1. Ligongo chichi Yesu ŵamŵendile Yehofa kuti ŵaloleleje ŵakumkuya ŵakwe?

 CHILO chakumalisya kutama ni umi pachilambo chapasi, Yesu jwaŵendile Atati ŵakwe ŵakwinani chindu chakusosekwa mnope. Jwalakwe ŵamŵendile Yehofa kuti ŵaloleleje ŵakumkuya ŵakwe. (Yoh. 17:15, 20) Yili yisyene kuti Yehofa akusiŵalolela, kwasamalila, nambosoni kwachenjela ŵandu ŵakwe. Nambope Yesu ŵamanyililaga kuti Satana chatendekasyeje kuti ŵakumkuya ŵakwe asimaneje ni yakusawusya yekulungwakulungwa. Myoyo, Yesu ŵamanyililagasoni kuti ŵakumkuya ŵakwe ŵasosechelaga chikamuchisyo cha Yehofa kuti akombole kulimbana ni Satana.

2. Mwakamulana ni Salimo 33:18-20, ligongo chichi ngatukusosekwa kogopa yakusawusya yatukusasimana nayo?

² Masiku agano Aklistu ŵasyesyene akusimana ni yakusawusya yejinji m’chilambo cha Satanachi. Tukusasimana ni yakusawusya yayikusatutengusya soni yayikusalinga chikulupi chetu. Nambo mpela mwachituyiwonele munganiji, ngatukusosekwa kogopa chilichose. Yehofa akusatulolelaga ndaŵi syosyope. Yeleyi yikugopolela kuti jwalakwe akusalola yakusawusya yosope yatukusasimana nayo mwamti akusaŵa jwakoseka kutukamuchisya. Kwende tulole yisyasyo yiŵili ya m’Baibulo, yayikulosya kuti Yehofa “akusiŵalolechesya ŵandu ŵakumpikanila.”—Aŵalanje Salimo 33:18-20.

3. Ana ni ndaŵi syapi syampaka tulipikaneje kuti pangali ŵampaka atukamuchisye?

³ Atamose kuti tukwete abale ni alongo ŵajinji mumpingo, nambope ndaŵi sine mpaka litukamuleje lipowo. Mwachisyasyo, ŵachinyamata mpaka alipikaneje kuti pangali wampaka ŵakamuchisye pakulondesya yachikulupi chawo kwa achimjawo ŵakusukulu kapena pasamile mpingo wasambano. Ŵane mwa m’weji mpaka tulagasicheje nganisyo ni yakusawusya yatukusimana nayo soni mpaka tuganisyeje kuti mpaka tukombole kumalana nayo pajika. Pane mpaka tulepeleje kwasalila achimjetu yakusawusya yetu paganisya kuti nganaŵa atupikanichisye. Soni ndaŵi sine mpaka tulagasicheje nganisyo ligongo lyakuganisya kuti pangali ŵakusamala ya m’weji. Ni chinga  tukutenda lipowo pamagongo gamtuli, yikusagamba kututendekasya kulagasika nganisyo. Nambo Yehofa jwangasaka kuti tulipikaneje myoyo. Ligongo chichi tukuŵecheta yeleyi?

