1, 2. (a) Ligongo cici akusasimicisya kuti Yehofa akusanonyela ŵandu ŵakwe? (b) Ana Yehofa ŵapanganyisye ŵandu m’litala lyatuli?

LIGONGO cici ngakusakayicila kuti Yehofa akusiŵanonyela ŵandu ŵakwe? Mkanajanje ciwusyoci, aganicisye kaje yisyasyo yakuyicisyayi. Kwa yaka yejinji, ŵakulupilila acimjakwe ŵa mlongo jwine lina lyakwe Taylene, ŵaŵele ali kumlimbikasya kuti amanyilileje yindu yampaka ayikombole, soni yanganaŵa akombwele. Jwalakwe ŵatite, “Yikaŵe kuti Yehofa ngakusanonyela, ngamkanajendelecela kungamucisya pangani jeleji.” Mlongo jwinesoni lina lyakwe Brigitte jwele ŵamkwakwe ŵajasice ni kulemlecela ŵanace ŵaŵili, ŵatite, “Kulela ŵanace m’cilambo ca Satanaci kuli kwakusawusya, mnopemnope naga ukwalela jika. Nambo ngusasimicisya kuti Yehofa akusanonyela ligongo akusalongolela ndaŵi syosope atamose pasimene ni yakusawusya, soni jwalakwe ngasakunda kuti simane ni yakusawusya yampaka ndepele kupilila.” (1 Akoli. 10:13) Sandra, akulwala ulwele wakuti ngaŵa mkuwuposya. Pamsongano waupande, mlongo jwine ŵamlosisye lung’wanu. Ŵamkwakwe mlongojo ŵaliji ŵakumanyika mnope. Ŵamkwakwe Sandra ŵatite, “Atamose kuti nganitummanyililaga mnope mlongojo nambo  twasangalele mnope ni yaŵatesileyo. Yakusatenda Aklistu acimjetu pakulosya kuti akusatunonyela atamose yiŵe yamnono, yikusalosya mwakusatunonyelela Yehofa.”

² Yehofa ŵapanganyisye ŵandu m’litala lyakuti anonyelaneje. Mpaka yiŵe yangasawusya kutenguka naga ŵane ngakutunonyela ligongo lya yindu yangayijembeceya kapena yakuŵasya mpela ulwele, kusoŵa mbiya, kapena naga tukuwona kuti undumetume wetu ngawukwenda cenene. Naga tutandite kuyiwona kuti Yehofa alesile kutunonyela, tukumbucileje kuti jwalakwe akusatuwona kuti tuli ŵakusosekwa, soni kuti ‘akusakamula mkono wetu wamlyo’ ni kutukamucisya. Jwalakwe ngasatuliŵalila naga tuli ŵakulupicika.—Yes. 41:13; 49:15.

3. Ana cici campaka citukamucisye kuŵa ŵakusimicisya kuti Yehofa akusatunonyela mnope?

³ Ŵandu ŵatwakolasile mu ndime jandanda ŵala, nganakayicilaga ata panandi kuti Mlungu ŵakamucisyaga pandaŵi jakusawusya. M’wejisoni mpaka tuŵe ŵakusimicisya kuti jwalakwe ali kumbali jetu. (Sal. 118:6, 7) Mungani ajino citulole yindu yayikusalosya kuti Mlungu akusatunonyela. Yindu yakwe yili: (1) yaŵapanganyisye, (2) Maloŵe gakwe, (3) lipopelo, soni (4) ciwombolo. Kuganicisya mwakusokoka yindu yambone yatutendele Yehofa kucitukamucisya kuyamicila mnope cinonyelo cakwe.—Aŵalanje Salimo 77:11, 12.

4. Ana kuganicisya mwakusokoka ya yindu yaŵapanganyisye Yehofa kukusatukamucisya kumanyilila cici? (Alole ciwulili cacili kundanda kwa nganiji.)

