NGANI JAKULIJIGANYA 42
NYIMBO NA. 103 Ŵakuchinga Ali Mituka mwa Achalume
Tuyamichileje Mituka ja Achalume Jatupele Yehofa
“Jwalakwe paŵakwesile kwinani. . . , ŵapeleche achalume mpela mituka.”—AEF. 4:8.
CHAKULINGA CHA NGANIJI
Chitukambilane yakusatenda ŵakutumichila ŵakamuchisya, achakulungwa ŵa mumpingo soni ŵakulolela madela pakutukamuchisya. Chitulolesoni yampaka tutende pakulosya kuyamichila masengo gakusatenda achalumeŵa.
1. Ana ni mituka jine japi jaŵatupele Yesu?
PANGALI mundu jwakoloŵa magasa mpela Yesu. Jwalakwe pajwaliji pachilambopa jwatendaga yakusimonjesya pakwakamuchisya ŵane. (Luk. 9:12-17) Mwamti jwayikene pakupeleka umi wakwe ligongo lya m’weji. Welewutu waliji mtuka wekulungwa. (Yoh. 15:13) Kutandila pijwagambile kwimuka ku chiwa Yesu jwapitilisye kulosya koloŵa magasa. Jwalakwe jwamŵendile Yehofa kuti atupe msimu wakwe weswela kuti utujiganyeje soni kutulimbikasya. (Yoh. 14:16, 17, maloŵe ga mwiŵanda; 16:13) Nambosoni kupitila m’misongano ja mpingo, Yesu akupitilisya kutukamuchisya pamasengo gakwajiganya ŵandu pachilambo chosope.—Mat. 28:18-20.
2. Ana achalume ŵali “mpela mituka” ŵakusiŵakolanga pa Aefeso 4:7, 8 akusapwatipo ŵani?
2 Kwende tulole mtuka wine waŵatupele Yesu. Ndumetume Paulo jwalembile kuti Yesu ali akwesile kwinani “jwapeleche achalume mpela mituka.” (Aŵalanje Aefeso 4:7, 8.) Paulo jwasasile kuti Yesu jwapeleche mitukaji pakusaka kuwukamuchisya mpingo mmatala gejinji. (Aef. 1:22, 23; 4:11-13) Masiku agano achalume ŵali mpela mitukaŵa akusapwatikapo ŵakutumichila ŵakamuchisya, achakulungwa ŵa mumpingo soni ŵakulolela madela. a Yisyene kuti achalumeŵa ali ŵangali umlama, mwamti ndaŵi sine akusalemwesyaga yindu yine. (Yak. 3:2) Nambope Ambuje ŵetu Yesu Klistu akusiŵakamulichisya masengo jemanjaji pakusaka kutukamuchisya ligongo lyakuti ali mituka kwa m’weji.
3. Ana wosopewe mpaka tukamuchisye nawo chamti uli masengo gakusakamula achalume ŵali mpela mitukaŵa? Asale chisyasyo.
3 Yesu jwaŵisile achalume ŵali mpela mitukaŵa kuti akamuleje masengo gakuwulimbikasya mpingo. (Aef. 4:12) Nambo wosopewe mpaka twakamuchisye jemanjaji kuti akomboleje kukamula masengo gakusosekwa mnopega. Kuti tupikanichisye yeleyi kwende tuganichisye ayi: Komboleka ŵane mwa m’weji pakwete patukamwile nawo masengo gakutaŵa Nyumba ja Uchimwene. Ŵane akusakamuchisya nawo masengoga mwakulinganya yakulya, kajende, soni yindu yine. Mwakulandana ni yeleyi, wosopewe mpaka twakamuchisye achalume ŵali mpela mitukaŵa kupitila mu yakuŵecheta soni yatukusatendaga. Sambano kwende tukambilane maumbone gatukusapata ligongo lya masengo gakusakamula mwakulipeleka jemanjaji soni yampaka tutende pakulosya kuyamichila.
