Ŵajinjiwe pakwete patuyiweni yindu yangali chilungamo, soni ŵandu ŵakusalingalinga kutenda yambone ali kulagasidwa ni ŵandu ŵakusakala. Ana jichiyika ndaŵi jele yindu yangali chilungamo soni yakusakala yichimala?

Pa Salimo 37, Baibulo jikusajanga chiwusyochi soni kutusalila yindu yampaka yitukamuchisye apano. Kwende tulole yajikusasala pa yiwusyo yakusosekwayi.

• Ana tukusosekwa kutenda mwamtuli ni ŵandu ŵakusatulagasya?—Ndime 1, 2.

• Ana ŵandu ŵakusakala chachisimana ni yamtuli?—Ndime 10.

• Ana ŵandu ŵakutenda yambone akwete sogolo jamtuli?—Ndime 11, 29.

• Ana tukusosekwa kutenda chichi apano?—Ndime 34.

Maloŵe gakusalilidwa ni Mlungu, pa Salimo 37, gakusasala chenene ya sogolo jambone ja ŵandu ‘ŵakusajembecheya mwa Yehofa soni kwenda m’matala gakwe.’ Ŵamboni sya Yehofa chachiŵa ŵakusangalala kwakamuchisya wawojo kulijiganya Baibulo, soni kumanyilila yampaka atende kuti wawojo ni liŵasa lyawo chakole sogolo jisyesyene.