1. Ana yindu yambone yapi yakombwele kutenda ŵachinyamata ŵajinji?

 CHAKA chilichose ŵachinyamata masausande gejinji akusabatisidwa. Ana wawojo ŵabatisidwe? Naga yili myoyo, abale ni alongo soni Yehofa akusangalala mnope ni yeleyo. (Mis. 27:11) Kwakandaŵi kamnono, aganichisye yindu yakombwele kutenda. Mwachisyasyo aŵele mkulijiganya Baibulo mwakulimbichila kwa yaka yejinji. Paŵalijiganyaga ŵayiweni kuti Baibulo jili maloŵe ga Mlungu. Kupunda pelepa ayikene pakummanyilila soni kumnonyela juŵalembile Baibulo. Chinonyelo chawo pa Yehofa chakusile mnope mwamti ŵayikene pakulipeleka ni kubatisidwa. Kusala yisyene yeleyitu yili yakusangalasya mnope.

2. Ana munganiji chitukambilane chichi?

² Mwangakayichila chikulupi chawo chalinjidwe mmatala gakulekanganalekangana mkanaŵe kubatisidwa. Nambo panyuma pakubatisidwa chasimaneje ni yindu yine yayichilinga kukulupichika kwawo. Satana chachilinga kwatendekasya kuti aleche kumnonyela soni kumtumichila Yehofa. (Aef. 4:14) Nambo jemanja akakunda kuti yeleyi yatendechele. Ana chichi champaka chakamuchisye kuti aŵepe ŵakulupichika kwa Yehofa? Sonitu kuti akwanilisye chilanga chaŵatesile kwa jwalakwe, akusosekwa ‘kutenda yiliyose yakomboleka’ kuti aŵe Mklistu jwamkomangale. (Aheb. 6:1) Ana mpaka atende chamtuli yeleyi?

3. Ana Aklistu wosope akusasosekwa kutenda chichi panyuma pakubatisidwa?

³ Panyuma pakubatisidwa wosopewe tukusasosekwa kukuya malangiso gaŵapeleche Paulo kwa Aklistu ŵa ku Efeso. Jwalakwe  jwalimbikasisye jemanjaji kuti aŵe Aklistu “ŵakomangale chenene.” (Aef. 4:13) Yeleyi yagopolelaga kuti jemanjaji ŵasosekwaga kupitilisya kukula mwausimu. Pakusaka kutukamuchisya kupikanichisya yeleyi, Paulo jwalandenye kukula mwausimu ni yakusatenda mwanache pakukula. Achinangolo akusasangalala mnope pakwete mwanache. Nambo mwanacheju jwangagamba kuŵa likandi mpaka kalakala. Kupita kwandaŵi jwalakwe akusasosekwa kuleka kutenda yindu “yauwanache.” (1 Akoli. 13:11) Yeleyitu yikusalandana ni Aklistuwe, patubatisidwe tukusasosekwa kukula mwausimu. Kwende tulole yindu yine yampaka yitukamuchisye kutenda yeleyi?

4. Ana chichi champaka chakamuchisye kukula mwausimu? Alondesye. (Afilipi 1:9)

⁴ Amnonyeleje mnope Yehofa. Jemanja alosisye kala kuti akusamnonyela Yehofa. Nambope mpaka akombole kumnonyela mnope jwalakwe. Ana mpaka atende chamtuli yeleyi? Ndumetume Paulo jwasasile mwampaka atendele yeleyi pa Afilipi 1:9 (Aŵalanje.) Paulo jwapopesile kuti chinonyelo cha Aklistu ŵa ku Filipi “chipitilisye kula.” Myoyo m’wejisoni mpaka tukombole kumnonyela Yehofa. Mpaka tukombole kutenda yeleyi ‘mwakumanyilila kwetu yisyesyene soni kupikanichisya chenene yakusaka ya Mlungu.’ Patukummanyilila mnope Yehofa ni patukusatanda kumnonyela mnope soni kuyamichila mwakusatendela yindu. Yeleyi yikusatukamuchisya kutenda yindu yakumsangalasya jwalakwe soni tukusaŵambala kutenda chilichose champaka chimtengusye. Tukusalingalinga kumanyilila yakusasaka jwalakwe kuti tutendeje soni mwampaka tutendele yeleyo.

5-6. Ana chichi champaka chitukamuchisye kuti tumnonyeleje mnope Yehofa? Alondesye.

