko tumsalileje Yehofa mwatukupikanila mumtima ligongo lya ndamosi. Mpaka tumchimbichisyesoni Yehofa ligongo lyakuti akusatukamuchisya m’weji nambosoni abale ni alongo ŵetu. Ndaŵi syosope jwalakwe akusatusamalila soni kutuchenjela.—1 Sam. 1:27; 2:1, 2.

8. Ana ni magongo gane gapi gakututendekasya kuti tumyamichileje Yehofa? (1 Atesalonika 5:18)

⁸ Tumyamichileje Yehofa. Tukwete magongo gejinji gakututendekasya kuti tumyamichileje Yehofa. (Aŵalanje 1 Atesalonika 5:18.) Mpaka tumyamichileje jwalakwe payindu yosope yatukwete, ligongo mtuka uliwose wambone ukusatyochela kwa jwalakwe. (Yak. 1:17) Mwachisyasyo, mpaka tumyamichile jwalakwe ligongo lya chilambo chakusalalachi soni yindu yambone yiŵayipanganyisye. Mpaka tulosyesoni kuyamichila ligongo lya yindu yaŵatupele mpela umi wetu, liŵasa lyetu, achimjetu soni chembecheyo chetu. Nambosoni tukusosekwa tumyamichileje Yehofa ligongo lyakutukunda kuti tuŵe najo paunasi.

9. Ligongo chichi tukusosekwa kulingalinga kuti tumyamichileje Yehofa?

⁹ Tukusasosekwa kulolechesyaga kuti tumanyilileje yindu yatutendele Yehofa yampaka yitutendekasyeje kuti tumyamichileje. Yili myoyo ligongo lyakuti tukutama m’chilambo chele ŵandu ŵajinji ali ŵangayamika. Ndaŵi syejinji ŵandu akusagamba kuganichisya ya yindu yakusaka ali akwete mmalo mwakumyamichila Yehofa payindu yakwete kala. Naga m’weji tukutanda kujigalila ndamoji nikuti mapopelo getu mpaka gagambeje kuŵa gakuŵenda basi. Kuti tuŵambale ndamoji tukusosekwa kupitilisya kukola nambosoni kusya ndamo jakuyamichila pa yindu yosope yatutendele Yehofa.—Luk. 6:45.

10. Ana kuyamichila kwamkamuchisye chamtuli mlongo jwine kuŵa jwakupilila? (Alole chiwulili.)

¹⁰ Ndamo jakuyamichila mpaka jitukamuchisyeje kuti tukombole kupilila yakusawusya yatukusimana nayo. Kwende tukambilane yaŵasimene nayo mlongo jwine (Kyung-sook) yakuyilondesya mu Sanja ja Mlonda ja Januwale 15, 2015. Mlongoju ŵamsimene ni ulwele wa kansa ja m’mapapo kapena kuti ja m’mapawa. Jwalakwe jwatite, “Ngani ja ulweleji jambwetekaga mnope, mwati naliwonaga kuti najasile yindu yangu yosope, soni jandesyaga woga.” Ana chichi chachamkamuchisye mlongoju kupilila yipwetesiyi? Jwalakwe ŵasasile kuti chilo chilichose mkanagone, ŵajawulaga pamalo gajika  ni kupopela mwakwesya maloŵe kum’yamichila Mlungu pa yindu yakwana msano yamtendele palisikulyo. Yeleyi yamkamuchisyaga soni yamtendekasyaga kuti amnonyeleje mnope Yehofa. Jwalakwe jwamanyilile kuti Yehofa akusiŵakamuchisya ŵakutumichila ŵakwe ŵakulupichika pasimene ni yakusawusya. Nambosoni jwamanyilile kuti yindu yambone yakusapata ŵakutumichila ŵakwe, yili yejinji kupunda yakusawusya yakusasimana nayo. Mwakulandana ni mlongoju, m’wejisoni tukwete magongo gejinji gakututendekasya kumyamichila Yehofa atamose kuti tukusasimana ni yakusawusya. Patukumyamichila jwalakwe yikusatukamuchisya kupilila soni kupitilisya kuŵa ŵakusangalala.

11. Ligongo chichi ŵakulijiganya ŵa Yesu ŵasosekwaga kuŵa ŵakulimba mtima panyuma pakuti Yesu awujile kwinani?

¹¹ Tumŵendeje Yehofa kuti atukamuchisyeje kuŵa ŵakulimba mtima patuli mu utumiki. Yesu mkanawujile kwinani, ŵakumbwisye ŵakulijiganya ŵakwe ya utumiki wakuti atendele umboni yakwamba jwalakwe “mu Yelusalemu, mu Yudeya mosope, mu Samaliya, soni mpaka kumbesi kwa chilambo chapasi.” (Mase. 1:8; Luk. 24:46-48) Mkanipapite ndaŵi, achimlongola ŵa Chiyuda ŵamtaŵile ndumetume Petulo soni ndumetume Yohane, ni kwajawusya kuluŵala lwekulungwa lwamagambo kwele ŵajogoyisye soni kwalamula kuti aleche kulalichila. (Mase. 4:18, 21) Ana Petulo ni Yohane ŵatesile yamtuli?

