Paul, jwamlume jwa ŵanace ŵaŵili ŵatite, “Yindu payakwesile mtengo mnope m’cilambo cetu, cakulya catandite katala soni kusoŵa. Twajimaga pamsele kwandaŵi jelewu nambo ndaŵi syejinji yakulya yamalaga mkanituyice kusogolo. Ŵandu ŵagandile mnope, soni ŵane ŵakomokaga ligongo lya sala. Mtengo wa yindu yakusosekwa mnope ŵakwesile mwacitema kwika pa mamiliyoni, kaneko mabiliyoni. Pambesi pakwe, mbiya sya m’cilambo cetu syamasile macili. Yeleyi yatendekasisye kuti mbiya syangu syasyaliji ku banki, ku inshulansi, soni sya peshoni silece kamula masengo.”

Paul ŵamanyililaga kuti akusosekwa kamulicisya masengo ‘lunda lwakamucisya’ kuti alisamalileje liŵasa lyakwe. (Miyambo 3:21) Jwalakwe ŵatite, “Nakamulaga masengo gamagesi, nambo natandite kamula masengo galigose gambatile atamose gele malipilo gakwe galiji gamnono. Ŵane ŵambaga yakulya kapena yindu yine yam’nyumba panyuma pakwakamulila masengo. Pambele sopo mcece, twakamulicisyaga masengo juŵili jwinejo twasumisyaga. Kaneko napatile tuŵanace twanguku 40. Patwakusile, natusumisye ni kusuma tuŵanace twine twakwana 300. Kaneko nacenganyisye nguku 50 ni misaku ja utandi jiŵili ja 50 kg. Ni misaku jiŵiliji, nakombwele kulisya liŵasa lyangu, soni maŵasa gane kwandaŵi jelewu.

Paul ŵamanyililagasoni kuti cindu cakusosekwa mnope cele jwalijose mpaka atende cili kulupilila Mlungu. Patukutenda yaŵatulamwile Mlungu, jwalakwe akusatukamucisya. Pakwamba ya kupata yindu yakusosecela mnope pa umi, Yesu ŵatite: “Mlece kulaga nganisyo; pakuŵa . . . Atati ŵenu akusamanyilila kuti jemanja mkusosecela yindu yeleyi.”—Luka 12:29-31.

Satana jwali m’magongo jwamkulungwa jwa Mlungu, atendekasisye kuti ŵandu alajeje nganisyo ligongo lyaganicisya mnope ya yindu yakucilu. Ŵandu akusadandaula mnope ya yindu yakusosecela, soni akusalingalinga mwamtawu kuti apate yindu yangasosekwa mnope. Ŵajinji akusajigala ngongole, yayikusatendekasya kuti alijiganye mwakupweteka kuti “jwakongola  yindu akusaŵa kapolo jwa jwakongosyajo.”—Miyambo 22:7.

Ŵandu ŵane ŵangasagula yakutenda mwalunda. Paul ŵasasile kuti, “Ŵandu ŵakuŵandikana nawo ŵajinji ŵagalesile maŵasa gawo ni kwawula ku yilambo yine kuti akapate yindu yakwakamucisya. Ŵane mwa ŵanduŵa nganakola yipepala yakwendela yakuŵajilwa mwati nganapata masengo. Ndaŵi syejinji ŵatamilaga kwajuŵa ŵapolisi soni ŵagonaga m’misewu. Jemanjaji nganampa Mlungu lipesa lyakuti ŵakamucisye. Nambo une ni liŵasa lyangu twasimicisye mtima kuti tulajile yimpepe, soni twajegamilaga kwa Mlungu kuti catukamucisye.”

Paul ŵasasilesoni kuti, “Yesu ŵatite, ‘Mkalagaga nganisyo ni ya lisiku lyakuyicisya, pakuŵa lisiku lyakuyicisya licikola yindu yakwe yakulagasya nganisyo. Yakusawusya ya lisiku lililyose yili yakwanila palisikulyo.’ M’yoyo, nam’ŵendaga Mlungu kuti ‘atupe cakulya cetu calelo’ kuti tukawa. Yehofa ŵatukamucisyaga mpela muŵaŵecetele Yesu. Ndaŵi sine twalyaga yakulya yangatukuyinonyela. Mwambone, lisiku line najimi pamsele kuti sume yakulya nambo nganimanyililaga yakulya yaŵasumisyaga. Panayice kusogolo nayiweni kuti akusumisya yakulya yati mpela likoko. Atamose kuti nganinayinonyela, nasumilepe mwati twalile ligulo lyelelyo. Ngusam’yamicila Yehofa ligongo pangali lisiku litwagonile ni sala.” *

“Apano yindu yili cenene. Nambo payayatutendeceleyi, tulijiganyisye kuti kulupilila Mlungu kuli kwakamucisya mnope patulagasice nganisyo. Naga tukutenda lisosa lya Yehofa, * jwalakwe cacitukamucisya ndaŵi syosope. Tukuweni kwanilicikwa kwa lilemba lya Salimo 34:8 lyalikusati, ‘Apasye ni calole kuti Yehofa ali jwambone. Jwana upile mundu jwakutilila kwa jwalakwe.’ Ligongo lya yeleyi ngatukusajogopa kusimanasoni ni cakusawusya cilicose cakwayana ni mbiya.

“Apano tupikanicisye kuti cakusosekwa mnope pa umi wa mundu cili cakulya, ngaŵaga masengo kapena mbiya. Tukwembeceya mwalung’wanu kwanilicikwa kwa maloŵe ga Mlungu gakuti, ‘Pacilambo paciŵa yagungula yejinji.’ Pandaŵi ajino, ‘tukwikutilaga patukwete yakulya soni yakuwala.’ Maloŵe ga m’Baibulo gagakusatupa macili gali gakuti, ‘Umi wenu ukaŵa wakunonyela mbiya, nambo m’ŵeje ŵakwikutila ni yindu yimkwete pandaŵijo. Pakuŵa Mlungu ŵatite, “Ngasinamleka kapena kumjasa ata panandi.” Mwati tulimbeje mtima ni kujila kuti, “Yehofa ali jwakungamucisya jwangu. Ngasinjogopa.”’” *

Pakusasosekwa cikulupi cakulimba kuti mundu ‘ajende ni Mlungu’ mpela mwakutendela Paul ni liŵasa lyakwe. (Genesis 6:9) Cinga apano tukulaga kapena kusogoloku citulaje ligongo lyakusoŵa mbiya, tukusosekwa kujigalila cisyasyo ca kulupicika kwa Paul, soni kamulicisya kwakwe masengo lunda lwa Mlungu.

Nambi wuli naga tukulaga nganisyo ligongo lya yakusawusya ya mwiŵasa?