⁵ Ligongo lyakuti Yesu jwaliji jwamlama, jwalakwe jwakombwele kulosya chenene ndamo sya Yehofa. Myoyo patukummanyilila chenene Yesu tuchikombolasoni kumnonyela mnope Yehofa. (Aheb. 1:3) Litala limo lyakutukamuchisya kumnonyela Yesu, lili kulijiganya mabuku mcheche ga Ngani Syambone. Naga nganatande kuŵalanga Baibulo lisiku lililyose, uli ngalinga apano kutenda yeleyi. Pakuŵalanga ngani syakwamba Yesu, alolechesyeje mwaŵatendelaga yindu jwalakwe. Jwalakwe jwaliji jwagopoka ni ŵandu soni jwanyakulaga ŵanache myala mwakwe. (Maliko. 10:13-16) Yesu jwaliji mundu jwambone soni jwakunguluchika mwamti ŵakumkuya ŵakwe ŵaliji ŵagopoka kumsalila nganisyo syawo. (Mat. 16:22) Apatu Yesu jwasyasyaga Atati ŵakwe ŵakwinani. Nombe Yehofa akusasaka kuti ŵandu agopocheje najo. Mpaka tupopele kwa jwalakwe soni patukupopela mpaka tumsalile yosope yayili mumtima mwetu. Tukusatenda yeleyi tuli tukwete chikulupi chakuti jwalakwe chatupikanile. Jwalakwe akusatunonyela soni akusatusamalilaga.—1 Pet. 5:7.

⁶ Yesu jwanonyelaga mnope ŵandu. Ndumetume Mateyu jwasasile kuti, “Paŵaweni ŵandu ŵajinji, ŵatendele chanasa mnope, ligongo ŵanduwo ŵaliji ŵagwaguchegwaguche soni ŵakwasika mpela ngondolo syangali m’busa.” (Mat. 9:36) Nambi Yehofa akusapikana uli? Yesu jwatite, “Atati ŵangu ŵali kwinani ŵangasaka atamose jumo mwa tuŵanache tweletu ali ajonasiche.” (Mat. 18:14) Kusala yisyene maloŵe gelegatu gali gakusangalasya ligongo gakulosya kuti Yehofa akusatunonyela mnope. Myoyo patukummanyilila chenene Yesu, ni patukusatanda kumnonyela mnope Yehofa.

7. Ana kunguluka ni Aklistu ŵakusamanyilila yejinji mpaka kwakamuchisye chamtuli?

⁷ Kunguluka ni Aklistu ŵakumanyilila yejinji ŵa mumpingo mwawo mpaka kwakamuchisyesoni kuti akole chinonyelo chekulungwa soni kuti akule mwausimu. Aloleje yakusati pakusangalala jemanjaji. Jemanjaji ŵangalijimbaga magambo kuti ŵasagwile kumtumichila Yehofa. Ŵawusyeje jemanjaji kuti ŵasalile yindu yaŵele mkusimana nayo pandaŵi jaŵele ali mkumtumichila Yehofa. Pakusaka kusagula yindu yekulungwakulungwa, mpaka ŵaŵende jemanjaji kuti ŵakamuchisye kusagula yindu mwalunda. Ndaŵi  syosope akumbuchileje kuti ‘papatupile ŵakumkamuchisya pakusaŵa mtendele.’—Mis. 11:14.

8. Ana mpaka atende uli naga akukayichila yajikusasala Baibulo?

⁸ Akakayichilaga. Mpela mwatwayiwonele mundime jaŵili, Satana chachilinga kwatendekasya kuti aleche kukula mwausimu. Litala limo lyampaka atendele yeleyi lili kwatendekasya kuti akayichileje yindu yaŵalijiganyisye Baibulo. Mwachisyasyo komboleka kuti ŵandu ŵane chachilinga kwatendekasya jemanja kuti akakulupililaga yakuti Mlungu jwatupanganyisye. Jemanjaji chachisaka kuti akulupilileje kuti twatesile kuchenga kutyochele ku yindu yine. Komboleka kuti paŵaliji mwanache nganamanyililaga chilichose pangani jeleji, nambo mwine apano pakusile alijiganyisye yeleyi kutyochela ku sukulu. Komboleka kuti yampaka asale atichala ŵawo pangani jeleji, mpaka yiwonecheje kuŵa yakupikanika. Nambope mwine atichala ŵawowo nganalinga kuwungunya kuti alole naga pana juŵatupanganyisye. Ndaŵi syosope akumbuchileje mfundo ja pa Misyungu 18:17. Palilembali pakusati, “Mundu jwakusatanda kuŵecheta pa magambo akusawoneka mpela jwakulondola ni jwalakwejo mpaka pati mjakwejo ajinjile mluŵala kukutanda kulumukula ni kuwuchisya chenene.” Mmalo mwakwamba kukulupilila yiliyose yapikene ku sukulu akusosekwa kuwungunya mwakusamala usyesyene wa m’Baibulo. Awungunyeje m’mabuku getu soni ŵawusyeje abale ni alongo ŵele pandanda ŵakulupililaga kuti yindu yaumi yatesile kuchenga kutyochela ku yindu yine. Ŵawusyeje jemanjaji chichatendekasisye kulupilila kuti pana juŵatupanganyisye soni jwakusatunonyela. Kutenda yeleyi mpaka kwakamuchisye wawojo kupata maumboni gakulosya kuti pana juŵatupanganyisye.

