Ŵandu ŵajinji akusasala yakulekanganalekangana pangani ja kumalana ni canasa. Nambo payakusaŵecetayi, ngaŵa yosope yayili yakamucisya. Mwambone, ŵane akusati jwakunonyelwa jwetu pawile ngatukusasosekwa kulila kapena kutenda cilicose. Ŵanesoni akusati pelepa ni patukusosekwa kulila mnope kapena kutenda yine yakwe yakulosya kuti tukwete canasa. Nambo yajikusasala Baibulo panganiji yili yakamucisya, soni ŵandu ŵajinji ajiticisye.

M’yilambo yine ŵajinji akusati jwamlume jwangalila. Akusati kulila kuli kuloŵela. Nambo ana kulosya kuti ukwete canasa mwakulila atamose pekuga kuli kulemwa? Madokotala ga nganisyo gakusati kulila kuli litala limo lyakulosya kuti mundu akwete canasa. Kulosya canasa mwati m’yiyi kukusakamucisya. Nambo kulosya canasa mwakupundanganya kuli kwakogoya. Baibulo jangajiticisya yakuti jwamlume jwangalila, kapena kuti kulila kuli kulemwa. Mwambone, Yesu pandaŵi jine ŵalisile pekuga ligongo lya ciwa ca Lasalo, mjakwe jwakunonyelwa. Jwalakwe ŵatesile yeleyi atamose kuti ŵakwete macili gakwimucisya ŵawe.—Yohane 11:33-35.

Ndaŵi sine canasa mpaka citutendekasye kuŵa ŵaukali, mnopemnope naga mlongo mjetu awile mwakusisimucisya. Yakutandisya ukaliwu mpaka yiŵe yakulekanganalekangana. Nambo ndaŵi sine yeleyi yikusatendekwa ligongo lya yindu yaŵecete mundu jutwamganicisyaga kuti catutondoye. Mike jwa ku South Africa jwatite, “Baba ŵangu ŵawile ndili ni yaka 14. Pamalilo gawo, jwakulalicila jwa dini ja Anglican ŵasasile kuti Mlungu akusasaka ŵandu ŵambone, mwati akusiŵajigala mwakwanguya. * Yeleyi yasakalisye kwabasi ligongo baba ŵatukamucisyaga mnope. Apano yimasile yaka 63 citendecele yeleyi, nambo yikusambwetekape mumtima.”

Nambi wuli pakwamba ya kulijimba magambo? Ndaŵi sine mlongo mjetu pawile mwakusisimucisya mpaka tulijimbeje magambo kuti, ‘Ngatende yamti, ngamkanawa.’ Mpaka tulijimbejesoni magambo naga nganitukamulana nganisyo pa yineyakwe ni mlongo mjetujo mkanawe.

Naga akulijimba magambo mnope kapena akwete ukali ligongo lya ciwa ca mlongo mjawo akagamba kuyisunga. Amsalile mwakupikanila mumtima mundu jwampaka ŵapikanicisye soni kwasimicisya kuti yeleyi yikusatendekwa kwa jwalijose mlongo mjakwe pawile. Baibulo jikusatukumbusya kuti, “Mjetu jusyesyene akusatunonyela ndaŵi syosope, soni jwalakwe ali mlongo mjetu juŵapagwile kuti atukamucisyeje patusimene ni yipwetesi.”—Miyambo 17:17.

Yehofa Mlungu mpaka aŵe mjetu jusyesyene patukulila ciwa ca mlongo mjetu. Amsalileje mwipopelo yayikwalagasya ligongo ‘jwalakwe akusasamala ya wawojo.’ (1 Petulo 5:7) Jwalakwe akusati naga tukumsalila yakudandaula yetu “mtendele wa Mlungu wawukusapunda kuganisya mwakusokoka kulikose” ucitutamika mtima pasi. (Afilipi 4:6, 7) Nambosoni aŵalanjeje Maloŵe ga Mlungu kuti gatondoyeje, soni komboleka kulemba malemba panepakwe. (Alole kabokosi pasipa.) Kombolekasoni kugasunga  gane pamtima. Ganicisya yeleyi mpaka kwakamucisye, mnopemnope pakulepela kugona ligongo lya nganisyo.—Yesaya 57:15.

Pacangakaŵapa, ŵamkwakwe ŵa jwamlume jwine jwa yaka 40 ŵalwasile ulwele wa kansa kaneko ŵajasice. Jwamlumeju citugambe kumpa lina lyakuti Jack. Jack ŵasasile kuti ndaŵi sine lipowo likusamkamula mnope. Nambo kupopela kwa Yehofa kukusamkamucisya. Jwalakwe ŵatite, “Pimbopesile kwa Yehofa lipowo likusamala.” Jwalakwe ŵajendelecele kuŵeceta kuti, “Ndaŵi syejinji lugono lukusamalila. Payitendekwe yeleyi, ngusatanda kuŵalanga soni ganicisya mwakusokoka malemba gakutondoya kaneko kupopela kwa Yehofa. Ngusinamsalila mwangupikanila mumtima. Pambesi pakwe, mtima soni nganisyo sikusatamilicika. Kaneko ngusatandilasoni gona.”

Jwamkongwe jwine lina lyakwe Vanessa mamagwe ŵajasice panyuma pakulwala mnope. Lipopelo lyamkamucisyesoni jwamkongweju. Jwalakwe ŵatite, “Ndaŵi sine pacingamwile canasa, ngambileje kolanga lina lya Mlungu kwineku misosi jili mkugwa. Ndaŵi syosope Yehofa apikeneje mapopelo gangu, mwati ŵambaga macili.”

Ŵane akusati kamula masengo gakamucisya ŵandu kukusanandiya canasa. Yeleyi yili yisyene, ligongo mundu akusaŵa jwakusangalala. (Masengo 20:35) Aklistu ŵajinji ŵele acalongo acimjawo ŵajasice akusakamula masengo gakamucisya ŵandu mwati yeleyi yikusatondoya.—2 Akolinto 1:3, 4.