1. Ligongo cici tukusosekwa kulimbisya unasi wetu ni Yehofa?

ANA wawojo ŵalipelece soni ŵabatiswe kuti aŵe jwa Mboni sya Yehofa? Naga yili m’yoyo, nikuti ŵapatile cipanje capenani cacili unasi wawo ni Mlungu. Nambope, tukusalimbana ni yindu yakutulepelekasya kuŵa paunasi ni Mlungu mpela cilambo ca Satanaci nambosoni yilu yetu yangali umlamayi. Aklistu wosope akusasimana ni yindu yakulingwayi. M’yoyo, tukusosekwa kutenda yiliyose yampaka tukombole kuti tulimbisye unasi wetu ni Yehofa.

2. (a) Ana unasi ukusagopolela cici? (Alole maloŵe ga mwiŵanda.) (b) Ana mpaka tulimbisye catuli unasi wetu ni Yehofa?

² Ana unasi wawo ni Yehofa wuli wakulimba kapena akusosekwa kuwulimbisya? Lilemba lya Yakobo 4:8 likusasala kuti, ‘Am’ŵandicile Mlungu, nipo jwalakwe tacaŵandicila jemanja.’ Kuti yeleyi yikombolece, Yehofa akusatenda mbali jakwe, m’wejisoni tukusosekwa kutenda mbali jetu. * Naga tukulingalinga kutenda yindu yakuti tum’ŵandicile Mlungu nombenajo cacituŵandicila. Kutenda yeleyi  ndaŵi syosope kucilimbisya unasi wetu ni Yehofa. Tuciŵa ŵakusimicisya kuŵeceta mpela muŵaŵecetele Yesu kuti, ‘Juŵandumile unejo ali jwakuwona, soni . . . Une ngummanyilila jwalakwe.’ (Yoh. 7:28, 29) Ana mpaka tutende cici kuti tum’ŵandicile Yehofa?

3. Ana tukusaŵecetana catuli ni Yehofa?

³ Kuŵecetana ni Yehofa ndaŵi syosope lili litala lyambone lya kum’ŵandicilila. Ana mpaka aŵecetane catuli ni Mlungu? Mwambone, ana wawojo akusaŵecetana catuli ni mjawo jwakusatama kwakutalika? Akusalembelana yikalata soni kuŵecetana pa foni, mwine akusatenda yeleyi ndaŵi ni katema. M’yoyosoni, tukusaŵeceta ni Yehofa patukupopela kwa jwalakwe ndaŵi ni katema. (Aŵalanje Salmo 142:2.) Soni tukusakunda Yehofa kuŵeceta ni m’weji patukuŵalanga Baibulo soni kuganicisya mwakusokoka maloŵe gatuŵalasilego. (Aŵalanje Yesaya 30:20, 21.) Sano kwende tutagulilane mwele kaŵecetane keleka mpaka kalimbisye unasi wetu ni Yehofa, ni kuŵa mjetu jusyesyene.

4, 5. Ana Yehofa akusaŵeta catuli ni wawojo kupitila m’Maloŵe gakwe? Asale cisyasyo.

⁴ Yili yisyene kuti Baibulo jikwete utenga wa Mlungu wakwakwaya ŵandu wosope. Nambo ana Baibulo mpaka jakamucisye wawojo kum’ŵandicila Yehofa? Elo. Mwatuli? Pakuŵalanga ni kulijiganya Baibulo ndaŵi ni katema akusosekwa kulolecesya kuti yakulijiganyayo yikwakwaya soni kulola yampaka atende pakamulicisya masengo yeleyo paumi wawo. Naga akutenda yeleyi, nikuti akunda kuti Yehofa aŵeceteje kwa wawojo. Yeleyi yicatendekasya kuti am’ŵandicile Mlungu.—Aheb 4:12; Yak 1:23-25.

