1, 2. Ana ŵandu ŵane akusaganisya yatuli pakwamba ya Mlungu?

ŴANDU ŵajinji akusaganisya kuti Mlungu jwangayikosya yakusatenda jemanjajo. Akusakulupilila kuti Mlungu ngakusasamala kandu pa yindu yayikwatendecela ŵandu. Mwambone, panyuma pakuti cimbungo cakogoya cijonasile mbali jekulungwa ja cilambo ca Philippines mu November 2013, jwamkulungwa jwa msinda wine ŵatite, “Komboleka kuti pandaŵiji Mlungu ŵaliji ali atyosile.”

² Ŵandu ŵane akusaganisya kuti Mlungu ngaŵa mkuyiwona yakutenda jemanjajo. (Yes. 26:10, 11; 3 Yoh. 11) Jemanjaji ali mpela ŵandu ŵele ndumetume Paulo ŵasasile kuti, ‘Nganasaka kummanyilila yisyesyene Mlungu.’ Ŵandu ŵeleŵa ‘ŵagumbelwe ni yangalungama, yangalumbana, kutunduka, soni kusakala.’—Alo. 1:28, 29.

3. (a) Ana tukusosekwa kuliwusya yiwusyo yapi yakwamba Mlungu? (b) Ana Baibulo pajikusala ya “ligasa” lya Mlungu jikusagopolela cici?

³ Nambi wuli m’weji? Mwakulekangana ni ŵandu ŵatwakolasile penanipa, m’weji tukusamanyilila kuti Yehofa akusalola cilicose catukusatenda. Nambo ana tukusaliwona ligasa lyakwe lili mkutukamucisya? Ana tuli m’likuga lya ŵandu ŵele Yesu ŵasasile kuti “cacim’wona Mlungu”? (Mat. 5:8) Ana mpaka tum’wone catuli Mlungu? Kwende candanda tulole yisyasyo ya m’Baibulo ya ŵandu ŵaŵaliweni ligasa lya Mlungu soni  ŵane ŵaŵakanile kuliwona. Kaneko citulijiganye mwampaka cikulupi citukamucisye kuliwona ligasa lya Yehofa lili mkutukamucisya. Patukulijiganya yeleyi, akumbucileje kuti ndaŵi syejinji Baibulo jikusasala ya “ligasa” lya Mlungu pagopolela macili gakwe, gakusagakamulicisya masengo pakwakamucisya ŵakutumicila ŵakwe soni pagomeka acimmagongo ŵakwe.—Aŵalanje Deuteronomo 26:8.

4. Ligongo cici acimmagongo ŵa Ayisalayeli ŵalepele kuliwona ligasa lya Mlungu?

⁴ Mu ndaŵi ja Ayisalayeli, ŵandu ŵajinji ŵakolaga upile wakulola soni kupikana yaŵatendaga Mlungu pakwakamucisya Ayisalayeli. Yehofa ŵakulupisye mwakusimonjesya ŵandu ŵakweŵa kutyocela ku Iguputo, soni ŵakamucisye kugomeka mayimwene gakulekanganalekangana. (Yos. 9:3, 9, 10) Mayimwene gane gagaliji kungapilo lyuŵa kwa Yolodani gapikene soni kulola yaŵatesile Yehofayi, nambope “gasongangenye pamo makuga gawo ga ngondo kuti gaputane ni Yoswa soni Ayisalayeli.” (Yos. 9:1, 2) Atamose pagatandite kuputana ni Ayisalayeli, mayimwenega gayiweni kuti ligasa lya Mlungu lyaliji mkwakamucisya Ayisalayeliwo. Ni macili ga Yehofa, “lyuŵa lyajimi, soni lwesi lwajimi mpaka pele mtunduwo wagomece acimmagongo ŵakwe wosope.” (Yos. 10:13) Nambo Yehofa ‘ŵakundile kuti [acimmagongo] ŵawo ajumusye mitima jawo kuti apute ngondo ni Ayisalayeli.’ (Yos. 11:20) Acimmagongo ŵa Ayisalayeli nganasaka kwiticisya kuti Mlungu ni jwakwaputila ngondo Ayisalayeliwo, mwati yeleyi yatendekasisye kuti ŵagomece.

