NGANI JAKULIJIGANYA 42
Akakayichilaga Yakuti Ŵawupatile Usyesyene
“Mlinje yindu yosope naga yili yakuwona, nipo myikamulichisyeje masengo yayili yambone.”—1 ATES. 5:21.
NYIMBO NA. 142 Tulimbisyeje Chembecheyo Chetu
YACHITULIJIGANYE *
1. Ligongo chichi ngani jakwamba dini jikusasokonasya ŵandu ŵajinji?
MASIKU agano kwana dini syejinji syasikusasala kuti sili sya Chiklistu soni sikusati Mlungu akusajitichisya kalambile kawo. Yeleyitu yasokonasisye ŵandu ŵajinji. Mwamti jemanjaji akusaliwusya kuti, “Ana pana dini jimpepe jakuwona, kapena Mlungu akusajitichisya dini syosope?” Ana m’weji ŵa Mboni sya Yehofa tukusasimichisya kuti tukusajiganya yisyesyene, soni kuti Yehofa akusajitichisya kalambile ketu? Ana yili yakomboleka kumanyilila soni ngakayichila yindu yeleyi? Kwende tulole maumboni gampaka gatutendekasye kuti tukakayichilaga yeleyi.
2. Mwakamulana ni 1 Atesalonika 1:5, ligongo chichi ndumetume Paulo nganakayichilaga yakuti apatile usyesyene?
2 Ndumetume Paulo nganakayichilaga atapanandi kuti jwawupatile usyesyene. (Aŵalanje 1 Atesalonika 1:5.) Jwalakwe nganagamba kulupilila ligongo lyakuti yamsangalesye. Jwalimbichilaga kulijiganya Maloŵe ga Mlungu soni jwakulupililaga kuti, “Malemba gosope galembedwe ni Mlungu.” (2 Tim. 3:16) Ana kulijiganya Maloŵe ga Mlungu kwamkamuchisye chamtuli Paulo? Ligongo lya kulijiganya, Paulo jwapatile umboni wamachili wakuti Yesu jwaliji Mesiya juŵamsasile kuti chachiyika. Nambosoni jwapatile umboni wakuti achimlongola ŵadini ŵa Chiyuda ŵamkanile Yesu mwamelepe. Achimlongola ŵadini ŵakulinonyelaŵa, ŵasalaga kuti akusamtumichila Mlungu nambo yitendo yawo yalosyaga kuti akumkana jwalakwe. (Tit. 1:16) Mwakulekangana ni jemanjaji, Paulo nganasagula kuti apikanileje mbali jine jakwe ja m’Baibulo ni ngapikanila mbali jine. Mmalo mwakwe jwalakwe jwajiganyaga soni kamulichisya masengo ‘yosope yakusasaka Mlungu.’—Mase. 20:27.
3. Ana kuti mundu asimichisye yakuti awupatile usyesyene akusosekwa kupata kwanga kwa yiwusyo yosope? ( Alole libokosi lyakuti, “Yindu Yiŵapanganyisye Yehofa Yili ‘Yangakomboleka Kuyiŵalanga Ligongo lya Winji Wakwe.’”)
3 Ŵandu ŵane akusaganisya kuti dini jisyesyene jikusosekwa kwanga chiwusyo chilichose, atamose yiwusyo yele kwanga kwakwe nganikuŵa kupatikene m’Baibulo. Ana yeleyi yili yakomboleka? Aganichisye chisyasyo cha Paulo. Jwalakwe jwalimbikasisye ŵakulupilila achimjakwe kuti ‘alinjeje yindu yosope naga yili yakuwona.’ Nambo jwasalilesoni jemanjaji kuti pana yindu yejinji yele jwalakwe ngakuyipikanichisya. (1 Ates. 5:21) Jwalakwe jwalembile kuti, “Tukumanyilila mwakupelembela.” Soni jwatite, “Yitukuyiwona sambano jinoyi tukuyiwonaga mpela chiwanichisyo pegalasi.” (1 Akoli. 13:9, 12) Mwakulandana ni m’weji, nombe Paulo ngaŵa kuti ŵapikanichisyaga yosope. Nambo jwamanyilile usyesyene wakusosekwa. Mwamti yindu yaŵamanyilile jwalakwe yamkamuchisye kusimichisya kuti awupatile usyesyene.
