“Naciweni citengu caucimwene kwinani, soni jwine ali atemi pacitengupo. Uwonece wa juŵatemi pacitengupo waliji mpela liganga lya mtengo wapenani lya yasipi ni lya sadiyo, nambosoni kusyungulila citenguco paliji ukunje wa ula wakuwoneka mpela liganga lya emalodi.”—Ciunukuko 4:2, 3.

“Papali kuŵala kwamacili kwakwamsyungulile jwalakwejo kwakuwoneka mpela ukunje wa ula m’mawunde palisiku lya ula. Kweleku ni kuŵala kwakwamsyungulile. Kuŵalako kwawonekaga mpela ucimbicimbi wa Yehofa.”—Ezekieli 1:27, 28.

Mesomkulola gaŵagaweni ndumetume Yohane soni jwakulocesya Esekiyele gakulosya ucimbicimbi wa Yehofa Mlungu pakamulicisya masengo yindu yatukuyimanyilila. Yindu yakwe mpela maganga gapenani gakunyesimila, ukunje wa ula, soni citengu caucimwene. Yeleyi yikulosya kuti Yehofa ali jwaucimbicimbi mnope, jwambone, soni jwamtendele.

Yagatagulile malembaga pakwamba ya Mlungu yikamulana ni yajwaŵecete jwamalumbo juŵalembile kuti, “Yehofa ali jwamkulungwa, soni akuŵajilwa kucimbicikwa mnope. Jwalakwe ali jwakutesya woga kujipunda milungu josope. Milungu josope ja mitundu jine ja ŵandu jili jangali mate, nambo Yehofa ni juŵapanganyisye kwinani. Lumbili ni ucimwene yili ni jwalakwe. Macili ni kusalala yili malo gakwe gamaswela.”—Salimo 96:4-6.

Atamose kuti Yehofa ali Jwamkulungwa mnope, jwalakwe akusatulimbikasya kuti tum’yicileje mwipopelo, soni akusatusimicisya kuti akusapikanila mapopelo getu. (Salimo 65:2) Mlungu akusatunonyela soni akusatusamalila. Ni ligongo lyakwe ndumetume Yohane jwalembile kuti, “Mlungu ali cinonyelo.”—1 Yohane 4:8.

“[Sitefano], mwakulongoleledwa ni msimu weswela, jwalolite kwinani ni jwawuweni ucimbicimbi wa Mlungu, soni wa Yesu ali ajimi kumkono wamlyo wa Mlungu. Ni jwatite, ‘Alole! Ngukuwona kwinani kwewuguce, soni ngum’wona Mwanace jwa mundu ali ajimi kumkono wamlyo wa Mlungu.’”—Masengo 7:55, 56.

Sitefano paŵagawonaga mesomkulolaga, paliji pali pagambile kupita masiku gakuŵalanjika ciwile Yesu. Pandaŵiji, Sitefano jwasalilaga yeleyi acimlongola ŵa dini ja Ciyuda, ŵaŵam’wuleje Yesujo. Mesomkulolaga  gasimicisye kuti Yesu jwajimwice kuŵawe ni kuŵa cijumi, soni kuti jwapocele ucimbicimbi. Ndumetume Paulo jwalembile ya ngani jeleji kuti, “[Yehofa] ŵamjimwisye [Yesu] kuŵawe, ni kumtamika kumkono wakwe wamlyo kwinani. Ŵam’ŵisile penani kupunda boma jilijose, maulamusi gosope, macili gosope, acambuje wosope ni lina lililyose lyakupegwa kwa jwalijose, mundaŵi ajino nambosoni mundaŵi jamsogolo.”—Aefeso 1:20, 21.

