1. Ana ndumetume Yohane ŵalimbikasisye Aklistu kuti aganicisyeje ya cici, soni ligongo cici?

PA lilemba lya 1 Yohane 3:1 ndumetume Yohane ŵatulimbikasisye kuti tuganicisyeje mnope ya cinonyelo cekulungwa ca Yehofa. Lilembali likusati, “Aganicisye ya cinonyelo cekulungwa catulosisye Atati.” Kuganicisya ya cinonyelo cekulungwa ca Yehofa celeci kucitukamucisya kumnonyela mnope, soni kucilimbisya unasi wetu ni jwalakwe.

2. Ligongo cici ŵane akusaganisya kuti Yehofa ngakusiŵanonyela?

² Ŵandu ŵane ngakusamanyilila kuti Mlungu akusiŵanonyela. Jemanjajo akusaganisya kuti Mlungu jwangasamala ya ŵandu, nambo akusagamba kutuŵicila malamusi gakuti tukuyeje soni akusapa cilango ŵandu ŵangapikanila. Soni ligongo lya yijiganyo yaunami, ŵane akusaganisya kuti Mlungu jwangatunonyela soni kuti m’weji ngakomboleka kumnonyela jwalakwe. Panasoni ŵane ŵakusaganisya kuti Mlungu akusiŵanonyela ŵandu wosope mwangajigalila kuti akusatenda yatuli. Nambo, paŵalijiganyaga Baibulo ŵamanyilile kuti cinonyelo cili ndamo japenani ja Yehofa, soni kuti cinonyelo cakweco camtendekasisye kuti apelece Mwanagwe mpela mbopesi jakutuwombola wosope. (Yoh. 3:16; 1 Yoh. 4:8) Nambope, ligongo  lya yindu yayatendecele pa umi, mpaka yasawusye kupikanicisya mwakusiŵanonyelela Yehofa.

3. Ana cici cacikusatukamucisya kupikanicisya kuti Mlungu akusatunonyela?

³ Sano, ana Yehofa akusatunonyela m’matala gapi? Kuti tumanyilile kwanga kwa ciwusyoci, candanda, tukusosekwa kupikanicisya ya unasi wawupali pasikati pa Yehofa ni m’weji. Jwalakwe ni juŵapanganyisye ŵandu wosope. (Aŵalanje Salimo 100:3-5.) Ni ligongo lyakwe Baibulo jikusamkolanga Adamu kuŵa “mwanace jwa Mlungu.” (Luk. 3:38) Konjecesya pelepo, Yesu ŵasalile ŵakumkuya ŵakwe kuti amkolanjeje Mlungu kuti “Atati ŵetu ŵakwinani.” (Mat. 6:9) Pakuŵa Yehofa ni Mkupeleka Umi, jwalakwe ali Atati ŵetu. M’yoyo, mpaka tujile kuti Yehofa akusatunonyela mpela mwele mtati jwacinonyelo akusiŵanonyelela ŵanace ŵakwe.

4. (a) Ana Yehofa akusalekangana catuli ni acatati ŵaumundu? (b) Ana mungani ajino soni jakuyicisya citulijiganye cici?

⁴ Yili yisyene kuti acatati waumundu ali ŵangali umlama. M’yoyo nganaŵa akombwele kulosya cinonyelo kwa ŵanace ŵawo mwakulandana ni Yehofa. Komboleka kuti ŵane mwa jemanjaji akusakumbucila yangalwe yaŵatendelaga acatati ŵawo. Nambope, Yehofa nganaŵa mpela acatati ŵeleŵa. Jwalakwe ali mtati jwambone kupunda wosope. (Sal. 27:10) Kumanyilila mwakusatunonyelela Yehofa soni yakusatenda pakutusamalila mpaka kutukamucisye kum’ŵandicila jwalakwe. (Yak. 4:8) Mungani ajino, citulijiganye matala mcece gakusatulocesya Yehofa cinonyelo cakwe. Mungani jakuyicisya, tucilijiganyasoni yindu mcece yampaka tutende pakulosya kuti tukusamnonyela Yehofa.

