1. Ligongo cici tukusosekwa kum’yamicila Yehofa?

YEHOFA, Mkupeleka jwa “mtuka wuliwose wambone, soni wangali cakuwusisya naco,” ni jwatukusosekwa kum’yamicila. (Yak. 1:17) Mpela Mkucinga jwacinonyelo, jwalakwe akusatupa yakusosecela yetu yosope yakucilu ni yausimu. (Sal. 23:1-3) Jwalakwe alosisye kuti ali “malo getu gakutilila, soni macili getu,” mnopemnope pandaŵi ja yipwetesi! (Sal. 46:1) Mwangakayicila tukwete magongo gejinji gakututendekasya kamulana ni mtima wosope ni jwamalumbo juŵalembile kuti: “Am’yamicileje Yehofa, pakuŵa jwalakwe ali jwambone. Umbone mtima wakwe wuli wangamala.”—Sal. 106:1.

2, 3. (a) Ligongo cici kugawona majali gatukwete kuŵa gangali mate kuli kwakogoya? (b) Ana munganiji citutagulilane yiwusyo yapi?

² Ligongo cici tukusosekwa kujiganicisya ngani ja kuyamicilaji? Mpela mujaŵecetele kala Baibulo, ŵandu m’moŵa gambesi gano akwete mtima wangayamicila. (2 Tim. 3:2) Ŵajinji akusagawona majali gakwete kuŵa gangali mate. M’malo mwakwikutila ni yindu yakwete, ŵajinji akulingalingape kola yindu yejinji. Jemanjaji akutenda yeleyi ligongo lyakujigalika ni ŵamalonda ŵa kucilambo. Msimu wangayamicilawu mpaka utujambucilesoni m’weji. Mpela  Ayisalayeli ŵakala, mpaka tuŵe ŵangayamicila, yampaka yitulepelekasye kuŵa paunasi wambone mnope ni Yehofa, soni mpaka yitulepelekasye kupocela majali kutyocela kwa jwalakwe.—Sal. 106:7, 11-13.

³ Tukusosekwa kuganicisyasoni yampaka yitendece naga tusimene ni yakulingwa yekulungwa. Pandaŵi mpela syelesi, mpaka tutenguce mwangasawusya ni kulepela kugawona majali gatukwete. (Sal. 116:3) Sambano, ana mpaka tutende yatuli kuti tukole, soni tukusye mtima wakuyamicila? Cici campaka citukamucisye kuŵape ŵakulimba atamose patukusimana ni yakulingwa yekulungwa? Kwende tulole.

4. Ana mpaka tukusye catuli mtima wakuyamicila?

⁴ Naga tukusaka kola, soni kusya mtima wakuyamicila, tukusosekwa kumanyilila, soni kuganicisya mwakusokoka ya majali gakusatupa Yehofa, soni kulola yakusatenda pakutulosya umbone mtima wangamala. Jwamalumbo piŵatesile yeleyi, ŵayiweni kuti Yehofa amtendele yindu yejinji yakusimonjesya.—Aŵalanje Salimo 40:5; 107:43.

5. Ana mpaka tulijiganye cici kutyocela kwa Paulo pakwamba yakusya mtima wakuyamicila?

⁵ Mpaka tulijiganye yejinji kutyocela kwa ndumetume Paulo yakwamba kola mtima wakuyamicila. Yili yangakayikasya kuti jwalakwe ŵaganicisyaga mwakusokoka ya majali gaŵakwete, ligongo ndaŵi ni katema jwalakwe ŵalosyaga kuyamicila kutyocela mumtima. Paulo ŵamanyililaga kuti pandanda ‘ŵatendelaga cipongwe, kwalagasya, soni kwanyosya Aklistu.’ Jwalakwe ŵam’yamicilaga Mlungu, soni Klistu ligongo ŵamlosisye canasa, soni ŵampele undumetume atamose kuti kala ŵatendaga yakusakala. (Aŵalanje 1 Timoteo 1:12-14.) Paulo ŵam’yamicilaga Yehofa, soni ŵayamicilaga Aklistu acimjakwe ligongo lyandamo syawo syambone, soni ligongo lyakutenda undumetume mwakulupicika. (Afi. 1:3-5, 7; 1 Ates. 1:2, 3) Paulo paŵasimanaga ni yakulingwa, mwacitema ŵam’yamicilaga Yehofa ligongo lya cikamucisyo capandaŵi jakwe caŵapocelaga kutyocela kwa Aklistu acimjakwe. (Mase. 28:15; 2 Akoli. 7:5-7) Ni ligongo lyakwe yili yangasimonjesya kuti yaŵalembile Paulo yikusalimbikasya Aklistu kuti: ‘Aŵeje ŵakutogolela . . . , amjimbileje Mlungu nyimbo sya masalimo, nyimbo sya usimu mwakumtogolela Mlungu.’—Akolo. 3:15-17.

