W100115
Ligongo Chichi Akusosekwa Kulipeleka kwa Yehofa?
“Chilo chipitechi lilayika lya Mlungu lyayichilile une jundili jwakwe jwa Mlungu.”—MASE. 27:23.
1. Ana ŵandu ŵakwawula kubatisidwa akusaŵa kuti atesile kala yindu yapi? Ana yeleyi yikusatendekasya kuti papagwe yiwusyo yapi?
CHIMO mwa yiwusyo yiŵili yakusawusidwa ŵandu ŵakwawula kukubatisidwa chili chakuti, “Ana alesile yakulemwa yawo, alipeleche asyene kwa Yehofa soni kwitichisya litala lyakwe lyakutukulupusya kupitila mwa Yesu Klistu?” Ligongo chichi Mklistu akusasosekwa kulipeleka msyene kwa Yehofa? Ana kulipeleka kwa Yehofa mpaka kutukamuchisye chamtuli? Naga tukusaka kumtumichila Yehofa, ligongo chichi tukusosekwa kulipeleka kaje kwa jwalakwe? Kuti tupate kwanga kwa yiwusyoyi, chandanda tukusosekwa kumanyilila kaje yayikusagopolela mundu palipeleche kwa Yehofa.
2. Ana kulipeleka kwa Yehofa kukusagopolela chichi?
2 Ana kulipeleka kwa Mlungu kukusagopolela chichi? Alole yiŵasasile ndumetume Paulo pakwamba ya unasi wakwe ni Mlungu. Pandaŵi jiŵajendaga ulendo wakogoya Paulo ŵamkolasile Yehofa kuti “une ndili jwakwe jwa Mlungu.” (Aŵalanje Masengo 27:22-24.) Aklistu wosope ŵakuwona ali ŵakwe ŵa Yehofa. Nambo mwakulekangana ni yeleyi, chilambo chosope chili “mmyala mwa jwakusakala jula.” (1 Yoh. 5:19) Aklistu akusaŵa ŵa Yehofa palipeleche kwa jwalakwe mwipopelo. Mundu akusalipeleka kwa Yehofa mwakusaka kwakwe soni palipeleche akusabatisidwa.
3. Ana ubatiso wa Yesu walosisye chichi? Ana ŵakumkuya ŵa Yesu mpaka ajigalile chamtuli chisyasyo chakwe?
3 Yesu jwatupele chisyasyo chambone, jwalakwe jwasagwile kutenda yakusasaka Mlungu. Yesu jwaliji ali alipeleche kala, yili myoyo ligongo lyakuti jwapagwile mu mtundu wa Aisalaeli wawaliji welipeleche kala kwa Mlungu. Nambi ligongo chichi jwalakwe jwabatisidwe? Maloŵe ga Mlungu gakusalosya kuti jwalakwe jwaŵechete kuti, “Ndili apano kuti nayitende yakusasaka ŵalakwe Mlungu.” (Aheb. 10:7; Luk. 3:21) Myoyo Yesu jwabatisidwe pakusaka kulosya kuti ali jwakusachilila kutenda yakusasaka Atati ŵakwe. Ŵakumkuya ŵakwe akusajigalila chisyasyochi mwakubatisidwa. Myoyo jemanjaji pakubatisidwa akusalosya kwa ŵandu kuti ŵapopesile kala kwa Mlungu ni kulipeleka kwa jwalakwe.
Ana Kulipeleka Kukusatukamuchisya Chamtuli?
