• Chachisagulidwa ni Mlungu. “Une namsyene nimjinjisye kala mwenye jwangu. . . . Tinjijitenda mitundu josope ni chilambo chosope kuŵa chenu.”—Salimo 2:6, 8.

• Chachijinjila mmalo mwa Mwenye Daudi. “Mwanache atupagwile uwe! Mwanache jwamlume apelechedwe kwa uwe . . . Machili ga ulamusi wakwe tigachiŵa gangali mbesi, uchimwene wakwe tiwuchiŵa wamtendele ndaŵi syosope. Tachilamula mpela muŵatendele nangolo jwakwe Mwenye Daudi, ulamusi wakwe tachiwutamilisya ni kuwulimbanganya.”—Yesaya 9:6, 7.

• Chachipagwila ku Betelehemu. “M’mwe Betelehemu . . , kutyochela mwa m’mwejo tinjiyika ni jwakulamulila . . . Pakuti ukulungwa wakwe tiwuchitamilichika pa chilambo chosope chapasi.”—Mika 5:2, 4.

• Chachikanidwa soni kuwulajidwa ni ŵandu. ‘Jwalakwe ŵandu ŵamnyosisye nipo ŵamkanile. . . . Ŵamsomile ligongo lya ulemwa wetu, ŵamchanyandile kapena kuti kumputa ligongo lya ulemwa wetu.’—Yesaya 53:3, 5.

• Chachijimuka ku ŵawe soni Mlungu chachimpa malo gakuchimbichikwa. “Ŵalakwe akunjinjilichisya une ku machili ga chiwa, ŵalakwe ngasakunda kuti jwakunonyelwa jwawo awole. . . . Tinjiŵa jwakusangalala kwandaŵi syosope.”—Salimo 16:10, 11.

Mu mbili josope ja ŵandu, Yesu Klistu ni juŵakwanilisye yakulochesyayi. Lilayika lyamsalile Maliya mamagwe Yesu kuti, “Mlungu tamchimtenda jwalakwejo kuŵa mwenye mpela muŵaŵelele nangolo jwakwe Daudi, . . . Uchimwene wakwe ngasiwumala kose.”—Luka 1:31-33.

Yesu nganalamulilejepo chilambochi. Mmalo mwakwe, jwalakwe chachalamulila ŵandu ali kwinani mpela Mwenye jwa Uchimwene wa Mlungu. Ana chili chichi chachikumtendekasya jwalakwe kuŵa Jwakulamulila jwambone? Aganichisye yaŵatesile Yesu paŵaliji pachilambopa.

•   Yesu jwasamalaga ya ŵandu. Yesu jwakamuchisye achalume soni achakongwe, ŵanache soni achakulungwa, mwangajigalila kuŵatyochelaga soni mwayaŵelele yindu pa umi wawo. (Mateyu 9:36; Maliko 10:16) Mundu jwine jwaŵalwalaga matana pajwaŵendile kuti, ‘Naga akusosa komboleka kuswejesya,’ Yesu ŵamtendele chanasa jwalakwejo soni ŵamposisye.—Maliko 1:40-42.

• Yesu ŵatusalile yampaka tutende kuti tumsangalasye Mlungu. Jwalakwe jwatite, “Ngaŵa mkupakombola kutumichila wosope ŵaŵili, Mlungu ni yipanje.” Jwalakwe jwasasilesoni kuti tukusosekwa kwatendelaga ŵane yindu yatukusasaka kuti jemanjajo atutendeleje. Konjechesya pelepa, jwalosisyesoni kuti Mlungu akusatenda lung’wanu ngaŵape ni yatukusatenda nambo yatukusaganisya soni mwatukupikanila mumtima. Myoyo kuti tumsangalasye Mlungu, tukusosekwa kusamala ni yatukusaganichisyaga mumtima mwetu. (Mateyu 5:28; 6:24; 7:12) Yesu jwasasilesoni kuti naga tukusaka kuŵa ŵakusangalala tukusosekwa kulijiganya yakusasaka Mlungu kuti tutendeje.—Luka 11:28.

• Yesu jwatujiganyisye kuti twanonyeleje ŵane. Maloŵe soni yiŵatendaga Yesu yayikaga pamtima ŵandu ŵaŵampikanilaga, soni yatendekasyaga kuti atendepo kandu. Baibulo jikusasala kuti, “Ŵandu wosope ŵala ŵasimonjile ni wiganye wakwe ligongo ŵaliji mkwiganya mpela mundu jwa ulamusi.” (Mateyu 7:28, 29) Jwalakwe jwasalile kuti, “Mwanonyeleje amagongo ŵenu.” Jwalakwe jwayikene pakwapopelela ŵandu ŵaŵamwuleje. Jwapopesile kuti, “Atati, mwakululuchile ŵanduŵa, ligongo ngakumanyilila yakutenda.”—Mateyu 5:44; Luka 23:34.

Yesu ni jwali jwakuŵajilwa kulamulila chilambo chosope, ligongo ali jwakamuchisya soni jwachanasa. Nambo ana jwalakwe chachitanda chakachi kulamulila?