9. Ana tukulijiganya chichi pa yindu yayamtendechele Melissa?

⁹ Mlongo jwine lina lyakwe Melissa, yamkamuchisye mnope pakuwungunya kwajwatesile pakwamba ya yakupanganyikwa. * Jwalakwe jwatite, “Pakwiganya kusukulu yakuti yaumi yatesile kuchenga kutyochela ku yindu yine yikusawoneka mpela yakuwona. Pandanda natendaga woga kuti sale yindu yanayikayichilaga. Najogopaga kuti mwine pakuwungunya chimbate yakuti ngani jakuti yaumi yachenjile kutyochela ku yindu yine jili jisyene. Nambo kaneko namanyilile kuti Yehofa akusasaka kuti yindu yatukusakulupililaga yikoleje maumboni. Myoyo natandite kuwungunya yanganiji. Naŵalasile buku ja chisungu jakuti, Is There a Creator Who Cares About You?  Nambosoni tumabuku twine twakuti, Ana Yaumi Yatesile Kupanganyidwa? Soni kakuti, Yiwusyo Msano Yakusosekwa Kuliwusya Yakwamba Kuwatyochele Umi. Yeleyi ni yanasosechelaga. Nayiweni kuti yikaliji chenene yikaŵe kuti nalijiganyisye yeleyi kutandila pandanda.”

10-11. Ana chichi champaka chakamuchisye kuti aŵambaleje kutenda yakusakala? (1 Atesalonika 4:3, 4)

¹⁰ Akaneje ndamo syakusakala. Mundaŵi ja unyamata nganisyo yakumbila yagonana sikusaŵa syamachili mnope. Mwamti ndaŵi sine ŵane mpaka ŵakanganichisye kuti atende chikululu. Satana akusasaka kuti jemanja mtendeje yeleyi. Ana chichi champaka chakamuchisye kuti aŵambale kutenda yakusakala? (Aŵalanje 1 Atesalonika 4:3, 4.) Pakupopela pajika, amsalileje Yehofa mwakupikanila mumtima. Amsalileje mwakupikanila soni amŵendeje kuti ŵape machili. (Mat. 6:13) Akumbuchileje kuti Yehofa akusasaka kuti ŵakamuchisye ngaŵaga kwapa chilango. (Sal. 103:13, 14) Baibulo mpaka jakamuchisyesoni mnope. Melissa jwatumkolasile jula jwalasile mnope kuti amalane ni nganisyo syakulemwecheka. Jwalakwe jwatite, “Kuŵalanga Baibulo lisiku lililyose kwangamuchisye kuti malane ni nganisyo syakusakala syanakwete. Kuŵalangaku kwangumbusyagasoni kuti ndili kumbali ja Yehofa soni kuti ngusasaka kuti namtumichileje jwalakwe.”—Sal. 119:9.

¹¹ Akalimbanaga ni yakusawusya yakusimana nayo mwajika jawo. Ŵasalileje achinangolo ŵawo yindu yayikwalagasya. Atamose kuti kutenda yeleyi kuli kwakusawusya, nambope pana umbone wekulungwa wampaka apate. Melissa jwatite, “Namŵendile Yehofa kuti angamuchisye kuŵa jwakulimba mtima. Kaneko nasalile baba ya yakusawusya yangu. Ndili ndesile yeleyi natandite kupikana chenene mumtima. Namanyilile kuti Yehofa akusangalala ni uneji.”