4. Pangani jakuŵa paujakwe ni mundu jwine, ana tukulijiganya chichi kwa Daudi ni Yonatani?
4 Kulipeleka kwa Mlungu jili ngani jekulungwa. Mundu palipeleche kwa Mlungu yikusaŵa kuti atesile chilanga ni jwalakwe. Chilangachi chili chakusosekwa mnope kulekangana ni champaka tutende ni mundu jwalijose. Nambo ana kulipeleka kwa Mlungu kukusatukamuchisya chamtuli? Aganichisye ayi, ana ni umbone wapi watukusapata ligongo lyakuŵa paunasi ni mundu jwine? Tukusaŵa ŵakamulana ni mundujo, nambo kuti yeleyi yikomboleche pana yindu yine yatukusasosekwa kutenda. Tukusasosekwa kumkamuchisya mjetujo soni kumwona kuti ali jwakusosekwa. Chisyasyo chimo cha ŵandu ŵaŵaliji paujakwe chakusachisala m’Baibulo chili cha Daudi ni Yonatani. Jemanjaji ŵalumbile kuti chachiŵa paujakwe mpaka kalakala. (Aŵalanje 1 Samuele 17:57; 18:1, 3.) Atamose kuti ujakwe mpela welewu uli wakusoŵa mnope masiku agano, nambo ŵandu mpaka aŵe paujakwe wambone naga wosope ali ŵakulupichika kwa jwine ni mjakwe.—Mis. 17:17; 18:24.
5. Ana papali umbone wamtuli naga kapolo akupitilisya kutama ni abwana ŵakwe mpaka kalakala?
5 Chilamusi chele Mlungu ŵapeleche kwa Ayisalayeli, chalosyaga umbone wele mundu jwakolaga naga akutenda chilanga ni mundu jwine. Naga kapolo jwanonyele abwana ŵakwe mwamti akusaka kupitilisya kutama nawo, jwatendaga chilanga ni abwanawo chakuti chachitamaga nawo mpaka kalakala. Chilamusi chasalaga kuti, “Naga kapolojo akusala kuti, ‘Ngwanonyela ŵalakwe ambuje, ŵamkwangu ni ŵanache ŵangu, ni ngangusosa kuŵa mlukosyo,’ ambujegwewo ayiche najo kapolojo ku Nyumba ja AMBUJE. Ayiche najo ni kumjimika petanga kapena felemu ja litanga, ni ambujegwe ampowole lipikanilo ni chisyano chakupowolela. Myoyo tachiŵa kapolo jwa ambujegwewo umi wakwe wosope.”—Eks. 21:5, 6.
6, 7. (a) Ana kamulana kaje mkanatende yindu kukusakamuchisyaga chamtuli ŵandu? (b) Ana yeleyi yikutusalila chichi pangani jakuŵa paunasi ni Yehofa?
6 Ŵandu palombene akusatenda chilanga chakusosekwa mnope. Chilangachi chili chakulekangana mnope ni champaka mtende pangani sya malonda. Nganiyiŵa yikomboleche kuti ŵandu ŵaŵili ŵakutama yimpepe mkanaŵe kulombana aŵe ŵakusangalala soni atamose ŵanache ŵawo nganaŵa aŵele ŵakusangalala. Nambo naga jwamlume ni jwamkongwe alombene soni naga akusakuya yajikusasala Baibulo akusaŵa ŵakusangalala. Jemanjaji pasimene ni yakusawusya ngakusamasya ulombela wawo, nambo akusakamulichisya masengo maloŵe ga Mlungu kuti amasye yakusawusyayo.—Mat. 19:5, 6; 1 Akoli. 13:7, 8; Aheb. 13:4.
7 Kalakala, ŵandu ŵatendaga chilanga pangani sya malonda soni pakusaka kulembana masengo. Yeleyi yakamuchisyaga mnope. (Mat. 20:1, 2, 8) Yeleyi ni yayikutendekwasoni masiku agano. Mwachisyasyo, mkanitutande kutenda bisinesi ni mundu jwine kapena kutanda kukamula masengo pa kampani jine, tukusatanda kamulana kaje soni kulemba yatukamuleneyo. Yeleyi yikusatukamuchisya mnope. Pelepa tuyiweni kuti kutenda chilanga yikusatukamuchisya mnope kuti tukamulaneje ni achimjetu kuti yindu yitujendeleje mu ulombela soni kuti yindu yijendeje chenene patukukamula masengo. Mwelemu ni mwampaka yiŵelesoni naga tulipeleche kwa Yehofa, yindu mpaka yitujendeleje chenene. Kwende sambano tulole umbone wapatile ŵandu ŵane ligongo lyakulipeleka kwa Yehofa. Chitulolesoni kuti ana yeleyi yagopolelaga chichi?
