Ligongo Cici Tukusosekwa Cikulupusyo?
Ligongo Cici Tukusosekwa Cikulupusyo?
“Mundu jwakupagwa kwa jwamkongwe, jwangatama kwandaŵi jelewu, soni umi wakwe ukusaŵa ni yipwetesi yejinji. Akusasipuka mpela liluŵa, kaneko ni kunyala, akusatyoka mwacitema mpela m’bwilili ngawonekasoni.”
Kutandila kalakala, ŵandu aŵele ali mkusacilila ali akwete cilu camacili, soni kutama ni umi kwangamala. Nambo cakutesya canasa cili cakuti ŵanduwe tukusawaga. Maloŵe gagali penanipa ŵagaŵecete Yobu yaka ciŵandika 3,000 yipiteyo, nambo yaŵasasileyo yikutendekwape mpaka lelo jino.
Mundu jwalijose akusasacilila mnope kola umi wangamala. Baibulo jikusatusalila kuti Mlungu ŵatupele mtima wakusaka kutama ni umi kwangamala soni mtima wakusacilila kuwumanyilila umiwo. (Mlaliki 3:11) Ni naga yili m’yoyo, ana Mlungu jwacinonyelo akatupele mtima welewu yikaŵe kuti yili yangakomboleka kutama ni umi mpaka kalakala? Iyayi. Maloŵe ga Mlungu gakusacikolanga ciwa kuŵa mmagongo soni gakusasala kuti ‘cacimmasya macili.’
Pangali mundu jwampaka akayicile kuti ciwa cili mmagongo. Patusimene ni yakogoya tukusajuŵa kapena kutila. Patulwasile, tukusasosasosa matala gakuti tulame. Tukusatenda yiliyose yampaka tukombole pakusaka kulicenjela kuyindu yampaka yijonanje umi.
Ana pana ligongo lyakulupilila kuti mmagongo jwakalakalaju cacimmasya? Elo, maloŵe ga Yehofa gakusati, Mkupanganya, nganaŵapanganya ŵandu kuti atameje kwa yaka yamnono. Cakulinga ca Mlungu nganiciŵa cakuti ŵandu aweje. Ŵasakaga kuti ŵandu atameje pacilambopa mpaka kalakala, soni yakulinga yakwe yosope akusayikwanilisya.
Ana ciwa cacicimasya catuli? Kutandila kalakala, ŵandu aŵele ali mkulinjilila kuti amasye ciwa, nambo alepele. Moŵa agano, kuwungunya kukwendelecelape. Ŵasayansi apanganyisye mitela jakamucisya kumasya mitundu jine ja yilwele. Aŵele mkuwungunya mnope mwaŵayipanganyicisye yindu ya umi. M’malo gane, ŵandu akusatama kwandaŵi jelewu kulekangana ni mwayaŵelaga yaka 100 yipiteyo. Atamose yili m’yoyo, ŵandu ngaŵa mkumasya ciwa. Mpela mwajasasile Baibulo, “wosope akuwujila ku luwundu.”
Nambo ngani jambone jili jakuti ngatukusosekwa kwegamila yakutenda ŵandu kuti yicimasya ciwa cacitemi yaka yejinjici. Yehofa Mlungu alinganyisye kala litala lyakutukulupucisya ku ciwa, soni Yesu Klistu ni jwakumkamulicisya masengo mnope pakwanilisya cakulinga celeci.