⁵ Mwambone, ana akusapikana wuli paŵalasile ni kuganicisya mwakusokoka maloŵe ga Yesu gakuti, ‘Mkasimliwunjicila yipanje pa cilambo capasi pano’? Naga wawojo akulipikana kuti akusalongosya yindu ya Ucimwene paumi wawo, nikuti mpaka aliwone kuti Yehofa akusangalala ni wawojo. Nambo naga akuliwona kuti akusosekwa kucenga yindu yine kuti alongosyeje yindu ya Ucimwene paumi wawo, nikuti Yehofa akwakamucisya wawojo kumanyilila yakusosekwa kutenda kuti am’ŵandicile.—Mat. 6:19, 20.

6, 7. (a) Ana kulijiganya Baibulo kukusakwaya catuli kunonyelana kwetu ni Yehofa? (b) Ana cakulinga cetu ciŵeje catuli patukutenda lijiganyo lya pajika?

⁶ Kulijiganya Malemba kukusatukamucisya kongolela umi wetu wausimu. Nambosoni kukusatulimbikasya mnope kuyamicila matala gambone ga Yehofa, yeleyi mpaka yitutendekasye kumnonyela mnope jwalakwe. Cinonyelo cetu  kwa Mlungu pacikwendelecela kula jwalakwesoni akusatunonyela mnope, yayikusalimbisya unasi wetu ni jwalakwe.—Aŵalanje 1 Akolinto 8:3.

⁷ Kuti tupakombole kum’ŵandicila Mlungu tukukososekwa kulijiganya ni calinga cambone. Lilemba lya Yohane 17:3 likusasala kuti, “Umi wangamala ugopolela kuti ŵandu ŵamanyilile ŵalakwe ŵali Mlungu jikape ŵakuwona, nipo soni ammanyilile Yesu Klistu juŵamtumile wawojo.” M’yoyo, cakulinga cetu ciŵeje ngaŵape kwamba kuŵalanga, nambo “kummanyilila” cenene Yehofa kuti ali jusyesyene.—Aŵalanje Eksodo 33:13; Sal. 25:4.

8. (a) Ana mpaka paŵe nganisyo syatuli pakwamba ya mwaŵatendele Yehofa pangani ja Mwenye Asaliya, jajikusimanikwa pa 2 Mafumu 15:1-5? (b) Ana kummanyilila cenene Yehofa mpaka kutukamucisye mwatuli kutyosya nganisyo syakayicila yitendo yakwe?

⁸ Patukulingalinga kummanyilila Yehofa mpela mjetu jusyesyene, ngasitudandawula naga Baibulo ngajikusala ligongo lyakwe Yehofa ŵatesile yindu mlitala line lyakwe. Mwambone, ana akusapikana wuli ni mwaŵatendele Yehofa ni Mwenye Asaliya jwa ku Yuda? (2 Maf. 5:1-5) Atamose kuti ‘ŵandu ŵaliji ciŵela kutaga mbopesi ni kututumisya ubani pamalo gaŵapopelelaga milungu jacilendo,’ Asaliya ‘ŵatesile yakulungamika pameso pa Yehofa.’ Nambope, ‘Yehofa ŵampele mwenye Asaliya cilango ca ulwele wa matana kwa umi wakwe wosope. Ligongo cici? Nganiji jangasala ligongo lyakwe. Ana yeleyi yikututendekasya kuganisya kuti Yehofa ŵampele Asaliya cilango pali pangali ligongo lyakupikanika? Iyayi. Naga tukusamanyilila cenene matala gakwe nikuti tukumanyilila kuti Yehofa ndaŵi syosope akusatenda yindu mwacilungamo. Jwalakwe akusapeleka cilango ‘pakuya cilungamo.’ (Yer. 30:11) Kummanyilila Yehofa m’litala lyeleli kukusatutendekasya kuŵa ŵakusimicisya kuti Asaliya ŵapocele cilango cacilungamo.