Ana Kulipeleka kwa Mlungu Kwakamuchisye Chamtuli Aisalaeli?
8. Ana kulipeleka kwa Mlungu kuŵatesile Aisalaeli kwagopolelaga chichi?
8 Mtundu wosope wa Aisalaeli walipeleche kwa Yehofa pandaŵi jaŵatesile chilanga ni jwalakwe. Yehofa ŵasalile jemanjaji kuti akasongane Palitumbi lya Sinayi. Ali kweleko jwalakwe jwatite: “Naga timumbikanile maloŵe gangu, ni kusunga chilanga changu, timŵe ŵandu ŵangu pasikati pa ngosyo syosope.” Aisalaeli ŵakamulene ni yeleyi ni ŵajanjile kuti: “Tuchiyitenda yosope yasasile AMBUJE.” (Eks. 19:4-8) Kulipeleka kwaŵatesile Aisalaeli pelepa kwaliji kwakusosekwa mnope. Ligongo kwaliji kwakulekangana ni chilanga chakatesile ni mundu jwinejwalijose. Kulipeleka kwawo kwagopolelaga kuti jemanjaji ali ŵa Yehofa. Sonitu Yehofa ŵawonaga Aisalaeli kuŵa ŵandu ŵakwe.
9. Ana Aisalaeli yindu yajendelaga uli ligongo lyakulipeleka kwa Mlungu?
9 Aisalaeli yindu yajendelaga chenene ligongo ŵaliji ŵa Yehofa. Jwalakwe jwaliji jwakulupichika kwa jemanjaji soni jwasamalilaga chenene, mpela mwakusatendela nangolo jwachinonyelo pakumsamalila mwanache jwakwe. Mlungu ŵasalile Aisalaeli kuti: “Ana yili yakomboleka jwamkongwe kumliŵalila mwanagwe, ngamtendela chanasa mwanache jwakuŵeleka jika? Atamosetu komboleka kumliŵalila mwanache, Une, ngasinamliŵalila kose.” (Yes. 49:15) Yehofa ŵapele jemanjaji chilamusi kuti chalongoleleje. Ŵapele ŵakulochesya kuti ŵalimbikasyeje. Soni ŵachenjelaga pakamuchisya masengo malayika. Jwamasalimo jwalembile kuti: “Akusam’manyisya Yakobo maloŵe gakwe, akusamjiganya Isalaeli malamusi ni majiganyo gakwe. Nganatendeje yeleyi ni mtundu wine wuliwose ŵa ŵandu.” (Sal. 147:19, 20; aŵalanje Salimo 34:7, 19; 48:14) Mpela muŵatendele Yehofa pakwasamalila Aisalaeli ŵaŵalipeleche kwa jwalakwe, masiku aganosoni jwalakwe chachasamalila chenene ŵandu wosope ŵakulipeleka kwa jwalakwe.
Ligongo Chichi Tukusosekwa Kulipeleka Kwa Mlungu?
10, 11. Ana patukupagwa tukusaŵa tuli m’liŵasa lya Mlungu? Alondesye.
10 Aklistu ŵane pakuganichisya ya kulipeleka soni kubatisidwa komboleka akusaliwusya kuti, ‘Ligongo chichi yili yakusawusya kuŵa paunasi wambone ni Mlungu mkaniŵe kulipeleka kwa jwalakwe?’ Yili myoyo ligongo lya mwakusatiwonela Yehofa. Ligongo lya ulemwa wa Adamu wosopewe tukusapagwila kusa kwa liŵasa lya Mlungu. (Alo. 3:23; 5:12) Myoyo kuti tuŵe paunasi ni Yehofa soni kuti tuŵe muliŵasa lyakwe tukusasosekwa kulipeleka kaje kwa jwalakwe. Kwende tulole ligongo lyakwe tukuŵecheta yeleyi.