ŴAKUTUMICHILA ŴAKAMUCHISYA AKUSAKAMULA “MASENGO GAKWAKAMUCHISYA ŴANE”
4. Ana ŵakutumichila ŵakamuchisya ŵa mu ndaŵi ja Aklistu ŵandanda ŵakamulaga masengo gane gapi “gakwakamuchisya ŵane”?
4 Mundaŵi ja Aklistu ŵandanda, achalume ŵane ŵaŵaga ŵakutumichila ŵakamuchisya. (1 Tim. 3:8) Yikuwoneka kuti achalumeŵa ni ŵaŵakamulaga “masengo gakwakamuchisya ŵane” gaŵagasasile Paulo. (1 Akoli. 12:28) Ŵakutumichila ŵakamuchisyaŵa ŵakamulaga masengo gane gakusosekwa mnope ni chakulinga chakuti achakulungwa ŵa mumpingo akamuleje chenene masengo gakwiganya soni gakwalimbikasya ŵane. Mwachisyasyo, ŵakutumichila ŵakamuchisya ŵakamulaga masengo gakusosasosa yindu yakamulichisya masengo pakopela Malemba kapena kuja kusuma yindu yeleyi.
5. Ana ni masengo gane gapi gakusakamula ŵakutumichila ŵakamuchisya masiku agano?
5 Aganichisye ya masengo gane gakusakamula ŵakutumichila ŵakamuchisya ŵa mumpingo mwawo. (1 Pet. 4:10) Jemanjaji akusakamula masengo gakusamalila mbiya, magawo ga mpingo, kuŵilasya mabuku soni kulolechesya kuti abale ni alongo akupochela mabuku pandaŵi jakwe. Akusasamalilasoni yipangiso yakamulichisya masengo pakulosya mafidiyo, kuŵa akalinde soni kukamuchisya nawo pakulinganya Nyumba ja Uchimwene. Masengo gosopega gakusakamuchisya kuti yindu pa mpingo yijendeje chenene. (1 Akoli. 14:40) Kupwatika pelepa, ŵakutumichila ŵakamuchisya ŵane akusajigala nawo mbali pakuŵecheta ngani sya mu Utumiki ni Umi Wetu Wachiklistu soni ngani sya wosope. Jwakutumichila jwakamuchisya mpaka aŵichidwesoni kuti amkamuchisyeje jwakulolela kagulu. Ndaŵi sine, ŵakutumichila ŵakamuchisya ŵakuŵajilwa akusajawulila yimpepe ni achakulungwa ŵa mumpingo ku maulendo ga ubusa.
6. Ana ni magongo gane gapi gagakusatutendekasya kwayamichila ŵakutumichila ŵakamuchisya ŵakusalipeleka mnope?
6 Ana masengo gakusatenda ŵakutumichila ŵakamuchisya gakusakamuchisya chamti uli mpingo? Mlongo Beberly b jwa ku Bolivia jwasasile kuti, “Ngusinayamichila mnope ŵakutumichila ŵakamuchisya ligongo akusandendekasya kuti sangalaleje pandili pamisongano. Masengo gakusatenda jemanjaji gakusangamuchisya kuti njimbeje nyimbo, kwanga, kupikanila ngani nambosoni kulijiganya kupitila mafidiyo soni yiwulili. Jemanjaji akusalolechesyasoni kuti pandaŵi ja misongano pakapagwa chakusokonasya chilichose. Konjechesya pelepa, akusiŵakamuchisyasoni ŵandu ŵalepele kwika pamisongano kuti alolele misonganojo ali kumangwawo. Panyuma pamisongano, abaleŵa akusalongolela pamasengo gakuswejesya, kusamalila mbiya, soni kulolechesya kuti tupochele mabuku.” Mlongo Leslie jwa ku Colombia jwelesoni ŵamkwakwe ali jwamkulungwa jwa mumpingo jwatite, “Kuti ŵamkwangu akombole kutenda chenene mautumiki gawo akusiŵadalila ŵakutumichila ŵakamuchisya. Yikaŵe kuti paliji pangali jemanjaji nikuti akatanganidwaga mnope. Myoyo ngusayamichila mnope kulipeleka kwakusatenda jemanjaji.” Ngatukukayichila kuti mwelemu ni mwakusapikanilasoni wawojo.—1 Tim. 3:13.
