NGANI JAKULIJIGANYA 46
Yakusatenda Yehofa Pakutukamuchisya Kuti Tupilileje Mwakusangalala
“AMBUJE akusosa nditu kuti amsalalile mtima. Ali chile kuti amtendele chanasa.”—YES. 30:18.
NYIMBO NA. 3 Machili Getu Soni Chembecheyo Chetu
YACHITULIJIGANYE a
1-2. (a) Ana chitukambilane yiwusyo yapi? (b) Ana chichi chachikulosya kuti Yehofa ali jwakusachilila kutukamuchisya?
YEHOFA mpaka atukamuchisye kumalana ni yakusawusya yatukusimana nayo ni chakulinga chakuti tumtumichileje mwakusangalala. Ana jwalakwe akusatenda mwamtuli yeleyi? Ana mpaka tupindule chamtuli ni chikamuchisyo chakusapeleka Yehofa? Munganiji chitupate kwanga kwa yiwusyo yeleyi. Nambope mkanitukambilane yiwusyoyi, kwende kaje tulole chiwusyo achi: Ana Yehofa ali jwakusachilila kutukamuchisya?
2 Maloŵe gaŵakamulichisye masengo ndumetume Paulo m’chikalata chakwe chakwawula kwa Ahebeli mpaka gatukamuchisye kupata kwanga kwakwe. Paulo jwalembile kuti, “Yehofa ali jwakungamuchisya, ngasindenda woga. Ana mundu mpaka andende chichi?” (Aheb. 13:6) Buku jine jakulondesya Baibulo jatite kuti, maloŵe gakuti “jwakungamuchisya” gakugasala palilembali gakusagopolela mundu jwakuwutuka kuti akamkamuchisye mundu jwine jwakusosechela chikamuchisyo. Aganichisye Yehofa ali kumwutuchila mundu jwakulagasika nganisyo kuti akamkamuchisye. Mpaka aŵe ŵakusimichisya kuti Yehofa ali jwakusachilila kutukamuchisya. Yehofa pakutukamuchisya, mpaka tukombole kupilila mwakusangalala yakusawusya yetu.
3. Ana Yehofa akusatukamuchisya mmatala gatatu gapi kuti tupilile yakusawusya mwakusangalala?
3 Ana Yehofa akusatukamuchisya mmatala gane gapi kuti tupilile yakusawusya mwakusangalala? Kuti tupate kwanga kwakwe kwende tuŵalanje buku ja Yesaya. Ligongo chichi tukusosekwa kuŵalanga bukuji? Ligongo yakulochesya yejinji yiŵasasile Yehofa kuti alembe Yesaya, yikukamula masengo masiku agano kwa ŵakutumichila ŵa Mlungu. Nambosonitu Yesaya ŵamlondesisye Yehofa mulitala lyangasawusya kupikanichisya. Mu chaputala 30 cha buku ja Yesaya mwana yine mwa yisyasyo yeleyi. Mu chaputalachi, Yesaya jwasasile yisyasyo yambone ya mwakusatendela Yehofa pakwakamuchisya ŵandu ŵakwe. Jwalakwe jwalembile kuti Yehofa akusatukamuchisya mmatala gatatu aga: (1) akusapikanila chenene soni kwanga mapopelo getu, (2) akusatulongolela mwakutupa malangiso soni (3) akusatupa yindu yambone apano soni yine chachitupa msogolo. Sambano kwende tukambilane ya matala gatatu gelega.
