1. Ana tujembecheyeje chichi? Ana ngatukusosekwa kayichila ya chichi?

 TUJEMBECHEYEJE kuti ŵandu ŵane mpaka atusisyeje patukulalichila. Kombolekasoni kuti msogolomu ni pachachitusisya mnope. (Dan. 11:44; 2 Tim. 3:12; Chiw. 16:21) Nambope, ngatukukayichila kuti Yehofa chachitukamuchisya. Ligongo chichi tukuŵecheta myoyo? Ligongo ndaŵi syosope Yehofa aŵele ali mkwakamuchisya ŵakutumichila ŵakwe kukwanilisya utumiki wawo. Jwalakwe atesile yeleyi atamose payikuwoneka kuti yili yakusawusya. Kuti tupikanichisye yeleyi, kwende tukambilane yindu yine yayatendekwe paumi wa jwakulochesya Esekiele. Jwalakwe ŵalalichilaga Ayuda ŵaŵaliji ku ukapolo ku Babulo.

2. Ana Yehofa jwasasile kuti ŵandu ŵaŵalalichilaga Esekiele ŵaliji ŵamtuli? Ana munganiji chitukambilane chichi? (Esekiele 2:3-6)

² Ana ŵandu ŵaŵalalichilaga Esekiele ŵaliji ŵamtuli? Yehofa jwasasile kuti jemanjaji ŵaliji “ŵangapikanila,” “ŵakumula mitima,” soni “ŵakwimuchila.” Jemanjaji ŵaliji mpela miŵa soni yiŵalaŵala yakogoya. Niligongo lyakwetu Yehofa ŵamsalile Esekiele mwakuwilisyawilisya kuti, “Mkasimwajogopa.” (Aŵalanje Esekiele 2:3-6.) Esekiele jwakwanisye masengo gakwe gakulalichila ligongo lyakuti (1) jwatumidwe ni Yehofa, (2) msimu wa Mlungu wamkamuchisyaga, soni (3) maloŵe ga Mlungu gamkamuchisyaga kola chikulupi chakulimba. Ana yindu yitatu yeleyi yamkamuchisye wuli Esekiele? Nambi mpaka yitukamuchisye chamtuli uweji masiku agano?

3. Ana maloŵe gapi gagamlimbikasisye Esekiele? Ana Yehofa ŵamsimichisye chamtuli kuti chamkamuchisye?

³ Yehofa ŵamsalile Esekiele kuti, “Ngumtuma m’mwejo.” (Esek. 2:3, 4) Maloŵega gamlimbikasisye Esekiele. Ligongo chichi tukuŵecheta myoyo? Ligongo komboleka kuti Esekiele jwakumbuchile kuti Yehofa jwaŵechete kwa Mose soni Yesaya maloŵe gakulandana  ni gelega paŵasagulaga jemanjaji kuti aŵe ŵakulochesya ŵakwe. (Eks. 3:10; Yes. 6:8) Esekiele jwamanyililagasoni yaŵatesile Yehofa pakwakamuchisya ŵakulochesya ŵaŵiliŵa kumalana ni yakusawusya yaŵasimanaga nayo. Myoyo Yehofa paŵamsalile kaŵili Esekiele kuti “ngumtuma,” jwalakwe jwakwete magongo gambone gakukulupilila kuti Yehofa chamkamuchisye. Nambosoni, m’buku ja Esekiele, maloŵe gakuti, “AMBUJE ŵaŵechete ni une,” gakusasimanikwa kejinji. (Esek. 3:16, 6:1) Mwangakayichila, Esekiele jwamanyilile kuti jwatumidwe ni Yehofa. Konjechesya pelepa, babagwe ŵa Esekiele ŵaliji ŵakutaga mbopesi. Komboleka kuti babagweŵa ŵamjiganyisye Esekiele kuti ndaŵi syosope Yehofa akusiŵakamuchisya ŵakulochesya ŵakwe. Mwachisyasyo, Yehofa ŵamsalile Isaki, Yakobo, soni Yelemiya, kuti, “Une ndili namwe.”—Gen. 26:24; 28:15; Yel. 1:8.