4. Ligongo chichi jwakulochesya Eliya jwaŵechete kuti, “Sigele une jikape basi”?

⁴ Aganichisye chisyasyo cha Eliya juŵaliji mundu jwakulupichika. Pandaŵi jine Yesebele jwasasile kuti chamwulaje Eliya. Myoyo Eliya jwatisile mwamti jwajesile chiŵandika masiku gakupunda 40 ali mkutila. (1 Ayi. 19:1-9) Kaneko, ali ajuŵile mu mbanga jine jakwe, Eliya ŵamsalile Yehofa kuti, “Sigele [jwakulochesya] jikape basi.” (1 Ayi. 19:10) Nambotu mchilambomo mwapali ŵakulochesya ŵane, ligongo Obadiya ŵaliji ali ŵakulupisye ŵakulochesya ŵakwana 100 mmyala mwa Yesebele. (1 Ayi. 18:7, 13) Sambano, ligongo chichi Eliya ŵalipikanaga kuti asigele jikape? Ana jwalakwe jwaganisyaga kuti ŵakulochesya wosope ŵaŵakulupwisye Obadiya awulajidwe? Ana komboleka kuti jwalakwe jwalipikanaga kuti ali jika ligongo lyakuti paliji pali pangali mundu jwalijose jwaŵatandite kumtumichila Yehofa, panyuma pakuti Yehofa alosisye kuti ali Mlungu jwakuwona palitumbi lya Kalimeli? Kapena jwaganisyaga kuti pangali jwalijose jwakumanyilila yakusawusya yakusimana nayo, kapenasoni jwaganisyaga kuti pangali jwalijose jwakusamala ya jwalakwe? Nganiji jangasalaga chilichose pakwamba mwajwapikanilaga Eliya. Nambo chatukumanyilila chili chakuti Yehofa ŵamanyililaga chachamtendekasyaga Eliya kulipikana kuti ali jikajikape mwamti ŵamanyilile chakusosekwa kutenda kuti amkamuchisye.

5. Ana Yehofa ŵamkamuchisye chamtuli Eliya kumanyilila kuti nganawa jika?

⁵ Yehofa ŵatesile yindu yejinji pakusaka kumkamuchisya Eliya. Jwalakwe jwamtendekasisye Eliya kuti asale nganisyo syakwe. Kwa maulendo gaŵili Yehofa ŵamwusisye Eliya kuti, “Ligongo chichi mli akuno?” (1 Ayi. 19:9, 13) Eliya pajwasalaga mwakupikanila mumtima Yehofa ŵapikanilaga. Yehofa ŵamjanjile Eliya mwakumlosya kuti ŵaliji ali papopo soni kuti jwalakwe ali jwamachili mnope. Jwalakwe ŵamsimichisyesoni Eliya kuti papalisoni Ayisalayeli ŵajinji ŵaŵamtumichilagape. (1 Ayi. 19:11, 12, 18) Ngatukukayichila kuti Eliya lyammalile lipowo paŵamsalile Yehofa mwaŵapikanilaga mumtima nambosoni paŵapikene maloŵe ga Yehofa gakumlimbikasya. Yehofa ŵampele Eliya masengo gejinji gakuti atende. Ŵamsalile kuti akamŵiche Hasaele kuŵa mwenye jwa ku Siliya, soni Yehu kuŵa mwenye jwa ku Yisalayeli,  nambosoni Elisha kuŵa jwakulochesya. (1 Ayi. 19:15, 16) Masengo gelega gamtendekasisye Eliya kutanda ganichisya yindu yambone. Mlungu ŵampelesoni Eliya mjakwe jwambone jwaŵaliji Elisha. Ana Yehofa mpaka ŵakamuchisye chamtuli wawojo pakulipikana kuti nganakola jwakwakamuchisya?