5. Ana Mwenye Ahabu nganasaka kulupilila cici?

⁵ Mkupita kwa ndaŵi, Mwenye Ahabu juŵaliji jwakusakala ŵakwete upile wakuliwona ligasa lya Yehofa mu yakutendekwa yejinji. Eliya ŵamsalile jwalakwe kuti, “Ngakugwa mangame kapena wula yaka yikwisayi akaŵe naga une ngulamula.” (1 Maf. 17:1) Yeleyi yikakombolece ni ligasa lya Yehofape, nambope Ahabu nganasaka kuyikulupilila. Ndaŵi jinesoni, Eliya ŵapopesile kwa Yehofa, soni jwalakwe ŵamjanjile mwakutumisya moto wawatinisye mbopesi jakwe. Ahabu ŵayiweni yosopeyi. Eliya ŵalosisyesoni kuti Yehofa cayikasye wula paŵamsalile Ahabu kuti, “mseselece kuti wula jikamsimanila.” (1 Maf. 18:22-45) Ahabu ŵayiweni yosopeyi yili mkutendekwa nambo nganasaka kwiticisya kuti yatendekwaga ni macili ga Yehofa. Yisyasyo yeleyi soni yakuyicisya yikutujiganya kuti tukusosekwa tumanyilileje pandaŵi jele ligasa lya Yehofa likutenda yindu yekulungwa.

6, 7. Ana Agibeoni soni Lahabu ŵalosisye catuli kuti ŵaliweni ligasa lya Yehofa?

⁶ Nambope, pana ŵandu ŵane ŵaŵaliweni ligasa lya Mlungu, atamose kuti nombenawo ŵaliji mu ndamo jakulandana ni ja mayimwene gakusakala gatugakolasile mwinanimu. Mwambone, mwakulekangana ni mitundu jine josope jajaputene ngondo ni Ayisalayeli mu ndaŵi ja Yoswa, Agibeoni ŵasagwile yakuti aŵe pa mtendele ni Ayisalayeli. Ligongo cici? Jemanjajo ŵatite, “Acikapolo ŵawowe . . . tuyice ligongo lyakuti tupikene ya lina lya Yehofa Mlungu jwawo. Tupikene ya mbili jakwe soni yosope yatesile.” (Yos. 9:3, 9, 10) Jemanjaji ŵamanyilile kuti Mlungu jwakuwona ni juŵakamucisyaga Ayisalayeli.

⁷ Lahabu ŵaliwenisoni ligasa lya Yehofa pa yindu yayatendekwe mu ndaŵi jakwe. Paŵapikene yaŵatesile Yehofa pakwakulupusya ŵandu ŵakwe, jwalakwe ŵasalile ŵakusonda ŵaŵili ŵa Ciyisalayeli kuti, “Ngumanyilila kuti Yehofa ciŵape cilamboci.” Atamose kuti jwalakwe ŵamanyililaga kuti yaŵatesileyi yaliji yakuŵika umi wakwe pangosi, nambo ŵakulupililaga kuti Yehofa mpaka amkulupusye jwalakwe ni liŵasa lyakwe.—Yos. 2:9-13; 4:23, 24.

8. Ana Ayisalayeli ŵane ŵaliweni catuli ligasa lya Mlungu?

⁸ Mwakulekangana ni Ahabu juŵaliji mwenye jwakusakala, Ayisalayeli ŵane ŵaŵawuweni moto uli mkutyocela kwinani, ŵamanyilile kuti Yehofa  ni juŵatesile yeleyo. Paŵawuweni motowo wuli mkutinisya mbopesi ja Eliya, jemanjajo ŵatite, “Yehofa ali Mlungu jwakuwona!” (1 Maf. 18:39) Jemanjaji ŵasimicisye mnope kuti ŵaliweni ligasa lya Yehofa.