12. Mwakamulana ni Masengo 4:29, 31, ana ŵandumetume ŵatesile chichi?

¹² Pakusaka kwajanga achimlongola ŵa dini ŵa Chiyuda ŵaŵajogoyagawo, Petulo ni Yohane ŵasalile kuti, “Mlamule jemanja mwachimsyene naga yili yakuŵajilwa pameso pa Mlungu kuti tumpikanileje jemanja mmalo mwakumpikanila Mlungu. Nambo kwa m’weji, nganituŵa tulesile kuŵecheta yindu yitwayiweni soni kuyipikana.” (Mase. 4:19, 20) Petulo ni Yohane ali ŵagopwele, ŵakulijiganya achimjawo ŵapopesile kwa Yehofa mwakwesya maloŵe kuti chatendeje chakulinga chakwe. Jemanjaji ŵapopesile kuti, “Ŵakunde achikapolo ŵawo kuti aŵecheteje maloŵe gawo mwakulimba mtima.” Mwamti Yehofa ŵajanjile lipopelo lyakutyochela pasi pa mtimali.—Aŵalanje Masengo 4:29, 31.

13. Ana mpaka tulijiganye chichi kutyochela kwa m’bale jwamkolasile mu ndimeji?

¹³ Mpaka twasyasye ŵandumetumeŵa mwakupitilisya kulalichila atamose achakulungwakulungwa ŵa boma ali mkutulekasya. Kwende tuganichisye yayamtendechele m’bale jwine (Jin-hyuk) juŵamtaŵile ligongo lyakana kwinjila usilikali. Jwalakwe ali kundende ŵampele masengo gakuti ŵasamalileje achikayidi ŵaŵatamaga kwajika. Nambo ŵamsalile kuti agambeje kuŵechetana ni achikayidiwo pa yindu yakwayana ni masengo gakwe pego, akasalilaga ngani sine mpela ngani sya m’Baibulo. M’baleju jwapopesile kwa Yehofa kuti amkamuchisye kuŵa jwakulimba mtima soni kuti alalichileje mwakalamuka upile paupatikene. (Mase. 5:29) Jwalakwe jwatite, “Yehofa ŵajanjile mapopelo gangu mwakungamuchisya kuŵa jwakulimba mtima soni kumba lunda lwakutandisya majiganyo ga Baibulo ganatendesyaga kwa maminisi 5 pamlango wa chipinda chilichose mundendemo. Kaneko chilo, nalembaga yikalata yakuti ngape achikayidi achimjangu palisiku lyakuyichisya.” Mwakulandana ni m’baleju, m’wejisoni mpaka tupopeleje kwa Yehofa kuti atukamuchisye kuŵa ŵakulimba mtima soni ŵalunda, tuli mkukulupilila kuti Yehofa chatukamuchisye kukwanilisya utumiki wetu.

14. Ana chichi champaka chitukamuchisye patukulimbana ni yakusawusya?

¹⁴ Tumŵendeje Yehofa kuti atukamuchisye kumalana ni yakusawusya yetu. Ŵajinji mwa m’weji tukulimbana ni yakusawusya mpela ulwele wekulungwa, chiwa cha ŵachinasi ŵetu, kulagasidwa, yakusawusya ya mwiŵasa soni yakusawusya yine. Tukusalagasoni kuyipilila yakusawusyayi ligongo lya yindu mpela milili soni ngondo. Myoyo,  tukusosekwa tumsalileje Yehofa mwatukupikanila mumtima. Tumsalileje mwayiŵelele yindu paumi wetu mpela yatukusatenda patukumsalila mjetu jwa pamtima. Nambosoni tukulupilileje kuti Yehofa ‘chachitusamalila.’—Aŵalanje Salimo 37:3, 5.

