Mlungu Akusasamala ya Wawojo
Baibulo jikwete malangiso gambone mnope gampaka gatukamuchisye. Yili myoyo ligongo lyakuti jili jakutyochela kwa Mlungu. Baibulo nganijiŵa buku jakusala ya chipatala nambo mpaka jitukamuchisye mmatala gejinji. Mpaka jitukamuchisye patusimene ni yindu yakulagasya nganisyo, soni yindu yampaka yitutendekasyeje kuti tukaganisyaga chenene. Nambosoni mpaka jitukamuchisye patukulaga ligongo lyakuti tukumbuchile yindu yakupweteka yayatutendechele nambosoni naga tukulaga ni ulwele.
Chakusangalasya mnope chili chakuti Baibulo jikusatusimichisya kuti Yehofa Mlungu, a akusamanyilila mwatukupikanila kupunda mundu jwalijose. Jwalakwe ali jwakoseka kutukamuchisya kulimbana ni yindu yakusawusya yatukusimana nayo. Mwachisyasyo, alole malemba gaŵili gakulimbikasyaga:
“[Yehofa] akusaŵa chiŵandika ni ŵandu ŵamtima wekasiche, akwakulupusya ŵelewo ŵajasile mtima.”—SALIMO 34:18
“Pakuti, Une, [Yehofa] Mlungu jwenu, ngumlimbisya ni kumsalila kuti, ‘Mkatenda woga; tinjimkamuchisya.’”—YESAYA 41:13
Nambo ana Yehofa, akusatukamuchisya chamtuli kuti tukombole kumalana ni kulagasika nganisyo? Pachaŵalanjeje ngani syakuyichisyasi, chayiwone kuti Yehofa akusatukamuchisya m’matala gakulekanganalekangana.
a Lina lya Mlungu lili Yehofa.—Salimo 83:18. NWT.