4. Ana mpaka tutende uli kuti tukakayichilaga kuti tupatile usyesyene? Ana chitukambilane chichi pakwamba ya Aklistu ŵasyesyene?
4 Litala limo lyampaka lyakamuchisye kusimichisya kuti awupatile usyesyene lili kuwanichisya muŵatendelaga Yesu pakulambila, ni yakusatenda ŵa Mboni sya Yehofa masiku agano. Munganiji chitukambilane kuti Aklistu ŵasyesyene, (1) akusaŵambala kulambila mafano, (2) akusachimbichisya lina lya Yehofa, (3) akusanonyela usyesyene, soni (4) akusanonyelana mnope.
TUKUSAŴAMBALA KULAMBILA MAFANO
5. Ana yiŵatesile Yesu yikusatujiganya chamtuli kulambila kwakusakujitichisya Mlungu? Ana yaŵasasile Yesu mpaka tuyikamulichisye masengo chamtuli?
5 Ligongo lyakuti Yesu ŵamnonyelaga mnope Yehofa, jwalakwe pajwaliji kwinani soni pajwayiche pachilambopa ŵamlambilaga Yehofape. (Luk. 4:8) Jwasalilesoni ŵakumkuya ŵakwe kuti amlambileje Yehofape. Yesu pampepe ni ŵakumkuya ŵakwe nganalinga ata panandi kukamulichisya masengo yiwanichisyo pakulambila. Ligongo lyakuti pangali jwampaka apakombole kumwona Mlungu, myoyosoni pangali mundu jwalijose jwampaka akombole kulinganya chindu chakulandana ni jwalakwe. (Yes. 46:5) Nambi wuli pangani jakupanganya yiwulili ya ŵandu ŵele ŵane akusiŵawona kuti ali ŵakuchimbichika soni ŵaswela, ni kupopelaga kwa yeleyo? Mu lilamusi lyaŵili pa Malamusi 10 gaŵapeleche Yehofa, jwalakwe jwatite, “Mkasimlipanganyichisya chindu chilichose chakusepa atamose kupanganya chindu chakulandanichisya ni chindu chilichose chakwinani kapena pachilambo chapasi. Mkasimyitindiŵalila kapena kuyipopelela yeleyi.” (Eks. 20:4, 5) Ŵandu ŵakusasaka kumsangalasya Yehofa akusamanyilila kuti jwalakwe akusaŵengana ni kulambila mafano.
6. Ana ŵa Mboni sya Yehofa masiku agano akusakuya litala lyapi pakulambila?
6 Ŵandu ŵakusalijiganya ya mbili jakala ŵasasile kuti mundaŵi ja ŵandumetume, Aklistu ŵamlambilaga Mlungu jikape. Mwachisyasyo, buku jine jakala jasasile kuti Aklistu ŵandanda ŵakanaga kuŵika yiwulili mmalo gaŵamlambililaga Mlungu. Nombe masiku agano ŵa Mboni sya Yehofa akusakuya yaŵatendaga Aklistu ŵa m’yaka 100 yandanda. M’weji ngatukusapopela kwa ŵandu ŵaswela kapena kwa malayika. Ngatukusalinga kupopela atamose kwa Yesu. Kupwatika pelepa ngatukusajitindiŵalila mbendela kapena kutenda chilichose champaka chilosye kuchilambila chilambo chatukusatamaga. Atamose ŵane ali atukanganichisye chamtuli, tukusalingalinga kupikanila maloŵe ga Yesu gakuti, “Mumlambileje AMBUJE Mlungu jwenu ni kwatumichila ŵelewo pewo.”—Mat. 4:10.