5. Ana Paulo ŵasalile cici ŵandu ŵa mu msinda wa Atene yakwamba Mlungu?

⁵ Ndumetume Paulo paŵaliji mu msinda wa Atene ku Greece, ŵayiweni kuti mumsindamo mwaliji milungu jakupanganyidwa jejinji soni kuti ŵandu ŵakulupililaga kuti milungujo ni jajapele umi soni jikusapa yakusosecela yawo. Yeleyo yamtendekasisye Paulo kuŵeceta kuti, “Mlungu juŵapanganyisye cilambo ni yindu yosope yayili mwelemo. . . . jwalakwe ni jwakusapa ŵandu wosope umi, lipuje soni yindu yosope. . . . Pakuŵa ligongo lya jwalakwe tukwete umi, tukusajendaga soni tupali.” (Mase. 17:24, 25, 28) Ligongo lyakuti Yehofa akusatunonyela akusatupa “yindu yosope” yakusosecela kuti tujendelecele kuŵa cijumi. Aganicisye yine mwa yindu yatupele Mlungu pakulosya kuti akusatunonyela.

6. Ana mwaŵacipanganyicisye cilambo capasi yikusalosya catuli kuti Yehofa akusatunonyela? (Alole ciwulili cacili kundanda kwa nganiji.)

⁶ Mwambone, aganicisye ya cilambo capasi cele Yehofa Mkupanganya “ŵacipelece kwa ŵanace ŵa ŵandu.” (Sal. 115:15, 16) Ŵasayansi ajonasile mbiya syejinji pakuwungunya mwipananga kuti alole naga kwana mapulaneti gane gakulandana ni cilambo capasi. Atamose kuti jemanjaji apatile mapulaneti gamajinji nambo pangali pulaneti jilijose jajikwete yindu yakamucisya kuti ŵandu aŵe cijumi mpela mwajiŵelele pulaneti ja cilambo capasi. Mlungu ŵacipanganyisye cilambo capasi mwapajika mnope. Yehofa ngakusagamba kutupa yindu yakusosecela kuti tuŵe cijumi nambo ŵatupelesoni cilambo capasi cakusalalaci soni cambone kutama kuti tusangalaleje ni umi. (Yes. 45:18) Yeleyi yikusalosya kuti Yehofa akusatunonyela mnope.—Aŵalanje Yobu 38:4, 7; Salimo 8:3-5.

7. Ana mwaŵatupanganyicisye Mlungu yikusalosya catuli kuti akusatunonyela?

⁷ Atamose kuti Yehofa ŵatupele cilamboci kuti tutamejemo nambope jwalakwe akusamanyilila kuti yindu yakucilupe ngaŵa mkutendekasya kuŵa ŵakusangalala. Mwanace akusasangalala naga acinangolo ŵakwe akusamnonyela soni kumsamalila. Yehofa ŵapanganyisye ŵandu m’ciwanicisyo cakwe, soni m’litala lyakuti  amanyilileje kuti jwalakwejo akusiŵanonyela soni kwasamalila. (Gen. 1:27) Konjecesya pelepa, Yesu ŵatite, “Ŵakusangalala ali ŵandu ŵakusamanyilila kulaga kwawo kwausimu.” (Mat. 5:3) Mpela Mtati jwacinonyelo, Yehofa ‘akusatupa mwakoloŵa makono yindu yakucilu soni yausimu kuti tusangalaleje.’—1 Tim. 6:17; Sal. 145:16.