9. Ana mpaka tuliwone catuli ligasa lya Yehofa moŵa agano?

⁹ Yisyasyo yambone soni yakusakala yatulijiganyisyeyi yikutukamucisya kumanyilila gopolela kwa kum’wona Mlungu kapena kuliwona ligasa lyakwe lili mkukamula masengo. Patummanyilile cenene Mlungu soni ndamo syakwe, tukusaliwonasoni ligasa lyakwe ni ‘meso ga mtima wetu.’ (Aef. 1:18) Tukusacilila kuŵa mpela ŵandu ŵaŵaliweni ligasa lya Yehofa lili mkwakamucisya ŵandu ŵakwe. Nambope, ana tukwete maumboni gakulosya kuti Mlungu akwakamucisya ŵandu ŵakwe moŵa agano?

10. Ana pana umboni watuli wakulosya kuti Yehofa akwakamucisya ŵandu moŵa agano? (Alole ciwulili cacili kundanda kwa nganiji.)

¹⁰ Tukwete magongo gejinji gakututendekasya kulupilila kuti Yehofa akwendelecela kwakamucisya ŵandu. Ndaŵi ni katema, tukusapikana ya ŵandu ŵele Mlungu ŵajanjile mapopelo gawo panyuma pakum’ŵenda kuti ŵakamucisye. (Sal. 53:2) Mwambone, Allan paŵalalicilaga ku nyumba ni nyumba pa cilumba cine ku Philippines, ŵasimene ni jwamkongwe jwine juŵatandite kulila. Allan ŵatite, “Kundaŵi kwa lisikulyo jwamkongwejo ŵapopelaga kwa Yehofa kuti Mboni syakwe simjawulile. Paŵaliji jwacinyamata, ŵalijiganyaga Baibulo ni ŵa Mboni nambo ŵalesile paŵalombegwe ni kusamila ku cilumbaco. Mlungu ŵajanjile lipopelo lyakwe mwacitema mwati yeleyi yamlimbikasisye mnope.” Mkanicimale caka, jwalakwe ŵalipelece kwa Yehofa.

11, 12. (a) Ana Yehofa akwakamucisya ŵakutumicila ŵakwe m’matala gapi? (b) Alondesye yaŵatesile Yehofa pakumkamucisya mlongo jwine.

¹¹ Ŵakutumicila ŵa Yehofa ŵajinji awuweni umboni wakuti Yehofa akwakamucisya ligongo lyakuti akombwele kumalana ni yisyoŵe yakusakala mpela kwemba sona, kamulicisya masengo mtela wakusokonasya mtwe, soni kulolela yakuŵagula. Ŵane ŵatite ŵalinjile mwakuwilisyawilisya kuleka yisyoŵeyi ni macili gawo nambo ŵalepelaga. Nambope, paŵam’ŵendile Yehofa kuti ŵakamucisye, jwalakwe ŵapele “macili gakupunda gacipagwa,” mwati ŵakombwele kumalana nayo.—2 Akoli. 4:7; Sal. 37:23, 24.

¹² Yehofa aŵele ali mkwakamucisya ŵakutumicila ŵakwe ŵajinji kuti akombole kupilila yakusawusya yakusimana nayo. Mwambone, mlongo jwine lina lyakwe Amy ŵasimanaga ni yakusawusya yine paŵamtumisye ku kacilumba kane kuti akakamucisye pa masengo gakutaŵa Nyumba ja Ucimwene soni nyumba ja amishonale. Jwalakwe ŵatite, “Twatamaga m’kahotelo kamwana, soni lisiku lililyose pakwawula ku malo gakamulila masengo twajendaga m’misewu mumwagumbalaga mesi.” Ŵasosekwagasoni kusyoŵelela ndamo syakumaloko, soni kusoŵa kwa magesi ni mesi. Amy ŵajonjecesye kuti, “Yindu yasakele mnope lisiku line panam’ŵecetele mwakupya mtima mlongo jwine jutwakamulaga najo masengo. Napite kunatamaga ndili mkulipikana mpela jwakulepela. Panaliji m’cipinda cangu mumwaliji cipi, napopesile kwa Yehofa ni mtima wosope kuti angamucisye.” Magesi pagakolele, Amy ŵajigele Sanja ja Mlonda jajakwete ngani jakusala yakutendekwa ya pakumalisya majiganyo ga ku Gileadi. Sanjaji jasasile yindu yosope yaŵalagaga nayo jwalakwejo mpela, ndamo syasambano, kukusoŵa kumangwawo, soni kutama ni ŵandu ŵasambano. Amy ŵatite, “Nayiweni mpela kuti Yehofa aŵeceteje ni unejo cilo celeco. Yeleyi yalimbikasisye kuti njendelecele kamula masengo gangu.”—Sal. 44:25, 26; Yes. 41:10, 13.

