1. Ana kukambilana chichatutendekasisye kuti tuŵe ŵa Mboni sya Yehofa kukusaŵa kwakamuchisya chamtuli?

 “ANA chichi chachatendekasisye kuti aŵe jwa Mboni sya Yehofa?” Ngatukukayichila kuti ŵandu ŵajinji aŵele ali mkwawusya chiwusyo chelechi. Chiwusyochi ni chakusatuwusya abale pakusaka kumanyilila chachatutendekasisye kuŵa jwa Mboni sya Yehofa. Tukusasangalala kupikana chichatendekasisye abale ni alongo ŵetu kutanda kumnonyela Yehofa. Tukusasangalalasoni kwasalila jemanjaji chichatutendekasisye kuti tutande kumnonyela Yehofa. (Alo. 1:11) Kukambilana yeleyi kukusatutendekasya kumanyilila kusosekwa kwa yijiganyo yisyesyene. Nambosoni yikusatutendekasya kuŵa ŵakusachilila ‘kukuyape yijiganyo yisyesyene.’ Yayikugopolela kutenda yindu yampaka yimtendekasye Yehofa kuŵa jwakusangalala.—3 Yoh. 4.

2. Ana munganiji chitukambilene chichi?

² Munganiji, chitukambilane magongo gane gagakusatutendekasya kuti tuwunonyeleje usyesyene. Kaneko chitukambilane yampaka tutende kuti tupitilisye kuwunonyela usyesyene. Ngatukukayichila kuti kutenda yeleyi chikutukamuchisye kumyamichila Yehofa ligongo lyakutukunda kuŵa mu gulu jakwe. (Yoh. 6:44) Chiyitulimbikasyesoni kola mtima wakusaka kwasalila ŵane yakwamba usyesyene.

3. Ana ni chindu chakusosekwa mnope chapi chachikusatutendekasya kuwunonyela usyesyene?

³ Tukwete magongo gejinji gagakusatutendekasya kuwunonyela usyesyene. Chakusosekwa mnope chili chakuti tukusamnonyela Yehofa juŵatandikasisye usyesyene. Kupitila m’maloŵe gakwe Baibulo, tukusamanyilila kuti jwalakwe ali jwamachili soni kuti ni juŵapanganyisye kwinani ni chilambo chapasi. Tukusamanyililasoni kuti jwalakwe ali Atati ŵetu ŵakwinani ŵakusatunonyela  soni kutusamalila. (1 Pet. 5:7) Tukusamanyilila kuti Mlungu jwetu ali ‘jwachanasa, jwambone mtima, jwangatumbila chitema, ŵakugumbala ni chinonyelo changamala soni jwakulupichika kwa ŵandu ŵakwe.’ (Eks. 34:6) Yehofa akusanonyela chilungamo. (Yes. 61:8) Jwalakwe yikusampweteka mumtima pakutuwona tuli mkusimana ni yakusawusya, mwamti akwembecheya ndaŵi jachachimasya yakusawusya yosope yatukusasimana nayo. (Yel. 29:11) Tukwembecheya mwachidwi mnope ndaŵi jakusangalasyaji. Kusala yisyene, yeleyi yikusatutendekasya kuti tumnonyeleje mnope Yehofa.

4-5. Ligongo chichi ndumetume Paulo jwalandenye chembecheyo ni nangula?

⁴ Ana ligongo line lyapi lyalikusatutendekasya kuwunonyela usyesyene? Usyesyene ukusatukamuchisya mnope. Mwachisyasyo, usyesyenewu ukusapwatikapo ya chembecheyo chatukwete chamsogolo. Pakusala ya kusosekwa kwa chembecheyo, ndumetume Paulo jwalembile kuti, “Chembecheyo chatukwetechi chili mpela nangula jwa umi wetu jwakutukamuchisya kuti tuŵe ŵakulimbangana soni ŵangakayichila.” (Aheb. 6:19) Mpela mwayikusaŵela kuti nangula akusakamuchisya liboti kuti likajigalwa, nombe chembecheyo chetu chakutyochela m’Baibulo mpaka chitukamuchisye patukusimana ni yakusawusya.

⁵ Pelepa, Paulo jwasalaga ya chembecheyo chakwawula kwinani chakwete Aklistu ŵasagulwe. Nambope, maloŵega gakukamulasoni masengo kwa Aklistu ŵakwete chembecheyo chakutama ni umi wangamala mu paladaiso pachilambo chapasi. (Yoh. 3:16) Kusala yisyene, kumanyilila ya chembecheyo cha umi wangamala kukusatutendekasya kuŵa ŵakusangalala.