4. Ana ni maloŵe gapi gagamkamuchisye Esekiele?

⁴ Ana Aisalaeli ŵajinji ŵawupochele chamtuli utenga waŵalalichilaga Esekiele? Yehofa jwatite, “Atamose jumo jwa ŵandu ŵa Aisalaeli ngasasaka kuti ampikanile, jemanjajo ngasambikanila atamose une.” (Esek. 3:7) Kukana kumpikanila Esekiele, kwagopolelaga kuti ŵanduŵa akukanasoni kumpikanila Yehofa. Maloŵega gamsimichisye Esekiele kuti kukana kwa ŵanduŵa nganikugopolelaga kuti julepele masengo gakwe gakulochesya. Yehofa ŵamsimichisyesoni Esekiele kuti utenga waŵalalichilagawo pawuchikwanilichikwa “ŵandu tachimanyilila kuti jwakulochesya ayiche pasikati pawo.” (Esek. 2:5; 33:33) Mwangakayichila maloŵega gamkamuchisye Esekiele kuti akwanilisye utumiki wakwe.

5. Mwakamulana ni Yesaya 44:8, ana ligongo chichi tukusalimba mtima?

⁵ Uwejisoni masiku agano tukusalimba mtima ligongo tukusamanyilila kuti Yehofa ni jwatutumile kuti tukalalichile. Jwalakwe akusatuchimbichisya mwakutukolanga kuti tuli “mboni”  syakwe. (Yes. 43:10) Kusala yisyene welewu uli upile wekulungwa. Mpela muŵaŵechetele Yehofa kwa Esekiele kuti “mkasimwajogopa,” jwalakwe akutusalilasoni uweji kuti, “Mkajogopa.” Ligongo chichi ngatukusosekwa kwajogopa ŵandu ŵakutusisya? Mwakulandana ni Esekiele, uwejisoni Yehofa ni jwatutumile soni jwalakwe ali ku mbali jetu.—Aŵalanje Yesaya 44:8.

6. (a) Ana Yehofa akutusimichisya chamtuli kuti chatukamuchisyeje? (b) Ana chichi chachikusatulimbikasya soni kutupa machili?

⁶ Yehofa akutusimichisya kuti chatukamuchisyeje. Mwachisyasyo, jwalakwe mkanaŵechete maloŵe gakuti, “Mli mboni syangu,” jwatite, “Patimchijombokaga nyasa, tinjiŵa namwe, patimchijomboka sulo, ngasimjigalwa nasyo. Pitimchipitaga pamoto ngisimpya, malamba gakwe ngasigamjocha.” (Yes. 43:2) Patukukamula masengo gakulalichila, ndaŵi sine tukusasimana ni yakusawusya yayili mpela mesi gakusewuchila soni yakulingwa yayili mpela moto. Atamose yili myoyo, Yehofa akusatukamuchisya kuti tupitilisye kulalichila. (Yes. 41:13) Mpela muyaŵelele mundaŵi ja Esekiele, masiku aganosoni ŵandu akusakana utenga wetu. Nambo yeleyi yangatendekwaga ligongo lyakuti ngatukulalichila chenene. Kumanyilila kuti Yehofa akusasangalala ligongo lyakuti tukupitilisya kulalichila mwakulupichika utengawu, kukusatulimbikasya soni kutupa machili. Ndumetume Paulo jwatite, “Mundu jwalijose chachipochela malipilo mwakamulana ni masengo gakwe.” (1 Akoli. 3:8; 4:1, 2) Mlongo jwine juŵatesile upayiniya kwa ndaŵi jelewu jwatite, “Ngusasangalala kumanyilila kuti Yehofa akusatupa mbote ligongo lyakulimbichila kwetu masengo gakulalichila.”

7. Ana Esekiele jwapikene wuli panyuma pakuganichisya mesomkulola gaŵagaweni? (Alole chiwulili cha pachikuto.)

⁷ Esekiele jwayiweni yawatite pakumkamuchisya msimu wa Mlungu. Yaŵayiweni Esekiele mmesomkulola, yamkamuchisye jwalakwe kumanyilila kuti msimu weswela wagakamuchisye malayika gamachili soni mawilo ga ligeleta lyekulungwa kuti gajawuleje kulikose. (Esek. 1:20, 21) Ana Esekiele jwatesile chichi? Pakusala yayatendekweyo, jwalakwe jwalembile kuti, “Panayiweni yeleyi naligwisisye, ngope jangu jakwayiye pasi.” Yeleyi yamsimonjesye mnope niligongo lyakwe jwalakwe jwaligwisisye pasi. (Esek. 1:28) Esekiele jwaganichisyaga mnope ya mesomkulola gakusimonjesyaga. Yeleyi yamkamuchisye kukulupilila kuti msimu wa Mlungu mpaka umkamuchisye kukwanilisya utumiki wakwe.

