1-2. Ana ŵakulijiganya ŵaŵili ŵa Yesu chatendechele chichi paŵajawulaga ku Emau?

 PALIJI pa Nisani 16, mu 33 C.E. Pandaŵiji ŵakulijiganya ŵa Yesu chakamwile chanasa chekulungwa soni ŵatendaga woga. Ŵakulijiganya ŵaŵili ŵa Yesu ŵatyochelaga ku Yelusalemu kwawula ku musi wine wakolanjidwa Emau wawaliji palutando lwa makilomita 11 kutyochela ku Yelusalemu. Ŵakulijiganyaŵa ŵatengwiche mnope ligongo lyakuti Yesu juŵamkuyaga jwaliji ali awile. Jemanjaji ŵajembecheyaga kuti Mesiya chiŵatendele yakusimonjesya, nambo pandaŵiji jwaliji ali awulajidwe. Kaneko patendekwe chindu changanachijembecheyaga.

² Mundu jwine jwachilendo jwakopochele ni kwendaga nawo. Ŵakulijiganyawo ŵatandite kumsalila yindu yayamtendechele Yesu. Kaneko mundujo jwatandite kwasalila ŵakulijiganyawo yindu yele nganayiliŵalila. Jwasalile jemanjajo ligongo lyakwe Mesiya jwasosekwaga kulaga soni kuwa. Myoyo, “Ŵalondechesye kutandila ni yakulemba ya Mose mpaka yakulemba ya ŵakulochesya wosope.” Ŵandu ŵatatuŵa paŵakopochele ku Emau, mundu jwachilendo jula jwalimanyikasisye kuti jwaliji Yesu jujwajimwiche ku chiwa. Kusala yisyene, ŵakulijiganyaŵa ŵasangalele mnope paŵamanyilile kuti Mesiya ajimwiche ku chiwa.—Luk. 24:​13-35.

3-4. Ana ŵakulijiganya ŵa Yesu chatendechele chichi? Ana chitulijiganye chichi mu nganiji? (Masengo 1:3)

³ Yesu ali ajimwiche ku chiwa jwatemi pachilambopa kwa masiku 40 mkanawujile kwinani. (Aŵalanje Masengo 1:3.) Mwamti kwa masiku gosopega, jwalakwe jwaŵele ali mkuwonechela kwa ŵakulijiganya ŵakwe. Pandaŵiji Yesu ŵalimbikasisye ŵakulijiganya ŵakwe ŵaŵakwete chanasa chekulungwa soni woga. Yaŵatesile Yesu yakamuchisye jemanjaji kuti atande kusangalala soni kuŵa ŵakulimba mtima kulalichila  ngani syambone syakwamba Uchimwene. a

⁴ Kusala yisyene, mpaka tulijiganye yejinji pa yaŵatesile Yesu pandaŵiji. Munganiji, chitukambilane yaŵatesile Yesu pakukamulichisya masengo ndaŵi jakwe (1) pakwalimbikasya ŵakulijiganya ŵakwe, (2) pakwakamuchisya kupikanichisya chenene Malemba, soni (3) pakwajiganya jemanjajo masengo gachachitenda msogolo. Pambali jilijose, chitulole yampaka tutende pakujigalila chisyasyo cha Yesu.

ŴALIMBIKASYEJE ŴANE

5. Ligongo chichi ŵakulijiganya ŵa Yesu ŵasosekwaga kwalimbikasya?

⁵ Ŵakulijiganya ŵa Yesu ŵasosekwaga kwalimbikasya. Yaliji myoyo ligongo lyakuti ŵane mwajemanjaji ŵalesile nyumba syawo, maŵasa gawo, soni mabisinesi gawo kuti amkuyeje Yesu. (Mat. 19:27) Ŵane ŵatendeledwaga yindu yangali chilungamo ligongo lyakuti ŵasagwile kumkuya jwalakwe. (Yoh. 9:22) Jemanjaji ŵakundile kuleka yindu yeleyi ligongo ŵakulupililaga kuti Yesu ŵaliji Mesiya. (Mat. 16:16) Nambo Yesu pajwawulajidwe, chembecheyo chawo chamasile mwamti ŵatengwiche mnope.