13. Ana pana umboni watuli wakulosya kuti Yehofa akwakamucisya ŵandu ŵakwe ‘kuŵicila kunyuma soni kutamilikasya mwalilamusi’ masengo gakulalicila ngani syambone?

¹³ Yehofa akwakamucisyasoni ŵandu ŵakwe  ‘kuŵicila kunyuma soni kutamilikasya mwalilamusi’ masengo gakulalicila ngani syambone. (Afi. 1:7) Maboma gane galinjilelinjile kumasya masengo gakulalicila, nambope twakombwele kuliŵicila kunyuma m’maluŵala ga magambo. Mwambone, kutandila mu 2000, tupundile magambo ciŵandika 268 ku nganya syekulungwakulungwa. Magambo 24 pa magamboga twapundile ku nganya jakulola ya ufulu wa ŵandu ku Europe. Kusala yisyene, pangali mundu jwampaka alilekasye ligasa lya Yehofa kutenda yindu yekulungwa.—Yes. 54:17; aŵalanje Yesaya 59:1.

14. Ana ligasa lya Mlungu likutukamucisya catuli pamasengo gakulalicila soni pa mkamulano watukusangalala nawo m’likuga lyakwe?

¹⁴ Masengo gakulalicila ngani syambone pacilambo cosope gakukomboleka ligongo lya cikamucisyo ca Yehofa. (Mat. 24:14; Mase. 1:8) Yehofa akwakamucisyasoni ŵandu ŵakwe pacilambo cosope kuŵa ŵakamulana. Mkamulano watukwetewu wuli wapajika mnope, mwati ŵandu ŵangalambila Yehofa akusasala kuti, “Yisyene Mlungu ali pasikati pa jemanja.” (1 Akoli. 14:25) M’yoyo, tukwete magongo gejinji gakututendekasya kulupilila kuti Mlungu akwakamucisya ŵandu ŵakwe mpela likuga. (Aŵalanje Yesaya 66:14.) Nambi wuli wawojo pajika? Ana akusaliwona ligasa lya Yehofa lili mkwakamucisya?

15. Ligongo cici ndaŵi sine mpaka tulepele kuliwona ligasa lya Yehofa lili mkutukamucisya?

¹⁵ Ndaŵi sine mpaka tulepele kuliwona ligasa lya Yehofa lili mkutukamucisya. Mwambone, patusimene ni yakusawusya yejinji, mpaka tuliŵalile yindu yejinji yatutendele Yehofa pakutukamucisya. Yeleyi ni yayamtendecele jwakulocesya Eliya. Jwalakwe ŵaliji jwakulimba mtima, nambo pandaŵi jele Yesebele, ŵamkwakwe Mwenye Ahabu ŵasakaga kum’wulaga, Eliya ŵaliŵalile yosope yaŵamtendele Mlungu. Baibulo jikusasala kuti Eliya ‘ŵaŵendile kuti agambe kuwa.’ (1 Maf. 19:1-4) Ana cici cacikamkamucisye Eliya pandaŵiji? Jwalakwe ŵasosekwaga kwegamila kwa Yehofa.—1 Maf. 19:14-18.

