Nganisyo sya Ŵandu Pangani ja Lipopelo
MARÍA jwatite, “Pangupopela ngusalipikana kuti Mlungu ali ni une, angamwile mkono wangu, soni akulongolela pasokonechele nganisyo.”
RAÚL jwatite, “Ŵamkwangu ŵawile panyuma pakulimbana ni ulwele wa kansa kwa yaka 13. Ngukumbuchila kuti napopelaga kwa Mlungu lisiku lililyose, soni nayiwonaga kuti jwambikanichisyaga munapikanilaga mumtima. Yeleyi yandendekasyaga kola mtendele wamumtima.”
ARNE jwasasile kuti, “Mlungu jwatunonyele mnope pakutukunda kuti tupopeleje kwa jwalakwejo.”
María, Raúl, Arne, soni ŵandu ŵane ŵajinji akusayiwona kuti lipopelo lili upile wapadela. Jemanjaji akusayiwona kuti lipopelo likusapakaga upile wakuŵechetana ni Mlungu, kumyamichila soni kuŵenda chikamuchisyo. Yeleyi yikulosya kuti akusakulupilila ni mtima wosope yajikusasala Baibulo pangani ja lipopelo. Maloŵe ga Mlungu gakusati, “Tukusalimba mtima pameso pa Mlungu pakuti jwalakwejo akusatupikana pa ndaŵi jitukuŵenda kandu kalikose mwakulingana ni lisosa lyakwe.”—1 Yohane 5:14.
Nambope ŵandu ŵajinji ŵangakulupilila yajikusasala Baibulo pangani ja lipopelo. Mwachisyasyo Steve jwatite, “Panakwete yaka 17, achimjangu ŵatatu ŵawile pangosi siŵili syakulekangana. Jwine jwawile pangosi ja galimoto, soni achimjangu ŵaŵili ŵawilile m’nyasa.” Yili yitendekwe yeleyi, ana Steve jwatesile yamtuli? Jwalakwe jwatite, “Napopesile kwa Mlungu kuti angamuchisye kumanyilila ligongo lyakwe yeleyi yatendekwe nambo ngananjanga chilichose. Myoyo naliwusisye kuti, ‘Ana kupopela kuli kwakusosekwa?’” Ŵandu ŵajinji akusayiwona kuti kupopela kuli kwangasosekwa ligongo lyakuti ngakusajanjidwa mapopelo gawo.
Panasoni magongo gane gagakusatendekasya ŵandu kuyiwona kuti kupopela kuli kwangasosekwa. Ŵandu ŵane akusati Mlungu akusamanyilila yindu yosope, myoyo akusamanyilila yakusosechela yetu soni yakusawusya yetu. Paligongo lyeleli akusati ngatukusosekwasoni kumsalilaga jwalakwe.
Ŵane akusakulupilila kuti Mlungu jwangasaka kupikanila mapopelo gawo ligongo lya yindu yaŵalemwisye kalakala. Jenny jwatite, “Chakusawusya changu chekulungwa chili chakuti ngusaliwona kuŵa mundu jwangasosekwa. Natesile yindu yakusakala yangusalijimba nayo magambo mwamti ngusaliwona kuti Mlungu nganaŵa apikene mapopelo gangu.”
Ana wawojo akusaganisya uli panganiji? Kombolekasoni wawojo akusayiwona kuti kupopela nganikuŵa kwakusosekwa. Nambope yajikusasala Baibulo pangani ja lipopelo * yili yakudalilichika soni mpaka yitulimbikasye. Baibulo mpaka jitukamuchisye kupata kwanga kwa yiwusyo ayi:
-
Ana yisyene kuti Mlungu akusapikana mapopelo getu?
-
Ana ligongo chichi jwangajanga mapopelo gane?
-
Ana tupopeleje chamtuli kuti Mlungu atujanje mapopelo getu?
-
Ana kupopela mpaka kwakamuchisye chamtuli?
^ ndime 9 Baibulo jikusasala ya mapopelo ga ŵandu ŵajinji ŵaŵamtumichilaga Mlungu kupwatikapo lya Yesu Klistu. M’Malemba ga Chihebeli gagakusamanyikasoni kuti Malangano Gakala, mwana mapopelo gakupunda 150.
You May Also Like
KWANGA KWA YIWUSYO YA M’BAIBULO
Ligongo Chichi Tukusapopela? Ana Mlungu Akusajanga Mapopelo Gangu?
Nambotu kuti Mlungu ajanje mapopelo gawo yikwegamila yakutenda wawojo pakupopela kwa jwalakwe.
YAKUSALIWUSYAGA ŴACHINYAMATA
Ligongo Chichi Ngusosekwa Kupopela?
Ana lipopelo lili yindu yatukusaganisya mu mtima mwetu kapena pana yine yakonjechesya pa yeleyi?