6. Ana Yesu jwatesile chichi ali ajimwiche ku chiwa?

⁶ Yesu jwapikanichisye kuti ŵakulijiganya ŵakwewo ŵakwete chanasa ngaŵa ligongo lya kunandipa chikulupi, nambo ligongo lyakukwayidwa mnope mumtima. Myoyo, Yesu ali agambile kwimuka ku chiwa, lisiku lilyolyo jwatandite kwalimbikasya achimjakwewo. Mwachisyasyo, jwalakwe jwawonechele kwa Maliya jwa ku Magadala pandaŵi jiŵalilaga palilembe lya Yesu. (Yoh. 20:​11, 16) Jwawonechelesoni kwa ŵakulijiganya ŵakwe ŵaŵili ŵatwasasile kundanda kwa nganiji. Kaneko jwawonechele kwa ndumetume Petulo. (Luk. 24:34) Ana tukulijiganya chichi pa chisyasyo cha Yesuchi? Kwende tulole yayatendekwe jwalakwe pajwawonechele kwa Maliya jwa ku Magadala.

7. Ana Yesu ŵam’weni Maliya ali mkutenda chichi? Ana jwalakwe jwamtendele chichi Maliyajo? (Yohane 20:​11-16) (Alolesoni chiwulili.)

⁷ Aŵalanje Yohane 20:​11-16. Kundaŵi kwa pa Nisani 16, achakongwe ŵane ŵakulupichika ŵapite ku malo gaŵamsichile Yesu. (Luk. 24:​1, 10) Kwende tukambilane yayamtendechele jumo mwa achakongweŵa jwali Maliya jwa ku Magadala. Maliya pajwajinjile mwilembemo, jwasimene kuti mwangali chilichose. Myoyo, jwapite kukumsalila Petulo  ni Yohane soni jwakuyaga jemanjaji paŵawutuchilaga ku lilembelyo. Achalumeŵa paŵasimichisye kuti mwilembemo mwangali chilichose, ŵawujile kumangwawo. Nambo Maliya ŵatemi papopo kwineku ali mkulila. Nambope jwalakwe nganamanyililaga kuti Yesu jwamwonaga. Yesu jwachiweni chanasa chekulungwa chajwakwete jwamkongweju mwamti jwasachililaga kumlimbikasya. Myoyo, Yesu jwawonechele kwa Maliyajo soni jwatesile chindu chichamlimbikasisye mnope. Yesu ŵaŵechetene ni jwalakwejo soni ŵampele masengo gakusosekwa mnope gakuti akasalile achimjakwe yakuti jwalakwe ajimwiche ku chiwa.—Yoh. 20:​17, 18.

8. Ana mpaka tumsyasye chamti uli Yesu?

⁸ Yampaka tutende pakumsyasya Yesu. Mpela mwajwatendele Yesu, m’wejisoni mpaka tukombole kwalimbikasya Aklistu achimjetu kuti apitilisye kumtumichila Yehofa. Mpaka tukombole kutenda yeleyi naga tukumanyilila yayikwalagasya nganisyo kaneko ni kwalimbikasya. Aganichisye yayamtendechele Mlongo Jocelyn, jwele mpwakwe jwawile pangosi. Mlongoju jwatite, “Kwa miyesi jejinji naliji ndili mkudandawula mnope.” Nambo liŵasa line lyamŵilanjile mlongoju kumangwawo. Mlongoju pajwalondesyaga yayamtendechele, jemanjanji ŵampikanilaga mwachanasa. Mwamti liŵasali lyamsimichisye kuti Mlungu akusamwona kuŵa jwakusosekwa. Mlongo Jocelyn jwatite, “Nalipikene mpela kuti Yehofa ŵakamulichisye masengo jemanjanji pakunjuwula m’nyasa ni kumbonya mu liboti lyakulupuchila. Jemanjaji ŵangamuchisye kuti mbitilisye kumtumichila Yehofa.” M’wejisoni mpaka tukombole kwalimbikasya ŵane mwakwapikanila chenene pakulondesya mwakupikanila mu mtima, soni kuŵecheta mwakwatendela chanasa ni chakulinga chakuti twalimbikasye kuti apitilisye kumtumichila Mlungu.—Alo. 12:15.

