Yajikusasala Baibulo Yili Yakamuchisya
Baibulo jiŵele jili mkwakamuchisya ŵandu ŵajinji mumbali mcheche syakuyichisyasi.
1. Mwiŵasa
Ŵandu akwete nganisyo syakulekanganalekangana pakwamba liŵasa soni yampaka atende kuti liŵasa lyawo liŵeje lyakusangalala.
BAIBULO JIKUSASALA KUTI: “Jwalijose ŵanonyeleje ŵamkwakwe mpelaga yakusati pakulinonyela msyene. Nambosoni ŵakongwe ŵachimbichisyeje mnope ŵamkwawo.”—Aefeso 5:33.
ANA LILEMBALI LIKUGOPOLELA CHICHI?: Mlungu ni juŵatandisye liŵasa. Myoyo akusamanyilila yampaka atende ŵalombane kuti aŵeje ŵakusangalala. (Maliko 10:6-9) Ŵalombane mpaka aŵe ŵakusangalala mnope naga jwalijose akusaŵika pandanda yakusaka ya mjakwe. Jwamlume mpaka alosye kuti akusiŵanonyela ŵamkwakwe naga akusiŵasamalila chenene soni kutenda yindu yakulosya kuti akusiŵaganichisya. Jwamkongwe mpaka alosye kuti akusiŵachimbichisya ŵamkwakwe naga akusiŵakamuchisya soni kuŵechetana nawo mwaulemu.
YAJITITE BAIBULO PAKWAKAMUCHISYA ŴANE: Quang ni Thi, ŵakusatama ku Vietnam ŵaganisyaga kuti nganiyiŵa yikomboleche kuti asangalaleje mwiŵasa mwawo. Ndaŵi syejinji Quang jwatendelaga ngasa ŵamkwakwe. Jwalakwe jwasasile kuti, “Nganinayikosyaga mwaŵapikanilaga ŵamkwangu mwamti ndaŵi syejinji natendaga yakuti atumbile.” Yeleyi yamtendekasisye Thi kusaka kumasya ulombela. Jwalakwe jwatite, “Nayiwonaga kuti nganimba ngombwele kwakulupilila soni kwachimbichisya ŵamkwangu.”
Nambo kaneko, jemanjaji ŵalijiganyisye yajikusasala Baibulo soni yampaka atende pakamulichisya masengo lilemba lya Aefeso 5:33 mwiŵasa mwawo. Quang jwasasile kuti, “Lilembali lyangamuchisye kumanyilila kuti ngusosekwa kwatendelaga ŵamkwangu yindu yambone, kwanonyela, soni kwapatila yindu yakusasosechela paumi. Panatandite kutenda yeleyi, ŵamkwanguŵa ŵatandite kunonyela soni kunjimbichisya mnope.” Nombenajo Thi jwasasile kuti, “Kukuya yayili pa Aefeso 5:33 kwangamuchisye kuti nachimbichisyeje mnope ŵamkwangu. Panatandite kwachimbichisya, nombenawo ŵanonyelaga mnope, kunjenjela, soni twatandite kutama mwamtendele.”
Kuti amanyilile yejinji yakamuchisya liŵasa, aŵalanje pa jw.org Ajimuche ja Na. 2 2018. Ajimucheji jikwete mtwe wakuti, “Yindu 12 Yakamuchisya Maŵasa Kuŵa Gakusangalala.”
2. Twawoneje Mwakuŵajilwa Ŵandu Ŵane
Ndaŵi syejinji ŵandu akusiŵatendela achimjawo yindu yakusakala ligongo lyakuti ali ŵakulekangana nawo mtundu, chilambo, kawoneche kawo, dini, mwinesoni ligongo lyakuti akusagonana achalumepe kapena achakongwepe.
BAIBULO JIKUSASALA KUTI: “Mwachimbichisyeje ŵandu ŵamtundu uliwose.”—1 Petulo 2:17.