YEHOFA AKUSATUPIKANILA
4. (a) Ana Yehofa akwalondesya Ayuda kuti ŵaliji ŵamtuli mundaŵi ja Yesaya? Ana kaneko ŵakundile kuti chatendechele chichi? (b) Ana Yehofa ŵapeleche chembecheyo chamtuli kwa Ayuda ŵaŵaliji ŵakulupichika? (Yesaya 30:18, 19)
4 Buku ja Yesaya chaputala 30 jikutanda ni maloŵe gele Yehofa akwalondesya Ayuda kuŵa ‘ŵanache ŵakwimuchila’ wele ‘ŵakusapelenganya kumlemwechesya.’ Jwalakwe jwapitilisye kuti, ‘Ŵeleŵa ali ŵandu ŵakwimuchila, . . . ŵakana kupikanila majiganyo’ gangu. (Yes. 30:1, 9) Ligongo lyakuti ŵanduŵa ŵakanile kupikanila, Yehofa ŵamsalile Yesaya kuti jemanjaji chachisimana ni yakusawusya. (Yes. 30:5, 17; Yel. 25:8-11) Mwamti yeleyi ni yayatendekwe, jemanjaji ŵajigalidwe ku ukapolo ku Babulo. Nambope papali Ayuda ŵane ŵakulupichika, mwamti Yesaya jwakwete utenga ŵakupeleka chembecheyo kwa jemanjaji. Jwalakwe jwasalile kuti lisiku line Yehofa chachakamuchisya jemanjaji kuti awujile kumangwawo. (Aŵalanje Yesaya 30:18, 19.) Sonitu yeleyi ni yayatendekwe. Atamose kuti papite yaka yejinji Yehofa mkanaŵe kwagopola jemanjaji ku ukapoloku, nambope Yehofa ŵakopwesye jemanjaji. Maloŵe gakuti “AMBUJE akusosa nditu kuti amsalalile mtima” gakulosya kuti ndaŵi sine Yehofa mpaka akunde kuti papite ndaŵi mkanamkulupusye jwakutumichila jwakwe jwakulupichika. Yeleyi ni yayatendechele Ayisalayeli. Jemanjaji ŵatemi yaka 70 ali ku ukapolo ku Babulo mkaniŵakunde kuwujila ku Yelusalemu. (Yes. 10:21; Yel. 29:10) Ŵanduŵa paŵagambile kuwujila kumangwawo, misosi jiŵakwete jasandwiche chisangalalo.
5. Ana lilemba lya Yesaya 30:19 likutusimichisya ya chichi?
5 Masiku aganosoni maloŵe gakuti, “Mlungu tachimsalalila mtima pitachipikana kulila kwenu” mpaka gatulimbikasye. (Yes. 30:19) Yesaya ŵatusimichisye kuti Yehofa chachipikanila kulila kwetu soni chachijanga mwachitema mapopelo getu. Jwajonjechesye kuti, “Pitachipikanapo, papopo tachimjanga.” Maloŵe gelega gakutusimichisya kuti Yehofa ali jwakusachilila kwakamuchisya ŵandu ŵakuŵenda chikamuchisyo. Kumanyilila yeleyi kukusatukamuchisya kupilila yakusawusya yetu mwakusangalala.
6. Ana maloŵe ga Yesaya gakusalosya chamtuli kuti Yehofa akusapikana mapopelo ga jwakutumichila jwakwe jwalijose?
6 Ana yindu yine yapi yatukulijiganya mu lilembali yakwayana ni mapopelo getu? Yehofa akusapikanila mwakusamala lipopelo lya jwakutumichila jwakwe jwalijose. Ligongo chichi tukuŵecheta myoyo? Mu chiŵecheto chandanda maloŵe gakuti “amsalalile” gagakusimanikwa kundanda kwa chaputala 30 cha buku ja Yesaya, gakwimila ŵandu ŵajinji. Nambope maloŵe gakuti “tachimsalalila” gagakusimanikwa pa ndime 19 gakusala ya mundu jwalijose pajikapajika. Yesaya jwalembile kuti “ngisimlilasoni. Mlungu tachimsalalila mtima soni . . . tachimjanga.” Ligongo lyakuti Yehofa akusiŵanonyela ŵanache ŵakwe, jwalakwe jwangasalila ŵanachewo maloŵe gangalimbikasya mpela gakuti,“Mkusosekwa kuŵa ŵakulimba mpela achimwene ŵenu kapena chemwali ŵenu.” Mmalomwakwe jwalakwe akusatusamalila jwalijose pajikapajika soni akusatenda chidwi ni mapopelo getu.—Sal. 116:1; Yes. 57:15.