6. Ana wawojo akusam’yamicila Yehofa ligongo cici?

⁶ Ana mpaka tumsyasye catuli Paulo pakusya, soni kulosya kuyamicila? Mpela Paulo, tukusosekwa kuganicisya mwakusokoka yatutendele Yehofa jwalijose pajika. (Sal. 116:12) Tuwanicisye kuti ŵawusisye kuti, ‘Ana akusam’yamicila Yehofa ligongo ŵapele majali gapi?’ mpaka ajanje kuti wuli? Ana mpaka asale ya unasi wakwete ni Yehofa wawuli wapenani? Kapena mpaka asale yakululucikwa kwa ulemwa kwakukusayika ligongo lyakulupilila mbopesi ja ciwombolo ja Klistu? Ana mpaka asale mena ga Aklistu acimjawo ŵaŵakamucisye pandaŵi jele wawojo ŵasimene ni yakulingwa? Tukumanyilila kuti ngaŵa mkwaliŵalila ŵamkwawo kapena ŵanace ŵawo. Kola ndaŵi jaganicisya mwakusokoka ya majali gakusangalasyaga gakutyocela kwa Atati ŵawo ŵacinonyelo, Yehofa, kucatendekasya kola mtima wakuyamicila mnope, soni kucakamucisya kuti am’yamicileje Yehofa lisiku lililyose.—Aŵalanje Salimo 92:1, 2.

7. (a) Ligongo cici tukusosekwa kupeleka mapopelo gakuyamicila? (b) Ana kupeleka mapopelo gakuyamicila kukwete umbone watuli?

⁷ Naga tukusaganicisya mnope ya majali gatukwete, tucipelekaga mapopelo gakum’yamicila Yehofa. (Sal. 95:2; 100:4, 5) Ŵajinji akusaliwona lipopelo kuŵa litala lyakum’ŵenda Mlungu kuti ŵape yineyakwe. Nambo m’weji tukusamanyilila  kuti Yehofa akusasangalala naga tukupeleka mapopelo gakuyamicila payindu yatukwete. M’Baibulo mwana yisyasyo ya ŵandu ŵajinji ŵaŵapelece mapopelo gakuyamicila gakutyocela mumtima, ŵane mwajemanjaji ŵaliji Hana ni Hesekiya. (1 Sam. 2:1-10; Yes. 38:9-20) M’yoyo, m’weji twasyasyeje ŵandumetume ŵakulupicikaŵa ŵaŵalosisye msimu wakuyamicila. Apeleceje mapopelo gakum’yamicila Yehofa ligongo lya majali gakwete. (1 Ates. 5:17, 18) Kum’yamicila Yehofa kukwete umbone wejinji. Caciŵa ŵakusangalala mnope, cacimnonyela soni, kum’ŵandicila mnope Yehofa.—Yak. 4:8.

8. Cici campaka citulepelekasye kum’yamicila Yehofa pa yosope yatutendele?

⁸ Ligongo cici tukusosekwa kuŵa ŵakalamuka kuti tukaleka kum’yamicila Yehofa? Ligongo lyakuti acinangolo ŵetu ŵatupelele msimu wangayamicila. Aganicisye ayi: Acinangolo ŵetu ŵandanda, Adamu ni Hawa, ŵaŵisile mu mgunda wakusalala mnope. Mlungu ŵapaga yosope yaŵasosecelaga, soni ŵakwete cembeceyo cakutama mwamtendele kwangamala. (Gen. 1:28) Nambo jemanjaji nganayamicila majali gawo. Mwakutunduka ŵasacililaga yindu yejinji. Yakuyicisya yakwe, ŵajasile yosope yaŵakwete. (Gen. 3:6, 7, 17-19) M’wejisoni mpaka tutande kuleka kulola yosope yatutendele Yehofa ligongo lyakuti tukutama m’cilambo cegumbale ni ŵandu ŵangayamicila. Komboleka kutanda kuwuwona unasi watukwete ni jwalakwe kuŵa wangasosekwa. Mpaka tulecesoni kuyamicila upile watukwete wakuŵa mu unasi wapacilambo cosope. Kombolekasoni kujigalika ni ya m’cilamboci yaciyimale pacangakaŵapa. (1 Yoh. 2:15-17) Kuti tuŵambale yeleyi, tukusosekwa kuganicisya mwakusokoka majali gatupele Yehofa, soni kum’yamicilaga ndaŵi ni katema ligongo lyakuŵa ŵandu ŵakwe.—Aŵalanje Salimo 27:4.