⁴ Ana yindu yaŵapanganyisye Yehofa yikusalosya kuti jwalakwe akusatunonyela mnope? Elo. Ligongo kupanganya yindupeko kwalosisye kuti Mlungu akusatunonyela. (Alo. 1:20) Jwalakwe ŵacipanganyisye cilamboci kuti paŵeje yakumela soni yinyama yayikusatukamucisya kuti tuŵeje cijumi soni kuti yindu yitujendeleje cenene. Jwalakwe akusamanyilila kuti tukusasosecela yakulya kuti tujendelecela kutama ni umi. Yehofa ŵapanganyisye yakulya yakulekanganalekangana m’litala lyakuti yikamalaga kuti ŵandu asangalaleje nayo. Jwalakwe ŵatupanganyisyesoni kuti tupikaneje kunong’a patukulya. (Mlal. 9:7) Mlongo jwine jwa ku Canada lina lyakwe Catherine, akusasangalala pakulola yakupanganyikwa mnopemnope ndaŵi ja cuku. Jwalakwe ŵatite, “Yikusaŵa yakusangalalasya kulola yakupangayikwa pandaŵi jeleji. Maluŵa gakusasipuka soni yijuni yikusawujila kutyocela kuyapite. Ngusasangalalasoni ni kajuni kanekakwe kakakusayika paliwindo lya kicini jangu kukusosasosa yakulya. Yindu yakusangalalasya yosope yaŵatupele Yehofa yikusalosya kuti jwalakwe akusatunonyela.” Atati ŵetu ŵakwinani akusasangalala ni yindu yaŵapanganyisye, soni akusasaka kuti nombe m’weji tusangalaleje nayo.—Mase. 14:16, 17.

5. Ana kapanganye ka ŵandu kakusalosya catuli cinonyelo ca Yehofa?

⁵ Yehofa ŵatupanganyisyesoni m’litala lyakuti tupakomboleje kamula masengo gagakusatukamucisya kuŵa ŵakusangalala. (Mlal. 2:24) Jwalakwe ŵasakaga kuti ŵandu agumbale pacilambo cosope, soni aloleleje somba, yijuni ni yinyama yosope. (Gen. 1:26-28) Ŵalosisyesoni kuti akusatunonyela paŵatupele ndamo syasikusatukamucisya kumsyasya jwalakwejo.—Aef. 5:1.

6. Ligongo cici tukusosekwa kuyamicila mnope maloŵe ga Mlungu?

⁶ Mlungu alosisyesoni kuti akusatunonyela mnope pakutupa Maloŵe gakwe. Maloŵe gakwega  gakusatusalila yatukusosekwa kumanyilila pakwamba Mlungu soni mwakusatendela yindu ni ŵandu. Mwambone, Malemba gakusatusalila mwaŵatendelaga yindu ni Ayisalayeli ŵanganampikanilaga ndaŵi syejinji. Lilemba lya Salimo 78:38 likusati, “Ŵatendele canasa. Ŵakululucilaga yakulemwa yawo soni nganiŵajonanga. Ndaŵi syejinji nganiŵatumbililaga soni nganiŵalosyaga ukali wakwe wosope.” Kuganicisya mnope lilembali mpaka kwakamucisye kumanyilila kuti Yehofa akusanonyela soni akusasamalila. Akakayicilaga kuti wawojo ali ŵakusosekwa mnope kwa Yehofa.—Aŵalanje 1 Petulo 5:6, 7.

7. Ligongo cici tukusosekwa kujiwona Baibulo kuŵa jakusosekwa mnope?

⁷ Baibulo jili jakusosekwa mnope ligongo ni jakusajikamulicisya masengo Mlungu pakuŵeceta nawe. Acinangolo pakuŵecetana mwagopoka ni ŵanace ŵawo akusakulupililana soni akusanonyelana mnope. Nambi wuli Yehofa? Atamose kuti nganam’woneje kapena kupikana maloŵe gakwe, nambo jwalakwe “akusaŵeceta” ni m’weji kupitila m’Baibulo, ni tukusosekwa kumpikanilaga. (Yes. 30:20, 21) Jwalakwe akusaka kutulongolela soni kutucenjela ku yindu yampaka yituwulasye. Akusakasoni kuti tummanyilile ni kumkulupililaga.—Aŵalanje Salimo 19:7-11; Miyambo 1:33.

8, 9. Ana Yehofa akusaka kuti tumanyilile yindu yatuli? Asale cisyasyo.

⁸ Yehofa akusaka kuti tumanyilileje kuti akusatunonyela soni kuti akusalola yindu yambone yatukusatenda. (2 Mbiri 16:9) Mwambone, Yehofa ŵalolite yindu yambone yaŵatesile Mwenye Yehosafati jwa ku Yuda. Ndaŵi jine,  Yehosafati ŵatesile yindu mwangali lunda pakunda kamulana ni Mwenye Ahabu jwa ku Yisalayeli. Jemanjaji ŵakamulene yakuputa ngondo ni Asiliya kuti ŵasumule msinda wa Lamoti-giliyadi. Atamose kuti ŵakulocesya ŵaunami 400 ŵamsalile mwenye jwakusakala Ahabu kuti cakapunde ngondojo, jwakulocesya jwakuwona jwa Yehofa, Mikaya ŵasasile kuti jemanjaji cacigomekwa. Ahabu ŵawilile kungondoko nambo Yehosafati ŵakulupwice mwaupile. Paŵawujile ku Yelusalemu, ŵamjamwice ligongo lyakamulana ni Ahabu. Atamose kuti Yehosafati ŵatesile yeleyi, Yehu mwanace jwa Hanani, ŵamsalile Yehosafati kuti, “Pana yindu yambone yayisimanikwe mwa wawojo.”—2 Mbiri 18:4, 5, 18-22, 33, 34; 19:1-3.