8. Ligongo cici tukusasaka kuti Yehofa atujiganyeje?

⁸ Acatati akusiŵanonyela ŵanace ŵawo soni ŵangasaka kuti ŵanacewo asokonecele kapena kuti ŵane ŵalambusyeje. Nambo ligongo lyakuti acinangolo ŵajinji ŵangakuya yagakusasala Maloŵe ga Mlungu akusalepela kwalongolela cenene ŵanace ŵawo. Yakuyicisya yakwe, wosopewo akusaŵa ŵangasangalala soni akusatenguka. (Miy. 14:12) Nambo Yehofa ali “Mlungu jwa usyesyene.” (Sal. 31:5) Jwalakwe akusiŵanonyela mnope ŵanace ŵakwe, soni akusiŵalongololela ni lilanguka lya usyesyene mu yakutenda yawo yosope, mnopemnope pangani jakwayana ni kulambila. (Aŵalanje Salimo 43:3.) Ana Yehofa ajuwile usyesyene watuli, soni ana yeleyi yikulosya catuli kuti akusatunonyela?

9, 10. Ana Yehofa alosisye catuli kuti akusatunonyela pakujuwula usyesyene (a) wakwamba jwalakwejo? (b) wakwamba cakulinga cakwe?

⁹ Candanda, Yehofa ŵajuwile usyesyene wakwamba jwalakwejo. Jwalakwe ŵatusalile lina lyakwe lyalikusasimanikwa mnope m’Baibulo kupunda lina lililyose. Yeleyi yikamucisye kuti jwalakwejo atuŵandicile soni kuti tummanyilile. (Yak. 4:8) Yehofa akusatusalilasoni ya ndamo syakwe. Kupitila mu yakupanganyikwa, tukusamanyilila kuti jwalakwe ali Mlungu jwalunda soni jwamacili. Malemba gakusalosyasoni kuti Yehofa ali jwacilungamo soni kuti akusatunonyela mnope. (Alo. 1:20) Jwalakwe ali mtati jwamacili, jwalunda, jwacilungamo soni jwacinonyelo. Yeleyi yikusakamucisya kuti ŵanace ŵakwe aŵeje najo paunasi wambone.

¹⁰ Yehofa ajuwilesoni ya cakulinga cakwe. Jwalakwe akusatusalila kuti tuli mbali ja liŵasa lyakwe. Akusatusalilasoni yindu yatukusosekwa kutenda kuti tuŵeje ŵakamulana ni jwalijose jwa mwiŵasa mwakwemo. Baibulo jikusasala kuti Mlungu nganiŵapanganya ŵandu m’litala lyakuti alilamulileje jika. Soni jikusasala yakogoya yampaka yipagwe naga ŵandu akulilamulila jika. (Yer. 10:23) Yehofa ni jwampaka atukamucisye kuti yindu yitujendele cenene. Ni naga tukusamanyilila ukumu wa Mlungu, soni kumpikanilaga tuciŵa pamtendele soni ŵakusangalala. Kujuwula yindu yeleyi kukusalosya kuti Yehofa akusatunonyela mnope.

11. Ana cilanga capi ca Yehofa cacikusalosya kuti akusatunonyela soni akusatuganicisya?

¹¹ Mtati jwacinonyelo akusaganicisya mnope ya msogolo mwa ŵanace ŵakwe. Jwalakwe akusasaka kuti ŵanacewo caŵe ŵakusangalala. Nambo yakutesya canasa yili yakuti ŵandu ŵajinji ŵangamanyilila yindu yakwamba msogolo soni akusamalila ndaŵi jelewu ali mkutenda yindu yakuti ngaŵa mkwakamucisya kusyesyene. (Sal. 90:10) Nambo m’weji ŵanace ŵa Mlungu, tuli ŵakusangalala mnope ligongo Yehofa ŵatulagucisye ya msogolo mwambone mnope. Cilanga celeci cikusatukamucisya kuŵa ŵakusangalala mnope.

