Yakulochesya yayikolasile mu chatichi yikusala ya yindu yine yayatendekwe pandaŵi jakulandana. Yakutendekwa yosopeyi yikulosya kuti tukutama mu “ndaŵi jakumalisya.”—Dan. 12:4.

• Lilemba Chiw. 11:7; 12:13, 17; 13:1-8, 12

  Yakulochesya “Chilombo” chiŵele chili mkulamulila chilambo kwa yaka yejinji. M’masiku gakumalisya, mtwe wakwe wa 7 ŵawuwulesye. Kaneko mtwewu waposile soni ‘ŵandu wosope” ŵachikuyaga chilombochi. Satana jwakamulichisye masengo chilombochi pakutenda ngondo ni “ŵanache wosope ŵa jwamkongwe jula.”

  Kwanilichikwa Panyuma pa Chigumula, maboma ga ŵandu ŵele ŵalisoni achimmagongo ŵa Yehofa aŵele ali mkwalamulila ŵandu. Pali pamasile yaka yejinji, pandaŵi ja ngondo jandanda ja pachilambo chosope, Ulamusi wa Britain wanandipe machili. Ulamusiwu watandilesoni kola machili pawatesile mkamulano ni United States. M’masiku gakumalisya, Satana aŵele ali mkukamulichisya masengo maboma pakwalagasya ŵandu ŵa Mlungu.

• Lilemba Dan. 11:25-45

  Yakulochesya Kumenyana kwa pasikati pa mwenye jwa kumpoto ni jwa kummwela m’masiku gambesi.

  Kukwanilichikwa Chilambo cha Germany, chamenyene ni Britain ni America. Mu 1945 Soviet Union ni achimjakwe ŵaŵele mwenye jwa kumpoto. Mu 1991, ulamusi wa Soviet Union wamasile, soni pandaŵi jakwe, Russia ni achimjakwe ni ŵaŵaŵele mwenye jwa kumpoto.

• Malemba Yes. 61:1; Mala. 3:1; Luk. 4:18

  Yakulochesya Yehofa ŵatumisye “jwamtenga” kuti ‘akalinganye litala’ Uchimwene wa Umesiya mkanaŵe kuwutamilikasya. ‘Jwamtengaju’ jwatandite ‘kulalichila ngani syambone kwa ŵakulaga.’

  Kukwanilichikwa Kutandila cha m’ma 1870, M’bale Russell ni achimjakwe ŵatandite kulijiganya mnope Baibulo kuti amanyilile yisyesyene yakwe yajikusajiganya. Cha m’ma 1880, jemanjaji ŵatandite kuŵecheta mnope yakuti ŵakutumichila ŵa Mlungu akusosekwa kulalichila. Jemanjaji ŵakopwesye ngani syakola mitwe jakuti, “Pakusosekwa Ŵakulalichila 1,000” soni wakuti “Ŵasagulidwe Kuti Alalichileje.”

• Lilemba Mat. 13:24-30, 36-43

  Yakulochesya Mmagongo jwapandile namsongole mumgunda wa tiligu, mwamti jwakusile mpaka tiligu jula ngawoneka. Msyene mgundawo jwamlesile kuti akule mpaka pandaŵi jagowola. Kaneko namsongole jula ŵamlekangenye ni tiligu.

  Kukwanilichikwa Kutandila mu 1870, paliji kulekangana kwekulungwa pasikati pa Aklistu ŵasyesyene ni ŵawunami. M’masiku gakumalisya, Aklistu ŵasyesyene ŵasongangenye mumpingo soni ŵalekangenye ni Aklistu ŵawunami.

• Lilemba Dan. 2:31-33, 41-43

  Yakulochesya Sajo sya chisyano ni litaka syasili pa chiwanichisyo chakupanganyidwa ni yindu yakulekanganalekangana

  Kukwanilichikwa Litaka likwimila ŵandu wamba ŵakulamulidwa ni Britain ni America ŵangakusasangalala ni ulamusiwu. Ulamusiwu ukusalepela kutenda yindu mwakamulana ni machili gakwe ligongo lya ŵanduŵa.

• Lilemba Mat. 13:30; 24:14, 45; 28:19, 20

  Yakulochesya “Tiligu” ŵamsongangenye “mu ngokwe” soni “kapolo jwakulupichika ni jwalunda” ŵasagulidwe kuti aloleleje “ŵamasengo.” Ŵandu ŵatandite kulalichila ‘ngani syambone syakwamba Uchimwene pachilambo chosope chapasi.’

  Kukwanilichikwa Mu 1919 pasagulidwe kapolo jwakulupichika pasikati pa ŵandu ŵa Mlungu. Kutandila pandaŵijo, ŵakulijiganya Baibulo ŵatandite kulalichila mnope. Masiku agano, ŵa Mboni sya Yehofa akulalichila m’yilambo yakupunda 200 soni akusakoposya mabuku gakusala ya m’Baibulo m’yiŵecheto yakupunda 1,000.