6. Ana mpaka asale yindu yapi mulipopelo lyawo pakulipikana kuti pangali jwakwakamuchisya? (Salimo 62:8)

⁶ Yehofa ŵapeleche upile wakuti ŵandu apopeleje kwa jwalakwe. Jwalakwe akusalola yakusawusya yosope yakusimana nayo, nambosoni akusaŵa jwakoseka kupikanila mapopelo gawo pandaŵi jilijose. (1 Ates. 5:17) Yehofa akusaŵa jwakusangalala mnope kupikanila mapopelo ga ŵandu ŵakusamtumichilaga. (Mis. 15:8) Ana mpaka asale yindu yapi mulipopelo lyawo pakulipikana kuti pangali mundu jwampaka ŵakamuchisye? Amsalileje Yehofa mwakupikanila mumtima, mpela mwaŵatendele Eliya. (Aŵalanje Salimo 62:8.) Amsalileje mwakupikanila mumtima ni yindu yakuyidandawula. Amŵendeje Yehofa kuti ŵakamuchisyeje kumanyilila yampaka atendeje kuti akombole kumalana ni kulagasika nganisyo, pandaŵi jakulipikana kuti pangali mundu jwampaka ŵakamuchisye. Mwachisyasyo, naga akutenda woga kwasalila achimjawo ŵa kusukulu yindu yakusakulupilila, amŵendeje Yehofa kuti ŵakamuchisye kuŵa ŵakulimba mtima kuti akombole kutenda yeleyo. Mpaka amŵende Yehofa kuti ŵape lunda lwakwakamuchisya kuti alondesye yachikulupi chawo mwakulimba mtima. (Luk. 21:14, 15) Naga akulagasika nganisyo, mpaka amŵende Yehofa kuti ŵakamuchisye kuti akombole kumsalila nganijo Mklistu jwakumanyilila yejinji. Mpaka amŵendesoni Yehofa kuti amtendekasye mundu jwakusaka kuti akamsalile yindu yayikwalagasya nganisyoyo kuti ŵapikanichisye. Naga akumsalila Yehofa mwakupikanila mumtima soni kulola yakuti jwalakwe pakwanga mapopelo gawo nambosoni kupochela chikamuchisyo kutyochela kwa ŵane, chachitanda kuyiwona kuti nganawa jika.

7. Ana alijiganyisye chichi pa chisyasyo cha Mauricio?

⁷ Yehofa atupele wosopewe masengo gakusosekwa mnope gakuti tukamuleje. Amanyilileje kuti jwalakwe akusalola soni kuyamichila masengo galigose gakusatenda pakumtumichila chinga mu mpingo kapena pakulalichila. (Sal. 110:3) Ana kulipeleka mnope pakumtumichila Yehofa mpaka kwakamuchisye chamtuli pakuyiwona kuti pangali mundu jwakwakamuchisya? Aganichisye ya chisyasyo cha mnyamata jwine lina lyakwe Mauricio. * Jwalakwe ali agambile kubatisidwa kwene, jumo mwa achimjakwe ŵapamtima ŵatandite kuleka kumtumichila Yehofa mwapanandipanandi. Mauricio ŵatite,“Pinayiweni kuti mjanguju akuleka kumtumichila Yehofa yangwayiye mnope, nakayichilaga naga chingwanisye chilanga chanatesile chakumtumichila Yehofa nambosoni naga chingombole kuŵape mliŵasa lyakwe. Nayiwonaga kuti pangali jwampaka angamuchisye soni kupikanichisya mwanapikanilaga.” Ana chichi chachamkamuchisye Mauricio? Jwalakwe jwatite, “Natandite kulalichila kwa maawala gejinji. Yeleyi yangamuchisye kuti ndeche kwambaga ganichisya ya uneji soni mwanapikanilaga mumtima. Kulalichila ni ŵandu ŵane kwangamuchisye kuti sangalaleje soni ngayiwonaga kuti pangali  jwakungamuchisya.” Kusala yisyene, atamose yili mkuti nganituŵa tukombwele kulalichila ku nyumba ni nyumba yalumo ni ŵakulupilila achimjetu, yikusaŵa yakulimbikasya mnope kulalichilaga ni jemanjaji chinga kupitila pa foni kapena mwakulemba yikalata. Ana ni chindu chinesoni chapi chachamkamuchisye Mauricio? Jwalakwe jwatite, “Natendagasoni yejinji mumpingo. Nakosechelaga mnope soni kuŵecheta mbali sya ŵa musukulu kutyochela pasi pamtima. Mbali syelesi syangamuchisye kuyiwona kuti Yehofa soni ŵandu ŵane akusambona kuŵa jwakusosekwa mnope.”