6-7. Ana kulijiganya usyesyene wakwamba yamsogolo kwamkamuchisye chamtuli mlongo jwine?

⁶ Kwende tulole yayamtendechele mlongo jwine lina lyakwe Yvonne. Mlongoju nganapagwila m’liŵasa lya Mboni sya Yehofa. Myoyo pajwaliji mwanache jwajogopaga chiwa. Jwalakwe jwakumbuchile kuti pandaŵi jine jwaŵalasile maloŵe gakuti, “Lisiku line chilichose chichimala.” Jwalakwe jwasasile kuti, “Maloŵega gandepelekasyaga kugona lugono ligongo naganichisyaga mnope ya msogolo. Naganisyaga kuti umi ukwete chakulinga ni naliwusyaga kuti, ‘Ligongo chichi napali?’ Naganisyaga myoyo ligongo nganisakaga kuwa.”

⁷ Kaneko ali akusile Yvonne jwasimene ni ŵa Mboni sya Yehofa. Jwalakwe jwatite, “Natandite kulupilila kuti ngwete chembecheyo chakutama ni umi wangamala mpaka kalakala pachilambo chapasi mu paladaiso.” Ana kulijiganya usyesyene kwamkamuchisye chamtuli mlongoju? Jwalakwe jwatite, “Masiku agano ngangusalepelaga kugona ligongo lyakudandawula yakusogolo kapena chiwa.” Pelepatu tuyiweni kuti mlongoju akusawuwona usyesyene kuŵa wakusosekwa mnope. Nambosoni akusasangalala kwasalila ŵane ya chembecheyo chakwete cha msogolo.—1 Tim. 4:16.

8-9. (a) Ana jwamlume juŵamkolasile Yesu mu chisyasyo chakwe jwachiwonaga chamtuli chipanje chiŵachipatile? (b) Ana usyesyene uli wakusosekwa chamtuli kwa wawojo?

⁸ Usyesyene wa m’Baibulo ukusapwatikaposoni ngani syambone syakwamba Uchimwene wa Mlungu. Yesu jwalandenye usyesyene wakwamba Uchimwenewu ni chipanje chakusisika. Pa Mateyu 13:44, Yesu jwatite, “Uchimwene wakwinani uli mpela chipanje chachasisiche mumgunda, chele mundu jwine ŵachipatile ni kuchisisasoni. Ligongo lya chisangalalo, jwalakwe jwapite kukusumisya yindu yosope yaŵakwete ni kusuma mgundawo.” Tuyiwenitu kuti munduju nganasosagasosaga chipanje. Nambope jwalakwe pajwachisimene jwatesile yiliyose yampaka akombole kuti achipate chipanjecho. Mwamti jwasumisye chilichose chajwakwete. Jwatesile yeleyi ligongo jwamanyililaga kusosekwa kwa chipanjecho. Kusala yisyene chipanjecho chaliji chakusosekwa mnope kupunda chilichose chakajonasile jwalakwe.

 ⁹ Ana mwelemu ni mwakusawuwonela usyesyene? Ngatukukayichila ata panandi, ligongo tukumanyilila kuti chilambochi nganichiŵa chitupele chilichose champaka tuchilandanye ni chisangalalo chatukusapata ligongo lyakumtumichila Yehofa. Nambosoni tukwete Chembecheyo cha umi wangamala mu Uchimwene wa Mlungu. Sonitu upile watukwete wakuŵa paunasi wambone ni Yehofa uli wakusosekwa mnope kupunda chilichose. Tukusaŵa ŵakusangalala patukutenda yindu ‘yakumsangalasya pa chilichose.’—Akolo. 1:10.

10-11. Ana chichi chachamkamuchisye Michael kuti achenje ndamo syakwe?

