NGANI JAKULIJIGANYA 47
Akakunda Chilichose Kwalekanganya ni Yehofa
“Chikulupi changu chili mwa [Yehofa].”—SAL. 31:14.
NYIMBO NA. 122 Tuŵeje Ŵakulimbangana Soni Ŵangatenganyika
YACHITULIJIGANYE a
1. Ana tukumanyilila chamtuli kuti Yehofa akusasaka kuti tuŵe najo paunasi?
YEHOFA akutuŵenda kuti tuŵe najo paunasi. (Yak. 4:8) Jwalakwe akusaka kuti aŵe Mlungu jwetu, Atati ŵetu soni Mjetu. Jwalakwetu akusajanga mapopelo getu soni kutukamuchisya patukusimana ni yakusawusya. Kupitila mu gulu jakwe, jwalakwe akusatujiganya soni kutuchenjela. Nambo ana tukusosekwa kutenda chichi kuti tuŵe paunasi ni Yehofa?
2. Ana chichi champaka chitukamuchisye kuŵa paunasi ni Yehofa?
2 Mpaka tuŵe paunasi ni Yehofa patukupopela kwa jwalakwe, kuŵalanga Maloŵe gakwe, soni kuganichisya yatuŵalasileyo. Patukutenda yeleyi, yikusatukamuchisya kuti tumnonyeleje mnope jwalakwe soni kumyamichila. Nambosoni yikusatutendekasya kuti tumpikanileje soni kumpa uchimbichimbi wakusasosekwa kupochela. (Chiw. 4:11) Myoyo, patukummanyilila chenene Yehofa ni patukusamdalila mnope pampepe ni gulu jakwe jatupele kuti jitukamuchisyeje.
3. Ana Satana akusatenda wuli pakusaka kutulekanganya ni Yehofa? Ana chichi champaka chitukamuchisye kuti tukalekangana ni Mlungu jwetu soni gulu jakwe (Salimo 31:13, 14)
3 Satana akusasaka kutulekanganya ni Yehofa, mnopemnope patusimene ni yakusawusya. Ana Satana akusatenda chamtuli yeleyi? Jwalakwe akusatenda yakuti tutande kuleka mwapanandipanandi kumdalila Yehofa soni gulu jakwe. Nambope mpaka tulichenjele payindu yakusatenda jwalakweju. Naga chikulupi chetu chili chakulimbangana soni tukusamdalila mnope Yehofa, nganiyiŵa yikomboleche kumleka Mlungu jwetu soni gulu jakwe.—Aŵalanje Salimo 31:13, 14.
4. Ana chitukambilane chichi munganiji?
4 Munganiji, chitukambilane yakusawusya yakwana yitatu yanganiyiŵa yityochele mumpingo. Chakusawusya chilichose, mpaka chitutendekasye kuti tutande kuleka kumdalila Yehofa soni gulu jakwe. Ana yakusawusya yeleyi mpaka yitulekanganye chamtuli ni Yehofa? Soni ana mpaka tutende wuli kuti tukaleka kumdalila Yehofa soni gulu jakwe ligongo lya yindu yakusatenda Satana?