ŴAKAMUCHISYEJE ŴANE KUPIKANICHISYA MALOŴE GA MLUNGU

9. Ana ŵakulijiganya ŵa Yesu ŵasimene ni chakusawusya chamti uli, soni ana Yesu jwakamuchisye chamti uli jemanjajo?

⁹ Ŵakulijiganya ŵa Yesu ŵakulupililaga Maloŵe ga Mlungu soni ŵatendaga yampaka akombole kuti agakamulichisyeje masengo paumi wawo. (Yoh. 17:6) Nambope jemanjaji nganapikanichisya ligongo lyakwe Yesu jwawulajidwe mpela jwachiswamba. Yesu jwamanyililaga kuti ŵakulijiganya ŵakwe ŵakwete chikulupi soni ŵamnonyelaga mnope Yehofa. Nambope jwalakwe jwamanyilile kuti jemanjaji ŵasosekwaga kugapikanichisya chenene Malemba. (Luk. 9:​44, 45; Yoh. 20:9) Myoyo, jwalakwe jwajiganyisye chenene jemanjajo kuti apikanichisyeje yaŵalasile m’Maloŵe ga Mlungu. Aganichisye yajwatesile jwalakwe pajwawonechele kwa ŵakulijiganya ŵakwe ŵaŵili pamsewu wakwawula ku Emau.

10. Ana Yesu jwatesile chichi pakwasimichisya ŵakulijiganya ŵakwe kuti jwaliji Mesiya jusyesyene? (Luka 24:​18-27)

¹⁰ Aŵalanje Luka 24:​18-27. Yesu pajwajendaga ni ŵakulijiganya ŵakwe ŵaŵiliwo nganayichila kulimanyikasya. Mmalomwakwe, jwalakwejo jwawusisye yiwusyo. Ligongo chichi jwatesile yeleyi? Komboleka jwasakaga kuti jemanjaji asale yayaliji munganisyo soni mumtima mwawo. Mwamti yeleyi ni yayatendekwe. Ŵakulijiganyawo ŵasasile kuti ŵajembecheyaga kuti Yesu chiŵakulupusye Ayisalayeli ku ulamusi wangasa wa Aloma. Ŵakulijiganyaŵa ali alondesisye yindu yaŵadandawulaga, Yesu jwakamulichisye masengo Malemba pakwakamuchisya kupikanichisya yindu yayagambile kutendekwa kweneyo. b Kaneko panyuma pa yeleyi, Yesu jwasimene ni ŵakulijiganya ŵakwe ŵane mwamti jwalondechesyesoni yisyesyene ya yindu yayatendekweyo. (Luk. 24:​33-48) Ana tukulijiganya chichi pelepa?

11-12. (a) Ana yaŵatesile Yesu pakwiganya yisyesyene ya m’Baibulo yikutujiganya chichi? (Alolesoni yiwulili.) (b) Ana m’bale jwine ŵamkamuchisye chamti uli mundu juŵamjiganyaga Baibulo?

¹¹ Ana mpaka tumsyasye chamti uli Yesu? Chandanda, patukwajiganya ŵandu Baibulo twawusyeje yiwusyo yampaka yatendekasye kusala yayili mumtima mwawo. (Mis. 20:5) Patumanyilile nganisyo syawo, twalosyeje yampaka atende kuti apate lilemba  lyampaka lyakamuchisye kumalana ni chakusawusya chasimene nacho. Nambo tuŵambaleje kwasalila yakutenda. Mmalomwakwe, paŵalasile lilemba linelyakwe ŵawusyeje yiwusyo kaneko ŵalimbikasyeje kuti aganichisyeje yaŵalasileyo soni yampaka atende pakuyikamulichisya masengo. Aganichisye yayamtendechele M’bale Nortey jwa ku Ghana.