Malemba gakusalosya kuti Yesu akwete ukumu wekulungwa. Gakusalosyasoni kuti jwalakwe akusasamala mnope ya ŵandu, mpela mwakusatendela Yehofa. Pajwatendaga undumetume wakwe pacilambopa, Yesu jwaposisye ŵakulwala, ŵalemale, soni jwajimwisye ŵawe. Nambosoni jwalosisye kuti akusamnonyela mnope Mlungu ni ŵandu pajwapelece umi wakwe kuŵa mbopesi. (Aefeso 2:4, 5) Pakuŵa apano ali kumkono wamlyo wa Mlungu, pacangakaŵapa Yesu calosye macili gakwe ni kwapa majali ŵandu wosope ŵakupikanila.

‘[Une jwakulocesya Daniyele] panaliji mkulola, nayiweni yitengu yaucimwene yili mkuŵicidwa pamalopo soni Jwamasiku Gejinji [Yehofa] jwatemi pa citengu caucimwene. . . . Likuga lyekulungwa lya malayika lyamtumicilaga jwalakwejo, nambosoni likuga line lyekulungwa mnope lya malayika kupunda linelyo lyajimi pameso pakwe.’—Danieli 7:9, 10.

M’mesomkulola gakwinaniga, Daniyele jwagaweni malayika gejinji, ngaŵaga lilayika limo. Yeleyi yili yakutesya lung’wanu kwabasi! Malayika gali yakupanganyikwa yangawoneka ni meso yalunda, soni yamacili mnope. Malayikaga gali m’makuga gakolanjikwa kuti aselafi ni akelubi. Baibulo jikusasala ya malayika maulendo gakupunda 250.

Malayika nganigaŵa ŵandu ŵakalakala ŵaŵatamaga pacilambopa. Mlungu jwagapanganyisye malayikaga kalakala mkanapanganye ŵandu. Mlungu pajwapanganyaga cilamboci, malayikaga gayiwonaga yosope yayatendekwaga mwati pambesi pakwe gasangalele mnope.—Yobu 38:4-7.

Malayika gakulupicika gakusamtumicilasoni Mlungu m’litala line lyakusosekwa mnope. Gakusakamucisya pamasengo gakulalicila ngani syambone syakwamba ya Ucimwene wa Mlungu pacilambo cosope. (Matayo 24:14) Mesomkulola gaŵagaweni ndumetume Yohane gakusasimicisya yeleyi. Jwalakwe jwalembile kuti, “Naliweni lilayika line lili mkuguluka  mwinani. Lilayikalyo lyakwete ngani syambone syangamala syakuti likalalicile kwa ŵandu ŵa pacilambo capasi, kwa ŵandu ŵamtundu wuliwose, ŵa lukosyo lulilose, ni ŵa ciŵeceto cilicose.” (Ciunukuko 14:6) Masiku agano, malayika gangaŵeceta ni ŵandu mpela mugatendelaga ndaŵi sine kalakalako. Nambope gakusigalongolela ŵandu ŵakulalicila ngani syambone kwa ŵandu ŵamtima wambone.

‘Jatandite ngondo kwinani. Mikaele [Yesu Klistu] ni malayika gakwe ŵamenyene ni cingwena cila. Cingwenaco pampepe ni malayika gakwe caputule ngondo nambo nganicipunda, mwati malo gawo nganigapatikanasoni kwinani. M’yoyo, cingwena cekulungwa, lijoka lyakala lila, ŵacigwisisye pacilambo capasi. Celeci ni cacikusakolanjikwa kuti jwakusakala soni Satana, cacikulambwusya ŵandu ŵa pacilambo capasi. Malayika gakwesoni ŵagagwisisye yimpepe naco.’—Ciunukuko 12:7-9.

Ndaŵi jine kwinani nganikupagwa mtendele. Mlungu pajwagambile kwapanganya ŵandu, lilayika line lyakumbisile mnope kuti ŵanduwo alilambileje. Pambesi pakwe lyamjimucile Yehofa, ni lyaŵele Satana, gopolela kuti “Jwakusisya.” Kaneko, malayika ganesoni gaŵele kumbali jakwe mwati gaŵele yiŵanda. Yiŵandayi yili yakusakala mnope ligongo yikusamsisya Yehofa, soni yikusatendekasya ŵandu ŵajinji kutenda yindu yakutindana ni yakusasaka Yehofa.

