Patukumanyilila yejinji pakwamba ya ndamo syakwete mundu jwine ni patukusammanyilila chenene soni mpaka aŵe mjetu jusyesyene. Mwakulandana ni yeleyi, patukumanyilila chenene ndamo sya Yehofa ni patukusammanyilila mwaŵelele jwalakwe soni tukusaŵa najo paunasi wakulimba. Pa ndamo syosope syakwete Mlungu, pana ndamo mcheche syekulungwa mnope. Ndamo syakwe sili machili, lunda, chilungamo soni chinonyelo.

“Ha! Ŵalakwe Ambuje! Ŵalakwe Ambuje ni uŵapanganyisye chilambo chakwinani ni chilambo chapasi. Ŵalakwe ŵayipanganyisye ni ligasa lyawo lyamachili.” —YELEMIYA 32:17.

Machili ga Mlungu gakusawonechela mu yindu yiŵapanganyisye. Mwachisyasyo, naga ajimi palyuŵa mu ndaŵi ja chawu, ana akusapikana wuli pachilu pawo? Lyuŵa likusajocha. Mwangakayichila, pelepa akusaŵa ali mkugawona machili ga Yehofa kupitila mu yindu yiŵapanganyisye. Ana lyuŵa likwete machili gamti uli? Pasikati pa lyuŵa, pakusajocha chiŵandika madigili gakwana 15,000,000. Pasekondi jilijose, lyuŵa likusakoposya machili gakulandana ni machili gampaka gakoposye mabomba ga nyukiliya mamiliyoni gejinji pagawuliche.

Nambope, lyuŵa likwete machili gamnono pakuwanichisya ni machili ga ndondwa syangaŵalanjika syasili kwinani. Ŵasayansi akusasala kuti pana ndondwa jimo, pa ndondwa syekulungwa mnope jajikusakolanjidwa kuti UY Schuti. Ndondwaji jili jekulungwa mnope mwamti lyuŵa mpaka lijinjile chiŵandika maulendo gakwana 1,700. Naga ali aŵisile ndondwaji palili lyuŵa ni kuti chilambo chetuchi mpaka chisimanikwe kuti chili mkati mwa ndondwaji soni pulaneti jine jakolanjikwa kuti Jupiter mpaka jisimanikwesoni kuti jili mkati. Yeleyi yikusatukamuchisya kupikanichisya maloŵe gaŵasasile Yelemiya kuti Yehofa Mlungu jwapanganyisye kwinani soni chilambo chapasi kupitila mmachili gakwe.

Umbone watukusapata ligongo lya machili ga Mlungu. Umi wetu ukusadalila pa yindu yapanganyisye  Mlungu, mpela lyuŵa soni yindu yakamuchisya yayili m’chilambomu. Konjechesya pelepa, Mlungu akusakamulichisya masengo machili gakwe pakumkamuchisya mundu jwalijose pajika. Chamti uli? M’yaka 100 yandanda, Mlungu ŵampele Yesu machili gakumkamuchisya kutenda yindu yakusimonjesya. Tukusaŵalanga m’Baibulo kuti, “Ŵangalola akulola, ŵalemale akwenda, ŵamatana akwaswejesya soni ŵangapikana akupikana. Ŵawe akwajimusya.” (Mateyu 11:5) Nambi wuli pakwamba ya masiku agano? Baibulo jikusati, “Akusiŵalimbikasya ŵangali machili.” Jikusasalasoni kuti, “Nambo ŵakusiŵakulupilila Ambuje tachipochela machili gasambano.” (Yesaya 40:29, 31) Mlungu mpaka atupe “machili gakupunda ga ŵandu” gakutukamuchisya kumalana soni kupilila yakusawusya ya paumi wetu. (2 Akolinto 4:7) Ana ngakusaka kuŵa paunasi ni Mlungu jwachinonyelo jwakusakamulichisya masengo machili gakwe gangali malile pakutukamuchisya pa yakusawusya yetu?

“Ŵalakwe Ambuje masengo gawo gali gamajinji, ŵagapanganyisye gosope mwalunda.” —SALIMO 104:24.

Patukulijiganya yindu yejinji yapanganyisye Mlungu, ni patukusasimonga mnope ni lunda lwakwe. Ŵasayansi ŵane akusalijiganya kutyochela ku yindu yaŵapanganyisye Yehofa, kaneko ni kupanganya yindu yine pakujigalila yalijiganyisyeyo. Mwamti ŵasayansiŵa ayikene pakupanganya yakumatila soni ndege pakujigalila yindu yaŵapanganyisye Mlungu.