¹² M’bale Nortey jwatandite kulijiganya Baibulo ali akwete yaka 16. Nambo mkanipapite ndaŵi, ŵandu ŵamwiŵasa mwakwe ŵatandite kumsisya. Ana chichi chachamkamuchisye m’baleju kuti apitilisye kulijiganya Baibulo? Mundu juŵamjiganyaga Baibulo ŵakamulichisye masengo yindu yayikusasimanikwa mu buku ja Maliko chaputala 10 pakumlondechesya kuti Aklistu ŵasyesyene chachilagasidwa. M’bale Nortey jwatite, “Panagambile kutanda kulagasidwa nakulupilile kuti mbatile yisyesyene.” Mundu juŵamjiganyaga Baibulo ŵamkamuchisyesoni M’bale Nortey kupikanichisya yayikusasimanikwa pa Mateyu 10:16. Ŵamsalile kuti akusosekwa kuŵa jwakusamala soni kwachimbichisya ŵachibale ŵakwe pakukambilana yakusakulupilila. M’bale Nortey ali abatisidwe ŵasakaga kutenda upainiya, nambo babagwe ŵasakaga kuti jwalakwejo akatende majiganyo ga ku yunifesite. Mmalo mwakumsalila yakutenda, juŵamjiganyaga Baibulojo jwagambile kumwusya yiwusyo yayamkamuchisye jwalakwe kuganichisya mfundo sya m’Baibulo syasyamkamuchisye kusagula yindu mwalunda. Ana yakuyichisya yakwe yaliji yamti uli? M’bale Nortey jwasagwile yakutanda upainiya. Nambo babagwe ŵamtopwele pamlangopo. Ana m’baleju jwapikene wuli ni yeleyi? Jwalakwe jwatite “Nasimichisye kuti yindu yanasagwile yaliji yakuŵajilwa.” Mpela muyaŵelele ni m’baleju, m’wejisoni patukupata ndaŵi jakwakamuchisya ŵane kuganichisya mfundo sya m’Baibulo mpaka twakamuchisye kuti aŵe Aklistu ŵakulimba.—Aef. 3:​16-19.

TWAJIGANYEJE ABALE KUTI AŴE MITUKA JA ACHALUME

13. Ana Yesu pajwawujile kwinani jwatesile chichi pakusaka kulolechesya kuti masengo ga kulalichila nganigajima? (Aefeso 4:8)

¹³ Pajwaliji pachilambopa, Yesu jwakamwile masengo gosope gaŵamsalile Atati ŵakwe kuti akamule. (Yoh. 17:4) Nambotu Yesu nganaganisyaga kuti jwalakwe jikape ni juŵaliji jwakuŵajilwa kukamula masengo gaŵasakaga Yehofa. Mwamti kwa yaka yitatu ni hafu yajwatendaga utumiki wakwe pachilambopa, jwajiganyisyesoni ŵane masengoga. Yesu jwadalilaga mnope ŵakulijiganya ŵakwe. Jwalakwe jwalechele masengo gakulalichila ngani syambone soni kwasamalila ŵakutumichila ŵa Yehofa. Mwamti ŵane mwa ŵandu ŵaŵakamulaga  masengoga ŵaliji ŵangakwana yaka 30. (Aŵalanje Aefeso 4:8.) Ana Yesu jwakamulichisye masengo chamti uli masiku 40 gakumalisya kutama pachilambopa pakwakamuchisya ŵakulijiganya ŵakwe ŵakulupichika soni ŵakulipelekaŵa kuti aŵe mituka ja achalume?

14. Ana Yesu ŵajiganyisye chichi ŵakulijiganya ŵakwe m’masiku 40 gakumalisya kutama pachilambopa? (Alolesoni chiwulili.)

¹⁴ Yesu jwapele ŵakulijiganya ŵakwe malangiso gangapita mumbali nambo mwachinonyelo. Mwachisyasyo, jwamanyililaga kuti ŵane mwa ŵakulijiganya ŵakwe ŵakayichilaga yakuti jwalakwe jwawile soni kwimuka ku chiwa. Myoyo jwalakwe jwakamuchisye jemanjaji kumanyilila yisyesyene panganiji mwakwapa malangiso. (Luk. 24:​25-27; Yoh. 20:27) Yesu jwakamuchisyesoni ŵakulijiganya ŵakwewo kuti alipelecheje mnope pa masengo gakwasamalila ŵakutumichila ŵa Yehofa mmalo mwakulipeleka mnope pakusosasosa chipanje. (Yoh. 21:15) Konjechesya pelepa, jwalakwe jwakamuchisye jemanjaji kuti aŵambaleje kulandanya utumiki wawo ni wakutenda ŵane. (Yoh. 21:​20-22) Jwakamuchisyesoni kuti akole nganisyo syakuŵajilwa pakwamba ya Uchimwene soni kuti aŵicheje nganisyo syawo pamasengo gakulalichila. (Mase. 1:​6-8) Ana achakulungwa ŵa mumpingo mpaka alijiganye chichi kwa Yesu?

15-16. (a) Ana achakulungwa ŵa mumpingo mpaka amsyasye Yesu m’matala gapi? Alondesye. (b) Ana kupochela malangiso kwamkamuchisye chamti uli M’bale Patrick?