7. Ana pana kulekangana kwamtuli pasikati pa ŵa Mboni sya Yehofa ni dini sine syosope?
7 Masiku agano ŵandu ŵajinji akusiŵakuyaga achimlongola ŵadini ŵakumanyika mnope. Yakusatenda pakwachimbichisya achimlongolaŵa yikusaŵa mpela kwalambila kwene. Ŵandu ŵajinji akusajawula m’machalichi ga achimlongola ŵa diniŵa, kusuma mabuku gawo soni kupeleka mbiya syejinji syakwakamuchisya jemanjajo. Ŵandu ŵane akusakulupilila chilichose chakusaŵecheta achimlongolaŵa. Mwamti yakusati ŵandu pakusangalala paŵaweni achimlongolawo yikusaŵa mpela am’weni Yesu. Nambo mwakulekangana ni yeleyi ŵandu ŵakusamlambila Mlungu m’litala lyakusalijitichisya, ŵangamkuyaga mundu jwalijose. Atamose kuti tukusitwachimbichisya ŵandu wosope ŵakusalongolela yindu m’gulu ja Yehofa, nambope tukusapikanila maloŵe ga Yesu gakuti, “Jemanja wosope mli abale.” (Mat. 23:8-10, NWT.) M’weji ngatukusamlambilaga mundu chinga aŵe jwakulongolela jwa dini kapena ŵakulamulila ŵandale. Soni ngatukusalinga ata panandi kamuchisya dinisyo kapena maboma gawo. Mwamti ngatukusajinjilila yakutendekwa ya m’chilambochi. Yeleyi yikusatutendekasya kuti tuŵe ŵakulekangana ni dini syejinji syasikusasala kuti sili sya Chiklistu.—Yoh. 18:36.
TUKUSACHIMBICHISYA LINA LYA YEHOFA
Aklistu ŵasyesyene akusasangalala kwasalila ŵane yakwamba Yehofa (Alole ndime 8-10) *
8. Ana tukusamanyilila chamtuli kuti Yehofa akusasaka kuti tulichimbichisyeje lina lyakwe soni kulimanyikasya kwa ŵandu wosope?
8 Pandaŵi jine Yesu jwapopesile kwa Yehofa ni kumŵenda kuti, “Atati alichimbichisye lina lyawo.” Yehofa ŵajanjile lipopeloli, mwamti kwinani kwapikaniche maloŵe gamachili gakusala kuti jwalakwe chachilichimbichisya lina lyakwe. (Yoh. 12:28) Kwandaŵi josope Yesu pajwaliji pachilambopa, ŵalichimbichisye lina lya Atati ŵakwe. (Yoh. 17:26) Myoyo yili yakupikanika kuti Aklistu ŵasyesyene akusasangalala kamulichisya masengo lina lya Mlungu soni kwasalila ŵane yakwamba linali.
9. Ana Aklistu ŵa m’yaka 100 yandanda ŵalosisye chamtuli kuti ŵalichimbichisyaga lina lya Mlungu?
9 M’yaka 100 yandanda mpingo ŵa Chiklistu uli ugambile kutamilikasidwa kwene, Yehofa “ŵakumbuchile ŵandu ŵamitundu jine pakwasapula [ŵandu ŵakumanyika ni lina lyakwe, NWT.]” (Mase. 15:14) Aklistu ŵa m’yaka 100 ŵeleŵa ŵasangalalaga mnope kamulichisya masengo lina lya Mlungu soni kulimanyikasya linali kwa ŵandu ŵane. Ŵandumetume soni ŵakumkuya ŵa Yesu ŵakamulichisyaga masengo lina lya Mlungu pakulalichila nambosoni paŵalembaga mabuku ga m’Baibulo. * Yeleyi yatendekasisye kuti jemanjaji amanyicheje kuti ali ŵandu ŵaŵalimanyikasyaga lina lya Mlungu.—Mase. 2:14, 21.