8-9. (a) Ana Esekiele chamtendechele chichi Yehofa paŵamlamwile kuti ajimuche? (b) Ana Yehofa ŵamkamuchisyesoni chamtuli Esekiele paŵalalichilaga mudela jakusawusya?

⁸ Yehofa jwamlamwile Esekiele kuti, “M’mwe mwanache jwa mundu, mjimuche ngusaka mbechete ni m’mwejo.” Maloŵega pampepe ni msimu wa Mlungu yampele Esekiele machili gajwasosechelaga kuti akombole kwimuka. Esekiele jwalembile kuti, “Msimu wa Mlungu wajinjile mwa une ni kunjimusya.” (Esek. 2:1, 2) Pa utumiki wakwe wosope, Esekiele jwalongoleledwaga ni “ligasa” lya Mlungu, lyalikwimila msimu wa Mlungu. (Esek. 3:22; 8:1; 33:22; 37:1; 40:1) Msimu wa Mlungu wamkamuchisye Esekiele kuti akamule masengo gaŵapochele. Masengoga galiji gakwalalichila ŵandu ŵa mudela jakwe ŵaŵaliji “ŵakusawusya” soni “ŵangapikanila.” (Esek. 3:7) Yehofa ŵamsalile Esekiele kuti, “Chinamtendesye kuŵa ŵangapikana ni ŵakusawusya mpela jemanjajo. Tinjimtenda kuŵa ŵakulimbangana mpela lwala, lwakulimba mpela liganga lya dayamondi; nambo mkatenda nawo woga.” (Esek. 3:8, 9) Pelepa, yaliji mpela Yehofa akumsalila Esekiele kuti, ‘Mkakunda kuti ŵandu ŵakusakalaŵa amtengusye. Une chinamkamuchisye.’

⁹ Panyuma pa yeleyi, msimu wa Mlungu wapitilisye kumkamuchisya Esekiele pa masengo gakwe gakulalichila. Esekiele jwalembile kuti, “Ligasa lya AMBUJE lyayiche kwa une mwamachili.”  Jwalakwe yamjigalile wiki jimo kuti alijiganye soni kupikanichisya utengawo ni chakulinga chakuti akalalichileje mwangakayichila. (Esek. 3:14, 15) Kaneko Yehofa ŵamsalile kuti ajawule ku chiŵata kwele “msimu wa Mlungu wajinjile mwa [jwalakwe].” (Esek. 3:23, 24) Myoyo Esekiele jwaliji jwakoseka kuti atande utumiki wakwe.

10. Ana tukusasosekwa chikamuchisyo chamtuli kuti tukwanisye masengo getu gakulalichila, soni ligongo chichi?

¹⁰ Ana tukusasosekwa chikamuchisyo chamtuli kuti tukwanilisye masengo gakulalichila? Kuti tujanje chiwusyochi, kwende tuganichisye yayamtendechele Esekiele. Jwalakwe mkanatande masengo gakwe gakulalichila, msimu wa Mlungu wampele machili gajwasosechelaga. Mpela muyaŵelele ni Esekiele, masiku aganosoni msimu wa Mlungu mpaka utukamuchisye kuti tukwanisye masengo getu gakulalichila. Ligongo chichi tukuŵecheta myoyo? Ligongo Satana akulimbana ni uweji ni chakulinga chakuti atulepelekasye masengo getu gakulalichila. (Chiw. 12:17) Ŵandu ŵajinji akusayiwona kuti Satana ali jwamachili mnope mwamti nganituŵa tulimbene najo. Nambo patukukamula masengo gakulalichila tukusaŵa kuti tukumgomeka jwalakwejo. (Chiw. 12:9-11) Ana tukusatenda yeleyi mwamtuli? Patukulalichila, tukusalosya kuti ngatukutenda woga ni yitendo ya Satana. Ndaŵi syosope patukulalichila, tukusaŵa kuti tukumgomeka Satana. Sano, ana chichi chachikutusimichisya kuti mpaka tupitilisyepe kukamula masengo gakulalichila atamose adani ŵetu ali mkutusisya? Tuyiweni kuti msimu weswela wa Mlungu ni wawukusatukamuchisya soni Yehofa ali ku mbali jetu.—Mat. 5:10-12; 1 Pet. 4:14.

