1-3. Ligongo cici mlongo jwine ŵasimicisye kuti Yehofa akusamanyilila yatukusosecela?

LANA ngasaliŵalila yayatendekwe lisiku line ku Germany m’caka ca 2012. Jwalakwe ŵayiweni kuti Yehofa ŵajanjile mapopelo gakwe gaŵili gakusala yisyesyene yaŵasakaga. Kandanda ŵapopesile ali musitima japamkuli paŵajawulaga ku luŵala lwa ndege. Ŵam’ŵendile Yehofa kuti amkamucisye kupata lipesa lyakulalicila. Ŵapopesilesoni paŵayice ku luŵala lwa ndege paŵamanyilile kuti ndege jaŵasakaga kwelajo cijinyakuce lisiku lyakuyicisya. Jwalakwe ŵam’ŵendile Yehofa kuti amkamucisye kupata malo gagona ligongo lyakuti mbiya syakwe syaliji sili simasile.

² Paŵagambile kumalisya lipopelo lyakwe lyaŵili, Lana ŵapikene mnyamata jwine ali mkuŵeceta kuti, “Lana, mkutenda cici akuno?” Mnyamataju ŵalijiganyaga sukulu yimpepe ni Lana. Jwalakwe ŵaliji yimpepe ni mamagwe soni angangagwe ŵakongwe ŵaŵampecesyaga kuluŵala lwa ndege paulendo wakwe wa ku South Africa. Mamagwe mnyamataju paŵamanyilile kuti Lana akusoŵa malo gagona ŵamsalile kuti akagone ku nyumba kwawo. Jemanjaji ŵampocele cenene Lana soni ŵam’wusisye yiwusyo yejinji yakwamba yindu yakusayikulupilila  nambosoni masengo gakwe gakulalicila mpela mpayiniya.

³ Lisiku lyakuyicisya ali amalisisye kulya yakulya yakundaŵi, Lana ŵajanjile yiwusyo yejinji pangani sya m’Baibulo. Pakumalisya, Lana ŵajigele adilesi ja liŵasali ni cakulinga cakuti apate mundu jwine jwakuti cajendelecele kutagulilana ni liŵasali. Kaneko ŵanyakwice kuwujila kumangwakwe kwakwendelecela kutumicila mpela mpayiniya jwakutamilicika. Lana akuyiwona kuti “Jwakupikana lipopelo” ŵajanjile mapopelo gakwe.—Sal. 65:2.

4. Ana citutagulilane yatuli?

⁴ Patusimene ni yakusawusya yangayijembeceya, yikusaŵa yangasawusya kupopela kwa Yehofa kuti atukamucisye. Jwalakwe akusasangalala ni mapopelo gampela gelega gakutyocela kwa ŵandu ŵakwe ŵakulupicika. (Sal. 34:15; Miy. 15:8) Naga tukusaganicisya ya lipopelo lyacisyasyo tuciyiwona kuti pana yindu yine yejinji yatukusosekwa kuyipopelela. Mwambone, kwende tulole yindu yakusosekwa yausimu yayisasile mu mbali sitatu syakumalisya sya m’lipopelo lyacisyasyoli. Citulolesoni yatukusosekwa kutenda mwakamulana ni mbali jamcece ja lipopelo lyacisyasyoli, jajili kuŵenda cakulya cetu calelo.—Aŵalanje Matayo 6:11-13.

5, 6. Ligongo cici kuli kwakusosekwa kupopelela cakulya cetu calisiku lililyose atamose tuli tukwete yakulya yejinji?

⁵ Yesu ŵasasile kuti tuŵendeje cakulya “cetu” calelo ngaŵa kuti cakulya “cangu” calelo. Jwakulolela mkuli jwine jwa ku Africa lina lyakwe Victor ŵatite, “Une ni ŵamkwangu tukusam’yamicila Yehofa, ligongo lyakuti akusatukamucisya kupata cakulya cetu calisiku lililyose, nambosoni kupata malo gagona galulele. Kusala yisyene abale akusatusamalila mwacinonyelo lisiku lililyose. Nambope ngusapopela kuti Yehofa ŵakamucisye abaleŵa kuti apateje mbiya syakwakamucisya atamose akusasimana ni yakusawusya.

⁶ Atamose tuli tukwete yakulya yakwanila yampaka tulye kwa masiku gejinji, tukusosekwape kwaganicisya abale ŵakulaga kapena ŵasimene ni ngosi syacipago. Tukusosekwa kwapopelela jemanjaji nambosoni tutendeje yindu mwakamulana ni mapopelo getugo. Mwambone, mpaka twagaŵile ŵakulambila acimjetu yindu yatukwete. Ndaŵi syosope tukamucisyeje nawo pamasengo gapacilambo cosope ni mbiya syetu, pakumanyilila kuti mbiyasyo akusasikamulicisya masengo pakwakamucisya ŵakulaga.—1 Yoh. 3:17.