7. Ana mpaka tulosye chamti uli kuti tukusitwayamichila ŵakutumichila ŵakamuchisya? (Alolesoni chiwulili.)
7 Atamose kuti tukusitwayamichila ŵakutumichila ŵakamuchisya, nambo Baibulo jikusatulimbikasyasoni kuti, “mlosyeje kuti mli ŵakuyamichila.” (Akolo. 3:15) Pakusaka kwayamichila ŵakutumichila ŵakamuchisya jwamkulungwa jwa mumpingo jwine lina lyakwe Kishishtof jwa ku Finland jwatite, “Ngusatumisya utenga ŵakola lilemba linelyakwe soni ngusalemba yindu yatesile pakulimbikasya nambosoni ligongo lyakwe nguyamichila.” M’bale Pascal soni Mlongo Jael ŵa ku New Caledonia akusiŵapopelelaga ŵakutumichila ŵakamuchisya ndaŵi syosope. M’baleju jwatite, “Tukusitwapopelela ŵakutumichila ŵakamuchisya ŵa mumpingo wetu soni kumyamichila Yehofa ligongo lya jemanjaji. Nambosoni tukusamŵendaga kuti apitilisye kwakamuchisya.” Kusala yisyene, Yehofa akusapikana mapopelo getu mwamti yeleyi yikusakamuchisya mpingo wosope.—2 Akoli. 1:11.
ACHAKULUNGWA ŴA MUMPINGO ‘AKUSAKAMULA MASENGO MWAKULIMBICHILA’
8. Ligongo chichi Paulo jwalembile kuti achakulungwa ŵa mumpingo ŵa m’yaka 100 yandanda ‘ŵakamulaga masengo mwakulimbichila’? (1 Atesalonika 5:12, 13)
8 Achakulungwa ŵa mumpingo wa m’yaka 100 yandanda ŵakamulaga masengo mwakulimbichila pakusaka kuwukamuchisya mpingo. (Aŵalanje 1 Atesalonika 5:12, 13; 1 Tim. 5:17) Jemanjaji ‘ŵawulongolelaga’ mpingo, kulongolela misongano, soni kusagula yakutenda pa likuga lya achakulungwa. Ŵasalilagasoni yakutenda abale ni alongo ŵawo soni kwapa malangiso gachinonyelo pakusaka kuwuchenjela mpingo. (1 Ates. 2:11, 12; 2 Tim. 4:2) Nambope, achalumeŵa ŵasosekwaga kukamula masengo mwakulimbichila pakusaka kugapatila maŵasa gawo yindu yakusosechela. Ŵatendagasoni yakomboleka kuti aŵe paunasi wambone ni Yehofa.—1 Tim. 3:2, 4; Tit. 1:6-9.
9. Ana achakulungwa ŵa mumpingo masiku agano akusakamula masengo gapi?
9 Achakulungwa ŵa mumpingo masiku agano akusakola yakutenda yejinji. Jemanjaji akusalalichila ngani syambone. (2 Tim. 4:5) Akusalipeleka mnope pakulongolela masengo gakulalichila soni kulinganya yakuti alalichileje gawo josope ja mpingo wawo. Akusatujiganyasoni mwampaka tukamulile masengo gakulalichila soni kwiganya mwakwayika ŵandu pamtima. Achakulungwaŵa akusatumichilasoni mpela ŵakwelusya ŵakusatenda yindu mwachanasa. Mklistu patesile chakulemwa chekulungwa, jemanjaji akusamkamuchisya kuti aŵesoni paunasi wambone ni Yehofa. Nambosoni akusalolechesya kuti mpingo uli weswela. (1 Akoli. 5:12, 13; Agal. 6:1) Nambo chakusosekwa mnope, achakulungwaŵa akusakamula masengo gakulanga ngondolo sya Yehofa. (1 Pet. 5:1-3) Jemanjaji akusaŵecheta ngani syakulimbikasya, kutenda yakomboleka kuti ammanyilile jwalijose mumpingo mwawo soni kutenda mawulendo ga ubusa. Achakulungwa ŵane akusakamuchisya pamasengo gakutaŵa soni kulinganya Nyumba sya Uchimwene, kulondesya yindu pa ndaŵi ja misongano ja chigawo, kukamuchisya nawo pa Komiti Jakuŵechetana ni Ŵachipatala, nambosoni m’magulu gakwalola ŵakulwala. Mwamti akusakombola kutenda yeleyi atamose kuti akusakola yakutenda yejinji. Kusala yisyene, achakulungwaŵa akusalipeleka mnope pakutukamuchisya.