11. Ana msimu weswela uchitenda chichi kwetuwe? Ana mpaka tutende chichi kuti msimu weswela upitilisye kutukamuchisya?

¹¹ Ana tukulijiganyasoni chichi patukuganichisya yaŵatesile Yehofa pakumkamuchisya Esekiele kuti akwanilisye masengo gakulalichila? Msimu weswela mpaka utupe machili gatukusosechela kuti tumalane ni yakusawusya yatukusasimana nayo patukulalichila. (2 Akoli. 4:7-9) Sano, ana mpaka tutende wuli kuti msimu wa Mlungu  upitilisyeje kutukamuchisya? Tukusosekwa kupopela ndaŵi syosope, soni kuŵa ŵakusimichisya kuti Yehofa chapikane mapopelo getu. Yesu ŵajiganyisye ŵakulijiganya ŵakwe kuti, “Mpitilisye kuŵenda ni chachimpa, . . . mpitilisye kusosasosa ni chimchipata, . . . mpitilisye kugogoda.” Ngatukukayichila kuti Yehofa pakwanga “chachipeleka msimu weswela, kwa wosope ŵakumŵenda.”—Luk. 11:9, 13; Mase. 1:14; 2:4.

12. Mwakamulana ni Esekiele 2:9–3:3, ana mpukutu watyochele kwapi? Ana mu mpukutumo mwaliji utenga wamtuli?

¹² Msimu weswela wamkamuchisye Esekiele kulalichila mwakulimba mtima. Nambo ngaŵa yeleyipe. Maloŵe ga Mlungu gamkamuchisyesoni Esekiele kola chikulupi chakulimba. Mmesomkulola, jwaliweni ligasa lili lijigele mpukutu. (Aŵalanje Esekiele 2:9–3:3.) Ana mpukutuwu watyochele kwapi? Soni mu mpukutumo mwaliji mwana chichi? Ana mpukutuwu wamkamuchisye chamtuli Esekiele? Kwende tulole. Mpukutuwu watyochele ku chitengu cha uchimwene wa Mlungu. Yehofa, jwakamulichisye masengo lilayika limo mwa malayika mcheche gaŵagaweni Esekiele kundanda kula kuti likampe mpukutuwu. (Esek. 1:8; 10:7, 20) Mu mpukutumo mwaliji maloŵe gakutyochela kwa Mlungu. Maloŵega galiji utenga wakwelusya uŵasosekwaga Esekiele kuti awulalichile kwa ŵandu ŵakwimuchila ŵiŵaliji ku ukapolo. (Esek. 2:7) Sonitu utengawu walembedwe mbali syosope sya mpukutuwo.

13. Ana Yehofa ŵamsalile Esekiele kuti atende nawo wuli mpukutu waŵampele? Ligongo chichi mpukutuwu waliji wakulyolyopela?

¹³ Yehofa ŵamsalile jwakulochesya jwakweju kuti alye mpukutuwo mpaka ‘kwikuta.’ Esekiele jwapikanile mwamti jwalile mpukutuwo mpaka kumalisya. Ana mesomkulolaga gagopolelaga chichi? Esekiele jwasosekwaga kupikanichisya chenene utenga uŵasosekwaga kuti akalalichile. Jwalakwe jwasosekwaga kuti awukulupilile utengawu, ni chakulinga chakuti akalalichile mwangakayichila. Nambo kaneko patendekwe chindu chine chakusimonjesya. Esekiele jwamanyilile kuti mpukutuwo “walyolyopelaga mpela uchi.” (Esek. 3:3) Yaliji myoyo ligongo lyakuti kwa Esekiele, kumjimila Yehofa kwaliji kwakulyolyopela, kapena kuti kwakusangalasya. (Sal. 19:8-11) Jwalakwe jwaliji jwakusangalala ligongo lyakuti Yehofa ŵamsagwile kuti atumichileje mpela jwakulochesya jwakwe.

14. Ana chichi chachamkamuchisye Esekiele kuŵa jwakoseka kutanda utumiki wakwe?

¹⁴ Kaneko Yehofa ŵamsalile Esekiele kuti, “Mpikanichisye ni kuyikumbuchila yosope yingumsalilayi.” (Esek. 3:10) Malangisoga, gagopolelaga kuti Yehofa ŵasakaga kuti Esekiele asunje maloŵe gagalembedwe mu mpukutuwu soni kugaganichisyaga mwakusokoka. Esekiele paŵatesile yeleyi chikulupi chakwe chalimbile mnope. Nambosoni, yamkamuchisye kuti alalichileje mwamachili utengawu. (Esek. 3:11) Esekiele paŵagambile kupikanichisya chenene utengawu soni kuwukulupilila, jwaliji jwakoseka kutanda kulalichila mpaka pambesi pa utumiki wakwe.—Alole Salimo 19:14.

