Paul jwasasile kuti, “Pandaŵi jine paŵambutile msiŵani jwangu, namkamwile palukosi. Nasakaga kwamba kumwulaga.”

Marco jwatite, “Kunyumba ngusatumbila mnope pali pangali ligongo lililyose. Ngusagamba kasanya mipando, yidole nambosoni chilichose chachimbandichile.”

Ŵajinji mwa m’weji nganituŵa tutesile yeleyi. Nambope ndaŵi sine tukusalepela kuligosa pa yindu yine. Yeleyi yikusatendekwa ligongo lyakuti twajigalile ulemwa kutyochela kwa nangolo jwetu jwandanda Adamu. (Alo. 5:12) Ŵandu ŵane ŵali mpela Paul soni Marco ŵatwakolasile ŵala, akusalaga kuti alilekasyeje papile mtima. Ŵandu ŵane yikusiyasawusya kuligosa pa yindu yakuganisya. Jemanjaji akusagamba ganichisya ya yindu yayikusiyatesyaga woga. Soni pana ŵandu ŵane ŵakusalepela kukana ŵane pakwakanganichisya kuti atende chikululu, kumwa mnope ukana kapena kamulichisya masengo mitela jakusokonasya mtwe.

Ŵandu ŵakusalepela kuligosa pa yindu yakuganisya soni yakusaka, mpaka ajonanje umi wawo. Nambo yili yakomboleka kuŵambala yeleyi. Ana yeleyi mpaka yikomboleche chamtuli? Mpaka yikomboleche mwakola ndamo ja kuligosa. Kuti tukombole kola ndamoji, kwende tukambilane yiwusyo yitatu yakuyichisyayi, (1) Ana kuligosa kukusagopolela chichi? (2) Ligongo chichi kuli kwakusosekwa kukola ndamoji? (3) Ana tukusosekwa kutenda wuli kuti tukole ‘ndamo jeleji jawukusakoposya msimu weswela’? (Aga. 5:22, 23) Kaneko chitulole yampaka atende jwalijose naga ndaŵi sine yikusatulema kukola ndamo ja kuligosa.

Mundu jwakuligosa jwangatendaga yindu mwangaganisya chenene. M’malo mwakwe, akusaŵambala kuŵecheta soni kutenda yindu m’litala lyangamsangalasya Mlungu.

Yesu jwapeleche chisyasyo chambone pangani ja kuligosa. Baibulo jikusati, “Pandaŵi jiŵamŵechetelaga ŵandu chipongwe, jwalakwejo nganawuchisya yachipongwe. Paŵajimukaga kuŵawe jwalakwejo nganiŵajogoya, mmalo mwakwe ŵapeleche yosope yene kwa Mlungu jwakusalamula mwakulungama.” (1 Pet. 2:23) Yesu jwalosisye ndamoji pandaŵi jele ŵandu ŵakusisya ŵamŵechetelaga yachipongwe paŵamkomele pa chitela chakulagachisya. (Mat. 27:39-44) Jwalakwe jwalosisyesoni ndamoji pandaŵi jele achimlongola ŵadini ŵamlingaga. (Mat. 22:15-22) Kusala yisyene, jwalakwe jwalosisye chisyasyo chambone pandaŵi jaŵamponyaga maganga Ayuda ŵane ŵakutumbila. Mmalo mwakuwuchisya yakusakalayi, “Yesu ŵajuŵile ni kutyoka m’nyumba ja Ambuje mula.”—Yoh. 8:57-59.

Ana mpaka tukombole kumsyasya Yesu? Elo mpaka tukombole. Ndumetume Petulo jwalembile kuti, “Klistu ŵayipikene yipwetesi ligongo lya jemanja, ni kumlechela chisyasyo kuti mkuyeje sajo syakwe.” (1 Pet. 2:21) Atamose kuti tuli ŵangali umlama, mpaka tukombole kumsyasya Yesu pangani ja kuligosa. Ligongo chichi kutenda yeleyi kuli kwakusosekwa?

Kuti tuŵe paunasi wambone ni Yehofa tukusosekwa kuŵa ŵakuligosa. Atamose kuti tumtumichile Yehofa mwakulupichika kwa yaka yejinji, unasi wetu ni jwalakwe mpaka umale naga tukulepela kuligosa pa yindu yatukusaŵecheta soni kutenda.

Aganichisye ya Mose, juŵaliji “mundu jwakulinandiya, kupunda mundu jwalijose pa chilambo chapasi” pandaŵijo. (Num. 12:3). Kwa yaka yejinji Mose jwaŵele jwakuligosa pandaŵi jele Aisalaeli waliji mkudandawula, nambo lisiku line Mose jwalepele kuligosa. Mose jwatumbile mnope pandaŵi jele Aisalaeli ŵadandawulaga ligongo lyakusoŵa kwa mesi. Jwalakwe jwaŵechete mwaukali kwa ŵanduwo kuti “Apikane jemanja ŵandu ŵakwimuchila! Ana uwe tutende kumkopochesya mesi mu lwalamu?”—Num. 20:2-11.

Mose jwalepele kuŵa jwakuligosa. Jwalakwe jwalepele kumchimbichisya Yehofa juŵapele mesi mwakusimonjesya. (Sal. 106:32, 33). Ligongo lya yeleyi, Yehofa nganamkunda kuti akajinjile m’chilambo chelaguchisye. (Num. 20:12) Mose jwadandawulaga kwa umi wakwe wosope ligongo lyakuti jwalepele kuŵa jwa kuligosa.—Det. 3:23-27.