Ana Yesaya jwagopolelaga chichi paŵatite kuti, ‘Mkaleka kumkumbusya [Yehofa]’? (Alole ndime 7)
7. Ana Yesaya soni Yesu ŵagombelechesye chamtuli kusosekwa kwa kupitilisya kupopela?
7 Patukupopela kwa Mlungu ni kumsalila yindu yayitusawisye, Yehofa akusatupa machili kuti tukombole kupilila yakusawusyayo. Naga yakusawusya yetu ngayikumala mpela mwatwajembecheyaga tukusosekwa kumŵenda mwakuwilisyawilisya kuti atupe machili gakutukamuchisya kupilila. Jwalakwe akutuŵenda kutenda yeleyi. Sonitu yeleyi yikukamulana ni maloŵe ga Yesaya gakuti, ‘Mkaleka kumkumbusya [Yehofa].’ (Yes. 62:7) Ana yeleyi yikugopolela chichi? Yikugopolela kuti tukusosekwa kupitilisya kupopela kwa Yehofa yayili mpela kumkumbusya. Maloŵe ga Yesayaga gakutukumbusya yaŵasasile Yesu yakwamba lipopelo yayikusimanikwa pa Luka 11:8-10, 13. Pelepa Yesu akutulimbikasya kupopela ‘mwakulimbichila mnope’ soni “kupitilisya kuŵenda” msimu weswela. Mpaka tumŵendesoni Yehofa kuti atulongolele kuti tusagule yindu mwakuŵajilwa.
YEHOFA AKUSATULONGOLELA
8. Ana maloŵe ga pa Yesaya 30:20, 21 gakwanilichikwe chamtuli mundaŵi ja Ayisalayeli?
8 Aŵalanje Yesaya 30:20, 21. Yakusawusya yaŵasimanaga nayo ŵandu ŵa ku Yelusalemu pandaŵi jele Asilikali ŵa ku Babulo ŵasyungulile msinda wa Yelusalemu kwa chaka ni hafu, yayiche pakuyisyoŵelela mpela mwayikusaŵela yakulya soni mesi. Nambope mwakamulana ni ndime 20 ni 21, Yehofa ŵasimichisye Ayuda kuti naga akuleka ndamo syawo syakusakala, jwalakwe chachakulupusya. Yesaya akusala kuti Yehofa ali ‘jwakwiganya’ jwamkulungwa jwele juchachajiganya ŵandu kuti amlambileje mwakuŵajilwa. Maloŵega gakwanilichikwe pandaŵi jele Ayuda ŵagopoledwe ku ukapolo. Yehofa jwalosisye kuti jwaliji jwakwiganya jwawo jwamkulungwa. Mwakulongoleledwa ni chikamuchisyo chakwe, ŵandu ŵakwe ŵakombwele kuwuchisya kulambila kusyesyene. Uli upile wekulungwa kuti Yehofa ali jwakwiganya jwetu jwamkulungwa masiku agano.
9. Ana masiku agano tukusapochela malangiso gakutyochela kwa Yehofa mmatala gapi?
9 Mundime syelesi, Yesaya akusala kuti Yehofa akutujiganya kupitila mmatala gaŵili. Yesaya jwasasile ya litala lyandanda kuti jwakwiganya jwenu jwamkulungwa ‘timchimwona, ngasalisisa.’ Maloŵega gakulosya kuti jwakwiganya ajimi kusogolo kwa ŵakulijiganya. Tukwete upile ligongo lyakuti masiku agano tukwiganyidwa ni Mlungu. Ana Yehofa akutujiganya chamtuli? Jwalakwe akutenda yeleyi kupitila mu gulu jakwe. Kusala yisyene tukusayamichila malangiso gatukusapochela kutyochela mu gulu ja Yehofa. Tukusapochela malangiso kupitila m’misongano ja mpingo, m’misongano jekulungwakulungwa, m’mabuku gatukusapochela, m’mapologalamu ga broadcasting soni mmatala gane. Yindu yeleyi yikusatukamuchisya kupilila yakusawusya yetu mwakusangalala.
