Baibulo nganijiŵa buku ja yachipatala. Atamose yili myoyo, jikusapeleka malangiso gampaka gakamuchisye ŵandu ŵakulwala ulwele wa kulagasika nganisyo. Aganichisye ya Malemba gakuyichisyaga.

“Ŵandu ŵambonembonepe ŵangasosekwa dokotala, nambo ŵakulwala.”—MATEYU 9:12.

Baibulo jikusatusalila kuti patulwasile tukusasosekwa mtela. Ŵandu ŵajinji ŵakusalwala ulwele wa kulagasika nganisyo, ayiweni kuti yindu yikusatanda kwajendela pamanyilile chachikusatandikasya ulwelewu soni papochele chikamuchisyo chamtela.

“Kutenda masewela gakulimbisya chilu kuli kwakamuchisya.”—1 TIMOTEYO 4:8, Contemporary English Version.

Naga akuchisamalila chenene chilu chawo, mpaka yakamuchisye kuti akalagasikaga mnope nganisyo. Mwachisyasyo, atendeje mwakutamilichika masewela gakulimbikasya chilu, alyeje yakulya yamagulu nambosoni agoneje mwakwanila.

“Mtima wakusangalala uli mtela wambone paumi wa mundu, nambo mtima wagasabu ukusajumusya chilu.”—MISYUNGU 17:22.

Kuti aŵeje ŵakusangalala, aŵalanjeje ngani syakulimbikasya sya m’Baibulo. Soni aliŵichileje yakulinga yambone yampaka akombole kuyikwanilisya.  Aganichisyeje yindu yambone yayatendechele paumi wawo, soni akulupilileje kuti yindu yichiŵa chenene. Kutenda yeleyi kuchakamuchisya kuti akombole kupilila pakulimbana ni ulwele wa kulagasika nganisyo.

“Lunda lukusaŵa ni ŵandu ŵakulinandiya.”—MISYUNGU 11:2, NWT.

Ndaŵi sine mpaka yisimanikwe kuti akulepela kutenda yindu yakusasaka ali mkutenda jika. Naga yili myoyo, ŵaŵendeje ŵane kuti ŵakamuchisye. Achimjawo soni ŵandu ŵamwiŵasa mwawo, ali ŵakoseka kuti ŵakamuchisye. Nambope mpaka yisimanikwe kuti jemanjaji ngakumanyilila yindu yakusaka wawojo. Myoyo ŵasalileje yindu yakusaka. Nambope, akajembechelaga kuti chagambeje kwakamuchisya pa chilichose. Atamose yili myoyo, ayamichileje yosope yakusiŵatendela.

Nicole a jwakusalwala ulwele wa kulagasika nganisyo wawukusamtendekasya kuti agambeje kutenda yindu mwakuwilisyawilisya jwasasile kuti, “Nayiwonaga kuti yindu ngayikwenda paumi wangu. Myoyo, naganisisye yakwawula kukuwonegana ni adokotala. Adokotalaŵa ŵangamuchisye kumanyilila yayikusasawusya. Yeleyi yangamuchisye kuti njitichisye mwayiŵelele yindu paumi wangu soni kumanyilila chikamuchisyo chamtela changusosechela.”

Peter jwakulaga ni ulwele wa kulagasika nganisyo jwasasile kuti, “Nayiweni kuti kuŵalanga Baibulo mwakutamilichika pampepe ni ŵamkwangu, kungamuchisye kuti nalitandeje lisiku ndili mkuganichisya yindu yambone soni yakulimbikasya. Sonitu ndaŵi sine pangulagasika nganisyo, Malemba gane ganajinjisye pamtima gakusalimbikasya.”

Ji-yoo jwakulaga ni ulwele wa kulagasika nganisyo wawukusamtendekasya kuti alyeje mnope jwasasile kuti, “Natendaga sooni kuti nasalile ŵane ya ulwele wanguwu. Nambo mjangu jwapamtima jwambikanichisyaga soni kundendela chanasa. Jwalakwe jwangamuchisye kuti ngadandawulaga mnope soni nayiwoneje kuti ulwelewu ngangulimbana nawo jika.”

Timothy jwakusalaga ni ulwele wa kulagasika nganisyo wawukusamtendekasya kuti agambeje kutenda yindu mwakuwilisyawilisya jwasasile kuti, “Baibulo jingamuchisye kuti ndendeje yindu mwangapundanganya malile pangukamula masengo soni kupumula. Lunda lwalukusimanikwa m’Baibulo lungamuchisye kuti ngomboleje kupilila pangulimbana ni yindu yayikusalagasya nganisyo.”