16. Ana tukusosekwa kutenda cici kuti tum’woneje Mlungu mpela muŵatendele Yobu?

¹⁶ Yobu ŵaganicisyaga mnope ya yakusawusya  yaŵasimanaga nayo mwati nganakombola kulola yindu mwaŵayiwonelaga Mlungu. (Yobu 42:3-6) Ndaŵi sine m’wejisoni mpaka yitusawusye kum’wona Mlungu ligongo lya yakusawusya yetu. Nambo, ana cici campaka citukamucisye kulola yindu yakusatutendela Mlungu? Tukusosekwa kuganicisya mwakusokoka yajikusasala Baibulo pakwamba ya yakusawusya yatukusimana nayo. Kumanyilila yakusatenda Yehofa pakutukamucisya, mpaka kutukamucisye kuti tumjegamileje mnope jwalakwe. Soni mpela Yobu tucikomboleka kusala kuti, “Nagambaga kupikana ya ŵalakwe, nambo sambano meso gangu gaweni.”

17, 18. (a) Ana yakutendekwa yapi yampaka yitukamucisye kulola kuti Yehofa akutukamucisya? (b) Asale cisyasyo cacikulosya kuti Mlungu akutukamucisya moŵa agano.

¹⁷ Ana mpaka tuliwone catuli ligasa lya Yehofa? Kwende tulole yisyasyo yine. Candanda, mwine mpaka ayiwoneje kuti Yehofa ŵakamucisye wawojo kuti alijiganye usyesyene. Ana pakwete papite ku misongano ja Ciklistu ni kupikanila ngani, kaneko ni kusala kuti, “Ngani jeleji jili jaune”? Kombolekasoni kuti ndaŵi jine ŵayiweni kuti Mlungu ŵajanjile lipopelo lyawo. Ndaŵi jine kombolekasoni kuti ŵaganisisye ya konjecesya undumetume wawo ni kaneko ŵayiweni kuti Yehofa ŵakamucisye kwanilisya cakulinga cawoci. Mwinesoni ŵalesile masengo gaŵakamulaga pakusaka kuti akoleje ndaŵi jejinji jakumtumicila Yehofa kaneko ni kulola Mlungu ali mkwanilisya cilanga cakwe cakuti, ‘Ngasinamleka ata panandi.’ (Ahe. 13:5) Naga tukuŵa mesope mwausimu, mpaka tukombolece kulola kuti Yehofa akutukamucisya m’matala gejinji.

¹⁸ Mlongo jwine jwa ku Kenya lina lyakwe Sarah, ŵasasile kuti, “Napopesile kwa Mlungu pakwamba ya mundu junalijiganyaga najo Baibulo. Munduju ŵawonekaga mpela kuti ngakusangalala ni lijiganyolyo. Nam’ŵendile Yehofa kuti angamucisye kulola naga ngusosekwa kuleka kulijiganya najo. Panagambile kumalisya kupopelako, foni jangu jatandite kulila. Mundu junalijiganyaga najo Baibulo jula ŵanjimbile kuti ambusye naga yili yakomboleka kwawula ku misongano ni uneji. Nasimonjile kwabasi!” Naga tukulingalinga kulola yakututendela Yehofa, tuciyiwona kuti jwalakwe akutukamucisya mnope. Mlongo jwine jwa ku Asia lina lyakwe Rhonna, ŵatite, “Pakusasosekwa mtawu kuti tumanyilile yakututendela Yehofa. Nambo patumanyilile tukusasimonga kulola kuti jwalakwe akutukamucisya mnope.”

19. Ana tukusasosekwasoni kutenda cici kuti tuŵe m’likuga lya ŵandu ŵakusam’wona Mlungu?

¹⁹ Yesu ŵasasile kuti, “Ŵakusangalala ali ŵandu ŵaswela mtima, ligongo tacim’wona Mlungu.” (Mat. 5:8) Ana mpaka tutende yatuli kuti tuŵe “ŵaswela mtima”? Tukusosekwa kuganicisyaga yindu yeswela soni kuleka kutenda cakusakala cilicose. (Aŵalanje 2 Akolinto 4:2.) Patukwendelecela kulimbisya unasi wetu ni Mlungu soni kola ndamo syambone, tukusaliŵika m’likuga lya ŵandu ŵakusam’wona Mlungu. Mu ngani jakuyicisya citulijiganye mwampaka cikulupi citukamucisye kulola mkono wa Yehofa pa umi wetu.