ANA LILEMBALI LIKUGOPOLELA CHICHI?: Baibulo jangatujiganya kuti tuŵenganeje ni ŵandu ŵatukulekangana nawo mtundu soni chilambo. Kapenasoni kwaŵenga ŵandu ŵakusagonana achalumepe kapena achakongwepe. Mmalomwakwe jikusatulimbikasya kuti twachimbichisyeje ŵandu wosope. Tukusasosekwa kutenda yeleyi atamose kuti ŵanduwo tukulekangana nawo mtundu, chilambo, chinga aŵe ŵakulaga kapena aŵe ŵakusichila. (Masengo 10:34) Tukusosekwa twatendeleje ŵane yindu yambone soni kwachimbichisya atamose yili mkuti ngatukukamulana ni yindu yakusakulupilila soni yakusatenda.—Mateyu 7:12.
YAJITITE BAIBULO PAKWAKAMUCHISYA ŴANE: Daniel jwalijiganyisye kuti ŵawoneje ŵandu ŵa ku Asia kuŵa ŵakwimuchila chilambo chakwe. Jwalakwe jwatandite kwaŵenga mnope ŵandu ŵa ku Asia soni jwalagasyaga atamose pasimene nawo pagulu ja ŵandu. Daniel jwasasile kuti, “Natendaga yosopeyi ligongo lyakuchinonyela mnope chilambo changu soni nganinganisyaga kuti yanatendagayi yaliji yakulemwecheka.”
Kaneko, Daniel jwalijiganyisye yajikusasala Baibulo. Jwalakwe jwatite, “Nachenjile nganisyo syangu mwamti natandite kwawona ŵane mwakusiŵawonela Mlungu. Jwalakwe akusatuwona wosopewe kuŵa ŵakulandana mwangajigalila chilambo chatukusatyochela.” Daniel jwasasilesoni mwakusapikanila apano pasimene ni ŵandu ŵa mitundu jine. Jwalakwe jwatite, “Pasimene ni ŵandu ŵa mitundu jine, jwangaganichisyaga mnope ya chilambo chakutyochela. Apano ngusinanonyela mnope ŵandu ŵa mitundu josope soni ngwete achimjangu ŵa pamtima ŵakutyochela m’yilambo yakulekanganalekangana.”
Kuti amanyilile yejinji aŵalanje pa jw.org Ajimuche ja Na. 3 2020. Ajimucheji jikwete mtwe wakuti “Ana Pana Mtela Wakumachisya Lusagu?”
3. Mbiya
Ŵandu ŵajinji akusatenda yakuti aŵe ŵakusichila pakusaka kuti asangalaleje soni akole sogolo jambone.
BAIBULO JIKUSASALA KUTI: “Lunda tiluchimchinjilichisya m’mwejo mpela musikusamchinjilichisya mundu mbiya. Nambo umanyilisi wa yindu uli wakupunda ligongo lyakuti lunda lukusiluchinjilichisya umi wa mundu jwakwete umiwo.”—Jwakulalichila 7:12.
ANA LILEMBALI LIKUGOPOLELA CHICHI?: Yisyene kuti tukusasosechela mbiya, nambope nganisiŵa situkamuchisye kuti tuŵe ŵakusangalala soni kuti tukole sogolo jambone. (Misyungu 18:11; 23:4, 5) Nambo kuti tukole sogolo jambone soni kuti tuŵeje ŵakusangalala tukusosekwa tukamulichisyeje masengo lunda lwa Mlungu lwalukusasimanikwa m’Baibulo.—1 Timoteyo 6:17-19.
YAJITITE BAIBULO PAKWAKAMUCHISYA ŴANE: Jwamlume jwine jwakusatama ku Indonesia lina lyakwe Cardo, jwamalilaga machili gakwe gosope pakusosasosa chipanje. Jwalakwe jwatite, “Nakwete chilichose chakusachikumbila ŵandu. Najendaga m’yilambo yakulekanganalekangana kuti ngasume katundu jwakudula, magalimoto, soni majumba.” Atamose yaliji myoyo, mbiya syaŵakwetesi nganisikaŵa kumala. Cardo jwatite, “Mundu jwine jwanjesile pasi mwamti jwanjiŵile mbiya syosope syanakwete. Mbiyasitu nasipatile panyuma pakukamula masengo mwakulimbichila kwa yaka yejinji. Nambo pambesi pakwe natandite kulagasika nganisyo ligongo nasigele yalayalape.”