9. Patusimene ni yakulingwa yekulungwa, ligongo cici tukusosekwa kuganicisya ya majali gatukwete?

⁹ Kola mtima wakuyamicila mpaka kutukamucisye kulimbana ni yakulingwa yekulungwa. Mpaka tutenguce mnope patusimene ni yipwetesi yangayijembeceya mpela ungakulupicika wa ŵamkwetu, ulwele wekulungwa, ciwa ca jwakunonyelwa jwetu, kapena ngosi syacipago. Patusimene ni yindu yeleyi, kulola majali gatukwete kala mpaka kututondoye, soni kutulimbikasya. Kwende tulole yayatendecele ŵandu ŵane.

10. Ana kuŵalanjila majali gatukwete kwamkamucisye catuli Irina?

 ¹⁰ Mpayiniya jwine jwa ku North America lina lyakwe Irina, * jwalombegwe ni jwamkulungwa jwa mumpingo. Mkupita kwandaŵi m’balejo ŵatandite kutenda yangakulupicika kaneko ŵatisile ŵamkwakwe, soni ŵanace ŵakwe. Cici cacamkamucisye Irina kumtumicilape Yehofa mwakulupicika? Jwalakwe ŵatite: “Ngusam’yamicila Yehofa ligongo lyakusamalila uneji pajika. Ligongo lyakuti ngusaŵalanjila majali gangwete lisiku lililyose, ngusayiwona kuti kumanyika, soni kunonyelwa ni Atati ŵetu ŵakwinani ŵakusatucenjela uli upile wekulungwa mnope. Ngumanyilila kuti jwalakwe ngaŵa mkundeka jika.” Atamose kuti Irina ŵasimene ni yakulingwa yekulungwa paumi wakwe, nambope kusangalala kwakwe kukusamlimbisya, soni akusiŵalimbikasya ŵane.

11. Cici cacamkamucisye Kyung-sook kulimbana ni ulwele wekulungwa?

¹¹ Kyung-sook, jwakusatama ku Asia, ŵatendaga upayiniya ni ŵamkwakwe kwa yaka yakupunda 20. Mwangajembeceya, jwalakwe ŵamsimene ni ulwele wa kansa ja m’mapapo kapena kuti ja m’mapawa ni ŵamsalile kuti caŵe cijumi kutandila miyesi jitatu mpaka miyesi nsano ni umo kaneko cawe. Atamose kuti jwalakwe yimpepe ni ŵamkwakwe ŵasimene ni yakulingwa yejinji, yamwanamwana, soni yekulungwa, nambope nganajasaga mtima ligongo lya ulwelewo. Jwalakwe ŵatite: “Ngani ja ulweleji jambwetekaga mnope, mwati naliwonaga kuti najasile yindu yangu yosope, soni jandesyaga woga.” Cici cacamkamucisye Kyung-sook kupilila yipwetesiyi? Jwalakwe ŵatite: “Cilo cilicose mkaningone, ngusajawula pamsakasa wa nyumba jetu ni kupopela mwakwesya maloŵe kum’yamicila Mlungu pa yindu yakwana msano yandendele lisikulyo. Yeleyi yikusandondoya, soni yikusandendekasya kumnonyela mnope Yehofa.” Ana mapopelo gakusapeleka ciloga gamkamucisye catuli Kyung-sook? Jwalakwe ŵatite: “Manyilile kuti Yehofa akusatukamucisya patusimene ni yakulingwa, soni kuti tukwete majali gejinji paumi wetu kupunda yakulingwa yatukusasimana nayo.”

12. Ana Jason ŵapatile citondoyo mwatuli ŵamkwakwe ali ajasice?

¹² Jason, jwakusatumicila pa ofesi jine ja nyambi ku Africa, aŵele ali mkutenda undumetume wandaŵi syosope kwa yaka yakupunda 30. Jwalakwe ŵatite: “Ŵamkwangu ŵajasice yaka nsano ni yiŵili yipiteyo. Yeleyi yikusambweteka kwabasi. Kuganicisya mnope mwaŵapikanilaga paŵalwalaga kansa, kukusandengusya mnope.” Cici cacamkamucisye Jason kupilila? Jwalakwe ŵatite, “Ndaŵi jine nakumbucilaga ndaŵi jele une ni ŵamkwangu twasangalalilaga yimpepe ni nam’yamicile Yehofa ligongo lyakumbucila yindu yeleyo. Yeleyi yandondweye ni kaneko natandite kum’yamicila Yehofa ndaŵi syosope ligongo lya yindu yakusangalasya yitwatendelaga yimpepeyo. Kuyamicila kungamucisye mnope kuyiwona yindu mwakuŵajilwa. Ngusadandawulape ligongo lya ciwa ca ŵamkwangu, nambo kum’yamicila Yehofa ligongo lyakumba liŵasa lyambone, soni mundu jwakutumicila najo juŵamnonyelaga Yehofa yingamucisye kuyiwona yindu mwakuŵajilwa.