10. Ana tukusagapikana chamtuli “maloŵe kunyuma [kwetu]”?
10 Yesaya jwasasilesoni litala lyaŵili lyakusakamulichisya masengo Yehofa pakutujiganya. Jwalakwe jwatite, “Timchipikana maloŵe kunyuma kwenu.” Yesaya pelepa akusala kuti Yehofa ali mpela jwakwiganya jwakwenda munyuma mwa ŵakulijiganya ŵakwe ni chakulinga chakuti ŵalongoleleje kwakusosekwa kwawula. Masiku agano tukusapikana maloŵe ga Mlungu kunyuma kwetu. Ana yeleyi yikusatendekwa chamtuli? Baibulo jalembedwe kalakala mnope. Yeleyitu yikugopolela kuti uweji mkanitupagwe. Myoyo patukuŵalanga Baibulo tukusaŵa mpela tukugapikana maloŵe ga Mlungu kutyochela kunyuma kwetu.—Yes. 51:4.
11. Kuti tupilile mwakusangalala ana tukusosekwa kutenda yindu yapi soni ligongo chichi?
11 Ana mpaka tupindule chamtuli ni malangiso gakusatupa Yehofa kupitila m’Baibulo soni mu gulu jakwe? Tuyiweni kuti Yesaya asasile yindu yiŵili. Chandanda “litala ni ali.” Chaŵili “mjende mwelemu.” (Yes. 30:21) Nganikuŵa kwakwanila kwamba kumanyililape “litala.” Nambo tukusasosekwasoni ‘kwenda mwelemo.’ Yehofa akusatujiganya pakamulichisya masengo Baibulo soni gulu jakwe kuti tutendeje yakusasaka jwalakwe. Tukusalijiganyasoni mwampaka tukamulichisye masengo yatukulijiganyayo paumi wetu. Kuti tupilileje mwakusangalala patukumtumichila Yehofa, tukusosekwa kukuya matala gosopega. Naga tukulijiganya soni kukamulichisya masengo yatukulijiganyayo mpaka tuŵe ŵakusimichisya kuti Yehofa chachitupa yindu yambone.
YEHOFA AKUSATUPA YINDU YAMBONE
12. Mwakamulana ni Yesaya 30:23-26, ana Yehofa ŵapele upile ŵamtuli ŵandu ŵakwe?
12 Aŵalanje Yesaya 30:23-26. Ana yakulochesyayi yakwanilichikwe chamtuli Ayuda paŵagopoledwe ku ukapolo ku Babulo ni kuwujila kumangwawo? Yehofa ŵapele jemanjaji yindu yejinji yayakamuchisye kuti atameje ni umi wambone soni kuti apitilisye kumtumichila jwalakwe. Nambo chakusosekwa mnope chaliji chakuti Yehofa ŵapele jemanjaji chilichose chakwakamuchisya kuŵa paunasi ŵambone ni jwalakwe soni kuti amlambileje mulitala lyakuŵajilwa. Yehofatu ŵapele jemanjaji yindu yejinji yambone yakuti chitandilile nganiŵapeje. Ndime 26, jikulosya kuti Yehofa ŵapele lilanguka jemanjaji mwakwakamuchisya kugapikanichisya Maloŵe gakwe. (Yes. 60:2) Yindu yambone yaŵapele jemanjaji yakamuchisye kuti amtumichileje Yehofa mwakusangalala soni ŵapitilisye kuŵa ŵakulimba “ligongo lyakola mtendele mumtima.”—Yes. 65:14, NWT.
