NYIMBO syaliji syakusosekwa mnope kwa Ayisalayeli. Ndaŵi syejinji Baibulo jikusasala kuti ŵandu ŵajimbaga nyimbo pakamulichisya masengo yida yakwimbila soni nyimbo syakwimba ni pakamwa. Mbali jekulungwa ja Baibulo sili nyimbo. Mwamti mabuku mpela Masalimo, Nyimbo ja Solomoni soni Jwakulalichila sili nyimbo. Buku jine jakulondesya muwaŵelaga umi mundaŵi ja m’Baibulo jasasile kuti, Ayisalayeli ŵajimbaga nyimbo payakutendekwa yejinji paumi wawo.

Ŵajimbaga nyimbo lisiku lililyose. Ayisalayeli ŵajimbaga nyimbo pakusaka kulosya muŵapikanilaga mumtima. (Yes. 30:29) Achakongwe ŵajimbaga tungoma mwakusangalala kwineku ali mkwimba nyimbo soni kuŵina. Ŵatendaga yeleyi pandaŵi jakumsagula mwenye, asilikali pawinile ku ngondo, soni payisangalalo. (Ŵak. 11:34; 1 Sam. 18:​6, 7; 1 Ayi. 1:​39, 40) Naga mundu jwine awile, Ayisalayeli ŵajimbagasoni nyimbo pakulosya chanasa. (2 Mbi. 35:25) Buku jine jasasile kuti, “Ayisalayeli ŵaliji ŵandu ŵakunonyela kwimba nyimbo.”

Kwimba nyimbo ku nyumba ja umwenye. Mamwenye ga Chiyisalayeli ganonyelaga nyimbo. Mwenye Sauli ŵamŵilasile Daudi kuti akamjimbileje nyimbo ku nyumba jakwe ja umwenye. (1 Sam. 16:​18, 23) Pali papitile ndaŵi, Daudi jwaŵele mwenye, mwamti jwalakwe jwaŵilasisye yida yakwimbila nyimbo kaneko jwalembile nyimbo. Ali alembile nyimbosi ŵapele ŵandu kuti akajimbeje papite kukupopela ku nyumba ja Yehofa. (2 Mbi. 7:6; Amo. 6:5) Nombenajo Mwenye Solomoni jwakwete achalume soni achakongwe ŵaŵajimbaga nyimbo ku nyumba jakwe ja umwenye.—Jwak. 2:8.

Kwimba nyimbo pakupopela. Ayisalayeli ŵakuwonaga kwimba nyimbo pakupopela kuŵa kwakusosekwa mnope. Achalume ŵakwana 4,000 ŵajimbaga yida yakwimbila nyimbo panyumba ja Mlungu ku Yelusalemu. (1 Mbi. 23:5) Jemanjaji ŵajimbaga nyimbo pakamulichisya masengo michekeche, yakwimbila yangonji yamtundu wine, yakwimbila yangonji, soni malipenga. (2 Mbi. 5:12) Nambope, papalisoni ŵandu ŵane ŵaŵamchimbichisyaga Yehofa mwa kwimba nyimbo. Pana maumboni gakulosya kuti Ayisalayeli ŵajinji ŵajimbaga nyimbo paŵajawulaga ku Yelusalemu kukutenda yisangalalo. Nyimbo syelesi ŵasikolangaga kuti syakwinjilila mumsinda. (Sal. 120–134) Mwakamulana ni yakulemba ya Ayuda, Ayisalayeli ŵajimbagasoni nyimbo sine syakumchimbichisya Mlungu pakutenda Pasika, nyimbosi sikusasimanikwa m’buku ja Masalimo. a

Mpaka apano nyimbo sili syakusosekwa mnope kwa ŵakutumichila ŵa Yehofa. (Yak. 5:13) Tukusajimba nyimbo pakusaka kumchimbichisya Yehofa. (Aef. 5:19) Nambosoni nyimbo sikusatukamuchisya kuŵa ŵakamulana mnope ni Aklistu achimjetu. (Akolo. 3:16) Sikusatukamuchisyasoni kuti tukombole kupilila patukusimana ni yakusawusya. (Mase. 16:25) Kwimba nyimbo lili litala lyambone mnope lyatukusalosya kuti tukusamkulupilila Yehofa soni kumnonyela mnope.