13. Cici cacamkamucisye Sheryl kupilila kwasika kwa acalongo acimjakwe ŵajinji?

¹³ Cakumbesi kwa caka ca 2013, cimbungo cakogoya caputile ku Philippines. Cimbungoci cajonasile ciŵandika yindu yosope ya msikana jwine lina lyakwe Sheryl juŵaliji ni yaka 13 pandaŵijo. Jwalakwe ŵatite: “Najasile pakutama, soni acalongo acimjangu ŵajinji.” Babagwe, mamagwe, soni acemwali ŵakwe ŵaŵili ni mlumbugwe ŵajasice. Cici cacamkamucisye Sheryl kupilila yipwetesi yeleyi? Jwalakwe akwete mtima wakuyamicila soni, akusakumbucila  majali gakwete. Jwalakwe ŵatite: “Nayiweni yaŵatesile Aklistu acimjetu pakwakamucisya, soni kwalimbikasya ŵaŵasosecelaga cikamucisyo. Namanyililaga kuti Aklistu acimjangu pacilambo cosope ŵambopelelaga.” Jwalakwe ŵatitesoni: “Ngusayamicila kuti Yehofa ali Mlungu jwangu. Jwalakwe ndaŵi syosope akusatupa yindu yatukusasosecela.” Yisyene, kumanyilila majali gatukwete kukusatukamucisya mnope kuti tukatenguka ni canasa. Mtima wakuyamicila ukusatukamucisya kuŵape ŵakulimba atamose patusimene ni yindu yakusawusya mnope.—Aef. 5:20; aŵalanje Afilipi 4:6, 7.

14. Ana tukwembeceya yindu yakusangalasya yatuli? (Alole ciwulili cacili kundanda kwa nganiji.)

¹⁴ Kutandila kalakala, ŵandu ŵa Yehofa aŵele ali mkusangalala ligongo lya majali gakwete. Mwambone, ali akulupwice m’miyala mwa Falawo ni asilikali ŵakwe pa Nyasa Jecejewu, Ayisalayeli ŵalosisye kusangalala kwawo pakwimba nyimbo syakumlumba, soni kum’yamicila Mlungu. (Eks. 15:1-21) Moŵa agano, majali gekulungwa gatukwete gali cembeceyo cakuti Mlungu cacitukulupusya ku yipwetesi yosope. (Sal. 37:9-11; Yes. 25:8; 33:24) Agambe ganisya mwatucipikanila pandaŵi jele Yehofa cacijonanga acimmagongo ŵakwe ni kutujinjisya m’cilambo casambano camtendele, soni cacilungamo. Lyelelyo liciŵa lisiku lyekulungwa lyakuyamicila!—Ciu. 20:1-3; 21:3, 4.

15. Ana asimicisye kutenda cici m’caka cosope ca 2015?

¹⁵ Tukwembeceya kupocela majali gausimu gejinji kutyocela kwa Yehofa m’caka ca 2015. Nambope citusimanejesoni ni yakulingwa. Nambo atamose tusimane ni yindu yatuli, tukumanyilila kuti Yehofa ngasatujasa kose. (Deut. 31:8; Sal. 9:9, 10) Jwalakwe cajendelecele kutupa yiliyose yatukusosecela kuti tumtumicileje mwakulupicika. M’yoyo, kwende tuŵe ŵakusimicisya kola msimu mpela wa jwakulocesya Habakuku juŵasasile kuti: “Atamose citela ca mkuju cikasogola yisogosi, soni atamose citela ca mpeleya cikasogola, atamose citela ca olifi cilepele kusogola, atamose migunda jikakoposya yakulya, atamose yilango yimale mwicinga, soni atamose ng’ombe sili simasile mwicinga, nambope une cinjimsangalalilape Yehofa. Cinjisangalala mwa Mlungu jwacikulupusyo cangu.” (Hab. 3:17, 18) M’caka cosopeci, kwende tuganicisyeje ya majali gatukwete, soni tulinjilileje kuya maloŵe ga m’lilemba lya caka ca 2015 gakuti: “Am’yamicileje Yehofa, pakuŵa jwalakwe ali jwambone.”—Sal. 106:1.