8. Ana yakusawusya yekulungwakulungwa mpaka yitutendekasye kulipikana uli?

⁸ Ligongo lyakuti tukutama m’masiku gakumalisya tukusajembecheya kuti chitusimaneje ni yakusawusya. (2 Tim. 3:1) Atamose kuti yili myoyo, ndaŵi sine mpaka tutenguche mnope patusimene ni yakusawusya ya mtundu winewakwe. Mpaka yisimanikwe kuti tukulaga mnope ligongo lyakusoŵa kwa mbiya, ligongo lya ulwele kapena ligongo lya chiwa cha mundu jwatukusamnonyela. Payitendekwe yeleyi, mpaka tulagasicheje nganisyo, mnopemnope naga yakusawusya yatukusimana nayoyo yigamba kutotoganya kapena tusimene nayo pandaŵi jimo. Atamose tuli tusimene ni yindu mpela yeleyi, tukumbuchilejepe kuti Yehofa akusalola yosope yayikututendechela, soni jwalakwe chachitukamuchisya kuti tukombole kulimbana ni chakusawusya chilichose chatusimene nacho.

9. Ana Yobu ŵasimene ni yakusawusya yamtuli?

⁹ Aganichisye yaŵatesile Yehofa pakumkamuchisya mundu jwakulupichika Yobu. Jwalakwe jwasimene ni yakusawusya yejinji pandaŵi jimpepe. Lisiku line, Yobu ŵapochele utenga wakuti yilango yakwe yosope yijiŵidwe soni yine yiwulajidwe. Jwapochelesoni utenga wakuti ŵamasengo ŵakwe soni ŵanache ŵakwe wosope awulajidwe. (Yob. 1:13-19) Mkanipapite ndaŵi, Yobu ali mkupikana kupweteka ni yindu yayamtendecheleyi, jwatanditesoni kulwala ulwele wakupweteka mnope. (Yob. 2:7) Yakusawusya yaŵasimene nayo Yobu yaliji yekulungwa mnope mwamti yamtendekasisye jwalakwe kuŵecheta kuti, “Mbesile ni umi wangu, une ngawa mkutama ni umi masiku gosope.”—Yob. 7:16.

10. Ana Yehofa ŵamkamuchisye chamtuli Yobu kuti akombole kupilila yakusawusya yaŵasimanaga nayo? (Alole chiwulili cha pachikuto.)

¹⁰ Yehofa ŵalolaga yindu yayamtendechele Yobu. Ligongo lyakuti Yehofa ŵamnonyelaga Yobu, jwalakwe jwamkamuchisye Yobu kuti aŵepe jwakulupichika. Yehofa paŵaŵechetanaga ni Yobu ŵamkumbwisye jwalakwe kuti Yehofa ali jwalunda mnope soni kuti akusayisamalila mwachinonyelo yindu yosope yaŵayipanganyisye. Jwalakwe jwasasile ya yinyama yejinji yakusimonjesya yaŵayipanganyisye. (Yob. 38:1, 2; 39:9, 13, 19, 27; 40:15; 41:1, 2) Yehofa ŵamkamulichisyesoni masengo mundu jwakulupichika Elihu kuti amlimbikasye Yobu. Elihu ŵamsimichisye Yobu kuti ndaŵi syosope Yehofa akusiŵawupa ŵakutumichila ŵakwe ligongo lyakupilila kwawo. Yehofa ŵamkamuchisyesoni Elihu kuti amjongolele Yobu pa yindu yine. Elihu ŵamkamuchisye Yobu kuti akagambaga kuganichisya ya msyene mwakumkumbusya kuti ŵanduwe tuli ŵamnono pakulandanya ni Yehofa juŵapanganyisye yindu yosope. (Yob. 37:14) Yehofa ŵampelesoni Yobu masengo. Ŵamsalile jwalakwe kuti ŵapopelele achimjakwe ŵatatu ŵiŵalemwisye. (Yob. 42:8-10) Ana masiku agano, Yehofa akusatukamuchisya chamtuli patusimene ni yakusawusya?