¹⁵ Ana achakulungwa ŵamumpingo mpaka amsyasye chamti uli Yesu? Jemanjaji akusosekwa kwajiganya abale kupwatikapo ŵachinyamata kuti aŵajilwe maudindo mumpingo. c Achakulungwa ŵa mumpingo pakwajiganya ŵane ŵangajembecheyaga kuti jemanjaji chatendeje chenene yindu yosope. Achakulungwaŵa akusapeleka malangiso mwachinonyelo kwa ŵachinyamata kuti akole lunda nambosoni kuti amanyilileje kusosekwa kwakuŵa ŵakulinandiya, ŵakulupichika, soni ŵakusachilila kwatumichila ŵane.—1 Tim. 3:1; 2 Tim. 2:2; 1 Pet. 5:5.

¹⁶ Aganichisye yagatite malangisoga pakumkamuchisya M’bale Patrick. Pajwaliji jwachinyamata, m’baleju jwaŵechetelaga yachipongwe soni kutenda yindu mwangaganichisya ŵane atamosesoni alongo. Nambo jwamkulungwa jwa mumpingo  jwine jwachiweni chakusawusya chajwakwete Patrick, mwamti ŵampele malangiso gangapita mumbali. Patrick jwatite, “Ngusayamichila mnope malangiso gaŵambele m’baleju. Nganisangalalaga ŵane papochele utumiki wanawusakaga. Nambo malangiso gajwambele jwamkulungwaju gangamuchisye kuti natumichileje ŵane mwakulinandiya mmalo mwaganichisya mnope udindo wampaka ngole mumpingo.” Ana yakuyichisya yakwe yaliji yamti uli? Patrick jwaŵichidwe kuŵa jwamkulungwa jwa mumpingo ali akwete yaka ya mma 20.—Mis. 27:9.

17. Ana Yesu jwalosisye chamti uli kuti jwakulupililaga mnope ŵakulijiganya ŵakwe?

¹⁷ Kupwatika pakwapa ŵakulijiganya ŵakwe masengo gakulalichila, Yesu ŵasalilesoni kuti akajiganyeje ŵandu. Komboleka ŵakulijiganyawo ŵayiwonaga kuti nganaŵa akombwele kukamula masengoga. Nambope, Yesu nganakayichilaga yakuti jemanjaji mpaka akombole kukamula masengoga. Mwamti jwalakwe jwasimichisye yeleyi. Pakulosya kuti jwadalilaga Yesu jwasalile kuti, “Mpela mwele Atati ŵandumisye une, unesoni ngumtumisya jemanja.”—Yoh. 20:21.

18. Ana achakulungwa ŵa mumpingo mpaka amsyasye chamti uli Yesu?

¹⁸ Yampaka atende achakulungwa ŵa mumpingo pakumsyasya Yesu. Achakulungwa ŵalunda akusiŵajiganya ŵane kuti aŵajilwe maudindo ga mumpingo. (Afil. 2:​19-22) Mwachisyasyo, achakulungwa mpaka ŵaŵende ŵachinyamata kuti akamuchisyeje nawo pamasengo gakuswejesya soni kulinganya pa Nyumba ja Uchimwene. Mpaka apelechesoni masengo kwa abale, kwajiganya mwampaka akamulile masengogo, soni kola chikulupi chakuti chigajende chenene. M’bale Matthew jwalisoni jwamkulungwa jwa mumpingo akusiŵayamichila mnope achakulungwa ligongo lyakumjiganya chenene mwampaka akamulile masengo ga mumpingo soni kukulupilila kuti chigajende chenene. Jwalakwe jwatite, “Pandemwisye yineyakwe, achakulungwaŵa ŵangamuchisyaga kuti nalijiganye kutyochela pa yandemwisyeyo nichakulinga chakuti ndaŵi jine chingombole kuyitenda chenene.” d

19. Ana tukusosekwa kuŵa ŵakusachilila kutenda chichi?

¹⁹ Yesu jwakamulichisye masengo masiku 40 gakumalisya kuŵa pachilambopa pakwajiganya soni kwakamuchisya ŵane. M’wejisoni tukusosekwa kuŵa ŵakusachilila kujigalila chisyasyo chakwe. (1 Pet. 2:21) Mwamti Yesu chachitukamuchisya kuti tukombole kutenda yeleyi. Pajatu jwalakwe jwatusalile kuti, “Une ndili ni jemanja masiku gosope mpaka mbesi ja ndaŵi ajino.”—Mat. 28:20.