10. Ana ni magongo gapi gagakusatutendekasya kwayamichila achakulungwa ŵa mumpingo ŵakusakamula masengo mwakulipeleka mnope?
10 Yehofa jwasasile kuti, “Achakulungwa ŵa mumpingo ŵali abusa chachitusamalila chenene mwamti m’weji ngasitutenda woga kapena kusokonechela.” (Yel. 23:4) Mlongo Johanna jwa ku Finland jwakuweni kukwanilichikwa kwa maloŵega mamagwe paŵalwasile mnope. Jwalakwe jwatite, “Atamose kuti nalepelaga kwalondechesya ŵane mwanapikanilaga, jwamkulungwa jwamumpingo jwanganinammanyililaga chenene ŵambikanilaga mwakuwusimana mtima panamlondechesyaga yakusawusya yangu. Ŵapopesile ni uneji soni ŵasimichisye kuti Yehofa akusanonyela. Ngangusakumbuchila chenene yajwaŵechete jwamkulungwaju, nambo ngusakumbuchila yajwatesile pakungamuchisya kuti ngatendaga woga. Ngusakulupilila kuti Yehofa ŵamtumisye jwamkulungwa jwa mumpingoju kuti angamuchisye pandaŵi jakuŵajilwa.” Ana achakulungwa ŵa mumpingo mwawo ŵakamuchisye chamti uli wawojo?
11. Ana mpaka tulosye chamti uli kwayamichila achakulungwa ŵa mumpingo? (Alole chiwulili.)
11 Yehofa akusasaka kuti twayamichileje achakulungwa ŵa mumpingo “ligongo lya masengo gawo.” (1 Ates. 5:12, 13) Mlongo Henrietta, jwa ku Finland jwasasile kuti, “Achakulungwa ŵa mumpingo akusalipeleka mnope pakwakamuchisya ŵane. Nambotu yeleyi yangagopolelaga kuti jemanjaji akusakola ndaŵi soni machili gejinji kwapunda ŵane, kapena kuti ŵangasimanaga ni yakusawusya paumi wawo. Ndaŵi sine ngusagamba kwasalila jemanjajo kuti, ‘Kusala yisyene wawojo ali jwamkulungwa jwa mumpingo jwambone. Ngukulupilila kuti akusamanyilila yeleyi.’” Mlongo Sera jwa ku Türkiye c jwatite, “Achakulungwa ŵa mumpingo akusasosekwa kwalimbikasya kuti apitilisye kukamula chenene masengo gawo. Myoyo, mpaka yiŵe chenene kwalembela maloŵe gakwalimbikasya, kwaŵilanjila yakulya soni kwenda nawo mu utumiki.” Ana mumpingo mwawo mwana jwamkulungwa jwa mumpingo jwakusamyamichila ligongo lyakuti akusalipeleka mnope? Naga yili myoyo asosejesoseje matala gampaka alosye kuyamichila kwawo.—1 Akoli. 16:18.
Mpaka akombole kwalimbikasya achakulungwa ŵa mumpingo kuti apitilisye kutenda chenene mautumiki gawo (Alole ndime 7, 11 soni 15)
ŴAKULOLELA MADELA AKUSATULIMBIKASYA MNOPE
12. Ana ni ŵandu ŵane ŵapi ŵaŵawulimbikasyaga mpingo mu yaka 100 yandanda? (1 Atesalonika 2:7, 8)
12 Yesu jwapelechesoni “achalume mpela mituka” pakusaka kuwukamuchisya mpingo mmatala gane. Jwalakwe jwakamulichisye masengo achakulungwa ŵa ku Yelusalemu pakumtumisya Paulo ni Balanaba soni achalume ŵane kuti akaŵe ŵakulolela madela. (Mase. 11:22) Jwalakwe jwatesile yeleyi kuti nombe jemanjaji akajilimbikasyeje mipingo, mpela mwakusatendela ŵakutumichila ŵakamuchisya soni achakulungwa ŵa mumpingo. (Mase. 15:40, 41) Achalumeŵa ŵalipelekaga mnope pakukamula masengoga, mwamti ndaŵi sine ŵaŵikaga umi wawo pangosi pakusaka kwajiganya soni kwalimbikasya ŵane.—Aŵalanje 1 Atesalonika 2:7, 8.
