Ŵanduwe tuli liŵasa limpepe ligongo twatyochele kwa Adamu. Nambope masiku agano atamose ŵandu ŵaliŵasa limo yili yakusawusya kuti anonyelaneje soni kuti achimbichisyaneje. Mlungu jwetu jwachinonyelo jwangasaka kuti yeleyi yitendekweje.

“Mumnonyeleje mlongo mjenu mpela yimkusati pakulinonyela mwasyene.”—LEFITIKO 19:18.

“Mwanonyeleje amagongo ŵenu.”—MATEYU 5:44.

Alole yaŵasasile Mlungu pangani ja chinonyelo pa 1 Akolinto 13:4-7.

“Chinonyelo chili chakuwusimana mtima nambosoni chakulisinga.”

Aganichisye ayi: Ana wawojo mpaka apikane wuli ŵandu ŵane pakwatendela yindu mwakuwusimana mtima?

“Chinonyelo changali wiwu” kapena kuti jelasi.

Aganichisye ayi: Ana wawojo mpaka apikane uli ŵandu ŵane pakwatendela jelasi soni akwakayichila?

Chinonyelo “changalilumba kapena kulikwesya.”

Aganichisye ayi: Ana wawojo mpaka alipikane uli ŵane pakusichimbichisya nganisyo syawo?

Chinonyelo “changasunga ngani naga jwine achilemwechesye.”

Aganichisye ayi: Mlungu ali jwakoseka kwakululuchila ŵandu ŵalesile yakulemwa. Maloŵe ga Mlungu gakusati, “Mlungu ngasaŵa chitumbilile mpaka yaka yosope.” (Salimo 103:9) Tukusaŵa ŵakusangalala naga jwine atukululuchile patumlemwechesye. Myoyo tuŵeje ŵakoseka kwakululuchila ŵandu ŵane patulemwechesye.—Salimo 86:5.

Chinonyelo “changasangalala naga jwine atesile yangalumbana.”

Aganichisye ayi: Ngatukusasaka kuti ŵandu asangalaleje patusimene ni yakusawusya. Myoyo tukasangalalaga ŵandu ŵane pasimene ni yakusawusya atamose kuti ŵanduwo akusatutendela yindu yangali chilungamo.

Kuti Mlungu atutendeleje yindu yambone tukusosekwa twanonyeleje ŵandu wosope ŵene mwangasamala kandu ya msingu wawo, chilambo chakutyochela kapena dini jawo. Myoyo tukusosekwa twakamuchisyeje ŵandu pa yindu yakusosechela pa umi wawo.