Ana tukulijiganya chichi kutyochela kwa Mose? Atamose kuti tuŵele tuli kumtumichila Yehofa kwa yaka yejinji, ngatukusosekwa kuŵecheta mwachipongwe kwa ŵandu ŵanganatuŵechetela chenene. (Aef. 4:32; Akolo. 3:12) Patukukula, ndaŵi sine yikusaŵaga yakusawusya kuti tuŵe ŵakuligosa. Nambo tukumbuchileje yayamtendechele Mose. Ngatukusosekwa konanga ndamo jetu jambone jakuŵa ŵakulupichika kwa Yehofa ligongo lyakulepela kuŵa ŵakuligosa. Ana mpaka tutende uli kuti tukole ndamo jakusosekwaji?

Tuŵendeje msimu weswela. Ligongo chichi tukusosekwa kutenda yeleyi? Ligongo lyakuti kuligosa jili ndamo jawukusakoposya msimu weswela wa Mlungu, soni Yehofa akusapeleka msimuwu kwa ŵandu ŵakusamŵendaga jwalakwe. (Luk. 11:13) Pakamulichisya masengo msimu wakwe weswela, Yehofa mpaka atupe machili kuti tukombole kola ndamoji. (Afil. 4:13) Jwalakwesoni mpaka atukamuchisye kuti tukole ndamo sine syawukusakoposya msimu weswela mpela, chinonyelo, champaka chitukamuchisye kuti tuŵe ŵakuligosa.—1 Akoli. 13:5.

Tuŵambaleje yiliyose yampaka yitulepelekasye kuligosa. Mwachisyasyo, tuŵeje ŵakusamala ni malo ga pa Intaneti nambosoni yakusangalasya yayikusalimbikasya yakusakala. (Aef. 5:3, 4) Tukusosekwa kuŵambalasoni chilichose champaka chitutendekasye kutenda yakusakala. (Mis. 22:3; 1 Akoli. 6:12) Mwachisyasyo, mundu jwakusalinjidwa  mwachitema kutenda chikululu, akusosekwa kuŵambala kuŵalanga mabuku soni kulolela mafilimu gagakusalosya yakuŵagula.

Ndaŵi sine mpaka yiŵe yakusawusya kutenda yeleyi. Nambope naga tukulimbichila, Yehofa chachitupa machili gakutukamuchisya kuti tukomboleje kuligosa. (2 Pet. 1:5-8) Jwalakwe chachitukamuchisya kuti tukomboleje kulamulila nganisyo syetu, kaŵechete, soni yakutenda yetu. Yeleyi yili yakomboleka, ligongo ni yayamkamuchisye Paul soni Marco ŵatwakolasile kundanda kula kuti alilekasyeje ku yindu yachiwawa. Aganichisye ya chisyasyo cha m’bale jwine jwaŵaliji jwakwendesya galimoto. Jwalakwe jwaliji jwangawukamula mtima soni jwakanganaga ni ŵakwendesya magalimoto ŵane. Ana jwalakwe jwatesile wuli? Jwatite, “Napopelaga mwakutyochela pasi pamtima lisiku lililyose. Nalijiganyaga ngani syakwamba kuligosa soni najinjisyaga mumtwe Malemba gane ga m’Baibulo. Atamose kuti nalimbene nayo kwa yaka yejinji, lisiku lililyose ngusalikumbusyaga kuti mbe jwakuwusimana mtima. Soni naga ngwete yakutenda nanyakukaga mwachitema kuti ngajenda mwakupupuluma.”

Ndaŵi sine tukusalepelaga kuligosa. Payitendekwe yeleyi, mpaka tutendeje sooni kupopela kwa Yehofa. Nambo pandaŵi jeleji ni jatukusasosekwa kupopela mnope. Myoyo, payitendekwe yeleyi tukusosekwa kupopela mwachitema. Tumŵendeje kuti atukululuchile, soni kuti atukamuchisye nambosoni kuŵa ŵakusimichisya kuti ngasitutandilasoni. (Sal. 51:9-11) Tukaganisyaga kuti Yehofa nganaŵa ajanjile mapopelo getu. (Sal. 102:17) Ndumetume Yohane ŵatukumbwisye kuti miyasi ja Mwanache jwa Mlungu “jikusatuswejesya ni kututyochesya ulemwa wosope.” (1 Yoh. 1:7; 2:1; Sal. 86:5) Tukumbuchileje kuti Yehofa akusiŵasalila ŵandu ŵakusamtumichila jwalakwe kuti ŵakululuchile ŵane ndaŵi syosope. Myoyo, mpaka tuŵe ŵakusimichisya kuti jwalakwe mpaka atukuluchilesoni m’weji.—Mat. 18:21, 22; Akolo. 3:13.

Yehofa nganasangalala pandaŵi jele Mose ŵalepele kulosya ndamo jakuligosa paŵaliji m’chipululu. Nambope atamose yaliji myoyo, Yehofa ŵamkululuchile. Maloŵe ga Mlungu gakusasala kuti Mose jwaliji chisyasyo chambone pangani ja kukulupichika. (Det. 34:10; Aheb. 11:24-28) Yehofa nganamkunda Mose kuti akajinjile m’chilambo Chelaguchisye. Nambope Yehofa chachimkunda jwalakwe kuti akasimanikwe m’chilambo chasambano ni kumpa upile wakutama ni umi mpaka kalakala. M’wejisoni mpaka tusangalale ni chembecheyo chelechi naga tukulosya ndamo jakuligosa.—1 Akoli. 9:25.