13. Ana yakulochesya yakwamba kuwuchisya kulambila kweswela yikukwanilichikwa chamtuli masiku agano?
13 Ana yakulochesya yakwamba kuwuchisya kulambila kweswela yikutukwayasoni masiku agano? Elo. Nambo ana yikutukwaya chamtuli? Kutandila mu 1919 C.E., ŵandu ŵajinji agopweche ku ukapolo wa Babulo jwamkulungwa, wawuli uchimwene wa pachilambo chosope wa dini jaunami. Jemanjaji alongoleledwe ku malo gambone mnope kupunda chilambo chaŵapochele Ayisalayeli. Ŵandu ŵeleŵa alongoleledwe ku paladaiso jwausimu. (Yes. 51:3; 66:8) Ana paladaiso jwausimuju ni chichi?
14. Ana paladaiso jwausimu ni chichi? Ana ŵani ŵakusimanikwa mpaladaisoju masiku agano? (Alole Ngopolelo ja Maloŵega.)
14 Kutandila mu 1919 C.E., ŵasagulwe aŵele mkusangalala ni paladaiso jwausimu. b Mkupita kwandaŵi ŵandu ŵakwete chembecheyo chakutama pachilambo chapasi ŵali ŵangondolo sine atamilichiche mu paladaisoju, soni aŵele ali mkusangalala ni yindu yejinji yambone yakwapa Yehofa.—Yoh. 10:16; Yes. 25:6; 65:13.
15. Ana paladaiso jwausimu ali kwapi?
15 Ana masiku agano paladaiso jwausimu ali kwapi? Ŵakutumichila ŵa Yehofa mpaka asimanikwe pachilambo chosope. Myoyo paladaiso jwausimu jukusimanikwasoni pachilambo chosope. Mwangasamala kandu ni kwatukutama, mpaka tusimanikwe mu paladaiso jwausimuju naga tukupitilisya kukamuchisya kulambila kusyesyene.
Ana m’weji pajika mpaka tujonjechesye chamtuli kusalala kwa paladaiso jwausimu? (Alole ndime 16-17)
16. Ana mpaka tutende chichi kuti tupitilisye kumwona paladaiso jwausimu kuŵa jwakusalala?
16 Kuti tupitilisye kuŵa mu paladaiso jwausimu tukusosekwa tutendeje nawo yindu yine mumpingo soni tuyamichileje ubale wetu wa Chiklistu watukwete pachilambo chosope. Ana mpaka tutende chamtuli yeleyi? Mpaka tutende yeleyi mwakulola yambone mwa abale ni alongo ŵetu ngaŵaga yakulepela yawo. (Yoh. 17:20, 21) Ligongo chichi yili yakusosekwa kutenda yeleyi? Tuwanichisye kuti tuli mungalango ni tukusangalala kuyiwona yitela yejinji yakusalala. Mwakulandana ni yeleyi, mu paladaiso jwausimu jwakusimanikwa m’mipingo masiku agano, mwana abale ni alongo ŵajinji ŵali mpela yitela yakusalala mungalango. (Yes. 44:4; 61:3) Myoyo tukusosekwa kupitilisya kulola yambone yakusatenda abale ni alongo ngaŵaga yakulemwecheka yawo. Tukakundaga kuti ungali umlama wetu kapena wa abale ni alongo usokonasyeje mkamulano wetu wa pachilambo chosope wawukusimanikwa mumpingo wa Chiklistu.
17. Ana m’weji pajika mpaka tutende chichi pakulimbikasya mkamulano?
17 Ana m’weji pajika mpaka tulimbikasye chamtuli mkamulano welewu? Tukusosekwa tuŵeje ŵakutamilikasya mtendele. (Mat. 5:9; Alo. 12:18) Ndaŵi jilijose patukutenda yindu yakulimbikasya mtendele pasikati pa abale ni alongo mumpingo tukusaŵa tuli mkonjechesya kusalala kwa paladaiso jwausimu. Tukumbuchileje kuti Yehofa ni jwamwutile mundu jwalijose jwali mu paladaiso jwausimu kuti amlambileje mwakuŵajilwa. (Yoh. 6:44) Kusala yisyene Yehofa akusasangalala pakutuwona tuli mkutenda yampaka tukombole pakulimbikasya mtendele soni mkamulano pasikati pa ŵakutumichila ŵakwe—Yes. 26:3; Hag. 2:7.
