Ndumetume Paulo ŵasasile kuti Yehofa * ali ‘Mlungu jwakusatutondoya m’litala lililyose, akusatutondoyasoni mu yakulingwa yetu yosope.’ (2 Akolinto 1:3, 4) M’yoyo Baibulo jikusatusimicisya kuti Mlungu nganaŵa alepele kumkamucisya jwalijose, soni pangali cakusawusya campaka tusimane naco mwati Mlungu jwetu jwakwinani ni kulepela kututondoya.

Nambope, naga tukusaka kuti Mlungu atutondoye tukusosekwa kutenda cindu cine cakwe. Jwakulocesya Amosi ŵawusisye kuti, “Ana ŵandu ŵaŵili mpaka ajende yimpepe mkanakamulane?” (Amosi 3:3) Ni ligongo lyakwe Malemba gakusatulimbikasya kuti, ‘Mum’ŵandicile Mlungu, soni jwalakwe tacim’ŵandicila jemanja.’—Yakobo 4:8.

Ana mpaka tusimicisye catuli kuti Mlungu cacituŵandicila? Candanda, ligongo lyakuti jwalakwe akusatusalila mwakuwilisyawilisya kuti akusasaka kutukamucisya. (Alole libokosi papeji jakuyicisya.) Caŵili, ligongo lyakuti tukwete umboni wamacili kutyocela kwa ŵandu ŵaŵatondweye Mlungu kalakala soni moŵa agano.

Ŵandu ŵajinji pasimene ni yakusawusya akusasosasosa cikamucisyo kwa Mlungu. Mwenye Daudi ŵasimenesoni ni yakusawusya. Jwalakwe ŵam’ŵendile Yehofa kuti, “Apikane kuŵenda kwangu kwakucondelela pangugumila kuti angamucisye.” Ana Mlungu ŵamjanjile? Elo. Mwati Daudi ŵatite kuti, “Jwalakwe angamucisye mwati mtima wangu ukusangalala.”—Salimo 28:2, 7.

Mlungu ŵasasile kuti Yesu akwete ukumu wakwatondoya ŵandu. Gane mwa masengo gele Mlungu ŵampele Yesu galiji “kutaŵa yilonda ya ŵandu ŵakasice mtima” soni “kwatondoya ŵandu wosope ŵakulila.” (Yesaya 61:1, 2) Mwakamulana ni yeleyi, Yesu ŵatendaga lung’wanu ni ŵandu “ŵakamula masengo gakusitopesya soni ŵakusitopelwa.”—Matayo 11:28-30.

Yesu ŵatondoyaga ŵandu ni maloŵe gambone, kwatendela yindu yambone soni ndaŵi sine ŵaposyaga ulwele wawo. Lisiku line jwamatana jwine jwam’ŵendile Yesu mwakumcondelela kuti, “Naga akusaka, komboleka kuswejesya.” Yesu camkamwile canasa, ni ŵatite, “Ngusaka, swejelani.” (Maliko 1:40, 41) Kaneko jwamatanajo jwaposile.

 Atamose kuti Mwanace jwa Mlungu nganaŵa pacilambo capasi pano, Atati ŵakwe, Yehofa, “Mlungu jwakusatutondoya m’litala lililyose,” akwendelecela kwakamucisya ŵandu. (2 Akolinto 1:3) Kwende tulole matala mcece gekulungwakulungwa gakukamulicisya masengo Mlungu pakwatondoya ŵandu.

• Baibulo. “Yindu yosope yaŵayilembile kalakala ŵayilembile kuti yitukamucisyeje. Malembaga gakusatupa cembeceyo ligongo gakusatukamucisya kupilila nambosoni gakusatutondoya.”—Aloma 15:4.

• Msimu Weswela wa Mlungu. Yesu paŵawile, mpingo wosope wa Ciklistu wasosekwaga kuwutondoya. Baibulo jikusalosya kuti Mlungu ŵakamulicisye masengo msimu weswela pakuwutondoya. (Masengo 9:31) Msimu weswela, wawuli macili ga Mlungu, uli wamacili mnope. Mlungu komboleka kuwukamulicisya masengo pakumtondoya jwine jwalijose pa yakusawusya yiliyose.

• Lipopelo. Baibulo jikusasala kuti, “Akadandawula ni kandu kane kalikose.” M’malo mwakwe “yakuŵenda yawo yimanyice kwa Mlungu. Pakutenda m’yoyo, mtendele wa Mlungu wawukusapunda kuganisya mwakusokoka kulikose, ucicenjela mitima jawo soni nganisyo syawo.”—Afilipi 4:6, 7.

• Aklistu Acimjetu mpaka atutondoye patusimene ni yakusawusya. Ndumetume Paulo ŵasasile kuti acimjakwe ‘ŵamtondoyaga’ pandaŵi ja “yisawusyo ni jakulaga.”—Akolose 4:11; 1 Atesalonika 3:7.

Nambo ana matala gelega gakusatukamucisya mwatuli? Kwende tulole yakutendekwa ya ŵandu ŵaŵasimene ni yakusawusya ŵatwakolasile kundanda ŵala. Cisyasyo ca jemanjaji mpaka citukamucisye kumanyilila kuti Mlungu akwanilisyape cilanga cakwe cakuti, “Mwakusatendela mama pakumtondoya mwanace, unesoni cinjimtondoya jemanja.”—Yesaya 66:13.