11. Ana Baibulo jikusatulimbikasya chamtuli patukusimana ni yakusawusya?

¹¹ Yehofa jwangaŵechetaga mwachindunji ni m’weji masiku agano mpela mwaŵatendele ni Yobu. Nambo jwalakwe akusaŵechetaga ni m’weji kupitila m’Baibulo. (Alo. 15:4) Jwalakwe akusatulimbikasya mwakutupa chembecheyo chambone cha msogolo. Kwende tulole yindu yamnono yajikusasala Baibulo yampaka yitulimbikasye patusimene ni yakusawusya. M’Malemba Yehofa akusatusimichisya kuti pangali chilichose champaka “chitulekanganye ni chinonyelo [chakwe].” (Alo. 8:38, 39) Yehofa akutusimichisya kuti ‘ali pakuŵandichila ni mundu jwalijose jwakumŵilanga’ jwalakwe mulipopelo. (Sal. 145:18) Yehofa akusatusalila kuti naga tukumdalila jwalakwe, mpaka tukombole kupilila  yakusawusya yiliyose soni mpaka tuŵe ŵakusangalala patukusimana ni yakusawusya. (1 Akoli. 10:13; Yak. 1:2, 12) Maloŵe ga Mlungu gakusatukumbusya kuti yakusawusya yatukusasimana nawo yili ya kandaŵi pakulandanya ni umi wangamala wachatupe jwalakwe kusogoloku. (2 Akoli. 4:16-18) Yehofa akutusimichisyasoni kuti chachimtyosya Satana soni ŵandu ŵali kumbali jakwe ŵakusatandisya yakusawusya yatukusasimana nayo. (Sal. 37:10) Ana wawojo ajinjisye pamtima malemba gane, gampaka gakamuchisye kupilila yakusawusya kusogoloku?

12. Ana Yehofa akusasaka kuti tutendeje chichi kuti tupinduleje mnope ni Maloŵe gakwe?

¹² Yehofa akusasaka kuti tulijiganyeje Baibulo mwakutamilichika, nambosoni kuganichisya mwakusokoka yatulijiganyisyeyo. Patukukamulichisya masengo yindu yatulijiganyisye tukusakola chikulupi chakulimba soni tukusaŵa paunasi wambone ni Atati ŵetu ŵakwinani. Patukutenda yeleyi, tukusapata machili gakutukamuchisya kupilila yakusawusya yetu. Yehofa akusiŵapasoni msimu weswela ŵandu ŵakusadalila Maloŵe gakwe. Msimu welewu mpaka utupe “machili gakupunda ga ŵandu” gampaka gatukamuchisye kupilila chakusawusya chilichose champaka tusimane nacho.—2 Akoli. 4:7-10.

13. Ana yindu yakusapeleka “kapolo jwakulupichika ni jwalunda” yikusatukamuchisya chamtuli kupilila yakusawusya?

¹³ Ni chikamuchisyo cha Yehofa “kapolo jwakulupichika ni jwalunda,” akusakoposya yindu yejinji mpela ngani mafidiyo soni nyimbo. Yindu yeleyi yikusatukamuchisya kola chikulupi chakulimba soni kuŵa mesope mwausimu. (Mat. 24:45) Myoyo tukusasosekwa kuyikamulichisyaga masengo yindu yeleyi. Pachangakaŵapa, mlongo jwine jwa ku United States jwayamichile yindu yakusakoposya kapolo jwakulupichika ni jwalundaju. Jwalakwe jwatite, “Mu yaka 40 yambele ndili mkutumichila Yehofa, chikulupi changu chaŵele chili mkulinjidwa mmatala gejinji.” Mlongoju jwasimene ni yakusawusya yekulungwakulungwa. Mwachisyasyo, angangagwe ŵawulajidwe ni galimoto jiŵajendesyaga dalayifa jwamkolelwe, achinangolo ŵakwe ŵalwasile mnope, nambosoni kwa maulendo gaŵili jwalakwejo jwasimanikwe ni ulwele wa kasa. Ana chichi chichamkamuchisye mlongoju kupilila? Jwalakwe jwatite, “Ndaŵi syosope Yehofa aŵele ali mkusamalila. Yindu yakusapeleka jwalakwe kupitila mwa kapolo jwakulupichika ni jwalunda, yingamuchisye kuti ngombole kupilila. Ligongo lya yeleyi ngusalipikana mpela muŵapikanile Yobu juŵasasile kuti, ‘Tinjipitilisya kulupichika mpaka ndaŵi ja chiwa changu.’”—Yob. 27:5.

