Kwa yaka yejinji mabuku getu gaŵele gali mkusala kuti lina lyakuti Gogi jwa cilambo ca Magogi lili lina line lya Satana kutyocela pandaŵi jiŵamtopwele kwinani. Twasalaga yeleyi ligongo lyakuti buku ja Ciunukuko jikusati Satana ni jwakulongolela kwimucila ŵandu ŵa Mlungu pacilambo cosope. (Ciu. 12:1-17) M’yoyo, yawonekaga mpela Gogi lili lina line lya Satana.

Nambope kutagulila nganiji m’litala lyeleli kwatendekasyaga kuti paŵe yiwusyo. Ligongo cici? Aganicisye ayi: Pakwamba ya ndaŵi jele Gogi cacimgomeka, Yehofa ŵatite, “Tinjimtenda kuŵa cakulya ca yijuni ni yilombo yakwitinji.” (Ezek. 39:4) Yehofa ŵajonjecesye kuti, “Palisiku lyelelyo tinjimpa Gogi malembe kuti tamsice mwelemo m’cilambo ca Isalayeli, . . . Gogi ni likuga lyakwe lyosope lya ngondo tacasika kweleko.” (Ezek. 39:11) Ana mpaka yikomboloce kuti “yijuni ni yilombo yakwitinji” yilye cakupanganyikwa causimu? Ana mpaka yikomboloce kuti Satana amsice m’malembe pacilambo capasi? Baibulo jikusasala kuti Satana caciponyedwa mwisimbo mucacitama kwa yaka 1,000, ngaŵa kuti yijuni ni yilombo yicimlya kapena tacimsika m’malembe.—Ciu. 20:1, 2.

Tukusamanyilila kuti panyuma pa yaka 1,000, Satana cacimkoposya mwisimbo mula ni ‘tacijawula kukwalambusya Gogi ni Magogi. Jeleji jili mitundu ja ŵandu jakutama ku mitepa mcece ja cilambo. Satana tacasonganya jemanjaji kuti atende ngondo.’ (Ciu. 20:8) Nambo yikaŵe kuti Satana ali Gogi, ana yikakombolece catuli kuti amlambusye Gogi? M’yoyo, “Gogi” jwamkolasile m’buku ja Ezekiele ni Ciunukuko ngaŵa Satana.

Sano ana Gogi jwa cilambo ca Magogi ali ŵani? Kuti tujanje ciwusyo celeci, kwende tulole kutyocela m’Malemba jucacajimucila ŵandu ŵa Mlungu. Baibulo jikusasala ya kwimucila kwa “Gogi jwa cilambo ca Magogi,” ‘mwenye jwa kumpoto,’ soni “ayimwene ŵa cilambo capasi.” (Ezek. 38:2, 10-13; Dan. 11:40, 44, 45; Ciu. 17:14; 19:19) Ana kwimucila kweleku kucitendekwa mundaŵi syakulekanganalekangana? Mwine ngaŵa m’yoyo. Mwangakayicila, Baibulo jigopolela kwimucila kwakucitendekwa pandaŵi jimo, nambo jikamulicisya masengo mena gakulekangana. Ligongo cici tukuti m’yoyo? Ligongo lyakuti Baibulo jikusatusalila kuti mitundu josope ja pacilambo capasi jicijimucila  ŵandu ŵa Mlungu. Kwimucila kweleku kuciyikasya ngondo ja Alamagedo.—Ciu. 16:14, 16.

Kulolasoni yagakusasala Malemba pangani jakwamba kwimucilidwa kwakumalisya kwa ŵandu ŵa Mlungu, kukutukamucisya kumanyilila kuti Gogi jwa cilambo ca Magogi ngaŵa Satana, nambo mkamulano wa mitundu josope ja ŵandu. Ana ‘mwenye jwa kumpoto’ ni jucacilongolela mkamulano welewu? Ngaŵa mkusimicisya kuti yiciŵa m’yoyo. Nambo yeleyi yikamulana ni yaŵasasile Yehofa yakwamba Gogi. Jwalakwe ŵatite, “Timcityocela kumangwenu mbali syakwakutalika sya kumpoto, mli mkulilongolela likuga lyekulungwa lya asilikali ŵamacili ŵangondo ŵa mitundu ja ŵandu, wosope ali akwesile mahaci.”—Ezek. 38:6, 15.

Jwakulocesya Daniyele ŵasasilesoni yakamulana ni yeleyi pakwamba ya mwenye jwa kumpoto. Jwalakwe ŵatite, “Mbili syakutyocela kungopoko lyuŵa ni kumpoto tisicajogoya, nipo jwalakwejo tacinyakuka ali atumbile mnope kuti akapute ngondo ni kwamala ŵandu ŵajinji. Jwalakwejo tacitaŵa matenti gakwe ga ucimwene pasikati pa nyasa ni petumbi pijitaŵidwe Nyumba ja Ambuje. Nambope pakumalisya pakwe mwenyejo taciwulajidwa ngapata jwakumkamucisya.” (Dan. 11:44, 45) Yeleyi yikamulana ni yajikusasala buku ja Ezekiele yakwamba yitendo ya Gogi.—Ezek. 38:8-12, 16.

Ana panyuma pa kwimucila ŵandu ŵa Mlungu pacitendekwa cici? Daniyele ŵatite, “Pandaŵi jelejo lilayika lyekulungwa Mikaele [Yesu Klistu] jwakusiŵalondela ŵandu ŵenu [kutandila mu 1914], taciyika [pa Alamagedo]. Ndaŵi jelejo tijiciŵa ja yisawusyo yakogoya yamkaniyiwoneceje kala kosope, ali ampangenye mundu. Pandaŵijo ŵandu ŵenu tacikulupuka, wosope ŵele mena gawo galembedwe m’buku ja Mlungu.” (Dan. 12:1) Yacacitenda Yesuyi ayikolasilesoni pa lilemba lya Ciunukuko 19:11-21.

Nambo ana “Gogi ni Magogi” jwamkolasile pa Ciunukuko 20:8 ali ŵani? Yaka 1,000 yili yimasile, ŵandu tacilinjidwa kakumalisya. Wosope ŵacacimjimucila Yehofa cacitenda yindu yakusakala mpela ya “Gogi jwa cilambo ca Magogi” jucacajimucila ŵandu ŵa Mlungu kumbesi kwa yisawusyo yakogoya. Gogi ni Magogi nombe najo cacipocela cilango ca ciwa cangali cembeceyo. (Ciu. 19:20, 21; 20:9) M’yoyo, mpaka tujile kuti ŵandu ŵacacimjimucila Mlungu yaka 1,000 yili yimasile ali “Gogi ni Magogi.”

Tukusosekwa kwembeceya mwalung’wanu kuti citulole jucaciŵa ‘Mwenye jwa kumpoto,’ jwacacilongolela mkamulano wa mitundu josope ja ŵandu. Cinga caciŵa ŵani, nambo m’weji tuli ŵakusimicisya kuti kusogoloku cikutendekwe yindu yiŵili ayi: (1) Gogi jwa cilambo ca Magogi pampepe ni asilikali ŵakwe tacagomeka ni kwajonanga, (2) Mwenye jwetu, Yesu Klistu, cacakulupusya ŵandu ŵa Mlungu ni kwalongolela m’cilambo capasi casambano camtendele.—Ciu. 7:14-17.