7. Ana Yesu ŵasasile cisyasyo catuli pakutukalamusya kuti ‘tukadandawulaga ya lisiku lyakuyicisya’?

⁷ Yesu paŵakolasile ya cakulya cetu calisiku lililyose, jwalakwe ŵagopolelaga ya yindu yakusosekwa mwacitema paumi wetu. Jwalakwe ŵajendelecele kuŵeceta mwakusatendela Yehofa pakusamalila maluŵa gakwitinji, kaneko ŵatite, “Ana jwalakwe ngaŵa mkwaweka kupunda pelepa, jemanja ŵacikulupi capanandi? M’yoyo, akadandawulaga kuti, . . . ‘Ana timbwale cici?’” Jwalakwe ŵamalisisye mwakuwilisya maloŵe gakuti, “Akadandawula ya lisiku lyakuyicisya.” (Mat. 6:30-34) Pelepa Yesu ŵalosisye kuti tuŵeje ŵakwikutila ni yindu yakusosekwa ya lisiku lililyose. Yindu yakwe mpela malo gagona gambone, kamula masengo gakamucisya kusamalila liŵasa, soni lunda lwakutukamucisya kumalana ni yakusawusya yam’cilu mwetu. Patukupopela ngatukusosekwa kusalaga yindu yeleyipe, nambo tusalejesoni yindu yausimu yayili yakusosekwa mnope.

8. Ana yiŵasasile Yesu yakwamba cakulya cetu calisiku lililyose yikusatukumbusya yindu yapi yakusosecela mnope? (Alole ciwulili cacili kundanda kwa nganiji.)

⁸ Yiŵasasile Yesu yakwamba cakulya cetu calisiku lililyose yikusosekwa kutukumbusya ya yakusosecela yetu yausimu. Yesu ŵatite, ‘Mundu ngaŵa mkutama ni umi ni cakulyape, nambo ni maloŵe gosope gakuŵecetedwa ni Yehofa.’ (Mat. 4:4) M’yoyo, tukusosekwa tupopeleje kuti  Yehofa ajendelecele kutulisya cakulya causimu pandaŵi jakwe.

9. Ligongo cici mpaka tujile kuti yakulemwa yili mpela ngongole?

⁹ Maloŵe gamwiŵanda ga pa Matayo 6:12 m’Baibulo ja Ciceŵa gakusalosya kuti maloŵe gakuti “yakulemwa” gakusagopolela “ngongole.” (Luk. 11:4) Yesu ŵasasile kuti yakulemwa yili mpela ngongole. M’caka ca 1951, Sanja ja Mlonda jasasile kuti patulemwisye tukusaŵa mpela tukwete ngongole kwa Yehofa. Jwalakwe akusasaka kuti tumnonyeleje soni tumpikanileje. M’yoyo, naga tukutenda yakulemweceka nikuti ngatukutenda yakusasaka Yehofa, soni unasi wetu ni jwalakwe mpaka umale. Sanjaji jasasilesoni kuti, “Kutenda yakulemwa nganikuŵa kumnonyela Mlungu.”—1 Yoh. 5:3.

10. Ana yikusakomboleka catuli kuti Yehofa atukulucile yakulemwa yetu, soni ana tukupikana wuli ligongo lya yeleyi?

¹⁰ Mlungu ŵapelece mwanace jwakwe mpela mbopesi jaciwombolo kuti atukulucileje yakulemwa ya lisiku lililyose. Atamose kuti ciwomboloci capelecekwe yaka 2,000 yipiteyo, nambo tukusosekwa kuciwonaga mpela kuti acipelece lelo. ‘Mtengo wa ciwombolo’ ca umi wetu ‘wuli wapenani mnope’ mwati mundu jwangali umlama ngaŵa mkupakombola kuwupeleka. (Aŵalanje Salimo 49:7-9; 1 Petulo 1:18, 19.) Tukusosekwa kwendelecela kum’yamicila Yehofa ligongo lya mtuka waŵatupelewu. Maloŵe gakuti “yakulemwa yetu,” ngaŵa kuti “yakulemwa yangu,” gakusatukumbusya kuti wosope ŵakusamlambila Mlungu akusosekwa ciwomboloci. Yehofa akusasaka kuti tuganicisyeje yakusosecela yetu yausimu soni ya ŵane, kupwatikapo ŵatuleŵele. Patukwakululucila ŵane tukusalosya kuti tukusanonyela abale ŵetu, mpela mwaŵatendele Yehofa pakutukululucila yakulemwa yetu.—Akolo. 3:13.

