NGANI JA PANDANDA | KUGAPIKANICISYA MESOMKULOLA GA KWINANI
Ana Ŵani Ŵakusatama Kwinani?
Ana pakwete paliwusisye ciwusyoci? Naga ŵaliwusyeje ciwusyoci, nganaŵa jikape. Kwa yaka yejinji, ŵandu aŵele ali mkusala yakulekanganalekangana pakwamba ya kwinani. Ŵane akusakulupilila kuti kwinani kuli kumalo kwakusatama acinangolo ŵetu ŵakalakala, ŵatukusosekwa kwacimbicisya. Ŵanesoni akusaganisya kuti kwinani kuli kumbepo, kugali malayika soni ŵandu ŵambone ŵaŵawile. Nambope ŵane akusati kuli kumalo kujikusatama milungu jejinji.
Ŵandu ŵajinji akusati ngaŵa mkumanyilila cenene yakwinani ligongo pangali juŵatyocele kwinaniko jwampaka atusalile yakweleko. Nambo yeleyi nganiyiŵa yisyene. Yesu jwamtameje kwinani mkanayice pacilambo capasi. Jwalakwe jwasalile acimlongola ŵa dini ŵa m’yaka 100 yandanda ya ndaŵi jetu jino kuti, “Natulwice kutyocela kwinani kukutenda lisosa lya juŵandumile.” M’yoyo, ndaŵi jine Yesu pajwasalilaga ŵandumetume ŵakwe kuti “m’nyumba mwa Atati ŵangu mwana malo gamajinji,” jwasalaga yindu yakuti jwayimanyililaga cenene.—Yohane 6:38; 14:2.
Tukusamanyilila kuti Atatigwe Yesu ali Mlungu, jwele lina lyakwe lili Yehofa, soni akusatama kwinani. (Salimo 83:18) M’yoyo, Yehofa Mlungu soni Yesu ni ŵampaka atusalile cenene yindu yakwinani kupunda jwalijose. Jemanjaji ŵajuwile yakwinani kupitila m’mesomkulola gaŵalosisye ŵandu ŵakulupicika.
Ngani jakuyicisya cijitagulile mbali sya Baibulo syasikusasala ya mesomkulola ga kwinani gaŵagaweni acalume ŵakulekanganalekangana. Pacaŵalanjeje nganiji, akumbucile kuti yindu yakwinani kwakusatama Mlungu ngaŵa mkuyikamula kapena kuyiwona. Nambo Mlungu jwasagwile kutagulila yakwinaniyi m’litala lyakuti mpaka tugapikanicisye. Mesomkulolaga cigakamucisye kwamanyilila cenene ŵakusatama kwinani.