Satana ni yiŵanda ali ŵalukale soni ŵangalwe. Jemanjaji ŵangawona ŵandu ni liso lyambone soni akusiŵalagasya mnope ŵanduwo. Mwambone, Satana jwawuleje yilango soni ŵamasengo ŵa mundu jwakulupicika Yobu. Kaneko, jwatendekasisye “mbungo jamacili mnope” kuti jigwisye nyumba ni kwawulaga ŵanace 10 ŵa Yobu. Pambesi pakwe, Satana jwamlwasisye Yobu ni “yilonda yakupweteka kutyocela kusajo mpaka pamtwe.”—Yobu 1:7-19; 2:7.

Nambope, pacangakaŵapa, Satana camlosye yakogoya. Pakuŵa ŵamgwicisye pacilambopa, akumanyilila kuti “jimsigalile ndaŵi jamnono.” (Ciunukuko 12:12) Satana camtyosye, mwati jeleji jili ngani jambone kwabasi!

“Wawo [Yesu] ŵam’wombolele Mlungu ŵandu ŵa ngosyo syosope, ŵaciŵeceto cilicose, cilambo cilicose ni mtundu wuliwose. Ŵalakwe ŵaŵisile jemanjajo kuŵa ucimwene wa ŵakutaga mbopesi ŵakumtumicila Mlungu jwetu, soni jemanjajo tacilamulila cilambo capasi.”—Ciunukuko 5:9, 10.

Mlungu jwamjimwisye Yesu ni kumjawusya kwinani, m’yoyosoni ŵane cacijawula kwinani. Yesu jwasalile ŵakumkuya ŵakwe kuti, “Ngwawula kukwalinganyicisya malo. . . . Cinjiyikasoni kukwajigalila kumangwetu,  kuti kucingatame une jemanjasoni akatame kweleko.”—Yohane 14:2, 3.

Ŵakwawula kwinani ŵana yacakatendeje. Jemanjajo pampepe ni Yesu cacipanganya boma ja Ucimwene jajicalamulila ŵandu wosope pacilambo capasi soni kwapa majali. Ucimwene welewu ni wele Yesu jwajiganyisye ŵakumkuya ŵakwe kuti awupopeleleje kuti, “Atati ŵetu ŵakwinani, lina lyawo liswejesyedwe. Ucimwene wawo uyice. Lisosa lyawo litendekwe pacilambo capasi, mpela kwinani.”—Matayo 6:9, 10.

“Napikene maloŵe gamacili mnope gakutyocela kucitengu caucimwene gacitiji, ‘Sambano malo gakutama Mlungu gali sikati ja ŵandu. . . . Jwalakwe cacipukuta misosi josope mmeso mwawo, soni ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Yindu yakala yiciŵa yimasile.’”—Ciunukuko 21:3, 4.

Mesomkulolaga gakusala yawucitenda Ucimwene wa Mlungu, wakulamuligwa ni Yesu pampepe ni ŵandu ŵakwimuka ni kwawula kwinani. Pandaŵijo, Ucimwenewu ucimasya ulamusi wa Satana ni kuyikasya paladaiso. Yakusawusya yosope ya ŵandu yiciŵa mbili jakala. Ni ciwa cakwe cicimala.

Nambi wuli pakwamba ya ŵandu ŵajinji ŵele ngasajawula kwinani pambesi pakwimuka kuŵawe? Pacacijimuka, mkupita kwa ndaŵi, wosope cacikola umi wamlama soni cacikola cembeceyo cakutama m’Paladaiso pacilambopa mpaka kalakala.—Luka 23:43.