11. Ligongo cici tukusosekwa kwakulucila ŵane?

¹¹ Ligongo lyakuti tuli ŵangali umlama ndaŵi sine mpaka tumsunjile m’bale jwetu cakulukosi. (Lev. 19:18) Naga tukwamba kwasalila ŵandu yakulemwa ya mjetujo mpaka yakwayesoni ŵandu ŵane. Yeleyi mpaka yisokonasye mkamulano wa mumpingo. Kunda kuti yeleyi yitendekweje mpaka kulosye kuti ngatukuyamicila mtuka wa ciwombolo waŵatupele Mlungu. Atati ŵetu cacileka kutukululucila yakulemwa yetu kupitila mu mbopesi ja Yesu, naga ngatukwakululucila ŵane. (Mat. 18:35) Yesu ŵatagulile yeleyi kumbesi kwa lipopelo lyakwe lyacisyasyo. (Aŵalanje  Matayo 6:14, 15) Tukatendagasoni yakulemweceka yekulungwakulungwa kuti Mlungu ajendelecele kutukululucila. Kwende tulole mbali jine jampaka jitukamucisye kuŵambala yakulemweceka.—1 Yoh. 3:4, 6.

12, 13. (a) Ana cici cicamtendecele Yesu paŵagambile kubatiswa? (b) Ligongo cici jwalijose akusosekwa kutendapo kandu pasimene ni yakulingwa? (c) Ana kulupicika kwa Yesu mpaka ciwa cakwe kwalosisye cici?

¹² Kutagulilana yayamtendecele Yesu ali agambile kubatiswa kwene mpaka kutukamucisye kupikanicisya kusosekwa kwa mbali ja lipopelo jakuti, “Akatujinjisya mu yakulingwa.” Msimu wa Mlungu wamlongolele Yesu kwawula m’cipululu. Ligongo cici? “Kuti akalinjikwe ni Satana.” (Mat. 4:1; 6:13) Tukasimonga ni yeleyi. Mlungu pakumtumisya Mwanagwe pacilambo capasi ŵakwete cakulinga cambone. Ŵasakaga kuti Yesu camasye ngani jajatandite ligongo lyakuti Adamu ni Hawa ŵakanile ulamusi wa Mlungu. Papagwile yiwusyo yakusosekwa kuyijanga, mpela yakuti, ana Mlungu ŵampanganyisye mundu m’litala lyambone? Ana yaliji yakomboleka kuti mundu jwamlama ajendelecele kuŵa jwakulupicika atamose pasimene ni yakulingwa kutyocela kwa “jwakusakalajo”? Soni ana ŵandu mpaka apakombole kulilamulila cenene mpela mwaŵaŵecetele Satana? (Gen. 3:4, 5) Kuti kwanga kwa yiwusyo yeleyi kupatikane pasosekwaga ndaŵi jakwanila kuti malayika soni ŵandu wosope amanyilile kuti Mlungu akusalamulila cenene.

¹³ Yehofa ali jwamswela soni jwalakwe ngaŵa mkumlinga mundu kuti atende yindu yakusakala. Satana ni jwali “jwakulinga” ŵandu. (Mat. 4:3) Satana mpaka atulinje m’matala gakulekanganalekangana. Nambo kuli kwa mundu jwalijose kunda kuti agwile mu yakulingwa kapena iyayi. (Aŵalanje Yakobo 1:13-15) Yesu ŵakanile mwacitema cakulingwa cilicose ca Satana pakamulicisya masengo Maloŵe ga Mlungu. Pakutenda m’yoyo, Yesu ŵalosisye kuti ŵaliji kumbali ja ulamusi Mlungu. Nambo Satana nganaleka kumlinga Yesu. Jwalakwe ŵamlesile kaje “kwembeceya ndaŵi jine jambone.” (Luk. 4:13) Satana ŵalinjilelinjile kumlinga Yesu kuti akaŵa jwagoloka, nambo Yesu ŵakanile yosopeyo. Yesu ŵajendelecele kuŵa kumbali ja ulamusi wa Yehofa, soni ŵalosisye kuti mundu jwamlama mpaka aŵe jwakulupicika atamose ali asimene ni yakulingwa yekulungwa. Nambotu Satana akusakape kwatega ŵakumkuya ŵa Yesu, kupwatikapo wawojo.