PATUKUSIMANA NI YAKUSAWUSYA
5. Ana yakusawusya mpaka yitutendekasye chamtuli kutanda kuleka kumkulupilila Yehofa ni gulu jakwe?
5 Ndaŵi sine tukusasimana ni yakusawusya. Yakusawusya yakwe yili mpela ŵamwiŵasa pakutusisya kapena kumala kwa masengo. Ana yakusawusya yeleyi mpaka yitulekanganye chamtuli ni Yehofa soni kuleka kujidalila gulu jakwe. Patukulimbana ni yakusawusya kwandaŵi jelewu, mpaka tulipikaneje kuti nganitukola chembecheyo soni mpaka tulagasicheje nganisyo. Pandaŵi mpela syelesi, Satana akusapatilapo upile wakututendekasya kukayichila yakuti Yehofa akusatunonyela. Mwamti jwalakwe akusasaka kuti tuganisyeje kuti Yehofa soni gulu jakwe ni ŵakutendekasya kuti tusimaneje ni yakusawusya. Yakulandana ni yeleyi, ni yayatendechelesoni Ayisalayeli ŵane paŵaliji ku Iguputo. Pandanda, jemanjaji ŵakulupililaga kuti Yehofa amsagwile Mose ni Aloni kuti ŵakulupusye ku ukapolo. (Eks. 4:29-31) Nambope, Falawo pajwatendekasisye kuti umi wa Ayisalayeli uŵe wakupweteka, jemanjaji ŵatandite kumdandawula Mose ni Aloni ligongo lya yakusawusya yaŵasimanaga nayoyo. Mwamti ŵatandite kuŵecheta kuti, ‘Jemanja . . . mtuŵengenye m’weji ni mwenye ni nduna syakwe, soni jemanja ni ŵimwapele machili gakuti atuwulaje m’weji.’ (Eks. 5:19-21) Pelepatu Ayisalayeli ŵatandite kwajimba magambo ŵakutumichila ŵa Mlungu ŵakulupichika. Ayitu yaliji yakutesya chanasa. Naga wawojo aŵele ali mkupilila yakusawusya kwandaŵi jelewu, ana chichi champaka chakamuchisye kupitilisya kumkulupilila Yehofa soni gulu jakwe?
6. Ana tukulijiganya chichi kutyochela kwa Habakuku pakwamba yatukusosekwa kutenda patukusimana ni yakusawusya? (Habakuku 3:17-19)
6 Amsalileje Yehofa yosope yayili mumtima mwawo kupitila mwipopelo, soni amjembecheyeje jwalakwe kuti ŵakamuchisye. Jwakulochesya Habakuku, jwasimene ni yakusawusya yejinji. Yikuwoneka kuti pandaŵi jine Habakuku jwatandite kukayichila yakuti Yehofa akusasamala ya jwalakwe. Myoyo, jwapopesile kwa Yehofa ni kumsalila yosope yayaliji mumtima mwakwe. Jwalakwe jwatite, “AMBUJE ana chimbe ndili mkwaŵenda chikamuchisyo kwandaŵi jajilewu uli, wawojo mkinatukulupusye uwe ku yiwawa?” (Hab. 1:2, 3) Yehofa jwapikanile lipopelo lyakutyochela pasi pamtima lya jwakutumichila jwakwe jwakulupichikaju. (Hab. 2:2, 3) Kaneko Habakuku pajwaganichisye yaŵatesile Yehofa pakwakulupusya ŵandu ŵane munyuma, jwatandilesoni kusangalala. Jwalakwe jwaliji jwakusimichisya kuti Yehofa akusamganichisya soni kuti chamkamuchisye pa yakusawusya yakusimana nayo. (Aŵalanje Habakuku 3:17-19.) Ana tukulijiganya chichi pelepa? Patusimene ni yakusawusya, tupopeleje kwa Yehofa ni kumsalila mwatukupikanila mumtima. Kaneko, tumjembecheyeje jwalakwe kuti atukamuchisye. Naga tukutenda yeleyi, nikuti tuchiŵa ŵakusimichisya kuti Yehofa chatupe machili gakutukamuchisya kupilila yakusawusyayo. Nambosoni patutandite kuyiwona kuti jwalakwe akutukamuchisya, chikulupi chetu ni pachichiŵa chakulimba mnope.
7. Ana jwachibale jwa Mlongo Shirley jwasakaga kuti mlongoju ayiwoneje yindu mwamtuli? Ana chichi chichamkamuchisye mlongoju kupitilisya kumkulupilila Yehofa?