11 Ligongo lyakuti achinangolo ŵetu ali ŵakulemwa yili yangakomboleka kuti ŵanachewe tukole umi ŵamlama. (1 Tim. 6:19) Kulemwa kwa Adamu ni Hawa kwatendekasisye kuti ŵandu wosope aŵe ŵakutalikangana ni Mlungu jwali jwachinonyelo. (Awanichisye ni Detulonomo 32:5.) Kutandila pa ndaŵijo ŵandu wosope aŵele ali mkutama kusa kwa liŵasa lya Yehofa.
12. (a) Ana mpaka yikomboleche uli ŵandu ŵakulemwa kuŵa m’liŵasa lya Yehofa? (b) Ana tukusosekwa kutenda yindu yapi mkanituŵe kubatisidwa?
12 Nambo jwalijose jwetuwe mpaka atende yakomboleka kuti aŵe m’liŵasa lya Mlungu. * Ana yeleyi mpaka yikomboleche chamtuli pakuŵapo ŵanduwe tuli ŵakulemwa? Ndumetume Paulo jwalembile kuti, “Pitwaliji amagongo ŵa Mlungu, chiwa cha Mwanache jwakwe chatujilenye ni jwalakwejo.” (Alo. 5:10) Palisiku lya tukubatisidwa tukusaŵa mpela tukumŵenda Mlungu akuti atupe mtima wakuwona, ni chakulinga chakuti tuŵe najo paunasi. (1 Pet. 3:21) Nambo mkanituŵe kubatisidwa pana yindu yine yatukusasosekwa kutenda. Tukusasosekwa kummanyilila chenene Mlungu, kumdalila ndaŵi syosope, kupitikuka mtima soni kuleka ndamo syakusakala. (Yoh. 17:3; Mase. 3:19; Aheb. 11:6) Nambope pana chindu chinesoni chatukusosekwa kutenda kuti tuŵe m’liŵasa lya Mlungu. Ana chindu chakwe chili chapi?
13. Ligongo chichi mundu akusosekwa kutenda chilanga chakulipeleka kwa Mlungu ni chakulinga chakuti aŵe m’liŵasa lyakwe?
13 Mundu kuti aŵe m’liŵasa lya Mlungu, chandanda akusosekwa kutenda chilanga ni Yehofa. Kuti tupikanichisye ligongo lyakwe mundu akusasosekwa kutenda chilangachi kwende tuganichisye kaje ayi. Aganichisye yampaka atende mtati jwachinonyelo jwakusaka kumjigala mnyamata jwamasije kuti atameje najo. Mtatiju akusamanyika kuti ali mundu jwambone. Nambope mtatiju mkanamjigale mnyamataju kuti atameje najo akusaka kuti akutende kaje chilanga ni jwalakwe. Myoyo akumsalila mnyamataju kuti, “Mkanimbe kumjigala mpela mwanangu ngusaka manyilile kaje naga chimchinjimbichisyaga mpela baba ŵenu.” Myoyo mnyamataju mpaka aŵe m’liŵasali naga jwalakwe akukamulana ni yamsalileyi. Yeleyitu yili yakupikanika. Mwakulandanamo Yehofa akusiŵajitichisya ŵandu kuŵa mliŵasa lyakwe naga akutenda chilanga chakulipeleka kwa jwalakwejo. Ni ligongo lyakwe Baibulo jikusati, “Mpeleche yilu yenu kuti yiŵe mbopesi jwachijumi, jajiswela ni jakumsangalasya Mlungu.”—Alo. 12:1.