10. Ana pana umboni wamtuli wawukulosya kuti ŵa Mboni sya Yehofa akusalimanyikasya lina lya Yehofa?
10 Ana ŵa Mboni sya Yehofa akusalimanyikasya lina lya Mlungu? Elo, soni umboni wakuyichisyawu ukusalosya yeleyi. Masiku agano achimlongola ŵa dini atesile yakuti lina lisyesyene lya Mlungu likamanyika. Jemanjaji alityosisye linali m’ma Baibulo gawo soni atesile yakuti ŵandu ŵa m’dini syawo akakamulichisyaga masengo linali pasimene pampepe. * Ana masiku agano pana jwalijose jwampaka akanile yakuti ŵa Mboni sya Yehofape ni ŵakusalichimbichisya lina lya Mlungu? Kusala yisyene, pangali dini jilijose jampaka jilandane ni m’weji pangani ja kuwandisya lina lya Yehofa pachilambo chosope. Kupwatika pelepa tukusatenda yindu mwakamulana ni lina lyetu lyakuti Mboni sya Yehofa. (Yes. 43:10-12) Tukopwesye ma Baibulo ga New World Translation gakupunda 240 miliyoni, gelesoni gakusakamulichisya masengo lina lya Yehofa mmalo gosope mwele ŵagopolela ma Baibulo ŵane ŵalityosisye linali. Kupwatika pelepa, tukusakoposyasoni mabuku gagakusasala ya Baibulo soni yakwamba lina lya Yehofa mu yiŵecheto yakupunda 1,000.
TUKUSAWUNONYELA USYESYENE
11. Ana Aklistu ŵa m’yaka 100 yandanda ŵalosisye chamtuli kuti ŵawunonyelaga usyesyene?
11 Yesu jwawunonyelaga usyesyene wakwamba Mlungu soni yosope yaŵasasile Mlungujo kuti chachitenda. Yesu jwatendaga yindu mwakamulana ni usyesyene welewu, soni jwasalile ŵane ya usyesyenewu. (Yoh. 18:37) Nombe ŵakumkuya ŵa Yesu ŵawunonyelaga mnope usyesyene. (Yoh. 4:23, 24) Mwamti ndumetume Petulo pakusala ya Chiklistu jwasasile kuti chili “litala lya usyesyene.” (2 Pet. 2:2) Ligongo lyakuti Aklistu ŵa m’yaka 100 yandanda ŵawunonyelaga mnope usyesyene, jemanjajo ŵakanile kutenda miyambo soni ndamo jilijose jakutindana ni usyesyene. (Akolo. 2:8) Mwakulandana ni yeleyi nombe Aklistu ŵasyesyene masiku agano akupitilisya kwenda mu usyesyene mwakutenda yakomboleka kuti yosope yakusakulupilila soni yakusatenda paumi wawo yiŵeje yakamulana ni maloŵe ga Yehofa.—3 Yoh. 3, 4.
12. Ana abale ŵakusatulongolela akusatenda chichi naga amanyilile kuti kapikane ketu ka usyesyene kakusosekwa kuchenga panepakwe? Ligongo chichi jemanjaji akusatenda yeleyi?