7 Akaleka kutenda yindu yakwayana ni kumtumichila Yehofa. Pambali jeleji, aganichisye yayamkamuchisye Mlongo Shirley pandaŵi jiŵasimene ni yakusawusya. b Mlongoju akusatama ku Papua New Guinea. Liŵasa lyaŵapagwile mlongoju lyaliji lyakulaga, mwamti ndaŵi sine ŵalagaga kuti apate yakulya. Pandaŵiji, jwachibale jwakwe jwine jwatandite kumtendekasya jwalakwe kuti aleche kumdalila Yehofa. Jwachibalejo jwatite, “Mkusaŵechetaga kuti msimu weswela wa Mlungu ukusamkamuchisyaga nambi pelepa msimuwo ni ukumkamuchisya yapi? Pakuŵa liŵasa lyenu ligamba kulagape. Nambosonitu mgamba kwasa ndaŵi ni masengo gakulalichila.” Yili yitendekwe yeleyi mlongo jula jwatite, “Naliwusisye kuti, ‘Ana Mlungu akusamala ya uweji kapena ngakutukosya?’ Kaneko ndaŵi jijojo napopesile kwa Yehofa ni kumsalila jwalakwe yosope yayajendaga munganisyo mwangu. Napitilisye kuŵalanga Baibulo soni kulijiganya mabuku getu. Nambosoni napitilisye kulalichila soni kusimanikwa pamisongano.” Panyuma pakwe, mlongoju jwatandite kuyiwona kuti Yehofa akusalisamalila liŵasa lyakwe. Liŵasa lyakweli nganiligoneje ni sala nambosoni lyaliji lyakusangalala. Mlongoju jwasasilesoni kuti, “Nayiweni kuti Yehofa ŵaliji mkwanga mapopelo gangu.” (1 Tim. 6:6-8) Myoyo, naga tukupitilisya kutenda yindu yakwayana ni kumtumichila Yehofa ngasitukunda kuti kukayichila kapena yakusawusya yitulekanganye ni Yehofa.
ABALE ŴAKWETE UDINDO MU GULUJI PAKULAGASIDWA
8. Ana ndaŵi sine mpaka chatendechele chichi abale ŵakusalongolela mu gulu ja Yehofaji?
8 Kupitila mmanyusi pepala soni mma intaneti, achimmagongo ŵetu akusawandisya ngani syaunami syakwamba abale ŵakusalongolela m’gulu ja Yehofaji. (Sal. 31:13) Abale ŵane aŵele ali mkutaŵidwa soni kulamulidwa magambo gawo kuti ali ŵakulemwa. Nambosonitu Aklistu ŵa m’yaka 100 yandanda ŵasimanaga ni yakusawusya mpela yeleyi pandaŵi jele ndumetume Paulo ŵamjimbaga magambo soni kumtaŵa atamose yili mkuti nganalemwa. Ana Aklistu ŵapandaŵijo ŵatesile uli payatendekwaga yeleyi?
9. Ana Aklistu ŵane ŵatesile uli pandaŵi jine Paulo ali mundende?
9 Aklistu ŵane ŵa m’yaka 100 yandanda, ŵalesile kumkamuchisya Paulo paŵaliji mundende ku Loma. (2 Tim. 1:8, 15) Ligongo chichi ŵatesile yeleyi? Ana tujile kuti ŵatendaga sooni ligongo lyakuti ŵandu ŵamwonaga Paulo mpela jwakulemwa? (2 Tim. 2:8, 9) Ana kapena ŵatendaga woga, paganisya kuti mwine jemanjajosoni mpaka alagasidwe? Chinga magongo gakwe galiji gamtuli, nambo aganichisye muŵapikanilaga mumtima Paulojo. Jwalakwetu ŵaliji ali mkupilila yakusawusya yejinji soni kuŵika umi wakwe pangosi ligongo lya jemanjajo. (Mase. 20:18-21; 2 Akoli. 1:8) Kusala yisyene, ngatukusosekwa kuŵa mpela ŵandu ŵaŵamlesile Paulo mmalo mwakumkamuchisya. Sano ana tukusosekwa kumbuchilaga chichi abale ŵakwete udindo mu guluji pakulagasidwa?
10. Ana tukusosekwa kumbuchila chichi abale ŵakwete udindo mu guluji pakulagasidwa? Ligongo chichi tukusosekwa kukumbuchila yeleyi?
10 Akumbuchileje chachikutendekasya kuti tulagasidweje soni jwakutandikasya yeleyo. Pa lilemba lya 2 Timoteyo 3:12 pakusati, “Ŵakulijiganya wosope ŵa Yesu ŵakusachilila kutama ni umi wakulipeleka kwa Mlungu nombe nawo chachilagasidwa.” Ligongo lya yeleyi ngatukusosekwa kusimonga Satana pakulimbichila kuti ŵagwisye ŵandu ŵakwete udindo mu guluji. Jwalakwetu akusatenda yeleyi ni chakulinga chakuti tuleche kuŵa ŵakulupichika soni kuti tutendeje woga.—1 Pet. 5:8.