12. Ana camuko caŵampele Kaini soni Baluki calosisye catuli kuti Yehofa ŵanonyelaga?

¹² Yehofa paŵayiweni kuti Kaini atumbile mnope mwati akusaka kutenda cindu cakusakala nganagamba kumleka nambo ŵasacile kumkamucisya pakum’wusya kuti, “Ligongo cici mtumbile cati m’yiyi, soni ligongo cici ngope jenu jili jakugwa? Naga mkucenga ni kutenda yambone, ana une ngaŵa mkumnonyela?  . . . Ana mmwejo ngawugomeka [ulemwawo]?” (Gen. 4:6, 7) Cakutesya canasa caliji cakuti Kaini nganampikanila Mlungu ni ŵasimene ni yakusawusya ligongo lya ungapikanila wakwe. (Gen. 4:11-13) Ndaŵi jine, Baluki juŵaliji mlembela jwa Yelemiya ŵapesile soni kutenguka ni yakusakala yayatendekwaga pandaŵijo. M’yoyo Yehofa ŵamjamwice pakumkamucisya kuti amanyilile kuti ŵaganicisyaga mwakulemweceka soni akusosekwa kucenga. Mwakulekangana ni Kaini, Baluki ŵampikanile Yehofa ni jwakulupwisye umi wakwe.—Yer. 45:2-5.

13. Ana ŵakutumicila ŵakulupicika ŵa Yehofa ŵalijiganyisye cici paŵasimene ni yakusawusya?

¹³ Yehofa akusatulongolela soni kutujamuka ligongo lyakuti akusatunonyela. Jwalakwe akusatusalila yatukusosekwa kutenda kuti tujongolele yitendo yetu soni akusatujiganya. (Ahe. 12:6) M’Baibulo mwana yisyasyo ya ŵandu ŵakulupicika ŵele Mlungu ŵajiganyisye kuti aŵe ŵandu ŵambone. Mwambone, Yosefe, Mose soni Daudi ŵasimene ni yakusawusya. Yehofa nganiŵaleka jika pandaŵi jakusawusyajo. Soni yaŵalijiganyisye pandaŵijo yakamucisye pandaŵi jele Yehofa ŵapele ukumu wekulungwa. Patukuŵalanga yakusatenda Yehofa pakwakamucisya ŵandu ŵakwe pasimene ni yakusawusya tukusayiwona kuti Yehofa akusatunonyela mnope.—Aŵalanje Miyambo 3:11, 12.

14. Patulemwisye, ana Yehofa akusalosya catuli kuti akusatunonyela?

¹⁴ Atamose patutesile cakulemweceka Yehofa akusatunonyelape. Naga tukundile camuko catupele ni kupitikuka mtima, jwalakwe ‘cacitukululucila kwa mnope.’ (Yes. 55:7) Ana yeleyi yigopolela cici? Maloŵe ga Daudi gakwamba mwakusatukululucila Yehofa gakusalosya kuti jwalakwe ali Atati ŵacinonyelo. Daudi  ŵatite, “Jwalakwe akumkululucila yakulemwa yenu yosope soni akuposya ulwele wenu wosope. Akuwombola umi wenu kwicenje. Jwalakwe akum’weka cinonyelo cangamala, soni canasa mpela cisoti ca ucimwene. Mpela mwayiŵelele kuti kungopoko lyuŵa kuli kwakutalikangana ni kungapilo lyuŵa, m’yoyosoni jwalakwe atuŵisile kwakutalikangana ni yakulemwa yetu.” (Sal. 103:3, 4, 12) Kwende ndaŵi syosyope tupikanileje camuko ca Yehofa soni kutendapo kandu mwacitema tuli mkumanyilila kuti camukoco cili litala limo lyakulosya kuti jwalakwe akusatunonyela mnope.—Sal. 30:5.