• Malemba Dan. 12:11; Chiw. 13:11, 14, 15

  Yakulochesya Chilombo chakola misengo jiŵili chalongolele ŵandu kuti “apanganye ‘chiwanichisyo cha chilombo’ soni ‘chakundidwe kupepelela lipuje ku chiwanichisyochi.’

  Kukwanilichikwa Ulamusi wamachili wa Britain ni America watamilikasisye bungwe ja League of Nations. Yilambo yine yakamulene ni bungweji. Kaneko mu 1926 mpaka 1933, mwenye jwa kumpoto jwakamulene ni bungweji. Mpela mwakusatendela ni bungwe ja United Nations, ŵandu ŵakulupililaga kuti bungwe ja League of Nations jichiyikasya mtendele pachilambo chosope, yindu yele Uchimwene wa Mlungupe ni wampaka utende.

• Lilemba Dan. 8:23, 24

  Yakulochesya Mwenye jwakuwoneka mwakogoya “tachijonanga mwakogoya.”

  Kukwanilichikwa Ulamusi wa Britain ni America uwuleje ŵandu ŵajinji soni ujonasile yindu yejinji. Mwachisyasyo, pangondo jaŵili ja pachilambo chosope, United States jajonasile ni mabomba gakogoya mnope chilambo chine chachaŵenganaga ni Britain ni America. Pangali mabomba gagajonasile mnope munyumamo pakulandanya ni gelega.

• Malemba Dan. 11:31; Chiw. 17:3, 7-11

  Yakulochesya Chilombo “chechejewu” chakola misengo likumi chikukopoka kwisimbo soni chili mwenye jwa nambala 8. Buku ja Daniele jikusamkolanga mwenyeju kuti ali “chindu chakunyalaya chakuyikasya chonasiko.”

  Kukwanilichikwa Bungwe ja League of Nations jamasile pangondo jaŵili japachilambo chosope. Kaneko bungwe ja United Nations “jajinjile mmalo.” Mwakulandana ni bungwe ja League of Nations, nombe bungwe ja United Nations ŵandu akusajipaga ulemu wawukusasosekwa kupelechedwa kwa Uchimwene wa Mlungu. Bungwe ja United Nations jichijimuchila dini syaunami.

• Malemba 1 Ates. 5:3; Chiw. 17:16

  Yakulochesya Maboma gachitanda kuŵecheta kuti “tuli pamtendele ni pambone,” kaneko “chilombo” pampepe ni “misengo likumi” yichimjimuchila “jwamkongwe jwakulijesya” soni kumjonanga. Kumala kwa yeleyi, maboma gachijonanjidwa.

  Kukwanilichikwa Maboma gachiŵechetaga kuti gatamilikasisye mtendele pachilambo. Nambo kaneko maboma gosope gagali pasi pa bungwe ja United Nations gachijonanga dini syosope syaunami. Jeleji jichiŵa ndaŵi ja kutanda kwa yisawusyo yekulungwa. Yisawusyo yekulungwayi yichimala pandaŵi jele Yesu chachijonanga chilambo cha Satanachi pa Alamagedo.

• Malemba Esek. 38:11, 14-17; Mat. 24:31

  Yakulochesya Gogi chachajimuchila ŵandu ŵa Mlungu. Kaneko, malayika gachasonganganya “ŵasagulidwe.”

  Kukwanilichikwa Mwenye jwa kumpoto, pampepe ni maboma gosope chachajimuchila ŵandu ŵa Mlungu. Pakuchitanda kwimuchilaku, ŵasagulwe ŵakusigala chachasonganganya kwinani.

• Malemba Esek. 38:18-23; Dan. 2:34, 35, 44, 45; Chiw. 6:2; 16:14, 16; 17:14; 19:20

  Yakulochesya “Jwakwesile” pa “hachi jeswela” jwamalisisye masengo gakwe “gakupunda” mwakumjonanga Gogi pampepe ni likuga lyakwe lyangondo. “Chilombo” chila ‘ŵachiponyisye munyasa ja moto,’ soni liganga lyakasile chiwanichisyo chila.

  Kukwanilichikwa Yesu jwali jwakulamulila mu Uchimwene wa Mlungu, chachiyika kukwakulupusya ŵandu ŵa Mlungu. Pampepe ni ŵakulamulila achimjakwe ŵakwana 144,000 soni malayika gakwe, jwalakwe chachijonanga maboma gosope gagakusalagasya ŵandu ŵa Mlungu. Kweleko kuchiŵa kumala kwa chilambo cha Satanachi.