Atamose kuti Paulo ŵamtaŵile ni maunyolo, Onesifolo mwakulimba mtima ŵamkamuchisye jwalakwe. Masiku aganosoni, abale ni alongo akusiŵakamuchisyaga Aklistu achimjawo ŵali mundende mpela mwayikuwonechela pelepa (Alole ndime 11-12)
11. Ana tukulijiganya chichi pa yaŵatesile Onesifolo? (2 Timoteyo 1:16-18)
11 Akaleka kwakamuchisya abale ŵawo soni ŵapikanileje. (Aŵalanje 2 Timoteyo 1:16-18.) Mklistu jwine jwa mu yaka 100 yandanda lina lyakwe Onesifolo jwatesile yindu mwakulekangana ni ŵandu ŵane pandaŵi jele Paulo ŵaŵichidwe mundende. Jwalakwe “nganatenda sooni ligongo lya maunyolo ga [Paulo].” Mmalomwakwe Onesifolo ŵamsosilesosile Paulo, mwamti paŵampatile, jwaganichisye yindu yampaka atende kuti amkamuchisye Paulojo. Kuti yeleyi yikomboleche, Onesifolo ŵaŵisile umi wakwe pangosi. Ana tukulijiganya chichi pelepa? Tukakundaga kuti kumjogopa mundu kutulepelekasyeje kwakamuchisya abale ŵetu ŵakulagasidwa. Mmalomwakwe kwende twakamuchisyeje jemanjaji mwampaka tukombolele. (Mis. 17:17) Abale ŵetuŵatu akusasaka kuti twanonyeleje soni kwakamuchisya.
12. Ana yakusatenda abale ni alongo ŵa ku Russia yikutujiganya chichi?
12 Aganichisye yaŵele mkutenda abale ni alongo ŵa ku Russia pakwakamuchisya ŵakulupilila achimjawo ŵaŵichidwe mundende. Achalongo achimjawo ŵane pakwimbidwa magambo, abale ni alongo ŵajinji akusayika ku koti kukwakamuchisya jemanjajo. Ana yeleyi yikutujiganya chichi? Abale ŵakwete udindo mu guluji pakwaŵechetela yindu yaunami, kwataŵa, soni kwalagasyaga m’wejo ngatukusosekwa kutenda woga. Mmalomwakwe twapopeleleje jemanjaji soni kwasamalila ŵandu ŵamwiŵasa mwawo. Nambosoni mpaka tuganichisye yindu yine yampaka tutende pakwakamuchisya abalewo.—Mase. 12:5; 2 Akoli. 1:10, 11.
ŴANDU PAKUTUNYOSYA
13. Ana ŵane pakutunyosya mpaka yitendekasye chamtuli kuti tuleche kumkulupilila Yehofa soni gulu jakwe?
13 Ŵachibale ŵanganaŵa ŵamboni, achimjetu ŵa kusukulu kapena ŵa kumasengo, mpaka atunyosyeje ligongo lya masengo getu gakulalichila. Mwinesoni mpaka atunyosyeje ligongo lyakuti tukusakuya ndamo syambone sya Yehofa. (1 Pet. 4:4) Jemanjaji mpaka aŵecheteje kuti, “Mmwejo ni ngusamnonyela, nambo gamba kuti dini jenu jikusayikandapasya yindu soni jili jachikala.” Ŵandu ŵane mpaka atunyosyejesoni ligongo lya mwatukusatendela yindu ni ŵandu ŵatyosyedwe mumpingo. Jemanjaji mpaka atuwusyeje kuti, “Ana pelepa mwasyene ni mkusalitenda kuti mkusimwanonyela ŵandu?” Kaŵechete kelekatu mpaka katutendekasye kutanda ganisya kuti malamusi ga Yehofa gali gangasa. Mwamti mpaka tutande kuliwusya kuti, ‘Ana Yehofa akusasaka kuti nguyeje yosopeyi? Ana gulu jakweji jili jakutupiya mnope malamusi?’ Naga akusimana ni chakusawusya mpela chelechi, ana mpaka atende wuli kuti aŵepe ŵakulupichika kwa Yehofa soni ku gulu jakwe?