¹⁰ Ŵajinji mwa m’weji twachenjile yindu yejinji kuti tumsangalasye Yehofa. Ŵane ŵalesile masengo gapenani soni yindu yine yayikatendekasisye kuŵa ŵakusichila. Nambosoni ŵane ŵalesile ndamo syakusakala paŵalijiganyisye yakwamba Yehofa. Yeleyi ni yajwatesile mundu jwine lina lyakwe Michael. Jwalakweju nganapagwila m’liŵasa lya Mboni sya Yehofa. Pajwaliji jwachinyamata jwalakwe jwalijiganyisye kalati. Jwalakwe jwatite, “Nasangalalaga mnope ni maseweloga ligongo gandendekasyaga kola chilu chakulimbangana. Soni ndaŵi sine nayiwonaga kuti pangali jwampaka angomeche.” Nambo Michael pajwatandite kulijiganya Baibulo, jwamanyilile kuti Yehofa akusawengana ni yachiwawa. (Sal. 11:5) Jwalakwe jwasasilesoni kuti, “Liŵasa lya Mboni lyalyanjiganyaga Baibulo, nganilisalilaga kuti ndeche kalati, nambo ŵagambaga kupitilisya kunjiganya usyesyene wa m’Baibulo.”

¹¹ Michael pajwalijiganyaga mnope yakwamba Yehofa ni pajwamnonyelagasoni mnope Yehofajo. Jwalakwe jwatesile chidwi mnope ni chanasa chakwete Yehofa pa ŵakutumichila ŵakwe. Pali papitile ndaŵi Michael jwayiweni kuti akusosekwa kuchenga ndamo syakwe sine. Jwalakwe jwatite, “Namanyilile kuti kuleka kalati chichiŵe chindu chakusawusya mnope paumi wangu.” Ni jwapitilisye kuti, “Nambo namanyililesoni kuti ngusosekwa kumsangalasya Yehofa. Namanyililesoni kuti kumtumichila Yehofa kuli kwakusosekwa mnope kupunda chine chilichose.” Michael ŵayamichile usyesyene waŵawupatile. Ligongo lyakuyamichilaku, yamtendekasisye kuti achenje ndamo syakwe syakusakala.—Yak. 1:25.

12-13. Ana usyesyene wa m’Baibulo ŵamkamuchisye chamtuli jwamkongwe jwine?

¹² Pakusaka kulondesya kusosekwa kwa usyesyene, Baibulo jikusawulandanya ni nyali jajikukolela pachipi. (Sal. 119:105; Aef. 5:8) Jwamkongwe jwine lina lyakwe Mayli, jwakusatama ku Azerbaijan, jwayamichile mnope yagatite pakumkamuchisya maloŵe ga Mlungu. Jwalakwe jwakulile m’liŵasa lya achinangolo ŵakulekangana dini. Babagwe ŵaliji Msilamu pele mamagwe ŵaliji Myuda. Jwalakwe jwatite, “Atamose kuti nganingayichilaga yakuti kwana Mlungu, papali yiwusyo yejinji yayalagasyaga. Naliwusyaga kuti, ‘Ligongo chichi Mlungu ŵatupanganyisye? Ana jwalakwe jwatupanganyisye kuti tulajeje kuti kaneko chatujonanje ku moto mpaka kalakala?’ Ligongo lyakuti ŵajinji akusasala kuti chilichose chachikusatendekwa chili lisosa lya Mlungu, naliwusyaga kuti, ‘Ana Mlungu akusiŵawonaga ŵandu mpela yidole yakwe kuti jemanjajo pakulaga jwalakwejo ni kusangalalaga?’”

¹³ Jwamkongweju jwapitilisye kusosasosa kwanga kwa yiwusyo yajwakwete. Kaneko jwatandite kulijiganya Baibulo mwamti jwaŵele jwa Mboni sya Yehofa. Jwalakwe jwatite, “Yindu yanalijiganyisye m’Baibulo yangamuchisye kuti mmbe mundu jwambone. Yangamuchisyesoni kuti ngole mtendele wa mumtima.” Mwakulandana ni jwamkongweju, wosopewe tukusamchimbichisya Yehofa ‘juŵatukopwesye [m’weji] mu chipi kuti tukuwone kuŵala kwakwe kwakusimonjesya.’—1 Pet. 2:9.

14. Ana mpaka tutende wuli kuti tuwunonyeleje mnope usyesyene? (Alole libokosi lyakuti “ Yindu Yine Yayikusalandana ni Usyesyene.”)

¹⁴ Yatukambileneyi yigambile kuŵa yisyasyo yamnono yakulosya kusosekwa kwa usyesyene.  Ngatukukayichila kuti wawojo mpaka apate yisyasyo yine yejinji. Uli ngalinganya yakulijiganya pajika kuti awungunye magongo gane gagakusatutendekasya kuwunonyela mnope usyesyene. Patukuwunonyela mnope usyesyene, ni patukusapatasoni matala gejinji gakulosya kuyamichila.