12 Ŵamboni sya Yehofa ŵangasala kuti ndaŵi syosope akusapikanichisya chenene yajikusasala Baibulo. Ndaŵi sine jemanjaji akusalemwesya pa kalondesye kayindu yine yajikusasala Baibulo, soni pakajendesye ka mpingo. Nambotu ngatukusosekwa kusimonga ni yeleyi ligongo Baibulo jikusasala kuti tukusatanda kuwupikanichisya usyesyene ndaŵi pajikupita. (Akolo. 1:9, 10) Yehofa akusatusalila usyesyene mwapanandipanandi. Myoyo tukusosekwa kwembecheya mwakuwusimana mtima kuti kuŵala kwa usyesyene kuŵale mnope. (Mis. 4:18) Naga abale ŵakusatulongolela ayiweni kuti kapikane ketu ka usyesyene kakusosekwa kuchenga panepakwe, ŵangacheleŵa kutenda yeleyo. Masiku agano dini syejinji sikusachengaga yindu yasikusajiganya pakusaka kwasangalasya ŵandu ŵa mu dini jawojo, kapena pakusaka kuŵa ŵakumanyika mnope kuchilamboku. Nambo ŵa Mboni sya Yehofa akusachengaga yindu yakusajiganya pakusaka kuti amŵandichile Mlungu soni kuti amlambileje jwalakwe mpela muŵatendele Yesu. (Yak. 4:4) Myoyo, ngatukusachengaga ngani jine jakwe ligongo lyakuti nganisyo sya ŵandu pachilambopa sichenjile, nambo tukusachengaga ligongo lyakupikanichisya chenene yajikusasala Baibulo. Kusala yisyene tukusawunonyela mnope usyesyene.—1 Ates. 2:3, 4
TUKUSANONYELANA MNOPE
13. Ana Aklistu ŵasyesyene akusalosyaga ndamo japi jakusosekwa mnope? Ana ŵa Mboni sya Yehofa masiku agano akusalosya chamtuli ndamo jeleji?
13 Aklistu ŵa m’yaka 100 yandanda, ŵamanyikaga ni ndamo syejinji syambone. Nambo ndamo jekulungwa jaŵamanyikaga najo mnope jaliji kunonyelana. Yesu jwatite, “Naga mkunonyelana jwine ni mjakwe pelepo ŵandu wosope tachimanyilila kuti jemanja mli ŵakulijiganya ŵangu.” (Yoh. 13:34, 35) Masiku agano ŵa Mboni sya Yehofa akusasangalala mnope ligongo lyakuti jemanjaji akusanonyelana soni kuŵa ŵakamulana. Mwakulekangana ni dini jilijose, m’weji tukusanonyelana mnope mwangajigalila mtundu soni kwakutyochela. Patusimene pampepe chinga pa misongano jamwanamwana kapena jekulungwa ni payikusawonechela kuti tukusanonyelana mnope. Yeleyi yikusatutendekasya kuŵa ŵakusimichisya kuti tukusamlambilaga Yehofa m’litala lyakusalijitichisya jwalakwe.
14. Ana lilemba lya Akolose 3:12-14, likulosya kuti ni chindu chapi champaka tutende pakulosya kwanonyela ŵane?
14 Malemba gakusatulimbikasya kuti ‘tunonyelaneje.’ (1 Pet. 4:8) Litala limo lyatukusalosya chinonyelo chelechi lili kwakululuchila ŵane patulemwechesye soni kwatendela chanasa. Tukusalingalinga kusosa matala gakwakamuchisya soni kukunguluka ni ŵandu wosope ŵali mumpingo mwetu. Tukusatenda yeleyi atamose kwa ŵandu ŵatuleŵele. (Aŵalanje Akolose 3:12-14.) Kunonyelana kweleku ni kwakukusamanyikasya Aklistu ŵasyesyene.
TUKWETE “CHIKULUPI CHIMO”
15. Ana ni yindu yine yapi yatukusatenda pakumtumichila Yehofa yayikulosya kuti tukukuya mwaŵatendelaga yindu Aklistu ŵa m’yaka 100 yandanda?