Cardo jwatandite kukamulichisya masengo yajikusasala Baibulo pangani ja mbiya. Apano jwalakwe jwalesile kusosasosa chipanje mwamti jwasagwile kutama ni umi wangasaka yindu yejinji. Jwalakwe jwasasile kuti, “Apano ndili jwakusichila yisyesyene ligongo ndili paunasi wambone ni Mlungu. Ndili jwakusangalala mnope soni ngusalupata lugono.”
Kuti amanyilile yajikusasala Baibulo pangani ja mbiya, aŵalanje pa jw.org ngani jakuti “Ana Majiganyo Soni Mbiya Mpaka Yakamuchisye Kola Sogolo Jambone?” mu Sanja ja Mlonda Na. 3 2021.
4. Kugonana
Ŵandu ŵajinji akwete nganisyo syakulekanganalekangana pangani jagonana.
BAIBULO JIKUSASALA KUTI: “Mŵambaleje ndamo ja chikululu. Mundu jwalijose akusosekwa kumanyilila yampaka atende pakuchilamulila chilu chakwe, ni chakulinga chakuti aŵe jwamswela soni jwakuchimbichika pameso pa Mlungu. Mkakuyaga yakusatendaga ŵandu ŵamitundu jine ŵele ŵangammanyilila Mlungu. Jemanjaji akwete ndamo jakumbila yachikululu mwangalilekasya.”—1 Atesalonika 4:3-5.
ANA LILEMBALI LIKUGOPOLELA CHICHI?: Baibulo jikusasala kuti tulilekasyeje pangani jagonana. Maloŵe gakuti “ndamo ja chikululu” gakusapwatikapo kutenda chikululu, uhule, kugonana kwa ŵandu ŵanganaŵa pa ulombela, kugonana kwa achalumepe kapena achakongwepe, soni kuyigona yinyama. (1 Akolinto 6:9, 10) Ŵandu ŵalombanepe ni ŵakusasosekwa kugonana ligongo welewu uli mtuka waŵapele Mlungu..——Misyungu 5:18, 19.
YAJITITE BAIBULO PAKWAKAMUCHISYA ŴANE: Jwamkongwe jwine jwa ku Australia lina lyakwe Kylie jwasasile kuti, “Panaliji jwangalombela nayiwonaga kuti naga ngugonana ni mundu nikuti chanonyeleje soni chasamalileje chenene. Nambo nganiyiŵa myoyo. Pandesile yeleyi natamilaga kulijimba magambo soni nayiwonaga kuti pangali jwakunonyela.”
Kaneko jwamkongweju, jwalijiganyisye soni kukamulichisya masengo yajikusasala Baibulo pangani jagonana. Jwalakwe jwatite, “Manyilile sambano kuti Mlungu ŵatupele malamusi gakwe pakusaka kutuchenjela kuti tukalijimbaga magambo. Apano ngusakuya malamusi ga Yehofa soni ngwete ŵamkwangu ŵakusanonyela mnope mwamti jwangadandawulaga chilichose. Kukamulichisya masengo yajikusasala Baibulo kungamuchisye kuti ŵambale kusimana ni yakusawusya yejinji.”
Kuti amanyilile yejinji aŵalanje pa jw.org ngani ja mtwe wakuti “Ana Baibulo Jikusasala Yamtuli Pangani Jakutamila Malo Gamo Ŵandu Ŵanganalombana?”
Mlungu akusatukamuchisya kumanyilila yindu yayili yambone soni yakusakala. Atamose kuti kukuya malamusi gakwe ga ndamo syambone mpaka kuŵe kwakusawusya, nambope patukukuya malamusi gakwego yindu yikusatujendela chenene soni tukusaŵa ŵakusangalala.