18. Ana tukusosekwa tuganichisyeje mnope ya chichi soni ligongo chichi?
18 Ana mpaka tupindule chamtuli ni yindu yambone yakupeleka Yehofa kwa ŵakutumichila ŵakwe? Tukusosekwa tuganichisyeje mnope yatukulijiganya m’Maloŵe ga Mlungu soni yatukulijiganya kutyochela m’mabuku getu. Kulijiganyaku soni kuganichisya kuchitukamuchisya kukola ndamo sya Chiklistu syele sichitukamuchisya kuti ‘twanonyeleje yisyesyene achalongo achimjetu’ mumpingo. (Alo. 12:10) Patukuganichisya yindu yambone yatupele Yehofa apano, ni patukusaŵa paunasi wakulimba ni jwalakwe. Nambosoni patukuganichisya yindu yambone yatusunjile Yehofa kusogoloku, yikusatukamuchisya kuŵa ŵakusachilila kupitilisya kumtumichila jwalakwe mpaka kalakala. Nambosoni yosopeyi yikusatukamuchisya kuti apano tumtumichileje Yehofa mwakusangalala.
TUŴEJE ŴAKUPILILA
19. (a) Mwakamulana ni Yesaya 30:18, Ana ngatukusosekwa kukayichila ya chichi? (b) Ana chichi champaka chitukamuchisye kupilila mwakusangalala?
19 Yehofa “ali chile” kumbali jetu kuti chatukamuchisye pachachijonangaga chilambo chakusakalachi. (Yes. 30:18) Ngatukukayichila kuti Yehofa ali “Mlungu jwa chilungamo.” Jwalakwe ngasakunda kuti chilambo cha Satanachi chitame mpaka kalakala. (Yes. 25:9) Tukwembecheya mwakuwusimana mtima ndaŵi jele Yehofa chachitukulupusya. Nambo pandaŵi ajino, tukusosekwa kupitilisya kukamulichisya masengo upile wakupopela, wakulijiganya soni kukamulichisya masengo yatukulijiganyayo. Nambosoni tukusosekwa kuganichisya yindu yambone yakututendela Yehofa. Patukutenda yeleyi, Yehofa chachitukamuchisya kuti tupilileje mwakusangalala patukumtumichila jwalakwe.
NYIMBO NA. 142 Tulimbisyeje Chembecheyo Chetu
a Mungani ajino chitukambilane yindu yitatu yakusakamulichisya masengo Yehofa pakwakamuchisya ŵakutumichila ŵakwe kupilila yakusawusya mwakusangalala. Chitulole yeleyi patukukambilana buku ja Yesaya chaputala 30. Patukukambilana chaputalachi, chitulole kusosekwa kwa kupopela kwa Yehofa, kulijiganya Maloŵe gakwe soni kuganichisya yakututendela Yehofa apano soni yachachitutendela kusogoloku.
b NGOPOLELO JA MALOŴEGA: “Paladaiso jwausimu” Jili yatukusatenda pakumlambila Yehofa mwakamulana. Mu paladaisoju Yehofa atujiganyisye yiliyose yatukusosekwa kuyimanyilila kuti tumtumichileje mwangasokonasidwa ni yijiganyo ya dini syaunami. Nambosoni tukwete masengo gejinji gakulalichila ngani syambone syakwamba Uchimwene wa Mlungu. Tukusasangalala kuŵa paunasi wakulimba ni Yehofa, kutama mwamtendele ni abale ni alongo ŵetu ŵatukusanonyela soni ŵakusatukamuchisya kupilila yakusawusya yetu mwakusangalala. Tukusajinjila mu paladaisoju patutandite kumlambila Yehofa mwakuŵajilwa soni patukutenda yampaka tukombole kuti tumsyasyeje jwalakwe.