Yobu jwakanile kukulupilila yindu yaunami yaŵaŵechetaga ŵandu ŵaŵalilosyaga mpela achimjakwe ŵelesoni ŵamnyosisye jwalakwe, mmalomwakwe jwalakwe jwaliji jwakusimichisya kuŵape jwakulupichika kwa Yehofa (Alole ndime 14)
14. Ana tukusosekwa kutenda chichi ŵandu ŵane pakutunyosya ligongo lyakuti tukukuya malamusi ga Mlungu? (Salimo 119:50-52)
14 Akaleka kukuya malamusi ga Yehofa. Yobu ali mundu jwele nganaleka kukuya malamusi ga Yehofa atamose kuti ŵandu ŵamnyosyaga ligongo lyakutenda yeleyo. Jumo mwa ŵandu ŵaŵalilosyaga kuti ali achimjakwe ŵa Yobu ŵamsalile Yobujo kuti Mlungu ngakusakola nayo masengo yakuti Yobujo akutenda yambone kapena iyayi. (Yob. 4:17, 18; 22:3) Nambope Yobu nganakulupilila unami welewu. Jwalakwe jwamanyililaga kuti malamusi ga Yehofa gakusala yindu yambone kapena yakusakala galiji gakamuchisya. Mwamti jwalakwe jwaliji jwakusimichisya kukuya malamusigo. Yobu nganakunda kuti ŵandu ŵane amtendekasye kuleka kuŵa jwakulupichika. (Yob. 27:5, 6) Ana tukulijiganya chichi pelepa? Tukakundaga kuti kutunyosya kwa ŵandu kututendekasyeje kukayichila malamusi ga Yehofa. Aganichisye ya yindu yine yasimene nayo paumi wawo. Ana pakulola yindu yeleyo ngakusakulupililaga kuti malamusi ga Yehofa gali gambone soni kuti gakusigakamuchisyaga wawojo? Myoyo, akaleka kujikamuchisya gulu jajikulimbikasya malamusi gambonega. Kutenda yeleyi kuchakamuchisya kuti akaleka kumtumichila Yehofa atamose ŵandu ali mkwanyosya chamtuli.—Aŵalanje Salimo 119:50-52.
15. Ligongo chichi Mlongo Brizit ŵanyosyedwaga?
15 Aganichisye chisyasyo cha Mlongo Brizit, jwakusatama ku India. Ŵachibale ŵakwe ŵamnyosyaga ligongo lya chikulupi chakwe. Ali agambile kubatisidwa mu 1997, ŵamkwakwe mlongoju ŵelesoni nganaŵa ŵamboni masengo gamalile. Myoyo jwamlumejo jwalinganyisye yakuti asame yalumo ni liŵasa lyakwe lyosope kuti akatameje ni achinangolo ŵakwe. Achinangolo ŵakwewo ŵatamaga mu msinda wine m’chilambo chichocho. Nambo yeleyi yagambile konjechesya yakusawusya yajwasimanaga nayo mlongo jula. Pakuŵa ŵamkwakwewo nganaŵa pamasengo, mlongoju jwasosekwaga kukamula masengo ndaŵi syosope kuti alikamuchisyeje liŵasa lyakwe. Nambosoni mpingo wawaŵandichile waliji palutando lwa makilomita 350. Chakutesya chanasa chaliji chakuti liŵasa lya kuchilumeko lyamsisyaga mlongoju ligongo lya chikulupi chakwe. Mlongoju ŵamsisyaga mnope, mwamti liŵasali lyalinganyisye yakusamasoni. Kaneko mwangajembecheya, ŵamkwakwe mlongoju ŵajasiche. Panyuma pakwe nombe mwanache jwakwe jwamkongwe jwawile ni ulwele wa kansa ali ni yaka 12. Yeleyitu yagambile konjechesyasoni yakusawusya ya mlongoju ligongo ŵachibale ŵakwe ŵaŵechetaga kuti jwalakwejo ni jwatendekasisye yakusawusya yosopeyi. Jemanjaji ŵamsalilaga mlongoju kuti akaŵe kuti nganaŵa jwa Mboni sya Yehofa, yosopeyo ngamkaniyitendekwa. Atamose kuti yaliji myoyo, mlongoju jwapitilisyepe kumkulupilila Yehofa ni gulu jakwe.