15. Ana cici cacikusalosya kuti Yehofa akusiŵawona ŵandu ŵakwe kuŵa ŵakusosekwa mnope?

¹⁵ Mtati jwacinonyelo akusalicenjela mnope liŵasa lyakwe ku yindu yakogoya. Yehofa, jwali Atati ŵetu ŵakwinani akusatucenjelasoni. Pakwamba ya Yehofa jwamalumbo ŵatite, “Jwalakwejo akusunga umi wa ŵandu ŵakusiŵanonyela. Akwakulupusya m’miyala mwa ŵakusakala.” (Sal. 97:10) Mpela mwakusagawonela meso gawo kuŵa gakusosekwa mnope, Yehofa akusiŵawonasoni ŵandu ŵakwe kuŵa ŵakusosekwa mnope.—Aŵalanje Zekariya 2:8.

16, 17. Ana Yehofa aŵele ali mkwacenjela catuli ŵandu ŵakwe atamose mundaŵi jetu jino?

¹⁶ Yehofa akusiŵacenjela ŵandu ŵakwe kupitila mwa malayika. (Sal 91:11) Mwambone, lilayika limo lyacenjele msinda wa Yelusalemu palyawuleje asilikali 185,000 ŵa Asuli cilo cimo. (2 Maf. 19:35) Malayika gakulupwisye ndumetume Petulo ni Paulo soni ŵane kundende. (Mase. 5:18-20; 12:6-11) Moŵa aganosoni Yehofa akwendelecelape kwakamucisya ŵandu ŵakwe. Mwambone, jwakwimila likulu lyetu jwine jwapite kukunguluka ku nyambi jine ku Africa. M’cilamboco mwana ungapikangana pangani sya ndale soni sya dini yayikutendekasya kuti muŵe cisokonasyo mnope. Kuputana, wiyi, kamulilana, soni kuwulagana kukutendakasya kuti yindu yisakale mnope m’cilambomo. Cakusangalasya cili cakuti pangali m’bale kapena mlongo jwawile ligongo lya yeleyi nambo ŵajinji ajasile ndundu syawo soni masengo. Paŵawusiye abalewo kuti asale mwakupikanila mu mtima, jwalijose ŵajanjile ali mkumwemwetela kuti, “Yosope yili cenene, tukum’yamicila mnope Yehofa.” Jemanjaji akuyiwona kuti Yehofa akusanonyela mnope.

¹⁷ Ndaŵi sine Yehofa akusakunda kuti acimmagongo ŵakwe awulaje ŵandu ŵakwe ŵakulupicika mpela yayamtendecele Sitefano. Nambope, Mlungu akusiŵacenjela ŵandu ŵakwe pakwakalamusya ya yitega ya Satana. (Aef. 6:10-12) Yehofa akusatukalamusya kupitila m’Maloŵe gakwe soni m’mabuku gakusala ya m’Baibulo galikusakoposya likuga. Mwambone, tukusalijiganyamo ya kogoya kwa Intaneti, kunonyela mbiya soni kulolela kapena kuŵalanga yindu yakusakala ni yakuwulasyana. Kusala yisyene, mpela Mtati jwacinonyelo, Yehofa akusatunonyela soni akusasacilila kutucenjela.

18. Ana akusapikana wuli mumtima ligongo lya cinonyelo ca Yehofa?

¹⁸ Patugaweni matala gakuŵalanjikape gakusatulocesya Yehofa cinonyelo cakwe, yitutendekasisye kupikana mumtima mpela muŵapikanile Mose. Paŵaganicisyaga ya ndaŵi josope jaŵaŵele ali mkutumicila Yehofa, Mose ŵatite, “Kundaŵi atugumbasye ni cinonyelo cawo, kuti tugumile mwakusangalala soni kuti tusangalaleje masiku gosope ga umi wetu.” (Sal. 90:14) Kumanyilila cenene yakusatenda Yehofa pakutulosya cinonyelo uli upile wekulungwa mnope watukwete apanopano. Tukusaŵeceta maloŵe mpela gaŵaŵecete ndumetume Yohane gakuti, “Aganicisye ya cinonyelo cekulungwa catulosisye Atati!”—1 Yoh. 3:1.