Lunda lwakusimonjesya lwa Mlungu lukusawonechela mnope ni muŵapanganyichisye chilu cha mundu. Mwachisyasyo, aganichisye mwawukusatandila umi wa mwanache. Chandanda, selo jimpepe jikusasimana ni machili ga ŵalume soni jikusakola malamusi gosope gakusosechela. Kaneko seloji jikusagaŵanyika nikuŵa maselo gejinji gagakusawoneka gakulandana. Nambo mwangachelewa maseloga gakusatanda kuwoneka mwakulekangana. Yeleyi yikusatendekasya kuti papagwe mitundu jejinji ja maselo mpela, maselo ga miyasi, mitasi soni mawupa. Pambesi pakwe yiŵalo yikusatanda kuwonechela soni kukamula masengo gakwe. Panyuma pa miyesi 9, selo jila jikusachenga ni kuŵa kamwanache kakapanganyidwe ni maselo gejinji. Lunda lwakapanganye ka yindu lwelelu, lukusatendekasya ŵajinji kukamulana ni nganisyo sya jwakulemba Baibulo jwine juŵatite, “Ngwalumba ŵalakwe pakuŵa ŵangumbile mwakogoya ni mwakusimonjeka.”—Salimo 139:14.

Umbone watukusapata ligongo lya lunda lwa Mlungu. Mlungu jwetu akusamanyililaga yindu yatukusosechela kuti tuŵeje ŵakusangalala. Ligongo lyakuti jwalakwe akwete lunda lwapenani mnope, mpaka atukamuchisye kupitila m’Maloŵe gakwe. Mwachisyasyo, Baibulo jikusatusalila kuti, “Mpitilisye . . . kululuchilana ni mtima wosope.” (Akolose 3:13) Ana maloŵega gali gakamuchisya? Elo. Madokotala gasimene kuti kukululuchila kukusakamuchisya kuti mundu apateje lugono lwambone soni kunandiya kawutuche ka miyasi. Akuti yikusakamuchisyasoni kunandiya ulwele wa kulagasika nganisyo ni maulwele gane mchilu. Mlungu ali mpela mjetu jwalunda soni jwachinonyelo jwele jwangakusaleka kutukamuchisya. (2 Timoteo 3:16, 17) Ana wawojo ngakusaka kola mjawo jwamti myoyo?

“Ambuje akusachinonyela chilungamo.”—SALIMO 37:28.

Ndaŵi syosope Mlungu akusatenda yindu yambone. Kusala yisyene, “Mlungu ngaŵa mkutenda chakusakala, Mlungu Jwamachiligosope ngaŵa mkutenda chakulemwecheka.” (Yobu 34:10) Chamuko chakwe chili chachilungamo mpela mujwaŵechetele jwamasalimo pakwamba Yehofa kuti, “Ŵalakwe akusiŵalamula ŵandu mwakulungamika.” (Salimo 67:4) Ligongo lyakuti Yehofa “akusalolaga yayili mumtima,” jwalakwe jwangamloŵesya ni yachinyengo. Ndaŵi syosope jwalakwe akusanonyela yisyesyene soni kulamula mwachilungamo. (1 Samuele 16:7) Konjechesya pelepa, Mlungu akusayiwona yindu yiliyose yangali chilungamo soni yachinyengo yayikutendekwa pachilambopa. Nambosoni jwalakwe asasile kuti pachangakaŵapa “ŵangalumbana, . . . chachatyosya pachilambo chapasi chino.”—Misyungu 2:22.

Mlungu nganaŵa jwakulamula jwangasa jwakusagamba kusachilila kupeleka chilango. Jwalakwe akusalosyaga chanasa pandaŵi jachikusosechela. Baibulo jikusati, “Ambuje ali ŵachanasa soni ŵambone mtima.” Jwalakwe akusalosya chanasachi atamose kwa ŵandu ŵakusakala naga agalawiche mtima yisyesyene. Chelechitu chili chilungamo chisyesyene.—Salimo 103:8; 2 Petulo 3:9.

Umbone watukusapata ligongo lya chilungamo cha Mlungu. Ndumetume Petulo jwatite, “Mlungu jwangali lusagu. Nambo akusampochela mundu jwakutyochela mu mtundu uliwose jwele akusamjogopa jwalakwejo soni kutenda yakuŵajilwa.” (Masengo 10:34, 35) Chilungamo cha Mlungu chikusatukamuchisya ligongo jwalakwe jwangatenda lusagu kwa jwalijose. Jwalakwe mpaka atujitichisye soni kuŵa ŵakulambila ŵakwe mwangajigalila mtundu, kwatwatyochele, majiganyo soni yindu yatukwete.