14. Ana Yehofa akusiŵakamulichisya masengo chamtuli abale ni alongo kuti atukamuchisye patusimene ni yakusawusya? (1 Atesalonika 4:9)

¹⁴ Yehofa aŵele ali mkwajiganya ŵandu ŵakwe kuti anonyelaneje soni kulimbikasyana. (2 Akoli. 1:3, 4; aŵalanje 1 Atesalonika 4:9.) Mpela  muŵatendele Elihu, Abale ni alongo ŵetu akusaŵa ŵakusachilila kutukamuchisya kuti tuŵepe ŵakulupichika patusimene ni yakusawusya. (Mase. 14:22) Mwachisyasyo, aganichisye yaŵatesile abale ni alongo ŵa mumpingo ŵaŵasonganaga Diane pakumlimbikasya soni kumkamuchisya jwalakwe kuti aŵepe jwakulimba mwausimu pandaŵi jele ŵamkwakwe ŵalwasile mnope. Jwalakwe jwatite, “Yaliji yakusawusya mnope, nambope twagaweni magasa ga Yehofa gali mkutukamuchisya pandaŵi jakusawusyaji. Abale ni alongo ŵa mumpingo mwetu, ŵalipeleche mnope pakutukamuchisya. Jemanjaji ŵayikaga kukutulola, ŵatujimbilaga mafoni, nambosoni ŵatulosyaga chinonyelo. Yosopeyi yatukamuchisye kuti tukombole kupilila. Panayiwonaga kuti chingombole kwawula kumisongano kapena kukulalichila, abale ni alongo ŵayikaga kukunjigala ligongo nganingombolaga kwendesya galimoto.” Kusala yisyene uli upile wekulungwa mnope kuŵa mumpingo Wachiklistu wele ŵandu ŵakwe akusanonyelana mnope.

15. Ligongo chichi mpaka tuŵe ŵakusimichisya kuti mpaka tukombole kupilila yakusawusya yampaka tusimane nayo?

¹⁵ Wosopewe chitusimaneje ni yakusawusya yakulekanganalekangana. Nambope patuchisimana ni yakusawusya tuchisosekwa kumbuchila kuti nganituŵa jika. Mpela mwakusatendela Mtati jwachinonyelo, ndaŵi syosope Yehofa akusatulolelaga. Jwalakwe ali kumbali jetu. Akusaŵa jwakoseka kupikana mapopelo getu, nambosoni akusaŵa jwakusachilila kutukamuchisya. (Yes. 43:2) Tuyiweni kuti mpaka tukombole kulimbana ni yakusawusya ligongo lyakuti jwalakwe atupele yindu yakutukamuchisya kuti tukombole kupilila. Jwalakwe atupele upile wa lipopelo, Baibulo, yindu yejinji yausimu nambosoni abale ni alongo. Yindu yosopeyi mpaka yitukamuchisye patusimene ni yakusawusya.

16. Ana mpaka tutende wuli kuti Yehofa apitilisye kutukamuchisya?

¹⁶ Kusala yisyene tuli ŵakusangalala mnope kola Atati ŵetu ŵakwinani ŵakusatulolelaga. “Mwa Jwalakwe mitima jetu jikusangalala.” (Sal. 33:21) Mpaka tulosye kuti tukusayamichila yakusatenda Yehofa pakutusamalila mwakukamulichisya masengo yindu yosope yakusatupa jwalakwe pakusaka kutukamuchisya. Tukusasosekwasoni kutenda yampaka tukombole kuti jwalakwe apitilisye kutusamalila. Kuŵecheta kwine, naga tukupitilisya kutenda yampaka tukombole pakumpikanila Yehofa soni kutenda yakusasaka, jwalakwe chachipitilisya kutulolela mpaka kalakala.—1 Pet. 3:12.