16. Ana mlongo Brizit jwapatile upile wamtuli ligongo lyakuŵa jwakulupichika kwa Yehofa soni ku gulu jakwe?
16 Ligongo lyakuti Mlongo Brizit ŵatamaga kwakutalikangana mnope ni mpingo, jwakulolela dela jwamsalile jwalakwe kuti alalichileje mu dela jakutama pejo. Jwamsalilesoni kuti misongano atendeleje kumangwakwe peko. Pandanda, mlongoju jwayiwonaga kuti yeleyi yaliji yakusawusya. Nambope jwapikanile yajwamsalile m’balejo. Jwalakwe jwalalichilaga ŵane ngani syambone, kutenda misongano ku nyumba jakwe, soni kupata ndaŵi jakutendela kulambila kwa peŵasa yimpepe ni ŵanache ŵakwe ŵachakongwe. Ana yeleyi yakwete yakuyichisya yamtuli? Mlongoju jwakombwele kutandisya majiganyo ga Baibulo gejinji. Kupwatika pelepa, ŵakulijiganya Baibulo ŵakwe ŵajinji ŵabatisidwe. Mu 2005 jwalakwe jwatandite upayiniya wakutamilichika. Apano ŵanache ŵakwe ŵachakongwe akumtumichila Yehofa mwakulupichika, soni mudela jakusatamaga mlongoju mwana mipingo jiŵili. Mlongoju ali jwakusimichisya kuti Yehofa jwampele machili kuti akombole kupilila yakusawusya soni kunyosyedwa ni ŵandu ŵa mwiŵasa mwakwe.
AŴEPE ŴAKULUPICHIKA KWA YEHOFA SONI KU GULU JAKWE
17. Ana tukusosekwa kuŵa ŵakusimichisya kutenda chichi?
17 Satana akusasaka kututendekasya kuganisya kuti Yehofa mpaka atuleche pandaŵi jatukusimana ni yakusawusya. Jwalakwe akusasakasoni kuti tuganisyeje kuti kujikamuchisya gulu ja Yehofa mpaka kututendekasye kuti tusimane ni yakusawusya. Satana akusasakasoni kuti tutendeje woga abale ŵakwete udindo mu guluji pakuŵecheteledwa yindu yaunami, kwalagasya soni kwaŵika mundende. Jwalakwe akusakamulichisyasoni masengo ŵandu kuti atunyosyeje ni chakulinga chakuti tuleche kugakulupilila malamusi ga Yehofa soni gulu jakwe. Nambope tukumanyilila yosope yakusatenda Satana, mwamti nganaŵa atuloŵesye. (2 Akoli. 2:11) Myoyo, kwende tuŵe ŵakusimichisya kugakana mabosa ga Satana soni kupitilisya kuŵa ŵakulupichika kwa Yehofa ni gulu jakwe. Tukumbuchileje kuti Yehofa nganaŵa atulesile. (Sal. 28:7) Myoyo tukakunda kuti chilichose chitulekanganye ni Yehofa.—Alo. 8:35-39.
18. Ana tuchikambilana chichi mungani jakuyichisya?
18 Munganiji, tukambilene yakusawusya yampaka tusimane nayo, yele nganiyiŵa yityochele mu mpingo. Nambopetu yili yakomboleka kuleka kumkulupilila Yehofa soni gulu jakwe patusimene ni yakusawusya yakutyochela mu mpingo pemo. Ana mpaka tumalane chamtuli ni yakusawusya yeleyi? Mungani jakuyichisya, tuchikambilana mbali jeleji.
NYIMBO NA. 118 “Atupe Chikulupi Chejinji”
a Kuti tupitilisye kupilila mwakulupichika m’masiku gambesiga, tumdalileje Yehofa soni gulu jakwe. Satana akusakamulichisya masengo yakulingwa pakusaka kuti tukamdalilaga Yehofa soni gulu jakwe. Munganiji chitukambilane yindu yitatu yakusatenda Satana soni yampaka tutende kuti tuŵepe ŵakulupichika kwa Yehofa soni ku gulu jakwe.
b Mena gane munganiji gachenjile.