Kulipeleka kwa Mlungu Kukusalosya Kuti Tukusamnonyela Soni Kumkulupilila
14. Ana kulipeleka kwa Mlungu kukusalosya chamtuli kuti tukusamnonyela?
14 Kutenda chilanga chakulipeleka kwa Mlungu kukusalosya kuti tukusamnonyela Yehofa ni mtima wetu wosope. Chilangachi mpaka tuchilandanye ni chakusatenda ŵalombane. Jwamlume palombele akusalumbila kuti chachanonyelaga ŵamkwakwe atamose asimane ni yakusawusya yamtuli. Jwamlume patesile chilangachi akusaŵa kuti asimichisye ni mtima wakwe wosope soni akusamanyilila kuti jeleji nganijiŵa ngani jamasanje. Jwamlume jwa Chiklistu akusamanyilila kuti nganaŵa ajigele jwamkongwe ni kutamaga najo mkanaŵe kutenda chilanga chaulombela. Mwakulandana ni Yeleyi naga m’weji nganitutende chilanga ni kulipeleka kwa Yehofa nikuti nganituŵa tusangalele ni umbone wawukusapagwa ligongo lyakuŵa mu liŵasa lya Mlungu. Myoyo atamose kuti tuli ŵangali umlama nambope tukusalipeleka kwa Mlungu soni tukusaŵa ŵakusimichisya kuŵa ŵakulupichika kwa jwalakwe atamose tusimane ni yakusawusya yamtuli.—Mat. 22:37.
15. Ana kulipeleka kukusalosya chamtuli kuti tukusamkulupilila Mlungu?
15 Patulipeleche kwa Mlungu tukusalosya kuti tukusamkulupilila. Ligongo chichi tukuŵecheta myoyo? Ligongo lyakumkulupilila Yehofa yikusatutendekasya kumanyilila kuti kuŵa najo paunasi kuli kwambone mnope kwa m’weji. (Sal. 73:28) Tukusamanyilila kuti yili yakusawusya kuŵa ŵakulupichika kwa Mlungu ligongo tukutama pasikati pa “ŵandu ŵa unami ni ŵakwasokonesya achimjawo.” Nambope tukusakulupilila kuti Mlungu chachitukamuchisya kuti tupitilisyepe kuŵa ŵakulupichika. (Afil. 2:15; 4:13) Tukusamanyilila kuti tuli ŵandu ŵangali umlama. Nambope tukusakulupilila kuti patulemwisye Yehofa ali jwachanasa soni ali jwakoseka kutukululuchila. (Aŵalanje Salimo 103:13, 14; Aloma 7:21-25) Tukusakulupililasoni kuti Yehofa chachitupa upile ligongo lyakulupichika kwetu.—Yob. 27:5.
Kulipeleka kwa Mlungu Kukusatutendekasya Kuŵa Ŵakusangalala
16, 17. Ligongo chichi kulipeleka kwa Yehofa kukusatutendekasya kuŵa ŵakusangalala?
16 Tukusaŵa ŵakusangalala ligongo lyakulipeleka kwa Yehofa. Yesu jwasasile usyesyene wakusosekwa mnope pajwatite, “Kupeleka kukusampa upile mundu kulekangana ni kupochela.” (Mase. 20:35) Pandaŵi jiŵatendaga utumiki wakwe pachilambo chapasichi Yesu jwalipelekaga mnope. Mwamti yeleyi yamtendekasyaga kuŵa jwakusangalala. Ndaŵi sine jwalakwe nganapumulaga amta kulya kwene ni chakulinga chakuti ŵakamuchisye ŵandu kuja kupata umi wangamala. (Yoh. 4:34) Yesu jwaliji jwakusangalala mnope ligongo jwamanyililaga kuti yaŵatendaga yasangalasyaga Atati ŵakwe. Jwalakwe jwatite: ‘Masiku gosope ngusatendaga yiyikumnonyela jwalakwejo.’—Yoh. 8:29; Mis. 27:11.