15. Ana lipopelo mpaka litukamuchisye chamtuli ‘kupilila patukusimana ni yakusawusya’? Apeleche chisyasyo.

¹⁵ Kupopela ndaŵi syosope mpaka kutukamuchisye ‘kupilila patukusimana ni yakusawusya.’ (Alo. 12:12) Yehofa akusamanyilila yindu yakusimana nayo ŵakutumichila ŵakwe, mwamti ‘akusapikana kulila kwawo.’ (Sal. 145:18, 19) Mlongo jwine jwa yaka 29 lina lyakwe Kristie jwalisoni mpayiniya, jwajitichisye yeleyi. Mwangajembecheya mlongoju jwatandite kulwala ulwele wekulungwa. Mwamti yakuyichisya yakwe jwatandite kulaga mnope nganisyo. Kaneko jwapikenesoni kuti mamagwe alwaliche mnope. Mlongoju jwatite, “Napopelaga kwa Yehofa mwakutyochela pasi pamtima kuti ambe machili gakuti ngomboleje kupilila lisiku lililyose. Ndaŵi syosope nakuyaga ndandanda jakutendela yindu yausimu mpela kwawula kumisongano soni kutenda lijiganyo lyapajika.” Jwasasilesoni kuti, “Kupopela kwangamuchisye kupilila yakusawusyayi. Nambosoni kumanyilila kuti Yehofa ali chiŵandika ni une kwandamiche mtima pasi. Atamose kuti yakusawusyayi nganiyimala ndaŵi jijojo, Yehofa ŵajanjile mapopelo gangu mwakumba mtendele wa mumtima.” Myoyo, tukaliŵalilaga kuti, “Yehofa akusamanyilila kwakulupusya ŵandu ŵakulipeleka kwa jwalakwe pakusimana ni yakwalinga.”—2 Pet. 2:9.

16. Ligongo chichi tukusasosekwa chikamuchisyo cha Yehofa kuti tukatenda yindu yakusakala?

¹⁶ Tumŵendeje Yehofa kuti atukamuchisyeje kuŵambala yakulingwa. Ligongo lyakuti tuli ŵandu ŵangali umlama ndaŵi syosope tukusalinjidwa kuti tutende yindu yakusakala. Satana akutenda yampaka akombole kuti tutendeje yindu yakusakala. Litala limo lyakutendela yeleyi lili kupitila mu yakusangalasya yakusakala. Kujigala nawo mbali mu yakusangalasyayi mpaka kujonanje kaganisye ketu kambone yampaka yijonanje umundu wetu wamkati ni kututendekasya  kutenda ulemwa wekulungwa.—Maliko 7:21-23; Yak. 1:14, 15.

17. Ana panyuma pakupopela kwa Yehofa, tukusosekwa kutenda chichi kuti tuŵambale yakulingwa? (Alole chiwulili.)

¹⁷ Tukusasosekwa chikamuchisyo cha Yehofa patukulinjidwa kuti tutende yindu yakusakala. Mulipopelo lyakwe lya chisyasyo, Yesu jwasasile kuti, “Akatujinjisya mu kulinjidwa, nambo atukulupusye kwa jwakusakalajo.” (Mat. 6:13) Yehofa akusasaka kuti atukamuchisyeje, nambope tukusosekwa kuti tumŵendeje jwalakwe kuti atukamuchisye. Nambosoni tutendeje yindu mwakamulana ni mapopelo getu. Mpaka tutendeje yakomboleka kuti tuŵambaleje kuŵalanga soni kupikanila ngani syakusakala syasiwandile m’chilambo cha Satanachi. (Sal. 97:10) Mpaka tugumbasye munganisyo mwetu ni yindu yambone mwakuŵalanga soni kulijiganya Baibulo. Nambosoni kusimanikwa pamisongano jampingo soni kulalichila mpaka kuchenjele nganisyo syetu. Mwamti Yehofa akutusalila kuti ngasakunda kuti tulinjidwe mpaka kwika pakulepela kupilila.—1 Akoli. 10:12, 13.

18. Pakwamba ya lipopelo, ana wosopewe tukusosekwa kutenda chichi?

¹⁸ Myoyo jwalijose akusosekwa kupopelaga kwa Yehofa mwakuwilisyawilisya ni chakulinga chakuti apitilisye kuŵa jwakulupichika m’masiku gakusawusyaga. Alinganyeje yakuti lisiku lililyose apopeleje kwa Yehofa mwakutyochela pasi pamtima. Yehofa akusasaka kuti ‘tumsalileje jwalakwe yakusawusya yetu yosope’ kupitila mwipopelo. (Sal. 62:8) Amchimbichisyeje soni kumyamichila Yehofa pa yindu yosope yakwatendela. Amŵendeje Yehofa kuti ŵakamuchisyeje kuŵa ŵakulimba mtima pali mu utumiki. Amŵendejesoni kuti ŵakamuchisyeje kumalana ni yakusawusya soni yakulingwa yampaka asimane nayo. Akakundaga kuti chindu chilichose chalepelekasyeje kupopela kwa Yehofa. Nambo ana Yehofa akusajanga chamtuli mapopelo getu? Tuchikambilana chiwusyo chakusosekwa mnopechi mungani jakuyichisya.