9. Ana pana umboni watuli wa m’Malemba wakulosya cenene ligongo lyakwe Yehofa ŵampele Asaliya ulwele wa matana?

⁹ M’Baibulo mwana malemba gane gagakusasala yejinji pakwamba ya Mwenye Asaliya jwaŵamanyikagasoni kuti Mwenye Usiya. (2 Maf. 15:7, 32) Ngani jajikusimanikwa pa 2 Mbiri 26:3-5, 16-21 jikusasala cenene yakwamba mwenye Usiya. Atamose kuti Usiya ŵatesile yindu yambone pameso pa Yehofa nambo mkupita kwa ndaŵi ‘ŵatandite kulikwesya, yeleyi yamtendesye kuti alepele.’ Mwenye Usiya mwakulikwesya ŵatesile masengo gagasosekwaga kutendedwa ni ŵambopesipe. Ŵambopesi ŵakwana 81 ŵamsalile kuti nganatenda cenene, m’yoyo ŵalinjilile kumlekasya. Ana Usiya ŵatesile cici? Ligongo lyakulikwesya ‘ŵatumbilile’ ŵambopesiwo. Ni ligongo lyakwe Yehofa ŵampele cilango ca ulwele wa matana.

10. Ligongo cici ngatukusosekwa kayicila yitendo ya Yehofa, soni ana mpaka tutende cici kuti tumkulupilileje mnope?

¹⁰ Ana tukulijiganya cici panganiji? Yikaŵe kuti Baibulo nganijisala cenene nganiji mpela mwasiŵelele ngani sine, ana wawojo akakayicilaga kuti Yehofa nganatenda yindu mwacilungamo? Kapena ana akakulupilile kuti Baibulo jikwete yakutukamucisya kusimicisya kuti ndaŵi syosope Yehofa akusatenda yindu m’litala lyambone soni kuti yitendo yakwe yili yakwenela soni yacilungamo? (Deut. 32:4) Patukwendelecela kummanyilila cenene Yehofa kuti ali jwambone soni jusyesyene kwa m’weji, cinonyelo cetu pa jwalakwe cicijendelecela kula, soni tucimkupilila mnope mwati ngasitukayicilaga kose yitendo yakwe. Nambo kuti yeleyi yikombolece tukusosekwa kuŵa ŵamtawu pakulijiganya Maloŵe ga Mlungu soni kuganicisya mwakusokoka yatukulijiganyayo. (Sal. 77:12, 13) Kutenda yeleyi kucilimbisya unasi wetu ni Yehofa soni jwalakwe taciŵa jusyesyene kwa m’weji kupunda kala kose.

11-13. Ana tukusamanyilila catuli kuti Yehofa akusapikanila mapopelo? (Alole ciwulili cacili kundanda kwa nganiji.)

¹¹ Patukupopela kwa Yehofa tukusam’ŵandicila jwalakwe. Tukusamlumba, kum’yamicila soni kum’ŵenda kuti atulongoleleje. (Sal 32:8) Nambo kuti unasi wetu ni Yehofa uŵe wakulimba tukusosekwa kusimicisya kuti jwalakwe akusapikana mapopelo.

¹² Ŵandu ŵane akusakulupilila kuti lipopelo likusagamba kumkamucisya mundu kuti alipikaneje cenene, nambo ŵangakulupilila kuti Mlungu akusapikanila mapopelo. Akusakulupililasoni kuti lipopelo likusagamba kutukamucisya kuti tuganicisye mnope ya yakusawusya yetu ni kuwungunya cikamucisyo cakwe. Yili yisyene kuti lipopelo likusatukamucisya m’matala gelega. Ana mpaka tusimicisye catuli kuti Yehofa akusapikanila mapopelo getu?

¹³ Aganicisye kaje ayi, Yesu mkanayice pacilambo capasi, ŵamanyililaga cenene kuti Yehofa ŵajangaga mapopelo ga ŵakumtumicila ŵakwe ŵapacilambo capasi. M’yoyo, pa undumetume wakwe wa pacilambo capasi, jwalakwe ŵasalaga mwaŵapikanilaga kwa Atati ŵakwe ŵakwinani kupitila mwipopelo. Lisiku line, ŵacesisye kupopela kwa Yehofa. Ana Yesu akapopelaga kwa Yehofa yikaŵe kuti ŵayimanyi kuti jwalakwejo ngaŵa mkumpikanila? (Luk. 6:12; 22:40-46) Ana akajiganyisye ŵakumkuya ŵakwe kuti apopeleje kwa Yehofa yikaŵe kuti jwalakwe ŵamanyililaga kuti Yehofa jwangapikanila mapopelo? Yesu ŵamanyililaga cenene kuti lipopelo lili litala lyakuŵecetelanilana ni Yehofa. Pandaŵi jine, Yesu ŵaŵecete kwa Atati ŵakwe kuti, “Ngwatogolela wawojo Atati, pakuŵa akusambikanila. Une ngumanyilila kuti wawo akusambikanila masiku gosope.” M’wejisoni mpaka tuŵe ŵakusimicisya kuti Yehofa ali ‘jwakupikanila lipopelo’.—Yoh. 11:41, 42; Sal. 65:2.