15. Ana litala limo lyapi lyampaka tulosye kuti tukusawunonyela mnope usyesyene?

¹⁵ Mpaka tulosye kuti tukusawunonyela usyesyene, mwakulijiganya Baibulo ndaŵi syosope soni mabuku gakulondesya Baibulo. Wosopewe, tukusasosekwa kulijiganya yejinji mwangasamala kandu kuti tutemi mu usyesyene kwandaŵi jelewu. Magasini ja Sanja ja Mlonda jandanda kukopoka jasasile kuti, “Usyesyene uli mpela liluŵa lyalisyungulilidwe ni chitekete. Kuti ukombole kulipata ukusasosekwa kulisosasosa mwakusamala. Nambosoni pawupatile limo ngawukusasosekwa kwikutila ni limo pelyo. . . . Ukusasosekwa kupitilisya kuwungunya maluŵa gane. Myoyo ngatukusosekwa kwamba kwikutila ni ngani jimpepe ja usyesyene jajikusatusangalasya. . . . Ndaŵi syosope tuwungunyeje mfundo sine sya m’Baibulo.” Kusala yisyene kulijiganya kuli kwakusawusya, nambo tukusapindula mnope patukulimbichila kutenda yeleyo.

16. Ana wawojo akusaliwona litala lyapi kuŵa lyakamuchisya pakulijiganya? (Misyungu 2:4-6)

 ¹⁶ Ngaŵa kuti wosopewe tukusanonyela kuŵalanga soni kulijiganya. Nambope, Yehofa akusatulimbikasya kuti “tusosesojepe” ni chakulinga chakuti tuwupikanichisye chenene usyesyene. (Aŵalanje Misyungu 2:4-6.) Naga ndaŵi syosope tukutenda yeleyi yichitukamuchisya mnope. Corey jwasasile kuti pakuŵalanga Baibulo akusatenda yakuti ajipikanichisye chenene ndime jilijose pajika. Jwalakwe jwatite, “Ngusaŵalanga maloŵe gamwiŵanda, kulola malifalesi nambosoni kuwungunya yindu yine. . . . Ngusalijiganya yejinji pakamulichisya masengo litalali.” Chinga tukukamulichisya masengo litala lyeleli kapena line, tukusalosya kuti tukusawuwona usyesyene kuŵa ŵakusosekwa mnope patukulingalinga kupata ndaŵi jakulijiganya.—Sal. 1:1-3.

17. Ana kutenda yindu mwakamulana ni usyesyene wa m’Maloŵe ga Mlungu kukusagopolela chichi? (Yakobo 1:25)

¹⁷ Tukumanyilila kuti kwamba kulijiganya usyesyene nganikuŵa kwakwanila. Nambo tukusasosekwa kamulichisya masengo yatulijiganyisyeyo paumi wetu. Naga tukutenda yeleyi usyesyene uchitukamuchisya kuŵa ŵakusangalala. (Aŵalanje Yakobo 1:25.) Ana mpaka tumanyilile chamtuli kuti tukusatenda yindu mwakamulana ni maloŵe ga Mlungu. Mpela mwajwaŵechetele m’bale jwine, tukusasosekwa kuwungunya ni kulola yindu yatukutenda chenene nambosoni yatukusosekwa kongolela paumi wetu. Pa mfundo jeleji, ndumetume Paulo jwatite, “Mulimose mwatujawulile pasogolo, kwende tupitilisye kwenda chenene m’litala lilyolyo.”—Afil. 3:16.

18. Ligongo chichi tukusosekwa kutenda yampaka tukombole kuti ‘tukuyeje yijiganyo yisyesyene’?

¹⁸ Aganichisye umbone watukusapata patukutenda yakomboleka kuti ‘tukuyeje yijiganyo yisyesyene.’ Ngaŵa kuti usyesyene ukusagamba kutukamuchisya kuti tukole umi wambonepe, nambo ukusatukamuchisyasoni kuti tumsangalasyeje Yehofa soni abale ni alongo. (Mis. 27:11; 3 Yoh. 4) Kusala yisyene, tukwete magongo gambone mnope gakututendekasya kuti tuwunonyeleje usyesyene soni kutenda yindu mwakamulana ni usyesyenewo.