⁹ Yehosafati ali agambile kutanda kulamulila, ŵalamwile nduna, Alefi soni ŵambopesi kuti ajende m’misinda josope ja ku Yuda kuti ŵajiganyeje ŵandu Cilamusi ca Yehofa. Yeleyi yakamucisye mnope ligongo ŵandu ŵamitundu jine ŵatanditesoni kogopa Yehofa. (2 Mbiri 17:3-10) Atamose kuti Yehosafati ŵatesile yindu mwakuloŵela Yehofa ŵalolite yindu yambone yaŵatesile. Nganiji jikulosya kuti atamose kuti tukusatenda yindu yakulemweceka, Yehofa akusatunonyelape naga tukusasacilila kutenda yakumsangalasya jwalakwejo.

10, 11. (a) Ligongo cici mpaka tujile kuti lipopelo lili mtuka wapajika wakutyocela kwa Yehofa? (b) Ana Mlungu akusajanga catuli mapopelo getu?

¹⁰ Mtati jwacinonyelo akusapikanila ŵanace ŵakwe pakuŵeceta najo. Akusasaka kumanyilila yayikwalagasya nganisyo ŵanacewo ligongo lyakuti akusasamala ya jemanjajo. Atati ŵetu ŵakwinani, Yehofa, akusatupikanila patukuŵeceta nawo kupitila mwipopelo.

¹¹ Mpaka tupopele kwa Yehofa ndaŵi jilijose. Jwalakwe jwangatulekasya kum’yicila mwipopelo. Ali Mjetu jwakusatupikanila ndaŵi syosope. Taylene jwatumkolasile kundanda jula ŵatite, “Mpaka amsalile Yehofa cilicose.” Mlungu akusatujanga mapopelo getu kupitila m’Baibulo, m’mabuku getu, kapena kupitila m’maloŵe gakulimbikasya ga ŵakulupilila acimjetu. Jwalakwe akusapikana mapopelo getu, soni akusatupikanicisya kupunda mundu jwalijose. Kwanga kwakwe mapopelo getu kukusalosya kuti akusatunonyela mnope.

12. Ligongo cici tukusosekwa kumanyilila mapopelo gagakusasimanikwa m’Baibulo? Asale cisyasyo.

¹² Mpaka tulijiganye yejinji kutyocela m’mapopelo gagakusasimanikwa m’Maloŵe ga Mlungu. M’yoyo, ndaŵi sine tukusosekwa kutagulilana ya mapopeloga pakulambila kwetu kwa peŵasa. Kuganicisya mwaŵapelecelaga mapopelo ŵakutumicila ŵa Yehofa ŵakala, mpaka kutukamucisye kongolela mapopelo getu. Mwambone, aganicisye ya lipopelo lyaŵapelece Yona paŵaliji m’matumbo mwa cisomba. (Yona 1:17–2:10) Aganicisyesoni ya lipopelo lyakutyocela pasi pamtima lyaŵapelece Solomoni paŵawugulilaga nyumba ja Mlungu. (1 Maf. 8:22-53) Aganicisyesoni ya lipopelo lya cisyasyo lyaŵapelece Yesu pakusaka kutukamucisya. (Mat. 6:9-13) Cakusosekwa mnope cili cakuti ndaŵi ni katema ‘yakuŵenda yawo yimanyiceje kwa Mlungu.’ Yakuyicisya yakwe yiciŵa yakuti “mtendele wa Mlungu wawukusapunda kuganicisya mwakusokoka kulikose, ucicenjela mitima jawo soni nganisyo syawo.”—Afi. 4:6, 7.

13. Ana ciwombolo cikusakamucisya catuli ŵandu?

¹³ Mlungu ŵatupele mtuka wambone mnope wa mbopesi ja ciwombolo ja Yesu kuti “tupate umi.” (1 Yoh. 4:9) Pakwamba ya cinonyelo ca Mlungu pakutupa ciwomboloci, ndumetume  Paulo ŵalembile kuti, “Klistu ŵawilile ŵandu ŵangalambila Mlungu pandaŵi jakuŵajilwa. Pakuŵa yili yakusawusya kuti mundu jwine am’wilile mundu jwakulungama. Yili yisyene kuti mundu jwine mwine mpaka alimbe mtima ni kum’wila mundu jwambone. Nambo Mlungu akulosya cinonyelo cakwe kwetuwe, mwati patwaliji ŵakulemwa, Klistu ŵatuwilile.” (Alo. 5:6-8) Ciwombolo caŵatupele Mlunguci cikusatukamucisya kuŵa paunasi wambone ni Yehofajo.

