Ana kuli kuloŵela kuganisya kuti ŵawe cacijimuka? Ndumetume Paulo nganayiwonaga m’yoyo. Jwalakwe ŵalembile kuti, “Naga tukwete cembeceyo mwa Klistu mu umi awunope, nikuti tuli ŵakutesya canasa kupunda ŵandu wosope. Nambo Yesu ŵamjimwisye kuŵawe, ni kuŵa cisogosi candanda ca ŵandu ŵakugona mu ciwa.” (1 Akolinto 15:19, 20) Jwalakwe nganakayicilaga kuti ŵawe cacijimuka. Ŵasimicisyaga yeleyi ligongo lyakuti Yesu ŵajimwice kuŵawe. * (Masengo 17:31) Ni ligongo lyakwe Paulo ŵamkolasile Yesu kuŵa “cisogosi candanda.” Jwalakwe jwaliji jwandanda kwimuka ni kupocela umi wangawa. Yeleyi yikulosya kuti panasoni ŵane ŵacacijimuka.

Cindu cinesoni campaka cakamucisye kulupilila kuti ŵawe cacijimuka cili kumanyilila kuti Yehofa ali Mlungu jwausyesyene. “Mlungu . . . nganaŵa alambwisye.” (Tito 1:2) Yehofa nganalambusyeje citandilile, soni ngasalambusya kose. Ana jwalakwe mpaka atusalile kuti cacajimusya ŵawe, soni kulosya mwacacitendela yeleyi, ali mkwamba kutulambusya? Yeleyi ngaŵa mkutendekwa.

Ligongo cici Yehofa alinganyisye yakwimusya ŵawe msogolo muno? Ligongo lyakuti akusiŵanonyela ŵandu. Yobu ŵawusisye kuti, “Ali awile mundu, ana cacitamasoni ni umi?” Kaneko ŵatite, “Ŵalakwe caciŵilanga, nipo une cinjajanga. Cacigasacilila masengo ga magasa gawo.” (Yobu 14:14, 15) Yobu nganakayicilaga kuti Atati ŵakwe ŵacinonyelo cacisacilila kumjimusya. Ana Mlungu acenjile? Iyayi. Jwalakwe ŵatite, “Une ndili Yehofa. Ngangusacenga.” (Malaki 3:6) Mlungu akusasacililape kwawona ŵandu ŵaŵawile ali akwetesoni umi wambone soni wakusangalala. Yeleyi yikulandanasoni ni yampaka asacilile nangolo jwalijose jwacinonyelo mwanace jwakwe pajasice. Nambo  kulekangana kwakwe kuli kwakuti, Mlungu akwete macili gakutendela cilicose cakusaka.—Salimo 135:6.

Yehofa cacimpa Mwanagwe macili gakuyikasya cisangalalo kwa ŵandu ŵaŵele ali mkudandawula ligongo lya ciwa ca ŵakunonyelwa ŵawo. Ana Yesu akusasacilila kuti ŵawe cajimuce? Mkanamjimusye Lasalo, Yesu ŵayiweni kuti ciwa ca Lasalo capwetece mumtima acalumbugwe soni acimjawo, mwati nombe najo “ŵagwisisye misosi.” (Yohane 11:35) Ndaŵi jine, Yesu ŵasimene ni jwamkongwe jwamasije jwa ku Naini, jwele mwanagwe jwamlume jumopejo ŵawile. Yesu “ŵamtendele canasa, ni ŵamsalile kuti, ‘Mlece kulila.’” Jwalakwe ŵamjimwisye mwanacejo ndaŵi jijojo. (Luka 7:13) Yeleyi yikulosya kuti ciwa soni kulila yikusampweteka mnope Yesu. Yesu cacisangalala mnope pacacakamucisya ŵandu kuti asangalaleje mmalo mwakulila.

Ana pakwete palisile ligongo lya ciwa? Mpaka aganisye kuti ciwa cili cakusawusya canganiciŵa cimasile. Nambo amanyilile kuti ciwa cicimala pandaŵi jele Mlungu cacijimusya ŵawe kupitila mwa Mwanagwe. Akumbucileje kuti Mlungu akusaka kuti wawojo ciŵawone soni kwapocela ŵakunonyelwa ŵawo pacacijimukaga.

Lionel, jwatumkolasile mu ngani jandanda jula, ŵatite, “Mkupita kwa ndaŵi, nalijiganyisye yakwamba kwimuka kwa ŵawe. Pandanda nganinayikulupililaga yeleyi, soni nganinamkulupililaga mundu juŵasalile yeleyi. Nambo nawungunyisye m’Baibulo ni nayiweni kuti yaliji yisyene. Apano ngwembeceya mwalung’wanu kuti cinawonesoni anganga ŵangu.”

Ana akusaka kumanyilila yejinji? Ŵa Mboni sya Yehofa cacisangalala kwasalila ligongo lyakusakulupilila kuti ŵawe cacijimuka pakamulicisya masengo Baibulo ja wawojo. *