Ŵandu ŵajinji pacilambo cosope akusakulupilila kuti Kilisimasi cili cindimba cakusangalalila kupagwa kwa Yesu Klistu. Nambo ana pakwete paganicisye naga ŵakulijiganya ŵa Yesu ŵasangalalilaga Kilisimasi? Ana akumanyilila yajikusasala Baibulo pakwamba ya kusangalalila masiku gakupagwa? Kumanyilila kwangwa kwa yiwusyo yeleyi mpaka kutukamucisye kulola naga Aklistu akusosekwa kusangalalilaga Kilisimasi.

Candanda, Baibulo jangatusalila kuti Yesu kapena ŵandu ŵane ŵaŵalambilaga Mlungu mwakulupicika, ŵasangalalilaga masiku gakupagwa. Malemba gakusagamba kusala ya ŵandu ŵaŵili ŵaŵatesile yindimba yakusangalalila lisiku lyawo lyakupagwa. Nambo wosopeŵa nganaŵa ŵakulambila Yehofa, Mlungu jwele juŵalembile Baibulo. Nambosoni palisiku lyaŵatendaga yindimbayo patendekwe yindu yine yakusakala. (Genesis 40:20; Maliko 6:21) Buku jine (Encyclopædia Britannica) jasasile kuti, Aklistu ŵandanda ŵasisyaga “ndamo jacikusa jakusangalalila masiku gakupagwa.”

Baibulo jangatusalila deti jisyesyene jakupagwa kwa Yesu. Buku jine (Cyclopedia) jakulembedwa ni John McClintock ni James Strong jasasile kuti, “Lisiku lisyesyene lyakupagwa kwa Yesu ngaŵa mkulipata m’Malangano Gasamabano kapena kwine kulikose.” Naga Yesu akasace kuti ŵakumkuya ŵakwe asangalalileje lisiku lyakupagwa, mwangakayicila akakamucisye kuti amanyilile cenene deti jisyesyene jakupagwa kwakwe.

Caŵili, m’Baibulo pangali palipose pakusasala kuti Yesu kapena jumo mwa ŵakulijiganya ŵakwe ŵasangalalilaga Kilisimasi. Mwakamulana ni buku jine jakatolika (New Catholic Encyclopedia) jasasile kuti kusangalalila Kilisimasi kukukolanjidwa kandanda “m’buku jine (Chronograph) ja Philocalus. Buku ja Cilomaji jalinganyidwe m’caka ca 336 [C.E.] soni ŵajendelecele kujiwandisya kwandaŵi.” Ndaŵi jeleji ŵandu ŵaliji ali amalisisye kala kulemba Baibulo soni paliji pali papite yaka yejinji kutyocela pandaŵi jele Yesu ŵaliji pacilambo capasi. Ni ligongo lyakwe McClintock soni Strong ŵatite, “Mlungu ngaŵa kuti ni juŵalamwile ŵandu kuti asangalalileje Kilisimasi, atamose m’Malemba ga Malangano Gasambano mwangali yeleyi.” *

Yesu jwali Mkwiganya Jwamkulungwa, jwalamwile ŵakumkuya ŵakwe yindu yaŵasosekwaga kutenda, soni yeleyi yikusasimanikwa m’Baibulo. Nambo nganiŵasalila kuti asangalalileje Kilisimasi. Mpela mwayikusaŵela kuti aticala ŵangasaka kuti ŵanace ŵawo atende yindu yakulekangana ni yaŵajiganyisye ni mwayiŵelelesoni ni Yesu. Jwalakwe ngakusasaka kuti ŵakumkuya ŵakwe, ‘atendeje yindu mwakupelenganya yakulembedwa’ m’Baibulo.—1 Akolinto 4:6.

Mmalo mwakwe Aklistu ŵandanda ŵatendaga cikumbucilo caciwa ca Yesu. Yesu jwasalile ŵakumkuya ŵakwe lisiku soni ndaŵi jakumbucila ciwa cakwe soni jwalosisye mwampaka atendeleje. Yindu yosope yaŵasalileyi yikusasimanikwa m’Baibulo.—Luka 22:19; 1 Akolinto 11:25.

Mpela mwatuyiwonele, Kilisimasi cili cindimba cakusangalalila lisiku lyakupagwa, nambo Aklistu ŵandanda nganatendaga nawo ndamo jacikusaji. Nambosoni m’Baibulo, pangali pakusasala kuti Yesu kapena mundu jwine jwakwe jwasangalalilaga Kilisimasi. Ligongo lya yeleyi, Aklistu ŵajinji pacilambo cosope asimicisye kuti ngakusosekwa kusangalalilaga nawo Kilisimasi.