13. Ana ŵakulolela madela akusakamula masengo gane gapi?
13 Ndaŵi syosope ŵakulolela madela akusatamila kwendajenda. Ŵakulolela madela ŵane akusajenda lutando lwa makilomita gejinji kuti akayiche ku mpingo wine. Wiki jilijose, jwakulolela dela akusaŵecheta ngani syejinji, kutenda maulendo ga ubusa, kutenda msongano ni apayiniya, kutenda msongano ni achakulungwa ŵa mumpingo nambosoni kutenda misongano jakukosechela utumiki. Jwalakwe akusakosechela ngani soni kulongolela misongano ja dela nambosoni ja chigawo. Akusajiganya nawo pa sukulu ja apayiniya, kulinganya msongano wa apayiniya wosope ŵa mudela jakwe, nambosoni ndaŵi sine kukamula masengo gagakusosekwa mwachitema paŵendedwe ni ofesi ja nyambi.
14. Ana ni magongo gane gapi gagakusatutendekasya kuti twayamichileje ŵakulolela madela ligongo lyakamula masengo mwakulimbichila?
14 Ana masengo gakusakamula ŵakulolela madela gakusakamuchisya chamti uli mipingo kwawula pasogolo? Pakwamba ya maumbone gajwapataga panyuma pakuti jwakulolela dela ayiche pa mpingo wakumangwakwe m’bale jwine jwa ku Türkiye jwasasile kuti, “Ulendo uliwose payiche jwakulolela dela pa mpingo wetu yalimbikasyaga kuti nalipelecheje mnope pakwakamuchisya abale ni alongo ŵangu. Mbele ndili mkusimana ni ŵakulolela dela ŵajinji, nambope pangali atamose jumo jwa jemanjaji ŵaŵandendekasisye kuyiwona kuti akusaŵa ŵakutanganidwa mnope kapena juŵalosisye kuti ngakusaka kuŵechetana ni uneji.” Pandaŵi jine, Johanna jwatumkolasile jula jwapite kukulalichila ni jwakulolela dela. Nambo jemanjaji nganampata mundu jwalijose. Jwalakwe jwatite, “Ngangusaliliŵalila lisikuli. Achakuluŵangu ŵaŵili ŵaliji ali agambile kusama kwene mwamti nasoŵile mnope. Nambo jwakulolela delaju jwanimbikasisye soni jwangamuchisye kumanyilila kuti masiku agano yili yakusawusya kutama yimpepe ni ŵamwiŵasa mwetu soni achimjetu. Nambo mchilambo chasambano tuchikola upile wekulungwa wakutama yimpepe ni achalongo achimjetu.” Kusala yisyene, ŵajinji ŵa m’weji tukusakumbuchila yindu yambone yaŵatesile ŵakulolela dela pakutulimbikasya.—Mase. 20:37–21:1.
15. (a) Mwakamulana ni 3 Yohane 5-8, ana mpaka twayamichile chamti uli ŵakulolela madela? (Alolesoni chiwulili.) (b) Ligongo chichi tukusasosekwa kwayamichila alongo ŵele achiŵamkwawo akusakamula masengo mwakulipeleka mnope mumpingo? Soni ana mpaka tutende chamti uli yeleyi (Alole libokosi lyakuti “ Ŵakumbuchileje Achiŵamkwawo.”)
