Naga yeleyi ngayikusiyatendechela, komboleka mwine pakwete papikene kapena kuyiwona yeleyi yili mkutendekwa. Ndaŵi syejinji tukusapikana yakwamba ŵandu ŵakusaŵenjedwa ligongo lyakuti ali ŵakutyochela chilambo chine, ali ŵamtundu wine, kapena ligongo lyakuti akusagonana achalumepe. Paligongo lyeleyi, maboma gejinji gakusatamilikasya malamusi gakulimbikasya kuti ŵandu akaŵenganaga.

Ŵandu ŵajinji akusiŵaŵenga ŵane ligongo lyakuti nombe jemanjajosoni akusimana ni yeleyo. Yili myoyo ligongo lyakuti mundu jwele ŵane akumŵenga akusasakasoni kuwuchisya kwa ŵandu ŵane, mwamti ŵanewo akusasakasoni kuwuchisya. Yakuyichisya yakwe uŵenganiwu ukusagambaga kupitilisya soni ukusakwaya ŵandu ŵane.

Kwaŵenga ŵane kukusamtendekasya mundu kwawona achimjakwe kuŵa ŵakutuluka, kwanyosya, kwaŵechetela yachipongwe soni kwajogoya. Nambo ndaŵi syejinji yikusapunda pelepa. Mundu jwakwaŵenga ŵane akusatanda kutenda yindu yangasa mpela kwalagasya ŵane, kutenda yachiwawa, kwakamulila ŵane, kuwulaga ŵandu ŵangalemwa chinga ali ŵakulandana nawo mtundu kapena ali ŵamtundu wine.

Magasiniji chijisale yampaka tutende kuti tumalane ni ndamo ja kwaŵenga ŵane soni chijinjaje yiwusyo yakuyichisyayi:

• Ligongo chichi ŵandu ŵajinji akusaŵengana?

• Ana mpaka tutende chichi kuti tuleche kwaŵenga ŵane?

• Ana jichiyika ndaŵi jele uŵengani wosope uchimala?