12. Ana mpaka atende uli kuti asaguleje yindu mwalunda?

¹² Mfundo sya m’Baibulo syalongoleleje paumi wawo. Pakukula, achinangolo ŵawo chachakunda kuti asaguleje jika yindu yine. Nambope pana yindu yine yejinji yangakuyimanyilila. Ana mpaka atende uli kuti aŵambale kutenda yindu yampaka yijonanje unasi wawo ni Yehofa? (Mis. 22:3) Mlongo jwine lina lyakwe Kari jwasasile chindu chachamkamuchisye kuti asaguleje yindu mwalunda. Jwalakwe jwamanyilile kuti Mklistu jwamkomangale mwausimu jwangasosekwa kukola lilamusi pa chindu chilichose. Jwalakwe jwatite, “Nasosekwaga kupikanichisya mfundo sya m’Baibulo mmalo mwa malamusi.” Pakuŵalanga Baibulo aliwusyeje kuti, ‘Ana ndime jeleji jikusalila yamtuli pakwamba ya nganisyo sya Yehofa? Ana pana mfundo syakungamuchisya kusagula yindu mwalunda? Naga ngukuya mfundo syelesi ana chinjipata umbone wamtuli?’ (Sal. 19:7; Yes. 48:17, 18) Patukuŵalanga Baibulo soni kuganichisya mfundo syakwe tuchiyiwona kuŵa yangasawusya kutenda yindu yakusangalasya Yehofa. Pakupitilisya kukula mwausimu chachiyiwona kuti ngakusosekwa malamusi pa chindu chilichose. Yichiŵa myoyo ligongo lyakuti chachimanyilila nganisyo sya Yehofa pa yindu yakulekanganalekangana.

13. Ana achimjawo ŵambone mpaka ŵakamuchisye chamtuli wawojo? (Misyungu 13:20)

¹³ Asaguleje achimjawo ŵakusamnonyela Yehofa. Mpela mwatuŵechetele kala, achimjawo ŵampaka asagule mpaka ŵakamuchisye kuti aŵe Mklistu jwamkomangale mwausimu. (Aŵalanje Misyungu 13:20.) Mlongo jwine lina lyakwe Sala nganasangalalaga. Kaneko chatendekwe chindu chine chachamkamuchisye kuti asangalaleje mnope. Jwalakwe jwatite, “Napatile achimjangu ŵambone. Uneji yalumo ni mlongo jwine jwachisikana twatandite kulijiganya Sanja ja Mlonda wiki jilijose. Mjangu jwine jwangamuchisye kuti ndande kupeleka ndemanga pamisongano ja mpingo. Achimjanguŵa ŵangamuchisye kuti yindu mpela kulijiganya Baibulo soni kupopela nayiwoneje kuŵa yakusosekwa mnope. Unasi wangu ni Yehofa ŵatandite kulimba mwamti natandite kusangalala mnope.”

14. Ana Julien jwatesile chichi kuti apate achimjakwe ŵambone?

 ¹⁴ Ana mpaka apate chamtuli achimjawo ŵampaka ŵakamuchisye kuti atendeje yindu yambone? Julien jwakutumichila apano mpela jwamkulungwa jwa mumpingo ŵatite, “Panaliji mwanache napatile achimjangu ŵambone. Patwalalichilaga achimjanguŵa ŵaliji ŵakulimbichila mnope mwamti ŵangamuchisye kuti sangalaleje patukulalichila. Nakwete chakulinga chakuti lalichileje kwa ndaŵi syosope. Kaneko namanyilile kuti nalijimaga chindu chambone ligongo nagambaga kukunguluka ni ŵandu ŵanalandanaga nawo misingu. Palipapitile ndaŵi napatilesoni achimjangu ŵambone panatumichilaga ku Beteli. Chisyasyo cha jemanjaji changamuchisye kuti saguleje yakusangalasya yambone. Yeleyi yandendekasisye kuti mbe pa unasi wambone ni Yehofa.”

15. Ana Paulo ŵamkalamwisye chichi Timoteyo ya ŵandu ŵaŵasosekwaga kukunguluka nawo? (2 Timoteyo 2:20-22)

¹⁵ Ana mpaka atende uli naga ayikopochele kuti kukunguluka ni mundu jwine jwakwe mumpingo chikusokonasye unasi wawo ni Yehofa? Paulo jwamanyilile kuti ŵandu ŵane ŵa mumpingo Wachiklistu mu yaka 100 yandanda nganakola ndamo syambone. Myoyo jwalakwe ŵamkalamwisye Timoteyo kuti akusosekwa kusamala ni jemanjajo. (Aŵalanje 2 Timoteyo 2:20-22.) Unasi wetu ni Yehofa uli wakusosekwa mnope. Myoyo ngatukusosekwa kunda kuti mundu jwalijose atujonanjile unasi wetu ni Yehofa wele twawulajilile kwandaŵi jelewu kuti tuwupate.—Sal. 26:4.