15 Tukusamlambilaga Yehofa mwakukuya matala gaŵakamulichisyaga masengo Aklistu ŵa m’yaka 100 yandanda. Mwachisyasyo, mwajikusajendechesya yindu gulu jetu yili yakuti tukwete ŵakulolela madela, achakulungwa ŵa mumpingo soni atumiki ŵakamuchisya. Jeleji jilisoni dongosolo jaŵaŵisile ŵandumetume m’yaka 100 yandanda. (Afil. 1:1; Tit. 1:5) Kupwatika pelepa, mwakulandana ni muŵatendelaga yindu Aklistu ŵa m’yaka 100 yandanda nombe m’wesoni tukusachimbichisya malamusi ga Yehofa pangani jagonana soni ulombela. Tukusajiwona miyasi kuti jili japadela soni tukusawuchenjela mpingo mwakwatyosya ŵandu ŵakutenda yakusakala ŵali ŵangapitikuka mtima.—Mase. 15:28, 29; 1 Akoli. 5:11-13; 6:9, 10; Aheb. 13:4.
16. Ana tukulijiganya chichi pamaloŵe gagakusimanikwa pa Aefeso 4:4-6?
16 Yesu jwasasile kuti ŵandu ŵajinji chachiŵechetaga kuti ali ŵakulijiganya ŵakwe. Nambo ngaŵa kuti wosopeŵa chachiŵa kuti ali ŵakulijiganya ŵasyesyene. (Mat. 7:21-23) Malemba gasasile kala kuti masiku gambesi ŵandu ŵajinji chachiwonekaga mpela ŵakutenda ya Mlungu. (2 Tim. 3:1, 5) Nambope Baibulo jikusatusalila mwangapita mumbali kuti pana “chikulupi chimo” chele Mlungu akusachijitichisyaga.—Aŵalanje Aefeso 4:4-6.
17. Ana masiku agano ni ŵani ŵakumkuya Yesu soni kulosya chikulupi chimo chisyesyene?
17 Ana ni ŵani ŵakuchikuya chikulupi chimpepe chisyesyenechi masiku agano? Umboni wakwe tuwuweni kala. Tuliweni litala lyaŵajiganyisye Yesu kuti ŵandu alikuyeje pakumlambila Mlungu. Nambosoni lyele litalali ni lyaŵakuyaga Aklistu ŵa m’yaka 100 yandanda. Apatu kwanga mwangapita mumbali kuli kwakuti, ŵa Mboni sya Yehofa ni ŵa kukuya chikulupi chisyesyenechi masiku agano. Kusala yisyene uli upile wekulungwa kuŵa mu gulu ja ŵandu ŵa Yehofa soni kumanyilila yisyesyene yakwe yakwamba Yehofa soni chakulinga chakwete jwalakwe. Myoyo, kwende tukakayichilaga yakuti twawupatile usyesyene.
NYIMBO NA. 3 Machili Getu Soni Chembecheyo Chetu
^ ndime 5 Munganiji chitulole chisyasyo chiŵapeleche Yesu pangani ja kulambila kusyesyene. Chitulolesoni yaŵatesile ŵakulijiganya ŵakwe pakuya chisyasyo chelechi. Chitukambilanesoni maumboni gagakulosya kuti masiku agano ŵa Mboni sya Yehofa akusakuya kulambila kusyesyene.
^ ndime 9 Alole libokosi lyakuti, “Ana Aklistu ŵa M’yaka 100 yandanda Ŵakamulichisyaga Masengo Lina lya Mlungu?” mu Sanja ja Mlonda ja Julayi 1, 2010 pa peji 6.
^ ndime 10 Mwachisyasyo, mu 2008 Papa Benedict jwa 16, jwasasile kuti pakasimanikwa jwalijose jwa mpingo wa Chikatolika ali “mkukamulichisya masengo kapena kolanga” lina lya Mlungu chinga pakwimba nyimbo sya dini jawo kapena pakupopela.
^ ndime 63 KULONDESYA CHIWULILI: Gulu ja Yehofa jikopwesye Baibulo ja New World Translation m’yiŵecheto yakupunda 200 ni chakulinga chakuti ŵandu aŵalanjeje Baibulo jajikwete lina lya Mlungu m’chiŵecheto chawo.