14, 15. (a) Ana kusala yisyesyene yatukusaka mwipopelo kwana umbone watuli? (b) Ana mapopelo gamkamucisye catuli mlongo jwine kulimbisya unasi wakwe ni Yehofa?

¹⁴ Pakupopela akusosekwa kusala yisyesyene yakusaka, naga akutenda yeleyi tacimanyilila cenene pandaŵi jele Yehofa akwajanga mwakamulana ni lipopelo lyawo atamose kwanga kwine mpaka kuŵe kwangawonecela. Yehofa pajanjile mapopelo gawo akusaŵa jusyesyene kwa  wawojo. Konjecesya pelepo, pakumsalila Yehofa yayikwalagasya nganisyo, jwalakwe cacaŵandicila.

¹⁵ Mwambone kwende tulole ngani ja Kathy. * Jwalakwe nganasangalalaga ni undumetume wamumgunda, atamose kuti ndaŵi syejinji ŵajinjilaga nawo mumgunda. Jwalawe ŵasasile kuti, “Nganinawunonyelaga undumetume wamumgunda. Nguti, nganinawunonyelaga kwene. Panalesile masengo gangu, jwamkulungwa jwa mumpingo jwine ŵalimbikasisye kuti ndande upaniya wakutamilicika. Jwalakwe mpaka ŵambele fomu jakuwucisya upayiniya. Nasagwile kuti ndande upaniya nambosoni napopelaga kwa Yehofa lisiku lililosye kuti angamucisye kuwunonyela undumetume wamumgunda.” Ana Yehofa ŵajanjile mapopelo gakwega? Jwalakwe ŵatite, “Acino cili caka catatu ndili mkutenda upaniya. Ligongo lyakuti namalilaga ndaŵi jejinji mu undumetume soni nalijiganyisye yejinji kwa alongo ŵane, natandite kongolela katende kangu ka undumetume wamumgunda. Apano ngusawunonyela mnope undumetume wamumgunda. Cindu cakusosekwa mnope cambatile ni kuŵa jwakuŵandikana mnope ni Yehofa kupunda kala kose.” Kusala yisyene, mapopelo gaŵapelekaga Kathy gamkamucisye kulimbisya unasi wakwe ni Yehofa.

16, 17. (a) Ana tukusosekwa kutenda cici kuti unasi wetu ni Yehofa ujendelecele kula? (b) Ana mungani jakuyicisya tucitagulilana yatuli?

¹⁶ Komboleka kwendelecela kusya unasi wetu ni Yehofa mpaka kalakala. Kuti yeleyi yikombolece tukusosekwa kumpikanila Yehofa pa kulijiganya Baibulo soni kuŵeceta najo mwipopelo. Naga tukutenda yeleyi unasi wetu ni Yehofa uciŵa wakulimba mnope yayicitukamucisya kuŵa ŵakulimba patucingangene ni yakulingwa.

¹⁷ Ndaŵi sine mpaka tusimaneje ni yakusawusya atamose kuti tukupopelape kwa Yehofa. Ndaŵi mpela syelesi mpaka tujasye cikulupi cetu pa Yehofa. Mpaka tutande kayicila naga Yehofa akupikanila mapopelo getu, kapena naga jwalakwe akusasaka kuti tuŵe najo paunasi. Ana mpaka tutende wuli pandaŵi mpela syelesi kuti unasi wetu ni Mlungu uŵe wakulimbape? Ngani jakuyicisya jicitukamucisya kulola mwampaka tutendele.