15 Ndumetume Yohane ŵamlimbikasisye Gayo kuti ŵapocheleje chenene abale ŵakusayika pampingo kukwalimbikasya Aklistu achimjawo. Jwalakwe ŵamsalile kuti, “Ngumŵenda kuti mwatendeleje yindu yampaka yimsangalasye Mlungu.” (Aŵalanje 3 Yohane 5-8.) Litala limo lyampaka tutendele yeleyi lili kwaŵilanjila ŵakulolela madela kuti tulile yimpepe chakulya. Litala line lili kwinjila nawo mu utumiki pakwendela mpingo wetu. Mlongo Leslie jwatumkolasile jula akusalosya kuyamichila kwakwe mu litala line. Jwalakwe jwatite, “Ngusinamŵenda Yehofa kuti ŵasamalileje jemanjaji. Une ni ŵamkwangu tukusitwalembela yikalata ŵakulolela madela yakwasalila maumbone gatwapatile paŵawujendelaga mpingo wetu.” Tukumbuchileje kuti ŵakulolela madela akusasimana ni yakusawusya soni akusapelaga mpela mwayikusaŵela ni m’weji. Ndaŵi sine jemanjaji akusalwalaga soni kulagasika nganisyo. Myoyo maloŵe galigose gachinonyelo gampaka aŵechete kwa jemanjaji kapena mtuka wuliwose wampaka ŵape mpaka yalimbikasye mnope.—Mis. 12:25.
TUKUSASOSECHELA ACHALUME ŴALI MPELA MITUKA
16. Mwakamulana ni Misyungu 3:27, ana abale akusasosekwa kuliwusya yiwusyo yapi?
16 Kusyungulila pa chilambo chosope tukusosechela achalume ŵali “mpela mituka” kuti atumichileje mu mpingo. Naga wawojo ali m’bale jwam’batisidwe ana nganakola ‘machili gakuti mpaka apakombole kuyitenda yeleyi’? (Aŵalanje Misyungu 3:27.) Ana akusachilila ali aŵele jwakutumichila jwakamuchisya? Ana akutenda yakomboleka kuti aŵajilwe kutumichila mpela jwamkulungwa jwa mumpingo? d Ana ali ŵakoseka kuchenga yine ni yine pa umi wawo ni chakulinga chakuti akajinjile nawo sukulu ja ŵakulalichila ya Uchimwene? Sukuluji jichakamuchisya kupata majiganyo gampaka gakamuchisye kuti Yesu ŵakamulichisye masengo mnope. Naga akusalikayichila kuti nganaŵa akombwele kutenda yeleyi apopeleje kwa Yehofa. Amŵendeje jwalakwe kuti ŵape msimu wakwe weswela kuti ŵakamuchisye kukamula chenene masengo galigose gampaka apochele.—Luk. 11:13; Mase. 20:28.
17. Ana achalume ŵali mpela mituka akusalosya chamti uli mwaŵelele mwenye jwetu Yesu Klistu?
17 Yindu yakusatenda abale ŵaŵasagulidwe ni Yesu kuŵa “achalume mpela mituka” yikusalosya kuti jwalakwe akutulongolela m’masiku gambesi gano. (Mat. 28:20) Ana wawojo ngakusangalala kumanyilila kuti tukwete Mwenye jwakusatunonyela mnope jwali jwakoloŵa magasa soni jwakusamanyilila yatukusasosechela mwakutupa abale ŵakuti atukamuchisyeje? Myoyo, mpaka atende chenene kusosasosa lipesa lyakwayamichila achalume ŵakulipelekaŵa. Nambosoni tukaliŵalilaga kumyamichila Yehofa, Jwakusapeleka “mtuka wuliwose wambone soni wa mlama.”—Yak. 1:17.
NYIMBO NA. 99 Abale Ŵangaŵalanjika
a Achakulungwa ŵa mumpingo ŵakusatumichila mu Likuga Lyakulongolela, ŵakamuchisya mu Likuga Lyakulongolela, ŵa mu Komiti ja Nyambi soni ŵakusatenda mautumiki gane ali achalume ŵali “mpela mituka.”
b Mena gane munganiji gachenjile.
c Chilambo chelechi munyumamo chamanyikaga kuti Turkey.
d Naga akusaka kumanyilila yampaka atende kuti aŵajilwe kutumichila mpela jwakutumichila jwakamuchisya kapena jwamkulungwa jwa mumpingo, alole ngani ja mtwe wakuti, “Abale Ana Akutenda Yakomboleka Kuti Aŵajilwe Kuŵa Jwakutumichila Jwakamuchisya?” soni jakuti “Abale Ana Akutenda Yakomboleka Kuti Aŵajilwe Kutumichila Mpela Jwamkulungwa Jwa Mumpingo?” Nganisi sikusimanikwa mu Sanja ja Mlonda ja Nofemba 2024.