14. Ana tukusosekwa kutenda cici kuti tumalaneje ni yakulingwa?

¹⁴ Ligongo lyakuti ngani jakwamba ulamusi wa Mlungu jikwendelecelape, Yehofa akusamkunda Satana kuti atulinjeje pakamulicisya masengo cilamboci. Nambo Mlungu jwangatujinjisya mu yakulingwa. M’malo mwakwe, jwalakwe akusakulupilila kuti mpaka tupakombole kupilila yakulingwayo, soni ali jwakusacilila kutukamucisya. Ligongo lyakuti ŵatupele ufulu wakulisagulila, Yehofa ngakusagamba kutucenjela kuti tukasimana ni yakulingwa. M’yoyo, kuti tumalaneje ni yakulingwa tukusosekwa kutenda yindu yiŵili ayi; kwendelecela kuŵa mesope mwausimu, soni kwendelecela kupopela. Ana Yehofa akusajanga catuli mapopelo getu?

15, 16. (a) Ana yakulingwa yine yapi yatukusosekwa kuyiŵambala? (b) Ana tukusosekwa kwajimba magambo ŵani patugwilile m’cakulingwa?

¹⁵ Yehofa akusatupa msimu wakwe weswela, wampaka utupe macili, soni kutukamucisya kulimbana ni yakulingwa. Kupitila m’Maloŵe gakwe, soni mumpingo, Mlungu akusatukalamusya ya yindu yatukusosekwa kuyiŵambala, mpela kumalila ndaŵi, mbiya soni macili getu pa yindu yangasosekwa mnope. Espen ni ŵamkwakwe Janne, akusatama m’cilambo cakusicila mnope ku Europe. Kwa yaka yejinji, jemanjaji ŵatendaga upayiniya wakutamilicika kumkuli wakusosecela ŵakulalicila ŵajinji m’cilambo cawoco. Jemanjaji ŵalesile upaniyawo ligongo  lyakuti ŵakwete mwanace. Apano akwetesoni mwanace jwine. Espen ŵatite, “Tukusapopela kwa Yehofa ndaŵi ni katema kuti tukagwila mu yakulingwa ligongo apano ngatukutenda yejinji pa undumetume wetu kulekangana ni mwatwatendelaga kala. Tukusam’ŵenda Yehofa kuti atukamucisye kuti tuŵepe ŵakulimba mwausimu, soni ŵamtawu mu undumetume.”

¹⁶ Cakulingwa cine caciwandile mnope moŵa agano cili kulolela yakuŵagula. Naga tukugwila m’cakulingwa celeci tukamjimba magambo Satana. Ligongo cici? Ligongo Satana soni cilambo cakweci ngaŵa mkutukanganicisya kuti tutendeje yindu yangatukusaka. Ŵane agwilile m’cakulingwaci ligongo lyaganicisya mnope yindu yakusakala. Nambo mpaka tuŵambale cakulingwaci mpela mwatendele Aklistu ŵajinji.—1 Akoli. 10:12, 13.

17. (a) Ana mpaka tutende catuli yindu mwakamulana ni maloŵe gakuti atukulupusye kwa jwakusakalajo? (b) Ana pacangakaŵapa tusangalale ligongo cici?

¹⁷ Kuti tutende yindu mwakamulana ni lipopelo lyakuti “Atukulupusye kwa jwakusakalajo,” tukusosekwa kulinjilila kuti ‘tukaŵa mbali jacilambo ca Satanaci,’ soni ngatukusosekwa ‘kucinonyela cilambo ca Satana kapena yindu yam’cilambo.’ (Yoh. 15:19; 1 Yoh. 2:15-17) Kuti yeleyi yikombolece tukusosekwa kwendelecela kuŵa ŵakulimba. Tucikusangalala mnope Yehofa pacacijanga mbali ja lipopelo jeleji ni kumtyosya Satana, soni cilambo cakwe cakusakalaci. Tukaliŵalila kuti kutandila paŵamgwisisye pacilambo capasi, Satana akumanyilila kuti asigele ni kandaŵi kamnono. Ni ligongo lyakwe akutenda cilicose campaka akombole kuti tukaŵa ŵagoloka. M’yoyo, tukusosekwa kwendelecela kupopela kuti Mlungu atukulupusye kwa jwakusakalajo.—Ciu. 12:12, 17.

18. Kuti citukulupuce pacicijonanjikwaga cilambo ca Satanaci, ana tukusosekwa kwendelecela kutenda cici?

¹⁸ Ana akusacilila mnope kutama mundaŵi jwakusangalasya jelejo? Naga yili m’yoyo, akusosekwa kwendelecela kupopela kuti Ucimwene wa Mlungu uswejesye lina lya Mlungu, soni kuti lisosa lyakwe litendekwe pacilambo capasi. Ajegamileje kwa jwalakwejo kuti ŵakamucisyeje pa yakusosecela yawo yausimu ni yakucilu. Aŵe ŵakusimicisya mtima kutenda yindu mwakamulana ni lipopelo lyacisyasyo.