Mlungu pakusaka kuti tumanyilileje umbone wa chilungamo chakwe, atupele chikumbumtima kuti chitukamuchisyeje. Malemba gakusasala kuti chikumbumtima chili mpela chilamusi ‘chachilembedwe m’mitima jetu,’ chele ‘chikusatendela umboni’ naga tutesile yindu yambone kapena yakusakala. (Aloma 2:15) Ana chikusatukamuchisya chamti uli? Chikumbumtima chetu chejiganyidwe chenene chikusatulimbikasya kuŵambala yindu yakusakala soni yitendo yangali chilungamo. Nambosoni, naga tutesile  chakulemwa, chikumbumtima mpaka chitukamuchisye kuti tugalawuche mtima soni tukawilisya chakulemwacho. Kusala yisyene, kuchipikanichisya chilungamo cha Mlungu kukusatukamuchisyasoni kuŵa paunasi ni jwalakwe.

“Mlungu ali chinonyelo.”—1 YOHANE 4:8.

Mlungu akusalosya machili, lunda soni chilungamo. Baibulo jangasala kuti jwalakwe ali machili, lunda soni chilungamo, nambo jikusati jwalakwe ali chinonyelo. Ligongo chichi? Ligongo lyakuti machili gakusamkamuchisya jwalakwe kutenda chinechakwe, nambosoni chilungamo ni lunda lwakwe yikusamlongolela pakatende ka yinduyo. Chinonyelo cha Yehofa chikusamlimbikasya kutenda yiliyose yakusaka.

Atamose kuti Yehofa jwangalajila chilichose, nambo chinonyelo chakwe chamkamuchisye kuti apanganye yakupanganyikwa yalunda mpela malayika soni ŵandu, ŵampaka akombole kuwuwona umbone soni kusangalala ni chinonyelo nambosoni chikamuchisyo chakwe. Jwalakwe mwangalinonyela, ŵapanganyisye chilambo chapasi kuti ŵandu atameje. Sonitu Mlungu akupitilisya kwalosya ŵandu chinonyelo, mwamti “akusaŵalisya lyuŵa pa ŵakusakala ni ŵambone soni akusagwisya wula pa ŵakulungama ni ŵangalungama ŵakwe.”—Mateyu 5:45.

Konjechesya pelepa, “Yehofa akwete chinonyelo chekulungwa soni ali jwachanasa.” (Yakobo 5:11) Jwalakwe akusasalalila mtima ŵandu ŵakusachilila kummanyilila jwalakwe soni kuŵa najo paunasi. Mlungu akusasamalila jemanjaji jwalijose pajika. Kusala yisyene, “jwalakwe akusasamala mnope ya jemanja.”—1 Petulo 5:7.

Umbone watukusapata ligongo lya chinonyelo cha Mlungu. Tukusasangalala ni mwakukusawonechela kusa lyuŵa palikukapila, kupikana maloŵe ga mwanache pakuseka soni chinonyelo chachikusapagwa mwiŵasa. Yindu yeleyi mpaka yiwoneche mpela yangasosekwa kusyesyene nambo yikusaŵa yakamuchisya paumi wetu.

Chindu chine chachikusatukamuchisya kulola umbone wa chinonyelo cha Mlungu chili lipopelo. Baibulo jikusatulimbikasya kuti, “Mkadandawulaga ni kandu kane kalikose. Nambo pa chilichose mumsalileje Mlungu yakuŵenda yenu yosope mwipopelo, soni mpopeleje kwa jwalakwejo mwakuchondelela soni mwakuyamichila.” Mpela mtati jwachinonyelo, Mlungu akusaka kuti tumdalileje jwalakwe kuti atukamuchisye pa yindu yayikutulagasya. Ligongo lya chinonyelo chakwe, akutusalila kuti chachitupa “mtendele wa Mlungu wele ukusapunda kupikanichisya yindu kulikose.”—Afilipi 4:6, 7.

Ana kulijiganya mwakata ndamo sya Mlungu mpela machili, lunda, chilungamo soni chinonyelo, kwakamuchisye kummanyilila chenene Mlungu? Pakulosya kumyamichila Mlungu, tukwaŵenda kuti alijiganye pakwamba ya yindu yatesile Mlungu soni yanganatende yampaka yiŵe yakamuchisya kwa wawojo.