17 Yesu ŵasalile ŵakumkuya ŵakwe yindu yampaka yakamuchisye kuŵa ŵakusangalala paŵatite: “Mundu jwakusaka kunguya une akuŵajilwa kuliliŵalila msyene.” (Mat. 16:24) Kutenda yeleyi kukusatukamuchisya kuti tuŵe paunasi wambone ni Yehofa. Kusala yisyene tukusosekwa kumtumichila Yehofa ligongo akusatunonyela soni kutusamalila chenene.
18. Ligongo chichi kutenda yindu mwakamulana ni kulipeleka kwetu kwa Yehofa kukusatutendekasya kuŵa ŵakusangalala, kulekangana ni kulipeleka kwa chindu chine kapena kwa mundu jwalijose?
18 Patulipeleche kwa Yehofa soni kutendaga yindu mwakamulana ni kulipeleka kwetu yikusatutendekasya kuŵa ŵakusangalala. Kusangalala kweleku kuli kwakulekangana ni kwampaka tupate naga tulipeleche ku yindu kapena kwa mundu jwine jwakwe. Mwachisyasyo, ŵandu ŵajinji akusalipeleka mnope kuti apate chipanje nambotu yeleyi yikusiyatendekasya kuti akasangalalaga. Nambope ŵandu ŵakusalipelaka kwa Yehofa akusaŵa ŵakusangalala mpaka kalakala. (Mat. 6:24) Jemanjaji akusaŵa ŵakusangalala mnope ligongo akusaŵa kuti “akukamula masengo yimpepe ni Mlungu.” Sonitu akusaŵa kuti akulipeleka kwa Mlungu jwakusayamichila mnope ngaŵaga ku masengogo. (1 Akoli. 3:9, NWT.) Yehofa akusayamichila mnope yakusatenda ŵandu ŵalipeleche kwa jwalakwe kuti amtumichileje. Sonitu pangali jwine jwakuyamichila mnope mpela Yehofa. Jwalakwe chachatendekasya jemanjaji kuti akole yilu mpela yaŵakwete paŵaliji ŵachinyamata mwati chachasamalila mpaka kalakala.—Yob. 33:25; aŵalanje Ahebeli 6:10.
19. Ana ŵandu ŵalipeleche kwa Yehofa akusasangalala ni chichi?
19 Kulipeleka kwa Yehofa mpaka kwatendekasye kuŵa pa unasi wakulimba mnope ni jwalakwe. Baibulo jikusatusalila kuti, “Mwaŵandichile Mlungu, nipo Ŵalakwe tachimŵandichila jemanja.” (Yak. 4:8; Sal. 25:14) Mungani jakuyichisya tuchilola ligongo lyakwe luli lunda kusagula kuŵa ŵakwe ŵa Yehofa.
[Maloŵe ga Mwiŵanda]
^ ndime 12 Ŵangondolo sine tachiŵa ŵanache ŵa Mlungu kumbesi kwa yaka 1000. Nambope ligongo lyakuti jemanjaji ŵalipeleche kwa Mlungu mpaka amkolanje jwalakwe kuti “Atati” soni Mlungu mpaka ŵawoneje jemanjaji kuti ali m’liŵasa lyakwe lya ŵandu ŵakusamtumichila.—Yoh. 10:16; Yes. 64:8; Mat. 6:9; Chiw. 20:5.
Ana Mpaka Ajanje Uli?
• Ana kulipeleka kwa Mlungu kukusagopolela chichi?
• Ana kulipeleka kwa Mlungu kukusatukamuchisya chamtuli?
• Ligongo chichi Aklistu akusasosekwa kulipeleka kwa Mlungu?
[Mawusyo]
[Chiwulili pa peji 6]
Kutenda yindu mwakamulana ni kulipeleka kwetu kwa Yehofa kukusatutendekasya kuŵa ŵakusangalala