16. Ana yakulinga yapi yampaka akole?

¹⁶ Akoleje yakulinga yakamuchisya. Asaguleje yakulinga yampaka yakamuchisye kukola chikulupi chakulimba soni kuŵa Mklistu jwamkomangale. (Aef. 3:16) Mwachisyasyo mpaka alinganye yakuti aŵalanjeje soni kulijiganya Baibulo ndaŵi syosope. (Sal. 1:2, 3) Kombolekasoni mpaka ayiwone kuti akusosekwa kutenda yakomboleka kuti apelecheje mapopelo gambone soni gakutyochela mumtima. Mwinesoni mpaka ayiwone kuti akusosekwa kusamala ni yakusangalasya yakusasagula nambosoni yakusati pakamulichisya masengo ndaŵi jawo. (Aef. 5:15, 16) Yehofa pakwawona kuti akulimbichila kuti akule mwausimu jwalakwe chachiŵa jwakusangalala mnope.

17. Ana kwakamuchisya ŵane kukwete umbone wamtuli?

¹⁷ Mpaka aŵe Mklistu jwamkomangale pakwakamuchisya  ŵandu ŵane. Yesu jwatite, “Kupeleka kukusamtendekasya mundu kuŵa jwakusangalala mnope kulekangana ni kupochela.” (Mase. 20:35) Pakukamulichisya masengo ndaŵi soni machili gawo mpela jwachinyamata, chachiŵa ŵakusangalala mnope. Mwachisyasyo mpaka akole yakulinga yakuti ŵakamuchisyeje ŵachikulile soni ŵandu ŵane ŵangakusakombola kutyoka pamlango ŵa mumpingo mwawo. Mpaka ŵakamuchisye jemanjaji mwakwasumila yindu kapena kwakamuchisya kuti amanyilile chenene kukamulichisya masengo yipangiso yamakono. Naga ali m’bale mpaka aliŵichile chakulinga chakuti aŵe jwakutumichila jwakamuchisya ni chakulinga chakuti ŵatumichileje abale ni alongo ŵawo. (Afil. 2:4) Kupwatika pelepa mpaka ŵalosyesoni chinonyelo ŵandu ŵane mwakwalalichila ngani syambone syakwamba ya Uchimwene. (Mat. 9:36, 37) Naga yili yakomboleka mpaka akolesoni chakulinga chakuti amtumichileje Yehofa ndaŵi syosope.

18. Ana kutenda utumiki wandaŵi syosope mpaka kwakamuchisye chamtuli kuŵa paunasi wambone ni Yehofa?

¹⁸ Kutenda utumiki wandaŵi syosope mpaka kwakamuchisye kuti aŵe paunasi wambone ni Yehofa. Kutenda upayiniya mpaka kwape upile wakwinjila mu Sukulu ja Ŵakulalichila ya Uchimwene. Mpaka akolesoni upile wakutumichila pa Beteli kapena kukamuchisya nawo pamasengo ga yakutaŵataŵa. Mlongo jwine jwachisikana lina lyakwe Kaitlyn jwatite, “Kulalichila yalumo ni Aklistu ŵakumanyilila yejinji kwangamuchisye kuti ngule mwausimu panyuma pa kubatisidwa. Yisyasyo ya jemanjaji yangamuchisye mnope kuti nalijiganyeje chenene Baibulo soni kuti njiganyeje chenene pandili mu utumiki.”

19. Ana pana upile ŵapi ŵampaka apate pakupitilisya kukula mwausimu?

¹⁹ Pakupitilisya kukula mwausimu Yehofa chachapa yindu yambone yejinji. Chachiŵambala kukamulichisya masengo machili gawo pa yindu yangali mate. (1 Yoh. 2:17) Chachiŵambalasoni kusimana ni yindu yakupweteka yayikusayika ligongo lyakusagula yindu mwangaŵajilwa. Mmalomwakwe yindu yichajendela chenene soni chachisangalala mnope paumi wawo. (Mis. 16:3) Chisyasyo chawo chambone chichalimbikasya Aklistu achimjawo chinga ali ŵanache kapena achakulungwa. (1 Tim. 4:12) Nambo chakusosekwa mnope kupunda yosopeyi chachiŵa ŵakusangalala soni ŵakwikutila. Yeleyi yichikomboleka ligongo lyakutenda yindu yakumsangalasya Yehofa soni kuŵa najo paunasi wambone.—Mis. 23:15, 16.