14, 15. Ana ciwombolo cikusakamucisya catuli (a) Aklistu ŵasagulwe? (b) ŵakwete cembeceyo cakutama pacilambo capasi?

¹⁴ Yehofa ŵanonyele mwapajika ŵandu ŵane. (Yoh. 1:12, 13; 3:5-7) Jwalakwe ŵasagwile ŵanduŵa ni msimu wakwe kuti aŵe ‘ŵanace ŵakwe.’ (Alo. 8:15, 16) Paulo ŵatite Aklistu ŵasagulweŵa ‘ŵakwesisye ni kwatamika pampepe mmalo gakwinani mwakamulana ni Klistu Yesu.’ (Aef. 2:6) Jemanjaji ali pa ukumu welewu ligongo lyakuti ‘ŵapocele cidindo ca msimu weswela welagucisyewo, wawuli cikole ca yindu yacacipocela msogolo.’ Yindu yakwe yili ‘cembeceyo cawo cakuja kutama kwinani.’—Aef. 1:13, 14; Akolo. 1:5.

¹⁵ Nambo ŵandu ŵajinji ŵakusakulupilila ciwombolo, akwete upile wakuŵa acimjakwe ŵa Yehofa soni akwete cembeceyo cakuŵa ŵanace ŵa Mlungu ŵacacitama pacilambo capasi ca Paladaiso. M’yoyo, kupitila m’ciwombolo, Yehofa ŵalosisye kuti akusanonyela ŵandu wosope. (Yoh. 3:16) Naga tukusaka kutama pacilambo kwangamala tukusosekwa kumtumicila Yehofa mwakulupicika. Kutenda yeleyi kucitukamucisya kuŵa ŵakusimicisya kuti Yehofa caciwutendekasya umi wetu kuŵa wakusangalala m’cilambo casambano. M’yoyo, tukusosekwa kuciwona ciwombolo mpela litala lya Mlungu lyakulosya kuti akusatunonyela mnope.

16. Ana ganicisya ya matala ngakusatunonyelela Yehofa mpaka kutukamucisye catuli?

¹⁶ Yehofa alosisye kuti akusatunonyela m’matala gangaŵalanjika. Jwamalumbo Daudi ŵajimbile kuti, “Kwa une nganisyo syawo sili syakusosekwa mnope, wawo Mlungu, soni sili syejinji mnope. Naga ndili linjile kusiŵalanga, mpaka siŵe syejinji kupunda msanga.” (Sal. 139:17, 18) Tukusosekwa kunda kuti nganisyosi situtendekasyeje kusacilila kumnonyela mnope Yehofa ligongo lya cinonyelo cakwe kwetuwe. Tukusosekwa kutenda yiliyose yampaka tukombole kuti tumsangalasyeje jwalakwe.

17, 18. Ana mpaka tulosye catuli kuti tukusamnonyela Mlungu?

¹⁷ Mpaka tulosye kuti tukusamnonyela Yehofa m’matala gakulekanganalekangana. Mwambone, tukusalosya kuti tukusamnonyela Mlungu, soni acimjetu mwakamula nawo mwamtawu masengo gakulalicila ya Ucimwene. (Mat. 24:14; 28:19, 20) Tukusalosyasoni kuti tukusamnonyela Yehofa patukupilila yakulinga cikulupi cetu. (Aŵalanje Salimo 84:11; Yakobo 1:2-5.) Naga yakulingwayo yiyikeni pakusawusya mnope, tukakayicilaga kuti Mlungu akumanyilila yeleyo, soni catukamucisye ligongo tuli ŵakusosekwa kwa jwalakwejo.—Sal. 56:8.

¹⁸ Kumnonyela mnope Yehofa kucitutendekasya kuti tuganicisyeje mwakusokoka ya yindu yaŵapanganyisye, soni yitendo yakwe yambone. Tukusalosya kuti tukusamnonyela Mlungu soni tukusagacimbicisya Maloŵe gakwe patukuŵalanga Baibulo mwamtawu. Cinonyelo cetu pa Yehofa cikusatutendekasya kuti tum’yicile jwalakwe mwipopelo. Patukuganicisya ya ciwombolo caŵatupele kuti atukululucileje yakulemwa yetu, tukusakusya cinonyelo cetu pa Mlungu. (1 Yoh. 2:1, 2) Gelega gali gane mwa magongo gakututendekasya kumnonyela Yehofa ligongo lya cinonyelo cakwe.