15. Ana tukusosekwa “kupikanichisya” chichi, kuti tukombole kupilila?

¹⁵ Kuti tukombole kupilila patukukamula masengo gakulalichila, m’wejisoni tukusosekwa kunda maloŵe ga Mlungu kuti galimbisye chikulupi chetu. Tukusosekwasoni “kupikanichisya” yosope yakutusalila Yehofa. Masiku agano Yehofa akusaŵecheta ni uweji kupitila m’Baibulo. Ana mpaka tutende wuli kuti Maloŵe ga Mlungu gapitilisyejepe kutukamuchisya pakaganisye ketu, soni katende ketu ka yindu?

16. Ana tukusosekwa kutenda chichi ni Maloŵe ga Mlungu? Ana mpaka tutende yamtuli kuti tugapikanichisyeje?

¹⁶ Patulile chakulya ni kugayika chenene, chilu  chetu chikusaŵa chakulimba. Mwakulandana ni yeleyi, patukulijiganya Maloŵe ga Mlungu soni kugaganichisya mwakusokoka, yikusatukamuchisya kola chikulupi chakulimba. Mwamti yeleyi ni yakusasaka Yehofa kuti tutendeje. Jwalakwe akusasaka kuti tulye soni ‘kwikuta’ Maloŵe gakwe. Yayikugopolela kuti, tukusosekwa kugapikanichisya chenene. Yeleyi mpaka yikomboleche patukupopela, kuŵalanga, soni kuganichisya mwakusokoka maloŵe gakwe. Mkanitutande kuŵalanga maloŵe ga Mlungu, chandanda tukusapopela kuti tuwukosechelesye mtima wetu. Chaŵili, tukusaŵalanga Baibulo. Soni chatatu, tukusajima kaje ni chakulinga chakuti tuganichisye mwakusokoka yatuŵalasileyo. Ana yakuyichisya yakwe yikusaŵa yamtuli? Patukuganichisya mnope Maloŵe ga Mlungu, yikusatukamuchisya kugapikanichisya soni kola chikulupi chakulimba.

17. Ligongo chichi kuganichisya yatuŵalasile m’Baibulo kuli kwakusosekwa?

¹⁷ Ligongo chichi kuŵalanga Baibulo soni kuganichisya mwakusokoka kuli kwakusosekwa? Kuli kwakusosekwa ligongo kukusatupa machili apano gakutukamuchisya kulalichila utenga wa Uchimwene. Kombolekasoni kuti kuchitukamuchisya kusogolo patuchilalichilaga utenga wakwelusya. Nambosoni patukuganichisya ndamo syambone sya Yehofa unasi wetu ni jwalakwe uchiŵa wakulimba. Yakuyichisya yakwe, tuchisangalala ni yindu yakulyolyopela kapena kuti yakusangalasya, yayili mtendele wa mumtima soni kuŵa ŵakwikutila.—Sal. 119:103.

18. Ana ŵandu ŵatukusalalichilaga chachimanyilila chichi, soni ligongo chichi?

¹⁸ Esekiele jwaliji jwakulochesya, nambo uweji nganituŵa ŵakulochesya. Nambope tukusaŵa ŵakusachilila kulalichila utenga wa Yehofa wawukusimanikwa m’Maloŵe gakwe mpaka pandaŵi jichachiyiwona jwalakwejo kuti utengawu ukwanile. Pajichikwana ndaŵi jakwelusya, ŵandu ŵatukusalalichilaga ngasakola magongo gakuŵecheta kuti nganitwasalila maloŵe ga Mlungu. (Esek. 3:19; 18:23) Mmalomwakwe, jemanjaji chachimanyilila kuti utenga watwalalichilaga waliji wakutyochela kwa Mlungu.

19. Ana chichi champaka chitukamuchisye kukwanilisya utumiki wetu?

¹⁹ Ana chichi champaka chitukamuchisye kukwanilisya utumiki wetu? Yindu yitatu yayamkamuchisye Esekiele yila, mpaka yitukamuchisye uwejisoni. Tukusapitilisya kukamula masengo gakulalichila ligongo lyakuti tukusamanyilila kuti Yehofa ni jwatutumile, msimu weswela ukusatukamuchisya, soni ligongo lyakuti Maloŵe ga Mlungu gakusatukamuchisya kola chikulupi chakulimba. Ligongo lyakuti Yehofa akusatukamuchisya, tuli ŵakoseka kuti tukamule masengo gakulalichila soni kupilila “mpaka pambesi.”—Mat. 24:13.